ಲೂಕ 7
7
ನೂರ್ ಸಿಪಾಯಿಯರ ಅದಿಕಾರಿಯಂಡ ನಂಬಿಕೆ
(ಮತ್ತಾಯ 8.5–13)
1ಯೇಸು ಅಂವೊಂಡ ವಾಕ್ಯತ್‍ನ ಜನಕ್ ಬೋದನೆ ಮಾಡ್‍ನ ಪಿಂಞ ಕಪೆರ್ನೌಮ್‍ಕ್ ಪೋಚಿ. 2ಅಲ್ಲಿ ನೂರ್ ಸಿಪಾಯಿಯಂಗಕ್ ಅದಿಕಾರಿಯಾಯಿತ್ಂಜ ರೋಮ್ ರಾಜ್ಯತ್‍ರ ಒರ್ ಅದಿಕಾರಿಕ್ ಕುಶಿಯುಳ್ಳ ಒರ್ ಆಳ್‍ಕ್ ದುಂಬ ಕಾಯಿಲೆ ಬಂದಿತ್ ಚಾವನೆಕೆ ಇಂಜತ್. 3ಈ ಅದಿಕಾರಿಕ್ ಯೇಸು ಬಂದದ್ ಗೊತ್ತಾನಗುಂಡ್, ಅಂವೊ, ಬಂದಿತ್ ತಾಂಡ ಆಳ್‌ನ ವಾಸಿ ಮಾಡಂಡೂಂದ್ ಬೋಡ್‍ವಕ್ ಯೆಹೂದ್ಯ ಮುಕ್ಯಸ್ತಂಗಳ ಅಂವೊಂಡ ಪಕ್ಕ ಅಯಿಚತ್.
4ಅಯಿಂಗ ಬಂದಿತ್: ನೀನ್ ಕನಿಕರ ಕಾಟ್‍ವಕ್ ಈ ಮನುಷ್ಯ ಯೋಗ್ಯನಾಯಿತುಂಡ್. 5ಅಂವೊಂಗ್ ನಂಗಡ ಜನಳ ದುಂಬ ಕುಶಿ ಉಂಡ್, ಅಂವೊ ನಂಗಕ್ ಒರು ಸಬಾಮಂದಿರತ್‌ನ ಸಹ ಕೆಟ್ಟ್‌ಚೀಂದ್ ಎಣ್ಣಿತ್, ಯೇಸುರ ಪಕ್ಕ ಬೋಡ್‍ಚಿ.
6ಅಕ್ಕ ಯೇಸು, ಅಯಿಂಗಡ ಕೂಡೆ ಪೋಚಿ. ಯೇಸು ಅಂವೊಂಡ ಮನೆರ ಪಕ್ಕ ಎತ್ತ್‌ವಕ, ನೂರ್ ಸಿಪಾಯಿಯರ ಅದಿಕಾರಿ ತಾಂಡ ಸ್ನೇಹಿತಯಂಗಳ ನೋಟಿತ್: ನಿಂಗ ಯೇಸುರ ಪಕ್ಕ ಪೋಯಿತ್, ಒಡೆಯನೇ, ನೀನ್ ಅಲ್ಲಿಕ್ ಬಪ್ಪಕ್ ತೊಂದರೆ ಎಡ್‍ಕತೆ, ನೀನ್ ನಾಡ ಮನೆಕ್ ಬಪ್ಪಕ್ ನಾನ್ ಯೋಗ್ಯನಲ್ಲ; 7ನಾನ್ ನೀಡ ಪಕ್ಕ ಬಪ್ಪಕೂ ನನ್ನ ಯೋಗ್ಯನಾಯಿತ್ ಗೇನ ಮಾಡುಲೆ; ನೀನ್ ಒರ್ ತಕ್ಕ್ ಮಾತ್ರ ಎಣ್ಣ್, ಅಕ್ಕ ನಾಡ ಆಳ್ ವಾಸಿಯಾಪ. 8ನಾನ್ ಬೋರೆಯಿಂಗಡ ಅದಿಕಾರತ್‍ರ ಅಡಿಲ್ ಉಂಡೇಂಗಿಯು, ನಾಡ ಅದಿಕಾರತ್‍ಲ್ ಸಹ ಸಿಪಾಯಿಯಂಗ ಉಂಡ್; ನಾನ್ ಒಬ್ಬನ ಪೋಂದ್ ಎಣ್ಣ್‌ಚೇಂಗಿ ಅಂವೊ ಪೋಪ, ಬೋರೆ ಒಬ್ಬನ ಬಾಂದ್ ಎಣ್ಣ್‌ಚೇಂಗಿ ಅಂವೊ ಬಪ್ಪ; ಇನ್ನನೆ ಮಾಡ್‍ೕಂದ್ ಒಬ್ಬಂಗ್ ಎಣ್ಣುವಕ, ಅಂವೊ ಅನ್ನನೆ ಮಾಡ್‌ವಾಂದ್ ನಾನ್ ಎಣ್ಣಿಯೇಂದ್ ಯೇಸುಕ್ ಎಣ್ಣುವಕ್ ಅಯಿಂಗಳ ಅಯಿಚತ್.
