ಯೋಹಾನ 17
17
ಯೇಸುರ ಯಾಜಕ ಪ್ರಾರ್ಥನೆ
1ಇದ್‍ನೆಲ್ಲಾ ಎಣ್ಣಿತಾನ ಪಿಂಞ ಯೇಸು ಪರಲೋಕತ್‌ನ ನೋಟುವಂಜಿ ಪ್ರಾರ್ಥನೆ ಮಾಡ್‌ವಕ್ ಸುರು ಮಾಡ್‍ಚಿ. ಅಪ್ಪಾ! ಸಮಯ ಬಂದ್‌ರ್‌ತ್, ನೀಡ ಮೋಂವೊಂಗ್ ಮಹಿಮೆ ಬಪ್ಪನೆಕೆ ಮಾಡ್, ಅಕ್ಕ ನೀಡ ಮೋಂವೊ ನೀಕ್ ಮಹಿಮೆ ಬಪ್ಪನೆಕೆ ಮಾಡ್‌ವ. 2ನೀನ್ ಅಂವೊಂಗ್ ಎಲ್ಲಾ ಜನಡಮೇಲೆ ಅದಿಕಾರ ಕೊಡ್‍ತಿತುಳ್ಳಿಯ. ನೀಡ ಮೋಂವೊಂಗ್ ನೀನ್ ಕೊಡ್‍ತಿತುಳ್ಳ ಎಲ್ಲಾರ್‌ಕು ಅಂವೊ ನಿತ್ಯ ಜೀವತ್‍ನ ತಪ್ಪ. 3ಸತ್ಯ ದೇವನಾಯಿತುಳ್ಳ ನೀನ್ ಒಬ್ಬನ ಪಿಂಞ ನೀನ್ ಅಯಿಚ ಯೇಸು ಕ್ರಿಸ್ತನ ಗೊತ್ತಾಪದೇ ನಿತ್ಯ ಜೀವ. 4ನೀನ್ ನಾಕ್ ಕೊಡ್‍ತ ಕ್ರಿಯೇನ ಪೂರ್ತಿಮಾಡಿಯೆ, ನಾನ್ ಈ ಲೋಕತ್‍ಲ್ ನೀಕ್ ಮಹಿಮೆ ಕ್‍ಟ್ಟುವನೆಕೆ ಮಾಡಿಯೆ. 5ಇಕ್ಕ, ಅಪ್ಪಾ! ಈ ಲೋಕ ಸೃಷ್ಟಿ ಆಪಕ್ ಮಿಂಞಲೇ ನಾಕ್ ನೀಡ ಪಕ್ಕ ಇಂಜ ಮಹಿಮೇರಗುಂಡ್ ಇಕ್ಕ ನೀನ್ ನೀಡಲ್ಲಿ ನಾಕ್ ಮಹಿಮೆ ಕ್‍ಟ್ಟುವನೆಕೆ ಮಾಡ್.
6ನೀನ್ ಈ ಲೋಕತ್ಂಜ ಗೊತ್ತ್ ಮಾಡಿತ್, ನಾಕ್ ತಂದಯಿಂಗಕ್ ನೀಡ ಪೆದತ್‍ನ ನಾನ್ ಕಾಂಬ್‍ಚಿಟ್ಟಿಯೆ. ಅಯಿಂಗ ನೀಡ ಜನಳಾಯಿತ್ಂಜತ್; ಅಯಿಂಗಳ ನೀನ್ ನಾಕ್ ತಂದಿಯೆ; ಅಯಿಂಗ ನೀಡ ವಾಕ್ಯ ಎಣ್ಣುವನೆಕೆ ಮಾಡ್‍ಚಿ. 7ನಾಕ್ ಉಳ್ಳದೆಲ್ಲ, ನೀನ್ ನಾಕ್ ಕೊಡ್‍ತದ್‍ೕಂದ್ ಇಕ್ಕ ಅಯಿಂಗಕ್ ಗೊತ್ತಾಯಿತುಂಡ್. 8ನೀನ್ ನಾಕ್ ಕೊಡ್‍ತಿತುಳ್ಳ ಸತ್ಯತ್‍ನ ನಾನ್ ಅಯಿಂಗಕ್ ಕೊಡ್‌ತಿಯೆ; ಅಯಿಂಗ ಅದ್‍ನ ಸ್ವೀಕಾರ ಮಾಡಿತ್, ನಾನ್ ನೀಡಯಿಂಜ ಪೊರಟಿತ್ ಬಾತ್‍ೕಂದ್ ದೃಡವಾಯಿತ್ ಗೊತ್ತಾಯಿತ್, ನೀನೇ ನನ್ನ ಲೋಕಕ್ ಅಯಿಚತ್‍ೕಂದ್ ನಂಬಿಯಂಡುಂಡ್.
