ಯೋಹಾನ 16
16
ಯೇಸು, ಬಪ್ಪಕುಳ್ಳ ಪವಿತ್ರಾತ್ಮತ್‍ರ ವಿಷಯತ್‍ನ ವಿವರಿಚಿಡುವದ್
1ನಾಡ ಮೇಲೆ ಉಳ್ಳ ನಂಬಿಕೇನ ನಿಂಗ ಬುಡುವಕ್ಕಾಗಾಂದ್ ನಿಂಗಕ್ ನಾನ್ ಇದ್‍ನೆಲ್ಲಾ ಎಣ್ಣಿಯೆ. 2ಅಯಿಂಗ ನಿಂಗಳ ಸಬಾಮಂದಿರತ್ಂಜ ಪೊರಂಬಡಿ ಬೆಪ್ಪ; ನಿಂಗಳ ಕೊಂದತೇಂಗಿ ಅಯಿಂಗ ದೇವಕ್ ಸೇವೆ ಮಾಡಿಯಂಡುಂಡ್‍ೕಂದ್ ಗೇನ ಮಾಡ್‌ವ ಸಮಯ ಬಪ್ಪ. 3ಅಯಿಂಗಕ್ ನನ್ನ, ನಾಡ ಅಪ್ಪನ ಗೊತ್ತಿಲ್ಲತಗುಂಡ್ ಇದ್‍ನೆಲ್ಲಾ ನಿಂಗಕ್ ಮಾಡ್‌ವ. 4ಇನ್ನನೆಲ್ಲಾ ಆಪಕ, ಇದ್‍ನೆಲ್ಲಾ ನಾನ್ ನಿಂಗಕ್ ಎಣ್ಣಿಯೇಂದ್ ನಿಂಗಕ್ ಗೇನ ಆಪಕಾಯಿತ್ ನಾನ್ ಇಕ್ಕ ಎಣ್ಣಿಯೆ; ನಾನ್ ನಿಂಗಡ ಕೂಡೆ ಸುರುಯಿಂಜಲೇ ಇಂಜಾಂಗ್, ಇದ್‍ನೆಲ್ಲಾ ಅಕ್ಕ ಎಣ್ಣಿತ್‌ಲ್ಲೆ. 5ಆಚೇಂಗಿ ಇಕ್ಕ, ನಾನ್ ನನ್ನ ದಾರ್ ಅಯಿಚತೋ ಅಂವೊಂಡ ಪಕ್ಕ ಪೋಯಂಡುಂಡ್; ನೀನ್ ಎಲ್ಲಿಕ್ ಪೋಪಿಯಾಂದ್ ಒಬ್ಬನಾಚೇಂಗಿಯು ನನ್ನ ಕ್‍ೕಟಂಡಿಲ್ಲೆ. 6ಆಚೇಂಗಿಯು, ನಾನ್ ಈ ತಕ್ಕ್ ಪರ್‌ಂದಾಂಗ್ ನಿಂಗಡ ಹೃದಯ ದುಃಖತ್‍ಲ್ ದುಂಬಿತುಂಡ್.