9ಯೇಸು ಇದ್‍ನ ಕ್‍ೕಟಿತ್ ಆಶ್ಚರ್ಯ ಪಟ್ಟತ್. ಅಲ್ಲಿ ಉಳ್ಳ ಜನಳೆಲ್ಲ ನೋಟ್‌ವಂಜಿ: ಇಸ್ರಾಯೇಲ್ ಜನತ್‍ಲ್ ಸಹ ಇನ್ನತ ಒರ್ ನಂಬಿಕೇನ ನಾನ್ ಕಂಡಿತ್‌ಲ್ಲೇಂದ್ ಎಣ್ಣ್‌ಚಿ. 10ಈ ಸುದ್ದಿನ ಎಡ್‍ತಂಡ್ ಪೋನ ಜನ, ಅದಿಕಾರಿಯಡ ಮನೆಕ್ ಬಪ್ಪಕ, ಆ ಆಳ್‍ರ ಕಾಯಿಲೆ ವಾಸಿ ಆಯಿತ್ಂಜಾನ ಕಂಡತ್.
ಯೇಸು ಒರ್ ವಿದವೆರ ಮೋಂವೊನ ಚಾವ್‍ಯಿಂಜ ಎಪ್ಪ್‌ನದ್
11ಇದ್ ಆನ ಪಿಂಞ, ಯೇಸು ಅಲ್ಲಿಂಜ ನಾಯಿನ್ ಎಣ್ಣುವ ಊರ್‌ಕ್ ಪೋಚಿ; ಅಂವೊಂಡ ಕೂಡೆ ಅಂವೊಂಡ ಶಿಷ್ಯಂಗ ಪಿಂಞ ದುಂಬ ಜನಳು ಪೋಚಿ. 12ಯೇಸು, ಊರ್‌ರ ಪಡಿರ ಪಕ್ಕ ಬಪ್ಪಕಾಪಕ, ಜನ ಒರ್ ಚಾವ್ ತಡೀನ ಪೂಪಕ್ ಎಡ್‍ತಂಡ್ ಬಂದಂಡಿಂಜತ್. ಚತ್ತ್ ಪೋನಂವೊ ಅಂವೊಂಡ ಅವ್ವಕ್ ಒರೇ ಮೋಂವೊನಾಯಿತ್ಂಜತ್. ಅವಳೂ ವಿದವೆಯಾಯಿತ್ಂಜತ್. ಆ ಪೊಣ್ಣಾಳ್‍ರ ಕೂಡೆ ದುಂಬ ಜನ ಬಂದಂಡಿಂಜತ್.
