Lúkas 7
7
Jesus makniwa pahavwi suwtat gibuk
Mt 8.5
1Pisenwa gawnan ta gitkis ignes hiyeg, ig Kiyavwiye Jesus tivik. Ig danuh atere arit paytwempu Kafarnawh.
2Pahavwi romayene suwtat gikivarakis ayge ig kadahan pahavwi gibuk gibetki. Ner gibuk kakahrip ig me miyapmet.
3Ig timap Kiyavwiye Jesus gak. Ayteke nikwe ig awahkise gaytakkis judeyenevwi giwewkistenkis atere gimin adahan igkisme amnihswa git marihwa ig ayta makniwa gibuk gidahan.
4Igkis tivik, igkis danuh atere, igkis amnihswe git Kiyavwiye Jesus akak madikte giwakemnikis. Igkis awna git:
— Uya amnih ner suwtat gikivarakis. Ig muwaka adahan pis amnihgi. Ig kibeyne hiyeg.
5Ig batek ukakwiy wixwiy hiyeg judeyenevwi. Ig kuwis kehkis paha payt leglis udahanwiy.
6gme Kiyavwiye Jesus timapni hene, ig tivik gikakkis. Kennesmin gidawnan arimkanit givin, ner suwtat gikivarakis awahkise gikagmadavu atere gimin. Igkisme danuh atere, igkis awna git:
— Kiyavwiye, ner suwtat gikivarakis wasavanaw pimin. Giwn ku ig ka muwaka adahan ig mpithebdih pihawkan. Ig awna ku ig patehwevye hiyeg. Ig yuma gikiytanisima pitivut adahan pis parak givinekut. 7Ine ig ka kis ayta kinetihwa pikak. Kiyavwiye, ig hiyak ku pis karayt akivara. Ku pis he awnevi aytontak piyawakad, ikeyvi. Gibuk makniwnek. 8Ig hiyakni mmanawa ig hawata ig kakivara. Ig kumaduka nawenyevwi suwtat akiw hawata. Ku ig awna ta git pahavwi: “Su tivik”, igme iha giwn ig tivik. Ku ig awna ta git pahavwiwa akiw: “Ba ayta”, igme iha giwn ig ayta. Ku ig kawatni gibuk, igme hawata ig iha giwn. Henewatbaki ig suwtat gikivarakis awna.
9Ig Kiyavwiye Jesus timapni inakni giwnkis hene, ig wakaymni ka aynsima. Ig wagestaw, ig awna ta gitkis neras ku pariye kane aynsima gihavu butte. Giwn:
— Ner suwtat kane izhaewyenema ig pi kamaxwate ta nuvitit mpiya madikte nukebyuvwi izhaewyenevwi. Nah ka hiyapti pahavwinema izhaewyene gikamaxwan kema nerma. Ihanabay inakni nuwnuh. Henewatbaki in.
Ayteke ig awna ta gitkis ner suwtat gikivarakis giwatnivwi. Giwn:
— Hiyawa yis diyuhe git.
10Ayteke nikwe igkis diyuhe git. Igkis danuh atere givinekut, igkis ute gibuk makniw kuwis.
Jesus kannikasa pahavu madankuno gukamkayh
11Hewke nikwe ig Kiyavwiye Jesus tivik avitite paha paytwempu kewye Nayh gikakkis gikannuhnivwi. Ka aynsima hiyeg akiw tivikwiye gihaptikis.
12Igkis danuh atere kennesa anumekut ini paytwempu alapota, ig sarayh givegi, ig hiyap pahabu hiyeg. Igkis avuhekwiyevwi. Igkis avuhpiye pahavwi awayg miyaviye. Ig pahavu madankuno gukamkayh, ig pahavwiwatnen. Ka aynsima hiyeg paytwempuyenevwi ayge gukak. Eg tihano ka aynsima.
13Ig Kiyavwiye Jesus hiyapni hene, ig ka aynsima kayah gudahan. Ig awna gut:
— Ka muwaka tih.