7ಆಚೇಂಗಿ, ನಾನ್ ನಿಂಗಕ್ ಒರ್ ಸತ್ಯ ಎಣ್ಣಿ ತಪ್ಪಿ: ನಾನ್ ಪೋಪದ್ ನಿಂಗಕ್ ಪ್ರಯೋಜನವಾಪ, ಎನ್ನಂಗೆಣ್ಣ್‌ಚೇಂಗಿ, ನಾನ್ ಪೋಕತ ಪೋನಕ ಆಲೋಚನೆ ತಪ್ಪ ಪವಿತ್ರಾತ್ಮ ನಿಂಗಡ ಪಕ್ಕ ಬಪ್ಪ್‌ಲೆ. ನಾನ್ ಪೋಚೇಂಗಿ, ಅಂವೊನ ನಿಂಗಡ ಪಕ್ಕ ಅಯಿಪಿ. 8ಅಂವೊ ಬಂತ್, ಜನಕ್ ಅಯಿಂಗ ಪಾಪ ಮಾಡ್‍ನಯಿಂಗಾಂದು, ನೀತಿ ಪಿಂಞ ದೇವಡ ನ್ಯಾಯತೀರ್ಪ್ ಕಂಡಿತವಾಯಿತ್ ಬಪ್ಪಾಂದು ಅರ್ಥ ಮಾಡಿತ್ ತಪ್ಪ. 9ಈ ಲೋಕತ್‍ರ ಜನ ನನ್ನ ನಂಬತಗುಂಡ್ ಅಯಿಂಗ ಪಾಪೀಂದ್ ಎಣ್ಣಿ ಕೊಡ್‍ಪ. 10ನಾನ್ ಅಪ್ಪಂಡ ಪಕ್ಕ ಪೋಪಗುಂಡ್ ನನ್ನ ಇಂಞು ಮಿಂಞಕ್ ನಿಂಗ ಕಾಂಬುಲೆ. ಆನಗುಂಡ್ ನೀತಿರ ವಿಷಯತ್ ಅಂವೊ ಎಣ್ಣಿ ತಪ್ಪ. 11ಈ ಲೋಕಕ್ ನ್ಯಾಯತೀರ್ಪ್ ಕಂಡಿತವಾಯಿತ್ ಬಪ್ಪಾಂದ್ ಕಾಟಿತಪ್ಪ. ಎನ್ನಂಗೆಣ್ಣ್‌ಚೇಂಗಿ, ಈ ಲೋಕತ್‍ರ ಅದಿಕಾರಿನ ದೇವ ಇಕ್ಕಲೆ ನ್ಯಾಯತೀರ್ಪ್ ಮಾಡಿಯತ್. 12ನಿಂಗಕ್ ಎಣ್ಣುವಕ್ ನಾಡ ಪಕ್ಕ ದುಂಬ ಸತ್ಯ ಉಂಡ್, ಆಚೇಂಗಿ ಅದ್‍ನೆಲ್ಲಾ ನಾನ್ ನಿಂಗಕ್ ಎಣ್ಣ್‌ಚೇಂಗಿ ನಿಂಗಕ್ ಹೃದಯತ್‍ಲ್ ಅದ್‍ನ ಎಡ್‍ಪಕ್ ಕಯ್ಯುಲೆ. 13ಸತ್ಯತ್‍ರ ಆತ್ಮವಾಯಿತುಳ್ಳ ಪವಿತ್ರಾತ್ಮ ಬಪ್ಪಕ, ನಿಂಗಳ ಸತ್ಯತ್‍ರ ಎಲ್ಲಾ ಬಟ್ಟೇಲ್ ನಡ್‍ತುವ; ಅಂವೊ, ಅಂವೊಂಡ, ಇಷ್ಟಪಕ್ರಾರ ತಕ್ಕ್ ಪರಿಯುಲೆ, ಅಂವೊ ಎಂತಾನ ಕ್‍ೕಪ ಅದ್‍ನ ನಿಂಗಕ್ ಎಣ್ಣಿತ್, ಇಂಞು ಮಿಂಞಕ್ ಬಪ್ಪಕುಳ್ಳ ಕಾರ್ಯತ್‍ನ ಎಣ್ಣಿ ತಪ್ಪ. 14ಅಂವೊ ನನ್ನಿಂಜ ಎಡ್‍ತಿತ್ ನಿಂಗಕ್ ಎಣ್ಣಿ ತಪ್ಪಗುಂಡ್, ಅಂವೊ ನಾಕ್ ಮಹಿಮೆ ತಪ್ಪ. 15ನಾಡ ಅಪ್ಪಂಡ ಪಕ್ಕ ಉಳ್ಳದೆಲ್ಲಾ ನಾಡದ್, ಆನಗುಂಡ್, ಪವಿತ್ರಾತ್ಮ ನನ್ನಿಂಜ ಎಡ್‍ತಿತ್ ನಿಂಗಕ್ ಕಾಂಬ್‍ಚಿಡುವಾಂದ್ ಎಣ್ಣಿಯೆ.