13ಒಡೆಯ ಅವಳ ಕಂಡದು, ಕನಿಕರ ಪಟ್ಟಿತ್: ಮೊರಡತೆ ಎಣ್ಣಿಯಂಡ್, 14ಚಾವ್ ತಡೀನ ಎಡ್‍ತಂಡ್ ಪೋಯಂಡಿಂಜ ಪೊಟ್ಟಿರ ಪಕ್ಕ ಪೋಯಿತ್ ಅದ್‍ನ ಮುಟ್ಟ್‌ಚಿ; ಚಾವ್ ತಡೀನ ಪೊರ್‌ತಂಡಿಂಜಯಿಂಗ ನಿಂದತ್; ಅಕ್ಕ ಅಂವೊ, ಬಾಲೆಕಾರನೇ, ಏಳ್ಂದ್ ನಾನ್ ನೀಕ್ ಎಣ್ಣುವೀಂದ್ ಎಣ್ಣ್‌ಚಿ. 15ಚತ್ತಂವೊ ಎದ್ದಿತ್ ಅಳ್‌ತಂಡ್ ತಕ್ಕ್‌ಪರಿವಕ್ ಸುರು ಮಾಡ್‍ಚಿ. ಯೇಸು ಅಂವೊನ ಅಂವೊಂಡ ಅವ್ವಂಗ್ ಒಪ್ಪ್‌ಚಿಟ್ಟತ್. 16ಅಲ್ಲಿ ಉಳ್ಳಯಿಂಗಕೆಲ್ಲಾ ಪೋಡಿ ಆಯಿತ್, ನಂಗಡ ಕೂಟ್‌ಲ್ ಒರ್ ಬಲ್ಯ ಪ್ರವಾದಿ ಎದ್ದಿತುಂಡ್; ದೇವ ತಾಂಡ ಜನಳ ಕಾಪಾಡ್‌ವಕ್ ಬಾತ್‍ೕಂದ್ ದೇವನ ತುದಿಪಕ್ ಸುರು ಮಾಡ್‍ಚಿ. 17ಯೇಸುರ ಈ ಸುದ್ದಿ ಯೂದಾಯ ನಾಡ್ ಪಿಂಞ ಅದ್ಂಡ ಸುತ್ತ್‌ಲ್ ಉಳ್ಳ ಎಲ್ಲಾ ನಾಡ್‍ಕೂ ಹರಡಿಪೋಚಿ.
ಯೇಸು ಪಿಂಞ ದೀಕ್ಷಾಸ್ನಾನ ತಪ್ಪ ಯೋಹಾನ
(ಮತ್ತಾಯ 11.2–19)
18 ದೀಕ್ಷಾಸ್ನಾನ ತಪ್ಪ ಯೋಹಾನಂಡ ಶಿಷ್ಯಂಗ ಈ ಎಲ್ಲಾ ಸುದ್ದಿನ ಅಂವೊಂಗ್ ಎಣ್ಣ್‌ಚಿ. ಅದ್‍ನ ಕ್‍ೕಪದು, ತಾಂಡ ಶಿಷ್ಯಂಗಡಡೆಲ್ ದಂಡ್ ಶಿಷ್ಯಂಗಳ ಕಾಕಿತ್,
19ನಿಂಗ ಯೇಸುರ ಪಕ್ಕ ಪೋಯಿತ್: ಬಪ್ಪಕಿಂಜಂವೊ ನೀನಾ? ಅಥವ ಬೋರೆ ಒಬ್ಬ ಬಪ್ಪಕ್ ಪಾರಕಾಕಂಡುವಾಂದ್ ಕ್‍ೕಳೀಂದ್ ಎಣ್ಣಿತ್ ಅಯಿಚತ್.