9ನಾನ್ ಇಕ್ಕ ಅಯಿಂಗಕಾಯಿತ್ ಪ್ರಾರ್ಥನೆ ಮಾಡ್‌ವಿ; ಈ ಲೋಕಕಾಯಿತ್ ಪ್ರಾರ್ಥನೆ ಮಾಡತೆ, ನೀನ್ ನಾಕ್ ತಂದಯಿಂಗಕಾಯಿತ್ ಪ್ರಾರ್ಥನೆ ಮಾಡ್‌ವಿ, ಎನ್ನಂಗೆಣ್ಣ್‌ಚೇಂಗಿ ಅಯಿಂಗ ನೀಡಯಿಂಗಳಾಯಿತುಂಡ್. 10ನಾಡದೆಲ್ಲಾ ನೀಡದ್, ನೀಡದೆಲ್ಲಾ ನಾಡದ್; ಅಯಿಂಗಡಲ್ಲಿ ನಾಕ್ ಮಹಿಮೆ ಕ್‌ಟ್ಟಿಯಂಡುಂಡ್. 11ಇಂಞು ನಾನ್ ಈ ಲೋಕತ್‍ಲ್ ಇಪ್ಪುಲೆ, ಆಚೇಂಗಿ, ಈಂಗ ಲೋಕತ್‍ಲ್ ಇಪ್ಪ; ನಾನ್ ನೀಡ ಪಕ್ಕ ಬಂದಂಡುಂಡ್, ಪವಿತ್ರವಾಯಿತುಳ್ಳ ಅಪ್ಪನೇ, ನಾನು ನೀನು ಬೋರೆ ಬೋರೆಯಾಯಿತ್ ಅಲ್ಲತೆ, ಒಂದಾಯಿತ್ ಉಳ್ಳನೆಕೆ ಈಂಗಳು ಒಂದಾಯಿತ್ ಇಪ್ಪನೆಕೆ, ನೀನ್ ನಾಕ್ ತಂದಿತುಳ್ಳ ನೀಡ ಪೆದತ್‍ಲ್ ಅಯಿಂಗಳ ಕಾಪಾಡಂಡು. 12ನಾನ್ ಈಂಗಡ ಕೂಡೆ ಇಪ್ಪಕಾಪಕ, ನೀನ್ ನಾಕ್ ತಂದಿತುಳ್ಳ ನೀಡ ಪೆದತ್‍ರ ಅದಿಕಾರತ್‍ಲ್ ಈಂಗಳ ಕಪಾಡಿಯಂಡ್ ಬಂದಿಯೆ; ನೀನ್ ನಾಕ್ ತಂದಯಿಂಗಳ ನಾನ್ ಕಾಪಾಡಿಯಂಡ್ ಬಂದಿಯೆ. ದೇವಡ ವಾಕ್ಯತ್‍ಲ್ ಎಣ್ಣ್‌ನದ್ ಪೂರ್ತಿ ಆಪನೆಕೆ ನಾಶ ಆಪಕ್ ಗುರಿ ಬೆಚ್ಚಿತ್ಂಜ ಒಬ್ಬನ ಬುಟ್ಟಿತ್ ಈಂಗಡ ಕೂಟ್‌ಲ್ ದಾರೂ ನಾಶ ಆಯಿತ್‌ಲ್ಲೆ. 13ಆಚೇಂಗಿ ಇಕ್ಕ ನಾನ್ ನೀಡ ಪಕ್ಕ ಬಂದಂಡುಂಡ್; ನಾಡ ಕುಶಿ ಪೂರ್ತಿಯಾಯಿತ್ ಅಯಿಂಗಡಲ್ಲಿ ಇಪ್ಪಕಾಯಿತ್ ನಾನ್ ಅಯಿಂಗಡ ಕೂಡೆ ಇಪ್ಪಕಲೆ ಇನ್ನನೆ ನಾನ್ ಎಣ್ಣಿಯಂಡುಳ್ಳ. 14ನಾನ್ ನೀಡ ವಾಕ್ಯತ್‍ನ ಅಯಿಂಗಕ್ ಕೊಡ್‌ತಿಯೆ; ನಾನ್ ಈ ಲೋಕಕ್ ಕೂಡ್‍ನಂವೊ ಅಲ್ಲತನೆಕೆ, ಈಂಗಳು ಈ ಲೋಕಕ್ ಕೂಡ್‍ನಯಿಂಗ ಅಲ್ಲ. ಅದ್ಂಗಾಯಿತ್ ಈ ಲೋಕ ಈಂಗಳ ದ್ವೇಶ ಮಾಡಿಯಂಡ್ ಉಂಡ್. 15ಈಂಗಳ ಈ ಲೋಕತ್ಂಜ ಎಡ್‌ತ ಪೋಯಿರ್‍ೕಂದ್ ನಾನ್ ನಿನ್ನ ಕ್‍ೕಟಂಡಿಲ್ಲೆ. ಕ್‍ೕಡ್ ಮಾಡ್‌ವ ಸೈತಾನಂಡ ಕೈಯಿಂಜ ತಪ್ಪ್‌ಚಿಟ್ಟಿತ್ ಈಂಗಳ ಕಾಪಾಡ್‍ೕಂದ್ ಕ್‍ೕಪಿ. 16ನಾನ್ ಲೋಕಕ್ ಕೂಡ್‍ನಂವೊ ಅಲ್ಲತನೆಕೆ ಈಂಗಳು ಲೋಕಕ್ ಕೂಡ್‍ನಯಿಂಗ ಅಲ್ಲ. 17ನೀಡ ಸತ್ಯತ್‍ರಗುಂಡ್ ಅಯಿಂಗಳ ಪವಿತ್ರವಾನಯಿಂಗಳಾಯಿತ್ ಮಾಡ್; ನೀಡ ವಾಕ್ಯವೇ ಸತ್ಯ. 18ನೀನ್ ನನ್ನ ಲೋಕಕ್ ಅಯಿಚನೆಕೆ ನಾನ್ ಅಯಿಂಗಳ ಲೋಕಕ್ ಅಯಿಪಿ. 19ಅಯಿಂಗಳಗುಂಡ್ ನನ್ನ ನಾನ್ ಪವಿತ್ರವಾಯಿತ್ ಮಾಡ್‌ವಿ, ಅಕ್ಕ ಈಂಗಳು ಸತ್ಯತ್‍ರಗುಂಡ್ ನೀಕ್ ಪವಿತ್ರವಾಯಿತ್ ಆಪ.