14Ayteke ig danukwa kennesa arimkat ner awayg gitiy, ig dax ini gitiy. Igkisme ku pariye gihiyetnivwi igkis misekwe. Ayteke ig Kiyavwiye Jesus awna:
— Awayg, nah awna pit. Kannikaw.
15Aynewa ig awayg kannikew, ig kavusa awna. Ayteke ig Kiyavwiye Jesus ekkevgi ta gut ginag.
16Madikte hiyeg hiyapni hene, igkis avisasew. Igkis kibeyhenes Uhokri. Igkis awna:
— Kibeyne. Pahavwi Uhokri gawneve kuwis kahayak ubetwiy. Kuri Uhokri parak abet uhawkanwiy wixwiy gihiyegavu.
17Aynewa inakni inetit gidahan Kiyavwiye Jesus ibekhewvi muwapuw avit Judeyamnaw hawata muwapuw aranwew madikte waxri ku pariye ahumwa.
Joawh Batista aya Jesus: “Mmah pisnewa?”
Mt 11.2
18Avim ini Joawh Batista gikannuhnivwi igkis akka git madikte ku pariye Kiyavwiye Jesus gikehni. Ig Joawh Batista timapni hene, ig humeke piyana gikebikis gikannuhnivwi ta gimkat.
19Igkisme danuh atere, igme awna gitkis:
— Su yi iwasa Kiyavwiye Jesus baki ignewatma ner ku pariye nehmnikuhpiye nuhavuh butte. Ba kawk, ba wixwiy wahap pahavwi nawenyewa ku pariye nehmnikuhpiye nuhavuh butte akiw?
20Igkisme tivik nikwe, igkis danuh atere git Kiyavwiye Jesus. Igkis awna git:
— Joawh Batista awahkise usuh atan pimin, Kiyavwiye. Ig hiyak ku pahavwi nehmnikuhpiye gihavu butte. Kame pisnema aytniye? Ba kawk? Ba usuh wahap pahavwi nawenyewa ku pariye nehmnikuhpiye gihavu butte akiw?
Henewatbaki igkis awna git.
21 Abetnewa ini hawkri ku samah igkis ayge ig Kiyavwiye Jesus piyihe ka aynsima hiyeg kakahribdavye, ig mpiyasa gikayhawnikis, ig pekkis wavitye givititakkis hiyeg, ig keh ka aynsima motavye hiyap.
22Pisenwa ig kaytwa giwnkis:
— Hiyawa yis diyuhe akka git Joawh Batista ini annut ku pariye yis timap ku pariye yis hiyap ku avim inin. Yis hiyap motavye hiyap, miyavuvye wew. Yis hiyap hiyeg axpusakare avit busukne ignes miyvit. Yis hiyap mataybavye timap. Yis hiyap miyaravye kannikaw. Yis hiyap hiyeg ku pariye kane hiyak kabayka, ku avim inin ignes ekkepka kabayka gitkis.
23Ku pariye hiyeg ka tukuhun ignes uti kabayka nuwntaknek.
Jesus kabayha Joawh Batista
Mt 11.7
24Igkis Joawh Batista giwatnivwi timapni hene, igkis diyuhe gimkat. Igkis tivikanten, ig Kiyavwiye Jesus awna ta gitkis neras hiyeg kabubuknene ayge. Ig kinetihwa gimin Joawh Batista. Ig awna:
— Yis kuwis atak iwasa Joawh Batista ta amadgat amatap. Ku samah yis atere, mmahpa yivewkan yis utivgi ayge? Mmah yivewkankama ku yis utivgi yuma gidatni ke pahat sivavabe wiwiwh abet kamaygviye? Kawa. Yis hiyak ku ig ka wagekiswa gimun. 25Mmahpa yivewkan yis utivgi ayge? Mmah yivewkankama ku yis utivgi akak gisimsa kibeyne mitibete? Kawa. Hiyeg ku pariye kasimsavu mitibete ku pariye igisavye ignes ka misakwa amadga amatap. Igkis misakwa ariku ikivarat givin barewyewatnene. 26Ba yivewkan ku yis utivgi Uhokri gawneve ayge? Henewa. Ignewa Uhokri gawneve yis uti. Heneme ig mpiybeta Uhokri gawnevevu pitatyevwi mmanawa ig ekkene ku Uhokri gikumadukan kuwis ahawkanavrik. 27Mmanawa ig Joawh Batista ignewa ku kamin Uhokri gannasan kinetihwa. Inakni gannasan akka wot ku pariye Uhokri awna ta git gikamkayh. Giwn:
“Nah awahkiste pahavwi nuwatni pavitkiya adahan ig ahegbetene madikte pavit.”