20ಅನ್ನನೆ ದೀಕ್ಷಾಸ್ನಾನ ತಪ್ಪ ಯೋಹಾನಂಡ ಶಿಷ್ಯಂಗ ಯೇಸುರ ಪಕ್ಕ ಬಂದಿತ್: ಬಪ್ಪಕಿಂಜಂವೊ ನೀನಾ? ಅಥವ ಬೋರೆ ಒಬ್ಬ ಬಪ್ಪಕ್ ಪಾರಕಾಕಂಡುವಾಂದ್ ಕ್‍ೕಪಕಾಯಿತ್ ಯೋಹಾನ ನಂಗಳ ನೀಡ ಪಕ್ಕ ಅಯಿಚತ್‍ೕಂದ್ ಎಣ್ಣ್‌ಚಿ. 21ಆ ಸಮಯತ್‍ಲ್ ಯೇಸು ದುಂಬ ಕಾಯಿಲೆಸ್ತಂಗಳ, ರೋಗಿಯಳ, ಕೂಳಿ ಪುಡ್‌ಚಯಿಂಗಳ ವಾಸಿ ಮಾಡಿತ್, ದುಂಬ ಕುರ್‌ಡಂಗಕ್ ಕಣ್ಣ್ ಕಾಂಬನೆಕೆ ಮಾಡಿಯಂಡಿಂಜತ್.
22ಯೇಸು ಯೋಹಾನಂಡ ಶಿಷ್ಯಂಗಕ್: ನಿಂಗ ಇಲ್ಲಿ ಎಂತೆಲ್ಲಾ ಕಂಡಿರೋ, ಕ್‍ೕಟಿರೊ ಅದ್‍ನ ಯೋಹಾನಂಗ್ ಎಣ್ಣಿ. ಕುರ್‌ಡಂಗ ಕಂಡಂಡುಂಡ್, ಕುಂಟಂಗ ನಡ್ಂದಂಡುಂಡ್, ಕುಷ್ಟರೋಗಿಯಂಗ ವಾಸಿ ಆಯಂಡುಂಡ್, ಕಿವ್‍ಡಂಗ್ ಕ್‍ೕಟಂಡು, ಚತ್ತಯಿಂಗ ಎದ್ದಡುಂಡ್, ಗರೀಬಂಗಕ್ ನಲ್ಲ ಸುದ್ದಿ ಪ್ರಚಾರ ಆಯಂಡುಂಡ್. 23ನಾಡ ಮೇಲೆ ಅನುಮಾನ ಇಲ್ಲತಂವೊ ಆಶೀರ್ವಾದ ಪಡ್ಂದವೋಂದ್ ಅಯಿಂಗಕ್ ಎಣ್ಣ್‌ಚಿ.
24ಯೋಹಾನಂಡ ಶಿಷ್ಯಂಗ ಪೋನ ಪಿಂಞ ಯೇಸು ಯೋಹಾನಂಡ ವಿಷಯತ್‍ನ ಜನಡ ಕೂಡೆ ತಕ್ಕ್ ಪರ್ಂದತ್. ಎಂತದ್‍ನ ಕಾಂಬಕಾಯಿತ್ ನಿಂಗ ಮಣಬೂಮಿಕ್ ಪೋಯಿತ್ಂಜಿರ? ಗಾಳಿಯಿಂಜ ಅಲ್ಲಾಡುವ ಪಿಲ್ಲ್‌ನ ನೋಟ್‌ವಕಾಯಿತಾ? 25ಇಲ್ಲತಪೋಚೇಂಗಿ, ಎಂತದ್‍ನ ನಿಂಗ ಕಾಂಬಕ್ ಪೋಯಿತ್ಂಜಿರ? ನಲ್ಲ ಚಾಯುಳ್ಳ ಬಟ್ಟೇನ ಇಟ್ಟಂಡುಳ್ಳ ಒರ್ ಮನುಷ್ಯನ ಕಾಂಬಕ್ ಪೋಯಿರ? ಅಲಂಕಾರತ್‍ರ ಬಟ್ಟೆ ಇಟ್ಟಿತ್ ಆಡಂಬರತ್‌ಲ್ ಬದ್‍ಕ್‍ವ ಜನಯೆಲ್ಲ ಅರಮನೇಲ್ ಉಂಡಲ್ಲ. 26ಪಿಂಞ ಎಂತದ್‍ನ ಕಾಂಬಕ್ ಪೋಯಿರ? ಪ್ರವಾದಿನ ನೋಟ್‍ವಕ್ ಪೋಯಿರ? ಅಕ್ಕು, ಅಂವೊ ಪ್ರವಾದಿಕಿಂಜಲು ಬಲ್ಯಂವೋಂದ್ ನಾನ್ ನಿಂಗಕ್ ಎಣ್ಣ್‌ವಿ.