20ನಾನ್ ಈಂಗಕಾಯಿತ್ ಮಾತ್ರ ಪ್ರಾರ್ಥನೆ ಮಾಡುಲೆ. ಈಂಗ ಮಾಡ್‌ವ ನಾಡ ಬೋದನೆರ ಮೂಲಕ ದಾರ್ ನನ್ನ ನಂಬುವ ಅಯಿಂಗಕಾಯಿತು ನಾನ್ ನಿನ್ನ ಬೋಡುವಿ. 21ಅಯಿಂಗೆಲ್ಲಾರು ಒಂದಾಯಿತ್ ಇಪ್ಪನೆಕೆ ನಾನ್ ಪ್ರಾರ್ಥನೆ ಮಾಡ್‌ವಿ. ಅಪ್ಪಾ! ನಾನ್ ನೀಡಲ್ಲಿ ನೀನ್ ನಾಡಲ್ಲಿ ಇಪ್ಪನೆಕೆ ಅಯಿಂಗಳು ನಂಗಡಲ್ಲಿ ಒಂದಾಯಿತ್ ಇಕ್ಕಡ್. ನೀನ್ ನನ್ನ ಲೋಕತ್‍ಲ್ ಅಯಿಚದ್‍ನ ಲೋಕತ್‍ರ ಜನ ನಂಬುವನೆಕೆ ಅಯಿಂಗ ಎಲ್ಲಾರು ಒಂದಾಯಿತ್ ಇಕ್ಕಡ್‍ೕಂದ್ ಬೋಡುವಿ. 22ನಂಗ ಒಂದಾಯಿತ್ ಇಪ್ಪನೆಕೆ, ಅಯಿಂಗಳು ಒಂದಾಯಿತ್ ಇಪ್ಪಕಾಯಿತ್, ನೀನ್ ನಾಕ್ ಕೊಡ್‍ತ ಮಹಿಮೆನ ನಾನ್ ಅಯಿಂಗಕ್ ಕೊಡ್‌ತಿಯೆ. 23ಐಕ್ಯತ್‍ಲ್ ಈಂಗ ಪೂರ್ತಿಯಾಯಿತ್ ಇಪ್ಪಕಾಯಿತು, ನೀನ್ ನನ್ನ ಲೋಕಕ್ ಅಯಿಚದ್‍ನ ಪಿಂಞ ನೀನ್ ನಾಡಲ್ಲಿ ಪ್ರೀತಿಯಾಯಿತ್ ಇಪ್ಪನೆಕೆ ಅಯಿಂಗಡಲ್ಲಿ ಪ್ರೀತಿಯಾಯಿತ್ ಇಪ್ಪದ್‍ನ ಲೋಕತ್‍ರ ಜನ ಗೊತ್ತಾಪಕಾಯಿತು ನಾನ್ ಅಯಿಂಗಡಲ್ಲಿಯು ನೀನ್ ನಾಡಲ್ಲಿಯು ಇರಂಡೂಂದ್ ಪ್ರಾರ್ಥನೆ ಮಾಡ್‌ವಿ.
24ಅಪ್ಪಾ! ಲೋಕತ್‍ನ ಸೃಷ್ಟಿ ಮಾಡ್‌ವಕ್ ಮಿಂಞಲೇ ನೀನ್ ನಾಡಲ್ಲಿ ಪ್ರೀತಿಯಾಯಿತ್ ಇಂಜಗುಂಡ್, ನೀನ್ ನಾಕ್ ತಂದ ನಾಡ ಮಹಿಮೆನ, ನೀನ್ ನಾಕ್ ಕೊಡ್‍ತಯಿಂಗ ಕಾಂಬನೆಕೆ, ನಾನ್ ಎಲ್ಲಿ ಇಪ್ಪಿ, ಅಲ್ಲಿ ಅಯಿಂಗಳು ಇಪ್ಪಕ್ ನಾನ್ ಕುಶೀಲ್ ಉಳ್ಳ. 25ನೀತಿವಂತ ಅಪ್ಪನೇ! ಈ ಲೋಕತ್‍ರ ಜನಕ್ ನೀನ್ ದಾರ್‍ೕಂದ್ ಗೊತ್ತ್‌ಲ್ಲೆ, ಆಚೇಂಗಿ ನಾಕ್ ನಿನ್ನ ಗೊತ್ತುಂಡ್; ನೀನ್ ನನ್ನ ಅಯಿಚದ್ ಈಂಗಕೂ ಗೊತ್ತುಂಡ್. 26ನೀನ್ ನಾಡಲ್ಲಿ ಮಾಡ್‍ನ ಪ್ರೀತಿ ಅಯಿಂಗಡಲ್ಲಿ ಇಪ್ಪಕಾಯಿತ್ ಪಿಂಞ ನಾನ್ ಅಯಿಂಗಡಲ್ಲಿ ಇಪ್ಪಕಾಯಿತ್ ನೀಡ ಪೆದತ್‍ನ ಅಯಿಂಗಕ್ ನಾನ್ ಗೊತ್ತ್ ಮಾಡಿಯೆ; ಅನ್ನನೆ ಇಂಞು ಮಾಡಿಯಂಡ್ ಇಪ್ಪಿ ಎಣ್ಣಿಯಂಡ್ ಪ್ರಾರ್ಥನೆ ಮಾಡ್‍ಚಿ.
Currently Selected:
ಯೋಹಾನ 17: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