ದುಃಖತ್‍ರ ಪಿಂಞ ಕುಶೀರ ಸಂಗತಿ
16ನಾನ್ ನಾಡ ಅಪ್ಪಂಡ ಪಕ್ಕ ಪೋಪಗುಂಡ್, ಚೆನ್ನ ಕಾಲ ನಿಂಗ ನನ್ನ ಕಾಂಬುಲೆ. ಚೆನ್ನ ಸಮಯ ಆನ ಪಿಂಞ ನನ್ನ ನಿಂಗ ಕಾಂಬಿರಾಂದ್ ಎಣ್ಣ್‌ಚಿ.
17ಅಂವೊಂಡ ಚೆನ್ನ ಶಿಷ್ಯಂಗ: ಇದೆಲ್ಲಾ ಎಂತ? ನಾನ್ ಅಪ್ಪಂಡ ಪಕ್ಕ ಪೋಪಗುಂಡ್, ಚೆನ್ನ ಸಮಯ ನನ್ನ ಕಾಂಬುಲೇಂದು ಪಿಂಞ ಪುನಃ ಚೆನ್ನ ಕಾಲ ಆನ ಪಿಂಞ ನನ್ನ ಕಾಂಬಿರಾಂದು ನಂಗಡ ಕೂಡೆ ಎಣ್ಣಿಯಂಡ್ ಉಂಡಲ್ಲಾ? 18ಚೆನ್ನ ಸಮಯಾಂದ್ ಇಂವೊ ತಕ್ಕ್ ಪರಿಯುವ ವಿಷಯ ಎಂತ? ಇದ್ಂಡ ಅರ್ಥ ಎಂತ್‍ೕಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದಂಡಿಂಜತ್.
19ಇದ್ಂಡ ವಿಷಯತ್ ಅಂವೊಂಡ ಪಕ್ಕ ಅಯಿಂಗ ಪ್ರಶ್ನೆ ಕ್‍ೕಕಂಡೂಂದ್ ಉಳ್ಳದ್ ಯೇಸುಕ್ ಗೊತ್ತಾಪಕ, ಅಂವೊ ಅಯಿಂಗಕ್: ನನ್ನ ಚೆನ್ನ ಸಮಯಕ್ ನಿಂಗ ಕಾಂಬುಲೆ, ಚೆನ್ನ ಸಮಯ ಆನ ಪಿಂಞ ನಿಂಗ ಕಾಂಬಿರಾಂದ್ ನಾನ್ ಎಣ್ಣ್‌ನ ವಿಷಯತ್ ನಿಂಗ ತಕ್ಕ್ ಪರ್‌ದಂಡ್ ಉಳ್ಳಿರಾ? 20ನಿಂಗ ದುಂಬ ಮೊರಡ್‌ವಿರ, ಆಚೇಂಗಿ ಈ ಲೋಕತ್‍ರ ಜನ ದುಂಬ ಕುಶಿ ಪಡುವ; ನಿಂಗ ದುಂಬ ದುಃಖ ಪಡ್‌ವಿರ ಆಚೇಂಗಿಯು ನಿಂಗಡ ದುಃಖ ಕುಶಿಯಾಯಿತ್ ಬದ್‍ಲಾಪಾಂದ್ ನೇರಾಯಿತು ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ. 21ಒರ್ ಪೊಣ್ಣಾಳ್ ಪೆರುವ ಸಮಯ ಬಪ್ಪಕ ಎಚ್ಚಕ್ ನೊಂಬಲತ್‍ನ ಸಹಿಸಂಡೂಂದ್ ಅವಕ್ ದುಂಬ ಬೇಜಾರ್ ಆಪ; ಆಚೇಂಗಿ ಅವಡ ಕುಂಞಿ ಪುಟ್ಟ್‌ನ ಪಿಂಞ ಒರ್ ಕುಂಞಿ ಲೋಕತ್‍ಲ್ ಪುಟ್ಟ್‌ಚೀಂದ್ ಉಳ್ಳ ಕುಶೀಲ್ ಅವಡ ಪೆರಿಗೆ ನೊಂಬಲತ್‍ನ ಮರ್ಂದ್‌ರುವ. 22ಅನ್ನನೆ, ನಿಂಗ ಇಕ್ಕ ಬೇಜಾರತ್‍ಲ್ ಉಳ್ಳಿರ, ಚೆನ್ನ ಕಾಲ ಆನ ಪಿಂಞ ನಾನ್ ಪುನಃ ನಿಂಗಳ ಕಾಂಬಿ. ಅಕ್ಕ ನಿಂಗಡ ಹೃದಯ ಸಂತೋಷತ್‌ಲ್ ದುಂಬುವ, ಆ ಸಂತೋಷತ್‌ನ ನಿಂಗಡಯಿಂಜ ದಾರ್‌ಕು ಎಡ್‍ಪಕ್ ಕಯ್ಯುಲೆ.
23ಆ ದಿವಸ ಬಪ್ಪಕ, ನನ್ನ ನಿಂಗ ಒಂದು ಕ್‍ೕಪುಲೆ. ನಾಡ ಪೆದತ್‍ಲ್ ನಿಂಗ ಅಪ್ಪಂಡ ಪಕ್ಕ ಎಂತ ಕ್‍ೕಪಿರೋ ಅದ್‍ನೆಲ್ಲಾ ನಿಂಗಕ್ ಅಪ್ಪ ತಪ್ಪಾಂದ್ ನೇರಾಯಿತು ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ. 24ಇಲ್ಲಿಕತ್ತನೆ ನಾಡ ಪೆದತ್‍ಲ್ ನಿಂಗ ಒಂದು ಕ್‍ೕಟಿತ್‌ಲ್ಲೆ. ನಿಂಗ ಕ್‍ೕಳಿ! ಅಕ್ಕ ನಿಂಗಕ್ ಕ್‍ಟ್ಟುವ; ನಿಂಗಡ ಕುಶಿ ಪೂರ್ತಿ ಆಪನೆಕೆ ನಿಂಗಕ್ ಕ್‍ಟ್ಟುವ. 25ಈ ತಕ್ಕ್‌ನ ಇಕ್ಕ ನಿಂಗಕ್ ಕಥೇರ ರೂಪತ್‌ಲ್ ನಾನ್ ಎಣ್ಣಿಯಂಡುಳ್ಳ. ಸಮಯ ಬಪ್ಪ, ಅಕ್ಕ ನಾನ್ ನಿಂಗಡ ಪಕ್ಕ ಕಥೇರ ರೂಪತ್‌ಲ್ ತಕ್ಕ್ ಪರಿಯತೆ, ಅಪ್ಪಂಡ ವಿಷಯತ್‍ನ ಚಾಯಿ ಅರ್ಥ ಆಪನೆಕೆ ಎಣ್ಣಿ ತಪ್ಪಿ. 26ಆ ಕಾಲ ಬಪ್ಪಕ ನಿಂಗ ನಾಡ ಪೆದತ್‍ಲ್ ಬೋಡ್‍ವಿರ. ಅಕ್ಕ ನಾನ್ ನಿಂಗಕಾಯಿತ್ ಅಪ್ಪಂಡ ಪಕ್ಕ ಕ್‍ೕಪೀಂದ್ ನಿಂಗಕ್ ಎಣ್ಣ್‌ವದ್ ಬೋಂಡ. 27ನಿಂಗ ನನ್ನ ಪ್ರೀತಿ ಮಾಡಿತ್, ನಾನ್ ದೇವಡಯಿಂಜ ಬಾತ್‍ೕಂದ್ ನಿಂಗ ನಂಬ್‍ನಾಂಗ್ ಅಪ್ಪ ನಿಂಗಳ ಪ್ರೀತಿ ಮಾಡ್‌ವ. 28ನಾನ್ ಈ ಲೋಕಕ್ ಅಪ್ಪಂಡಯಿಂಜ ಬಂದಿಯೆ, ಇಕ್ಕ ನಾನ್ ಈ ಲೋಕತ್‍ನ ಬುಟ್ಟಿತ್ ಅಪ್ಪಂಡ ಪಕ್ಕ ಪೋಯಂಡುಂಡ್‍ೕಂದ್ ಎಣ್ಣ್‌ಚಿ.