Henewatbaki inakni iwit awna gimin Joawh Batista. 28Yuma pahavwinema awayg wayvuka amadga inin kabaytema giw. Heneme pahavwi ku pariye kuwis kawih Uhokri gikumadukan igi pi kabayte giw Joawh Batista. Hiyawa ig pahavwi yuma gikiytani giwtrikkis hiyeg amedgenevwi inin heneme ig pi kabayte giw mmanawa ginetni pi kabayte akiw. 29Igme Joawh Batista ginetni kabayntiwa. Kibeyne, madikte hiyeg ataybiswa git Joawh Batista, he ladwan igkis ataybiswa git. Igkis ameve inakni Uhokri gihiyekemni waditnene, mmanawa igkis kaywasew ta git Joawh Batista. 30Igkisme neras farizewkis gikakkis neras kannuhekevutnevwi amin amekene Moís gikumadukan igkis tukuhe ku pariye Uhokri ikiswanaw gidahankis, mmanawa igkis ka kaywasaw ta git Joawh Batista.
Hiyeg ka amevekere ine Joawh Batista ine Jesus
Mt 11.16
31Ayteke ig Kiyavwiye Jesus awna akiw. Giwn:
— Mmah nuwnuh kuri adahan nah akki yit ku samah hiyeg gihiyekemnikis amadgayavu inin? Mmahpa gihiyekemnikis?
32Gihiyekemnikis kewa bakimnayhbe nopsanyumni gihiyekemnikis. Nah akkite yit abektey akak ku bakimnayh arehwene ay amadga higiw. Ig Uhokri humaw kewa bakimnayhbe ku pariye wakaymni giminkis gidahewektenkis. Igkis bakimnayh kabiman gitkis gidahewektenkis. Igkis awna gitkis: “Usuh agighene usuh kayepne yisme ka kaykere ukakuh, yis ka batekere payak ukakuh. Ayteke nikwe usuh wages warehwan adahan avuhekwiye usuh tihene. Yisme kawnata tihkere payak ukakuh. Mmahki yis ka amevekere uhiyekemni?” Ihanabay inakni nuwnuh. Henewatbaki ig Uhokri. Hiyeg amadgaya inin ka amevekere pahavwinema Uhokri giwatni ku pariye gawahkisni giminkis.
33Mmanawa ig Joawh Batista danuh atan, ig maxhewne ig ka higap win. Ignesme hiyeg ka amavig. Igkis awna: “Ig wavitye givit.”
34 Nahme nah ku pariye wageswe awayg amadgaya inin, nah danuh atan nah ka henema. Nah ka maxhaw, nah higap win. Heneme kawnata hiyeg amavan. Igkis awna: “Ka ba yis hiyap ner awayg kayhpiye kahigvekevye? Ig gibetki darihwak gikakkis ladwan hawata gikakkis hiyeg kane kibeynevwima akiw. Ig kawnata kibeynema.”
35 Ka sam igkis awna numinuh hene. Ku pariye hiyeg hiyeknevwi hiyakemniki ignesnewa ka mahikoh Uhokri gihiyekemni ignes amavinek.
Pahavu tino imiha Jesus
36Ayteke ariwnteke ini pahavwi farisew danuh atere. Ig awna git Kiyavwiye Jesus:
— Uya atak ax nukakuh kuwewanek.