27ನೋಟಿ, ನಾನ್ ನಾಡ ದೂತನ ನಿಂಗಕ್ಂಜ ಮಿಂಞ ಅಯಿಪಿ;
ಅಂವೊ ನೀಕ್ ಮಿಂಞ ಪೋಯಿತ್, ನೀಡ ಬಟ್ಟೇನ ತಯಾರ್ ಮಾಡ್‌ವಾಂದ್
ದೇವಡ ವಾಕ್ಯತ್‍ಲ್ ಒಳ್‍ದಿತುಳ್ಳದ್ ಇಂವೊಂಡ ವಿಷಯವೇ.#7.27 ಮಲಾಕಿ 3.1 28ಈ ಲೋಕತ್‍ಲ್ ಪುಟ್ಟ್‌ನಯಿಂಗಡಡೆಲ್ ಯೋಹಾನಕಿಂಜ ಬಲ್ಯ ಪ್ರವಾದಿ ದಾರೂ ಇಲ್ಲೆ. ಆಚೇಂಗಿಯು ದೇವಡ ರಾಜ್ಯತ್‍ಲ್ ಚೆರಿಯಂವೊನಾಯಿತುಳ್ಳಂವೊ ಅಂವೊಗಿಂಜ ಬಲ್ಯಂವೊನಾಯಿತುಂಡ್‍ೕಂದ್ ನಾನ್ ನಿಂಗಕ್ ಎಣ್ಣ್‌ವಿ. 29ಎಲ್ಲಾರು ಯೋಹಾನಂಡ ಬೋದನೆನ ಕ್‍ೕಟತ್. ಮುಕ್ಯವಾಯಿತ್ ಕಂದಾಯ ಎಡ್‌ಪ ಜನಳು ಯೋಹಾನಂಡ ಉಪದೇಶತ್‍ನ ಕ್‍ೕಟಿತ್, ದೀಕ್ಷಾಸ್ನಾನ ಎಡ್‍ತಿತ್ ದೇವ ನೀತಿಯುಳ್ಳಂವೋಂದ್ ಅರಿಕೆ ಮಾಡ್‍ಚಿ. 30ಆಚೇಂಗಿ ಫರಿಸಾಯಂಗ ಪಿಂಞ ನ್ಯಾಯಪ್ರಮಾಣತ್‍ರ ಶಾಸ್ತ್ರಿಯಂಗ, ದೇವಕ್ ಬಗ್ಗಿತ್ ನಡ್‍ಪಕ್ ಒತ್ತತೆ, ಯೋಹಾನನಗುಂಡ್ ದೀಕ್ಷಾಸ್ನಾನ ಎಡ್‌ಪ ಆಲೋಚನೆನ ಅಲ್ಲಗೆಳೆದ್‌ಚಿ.
31ಇಂಞು, ಯೇಸು: ನಾನ್ ಈ ಸಂತಾನತ್‍ರ ಜನಳ ಎಂತಾಂಗ್ ಹೋಲಿಕೆ ಮಾಡಡ್? ನಿಂಗ ಎಂತ ಮನುಷ್ಯಂಗ? 32ಈಂಗ ಗುಂಪ್ ಗುಂಪಾಯಿತ್ ಅಳ್‌ತಿತ್, ಅಯಿಂಗಳಯಿಂಗಳ ನೋಟಿತ್:
ನಂಗ ನಿಂಗಕಾಯಿತ್ ಪಾಂಗೊಳ ಊದ್‍ಚಿ,
ಆಚೇಂಗಿ ನಿಂಗ ಆಡಿತ್‌ಲ್ಲೆ.