29ಅಕ್ಕ ಅಂವೊಂಡ ಶಿಷ್ಯಂಗ ಅಂವೊನ ನೋಟಿತ್: ನೋಟಿ, ಇಕ್ಕ, ನೀನ್ ನಂಗಡ ಕೂಡೆ ಕಥೇರ ರೂಪತ್‌ಲ್ ಅಲ್ಲ, ಚಾಯಿತೆ ಅರ್ಥ ಆಪನೆಕೆ ತಕ್ಕ್ ಪರಿವಿಯ. 30ನೀಕ್ ಎಲ್ಲಾ ವಿಷಯವು ಗೊತ್ತುಂಡ್. ನೀಡ ಪಕ್ಕ ದಾರೂ ಪ್ರಶ್ನೆ ಕ್‍ೕಕಂಡೂಂದ್ ಇಲ್ಲೆ. ಆನಗುಂಡ್ ನೀನ್ ದೇವಡಯಿಂಜ ಬಾತ್‍ೕಂದ್ ನಂಗ ನಂಬುವಾಂದ್ ಎಣ್ಣ್‌ಚಿ.
31ಅಕ್ಕ ಯೇಸು ಅಯಿಂಗಕ್: ಇಕ್ಕಾಚೇಂಗಿಯು ನಿಂಗ ನಂಬುವಿರಾಂದ್ ಕ್‍ೕಟತ್. 32ಒರ್ ಸಮಯ ಬಪ್ಪ, ಅದ್ ಇಕ್ಕಲೆ ಬಂದ್‌ರ್‌ತ್. ನಿಂಗ ಎಲ್ಲಾರು ನನ್ನ ಬುಟ್ಟಿತ್ ಚದ್‌ರಿ ಪೋಯಿತ್ ಬೋರೆ ಬೋರೆ ಆಯಿತ್ ನಿಂಗ ನಿಂಗಡ ಮನೆಕ್ ಪೋಪಿರ, ನಾನ್ ಒಬ್ಬನೇ ಆಯಿಪೋಪಿ. ಆಚೇಂಗಿಯು ನಾನ್ ಒಂಟಿಯಾಯಿತ್ ಇಪ್ಪುಲೆ, ನಾಡ ಅಪ್ಪ ನಾಡ ಕೂಡೆ ಉಂಡ್. 33ನಿಂಗಕ್ ನಾಡಲ್ಲಿ ಸಮಾದಾನ ಇಕ್ಕಂಡೂಂದ್ ನಾನ್ ನಿಂಗಕ್ ಇದ್‍ನೆಲ್ಲಾ ಎಣ್ಣಿಯೆ. ಲೋಕತ್‍ಲ್ ನಿಂಗಕ್ ಕಷ್ಟ ಉಂಡ್ ಆಚೇಂಗಿಯು ದೈರ್ಯತ್‍ಲ್ ಇರಿ; ನಾನ್ ಲೋಕತ್‍ನ ಗೆದ್ದಿಯೇಂದ್ ಎಣ್ಣ್‌ಚಿ.
Currently Selected:
ಯೋಹಾನ 16: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