Igme Kiyavwiye Jesus ihe giwn. Ig tivik atere givinekut. Ig danuh atere, ig batahkiswe ahumwa axtet.
37Ayge avit ini paytwempu pahavu tino powkemnivyo. Eg time Kiyavwiye Jesus gak ku ig ayge axne gimun ner farisew. Eg hiyapni hene, eg iwe imihgi ariku paha atiy kehka tip seyno, eg tivik. Eg danuh atere git Kiyavwiye Jesus.
38Eg paberetusaw ta gikimpurit. Eg biyuk gukan, eg suke gukantak ayge. Ig Kiyavwiye Jesus gikugku sabapti awaku nor tino gukantak. Ayge eg manpusano gikugku akak gusemni, eg ayhpoka gikugku. Ayteke eg imihepni akak ini imihgi.
39Ner farisew ku pariye gawnesetni Kiyavwiye Jesus atere ig hiyapni hene, ig awna abetpi gihiyekemni. Giwn:
— Mmahki ig isaksa nor tino powkemnivyo daxtig? Wake igyewa Uhokri gawnevebe, nikwekam ku samah ig hiyavgu, ig hiyakkam ku samah guhiyekemni mbeyevye.
40Igme Kiyavwiye Jesus hiyak abet gihiyekemni, ig kaytwa giwn. Ig awna git:
— Simawh, nah muwaka akka pit pahat arikna.
Igme kaytwa giwn:
— Kiyavwiye, uya akka nutuh.
41Igme Kiyavwiye Jesus awna git:
— Minikwak piyana awaykemni matiwnih karukri ta git pahavwi awayg. Pahavwi matiwnihe pohowku madikawku madikwa (500) karukri git. Pahavwime matiwnihe pohowku madikwa (50) karukri git. 42Igkis piyamate yuma ariknawnema adahan igkis diyuhkiswiyes ner pahavwi gikakura awenyan. Ig awayg hiyapni hene, ig bayahminevgikis ariw gimatiwnihnikis igkis piyamate. Kuri uya akka nutuh. Pariye pi batekte gikak ner awayg gaytakkis neras piyananene gikebikis?
43Igme Simawh kaytwa giwn:
— Ke nutuhbe ner awayg ku pariye gimatiwnihni pi kiyestenene.
Igme Kiyavwiye Jesus awna git:
— Henewa. Piwnavriknawa.
44Ayteke ig iveg gumkat nor tino. Ig awna git Simawh:
— Ba pis hiyap nor tino? Ku aysaw nah pareke pivinekut pis ka iki un aynesnima nutuh adahan nah sukuhkugewne. Egme nor tino eg sukuhkugevun akak gukantak, eg manpuse nukugku akak gusemni. 45Ku aysaw nah pareke pis ka aytnihun akak ayhpokaki. Egme nor tino ku samah nah parak atan eg ka matiswa ayhpoka nukugku. 46Pis kawnata amavan pivinekut akak ariknawnema nutewharit ine akak iyti. Egme nor tino ike imihgi kane atiwnisima ta nukugkavrikut. 47Nah kuwis bayahminevgu ariw kane aynsima gutaraksan. Inneki keh eg batek nukakuh mpiynevevye. Heneme ku pariye hiyeg bayahminaka ariw aynesawa gitaraksan, igi batek gikak gibayahmnihten aynesawa.
48Ayteke ig awna ta gut nor tino. Giwn:
— Nah bayahminap ariw madikte pitaraksan gikak Uhokri.
49Neras hiyeg ganwayevwi igkis timapni hene, igkis awna gimin ginaktinkis. Giwnkis:
— Pariyenekig ner hiyeg? Mmahkama he utaraksanwa gikak Uhokri ig bayahminaw ariw?
50Igme awna ta gut nor tino:
— Pis isahptew awaku ku samah pis kamaxwa ta nuvitit. Hiyawa pis tivik akak kabayka.
Currently Selected:
Lúkas 7: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