ನಂಗ ಚಾವ್ ಪಾಟ್ ಪಾಡ್‌ಚಿ,
ನಿಂಗ ಮೊರಟಿತ್‌ಲ್ಲೇಂದ್
ಎಣ್ಣುವ ಮಕ್ಕಕ್ ಸಮವಾಯಿತುಳ್ಳಿರ. 33ಎನ್ನಂಗೆಣ್ಣ್‌ಚೇಂಗಿ, ದೀಕ್ಷಾಸ್ನಾನ ತಪ್ಪ ಯೋಹಾನ ಒಟ್ಟಿ ತಿಂಗತಂವೊನಾಯಿತ್ ದ್ರಾಕ್ಷಿರಸ ಕುಡಿಕತಂವೊನಾಯಿತ್ ಬಾತ್, ಆಚೇಂಗಿ ನಿಂಗ ಅಂವೊಂಗ್ ಕೂಳಿ ಪುಡ್‌ಚಿತುಂಡ್‍ೕಂದ್ ಎಣ್ಣಿರ.
34ಮನುಷ್ಯಕುಮಾರ ತಿಂದಂಡ್ ಕುಡಿಚಂಡಿಂಜತ್, ಅದ್ಂಗ್ ನಿಂಗ: ಅಂವೊ ತೀನಿಮಾರಿಯು, ಕುಡುಕನು, ಕಂದಾಯ ಎಡ್‌ಪಯಿಂಗಡ ಪಿಂಞ ಸಮಾಜ ಪಾಪಿಯಂಗಾಂದ್ ಎಣ್ಣುವ ಜನಡ ಸ್ನೇಹಿತಾಂದ್ ಎಣ್ಣಿರ. 35ಆಚೇಂಗಿ, ದೇವಡ ಜ್ಞಾನ, ಅಂವೊನ ನಂಬುವಯಿಂಗ ಮಾಡ್‌ವ ಕ್ರಿಯೆರ ಮೂಲಕ ಸತ್ಯವಾಪಾಂದ್ ಎಣ್ಣ್‌ಚಿ.
ಪಾಪಿಯಾನ ಒರ್ ಪೊಣ್ಣಾಳ್ ಯೇಸುರ ಮೇಲೆ ಸುಗಂದ ತೈಲತ್‌ನ ಬೂಕ್‌ನದ್
36ಒರ್ ಫರಿಸಾಯ ಯೇಸುನ ತಾಂಡಕೂಡೆ ಉಂಗಂಡೂಂದ್ ಬೋಡಿಯಂಡತ್. ಯೇಸು ಪೋಯಿತ್ ಉಂಬಕ್ ಅಳ್‌ತತ್. 37ಅಕ್ಕ ಆ ಊರ್‌ಲ್ ಪಾಪತ್‍ಲ್ ಬದ್‍ಕಿಯಂಡಿಂಜ ಒರ್ ಪೊಣ್ಣಾಳ್‌ಕ್, ಯೇಸು ಫರಿಸಾಯಂಡ ಮನೆಕ್ ಉಂಬಕ್ ಬಂದಿತುಂಡ್‍ೕಂದ್ ಗೊತ್ತಾಚಿ. ಅವ ದುಂಬ ಬೆಲೆಯುಳ್ಳ ಅಲಬಸ್ಟರ್ ಎಣ್ಣುವ ಸುಗಂದ ತೈಲತ್‌ನ#7.37 ಅಲಬಸ್ಟರ್ ಎಣ್ಣುವದ್ ಬೊಳ್‍ತ ಕಲ್ಲ್‌ಲ್ ಮಾಡ್‍ನ ಒರ್ ಕುಪ್ಪಿ. ಕೊಂಡ್ ಬಾತ್. 38ಯೇಸುರ ಬಯ್ಯ ನಿಂದಿತ್, ದುಂಬ ಮೊರಟಿತ್, ಅವಡ ಕಣ್ಣೀರ್‌ಲ್ ಯೇಸುರ ಕಾಲ್‌ನ ನಲಪಿತ್, ಆ ನೀರ್‌ನ ಅವಡ ಮಂಡೆರ ತಲ್‌ಮಿಯಿಂಜ ತ್‍ೕಟಿತ್, ಕಾಲ್‌ಕ್ ಮುತ್ತ್ ಕೊಡ್‌ತಿತ್, ಅಂವೊಂಡ ಕಾಲ್‌ಕ್ ಸುಗಂದ ತೈಲತ್‌ನ ಬೂಕ್‍ಚಿ. 39ಯೇಸುನ ಮನೆಕ್ ಕಾಕ್‍ನ ಫರಿಸಾಯ, ಇದ‌ನ್ನೆಲ್ಲ ನೋಟಿತ್, ಈ ಮನುಷ್ಯ ಒರ್ ಪ್ರವಾದಿಯಾಯಿತ್ಂಜತೇಂಗಿ, ತಾಂಡ ಕಾಲ್‌ನ ಮುಟ್ಟುವ ಈ ಪೊಣ್ಣಾಳ್ ದಾರ್‍ೕಂದ್ ಗೊತ್ತಾಪಕಿಂಜತ್; ಎನ್ನಂಗೆಣ್ಣ್‌ಚೇಂಗಿ, ಇವ ಒರ್ ಪಾಪೀಂದ್ ಅಂವೊಂಡೊಳ್‌ಲೇ ಗೇನ ಮಾಡ್‍ಚಿ.
40ಯೇಸು ಸೀಮೋನನ ಕಾಕುವಂಜಿ: ನಾನ್ ನೀಕ್ ಒರ್ ವಿಷಯ ಎಣ್ಣಂಡೂಂದ್ ಎಣ್ಣ್‌ಚಿ.
ಅದ್ಂಗ್ ಅಂವೊ: ಉಪಾದ್ಯನೇ, ಎಣ್ಣ್‍ೕಂದ್ ಎಣ್ಣ್‌ಚಿ.
41ಅಕ್ಕ ಯೇಸು: ಒರ್ ಮನುಷ್ಯಡಿಂಜ ದಂಡ್ ಜನ ಸಾಲ ಎಡ್‍ತಂಡತ್. ಒಬ್ಬ ಅಂಞೂರ್ ಬೊಳ್ಳಿರ ಪಣ, ಇಂಞೊಬ್ಬ ಐಂಬದ್ ಬೊಳ್ಳಿರ ಪಣ. 42ದಂಡಾಳ್‍ಕು ಸಾಲ ತ್‍ೕಪಕ್ ಕಯಿಂಜಿತ್‌ಲ್ಲೆ. ಸಾಲ ಕೊಡ್‍ತಂವೊ ಅಯಿಂಗ ದಂಡಾಳು ಸಾಲತ್‍ನ ಕೊಡ್‍ಪದ್ ಬೋಂಡಾಂದ್ ಮನ್ನಿಚಿಟ್ಟಿತ್ ಬುಟ್ಟ್‌ರ್‌ತ್. ಇನ್ನನೆ ಇಪ್ಪಕ, ಆ ದಂಡಾಳ್‌ಲ್ ದಾರ್‌ಕ್ ಅಂವೊಂಡ ಮೇಲೆ ದುಂಬ ಪ್ರೀತಿ ಇಪ್ಪಾಂದ್ ಎಣ್ಣೀಂದ್ ಯೇಸು ಕ್‍ೕಟತ್.
43ಅದ್ಂಗ್ ಸೀಮೋನ: ದಾರ್‌ಕ್ ದುಂಬ ಸಾಲತ್‍ನ ಬುಟ್ಟಿತ್ ಮನ್ನಿಚಿಟ್ಟತೋ ಅಂವೊನೇ ದುಂಬ ಪ್ರೀತಿ ಮಾಡ್‌ವಾಂದ್ ಎಣ್ಣ್‌ಚಿ.
ಅದ್ಂಗ್ ಯೇಸು: ನೀನ್ ಸರಿಯಾಯಿತ್ ಎಣ್ಣಿಯಾಂದ್ ಎಣ್ಣ್‌ಚಿ. 44ಪಿಂಞ ಯೇಸು ಆ ಪೊಣ್ಣಾಳ್‍ರ ಪಕ್ಕ ತಿರಿತ್ ಸೀಮೋನನ ನೋಟಿತ್: ನೀನ್ ಈ ಪೊಣ್ಣಾಳ್‍ನ ನೋಟ್‍ವಿಯ? ನಾನ್ ನೀಡ ಮನೆಕ್ ಬಪ್ಪಕ, ನೀನ್ ನಾಡ ಕಾಲ್ ಕತ್ತ್‌ವಕ್ ನೀರ್ ತಂದಿತ್‌ಲ್ಲೆ. ಆಚೇಂಗಿ ಈ ಪೊಣ್ಣಾಳ್ ಅವಡ ಕಣ್ಣೀರ್‌ಲ್ ನಾಡ ಕಾಲ್‌ನ ಕತ್ತಿತ್, ಅವಡ ತಲ್‌ಮಿಲ್ ನಾಡ ಕಾಲ್‌ನ ತ್‍ೕಟ್‍ಚಿ. 45ನೀನ್ ನಾಕ್ ಮುತ್ತ್ ತಂತ್‍ಲೆ, ಆಚೇಂಗಿ ಇವ ನಾನ್ ಒಳ್‍ಕ್ ಬಂದ ಸಮಯತ್ಂಜ ನಾಡ ಕಾಲ್‌ಕ್ ಮುತ್ತ್ ತಂದಂಡೇ ಉಂಡ್. 46ನೀನ್ ನಾಡ ಮಂಡೆಕ್ ಇಡ್‌ವಕ್ ಎಣ್ಣೆ ತಂತ್‍ಲೆ. ಇವ ಸುಗಂದ ವಾಸನೆ ಉಳ್ಳ ತೈಲತ್‌ನ ನಾಡ ಕಾಲ್‌ಕ್ ಬೂಕ್‍ಚಿ.
47ಆನಗುಂಡ್ ನಾನ್ ನೀಕ್ ಎಣ್ಣ್‌ವಿ: ಇವ ಮಾಡ್‍ನ ಪಾಪಕೆಲ್ಲ ಮನ್ನಿಪ್ಪ್ ಕ್‍ಟ್ಟ್‌ಚೀಂದ್ ಇವ ಕಾಂಬ್‍ಚಿಟ್ಟ ಪ್ರೀತಿಯಿಂಜ ಗೊತ್ತಾಪ. ದಾರ್‍ಕೆಲ್ಲ ಚೆನ್ನ ಮನ್ನಿಪ್ಪ್ ಕ್‍ಟ್ಟ್‌ಚೋ, ಅಯಿಂಗೆಲ್ಲ ಚೆನ್ನ ಮಾತ್ರ ಪ್ರೀತಿ ಮಾಡ್‌ವಾಂದ್ ಎಣ್ಣ್‌ಚಿ. 48ಪಿಂಞ ಯೇಸು ಆ ಪೊಣ್ಣಾಳ್‍ನ ನೋಟಿತ್, ನೀನ್ ಮಾಡ್‍ನ ಪಾಪಕ್ ಮನ್ನಿಪ್ಪ್ ಕ್‍ಟ್ಟ್‌ಚೀಂದ್ ಎಣ್ಣ್‌ಚಿ.
49ಉಂಬಕ್ ಅಳ್‌ತಿತ್ಂಜ ಜನ: ಪಾಪತ್‍ನ ಮನ್ನಿಪ್ಪಕ್ ಈ ಮನುಷ್ಯ ದಾರ್‍ೕಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್.
50ಆ ಪೊಣ್ಣಾಳ್‌ಕ್: ನೀಡ ನಂಬಿಕೆ ನಿನ್ನ ರಕ್ಷಣೆ ಮಾಡ್‍ಚಿ, ಶಾಂತಿಲ್ ಪೋಂದ್ ಯೇಸು ಎಣ್ಣ್‌ಚಿ.
Currently Selected:
ಲೂಕ 7: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
