ಲೂಕ 8

ಯೇಸುರ ಕೂಡೆ ಬಂದ ಪೊಣ್ಣಾಳುವ

1ಬಯ್ಯಂಜಿ, ಯೇಸು ಅಲ್ಲಿಯತ್‍ರ ಪಟ್ಟಣ ಪಿಂಞ ಗ್ರಾಮಕೆಲ್ಲಾ ಪ್ರಯಾಣ ಮಾಡಿತ್, ದೇವಡ ರಾಜ್ಯತ್‍ರ ನಲ್ಲ ಸುದ್ದಿನ ಪ್ರಚಾರ ಮಾಡಿಯಂಡಿಂಜತ್. ಅಂವೊಂಡ ಪನ್ನೆರಂಡ್ ಶಿಷ್ಯಂಗಳು ಅಂವೊಂಡ ಕೂಡೆ ಇಂಜತ್. 2ಕೂಳಿ ಪುಡ್‌ಚಿತ್ ವಾಸಿ ಆನ ಚೆನ್ನ ಪೊಣ್ಣಾಳುವಳು, ಬೋರೆ ಕಾಯಿಲೆಯಿಂಜ ವಾಸಿ ಆನ ಪೊಣ್ಣಾಳುವಳು ಇಂಜತ್. ಆ ಪೊಮ್ಮಕಂಗ ದಾರ್‍ೕಂದೆಣ್ಣ್‌ಚೇಂಗಿ: ಏಳ್ ಕೂಳಿಯ ಬುಟ್ಟಿತ್ ಪೋನ ಮಗ್ದಲ ಎಣ್ಣುವ ಮರಿಯಳು, ಸುಸನ್ನಳು, 3ಹೆರೋದ ರಾಜಂಡಲ್ಲಿ ಒರ್ ಮುಕ್ಯ ಅದಿಕಾರಿಯಾಯಿತ್ ಕೆಲಸ ಮಾಡಿಯಂಡಿಂಜ ಕೂಜ ಎಣ್ಣ್‌ವಂವೊಂಡ ಪೊಣ್ಣ್ ಯೊಹನ್ನ ಎಣ್ಣುವಯಿಂಗಳೇ. ಬೋರೆ ದುಂಬ ಪೊಣ್ಣಾಳುವಳು ಯೇಸುರ ಕೂಡೆ ಇಂಜತ್. ಈ ಪೊಮ್ಮಕ ಅಯಿಂಗಡ ಸ್ವಂತ ಆಸ್ತಿಯಿಂಜ ಯೇಸು ಪಿಂಞ ಅಂವೊಂಡ ಶಿಷ್ಯಂಗಕ್ ಸೇವೆ ಮಾಡಿಯಂಡಿಂಜತ್.

ಬಿತ್ತ್ ಇಡ್‍ವಂವೊಂಡ ಕಥೇರ ರೂಪ

(ಮತ್ತಾಯ 13.1–9; ಮಾರ್ಕ 4.1–9)

4ಅಕ್ಕ ಎಲ್ಲಾ ಪಟ್ಟಣತ್ಂಜ ದುಂಬ ಜನ ಯೇಸುರ ಪಕ್ಕ ಬಂದಂಡಿಂಜತ್. ದುಂಬ ಜನ ಬಂದಿತ್ ಕೂಡ್‍ನ ಪಿಂಞ ಕಥೇರ ರೂಪತ್‌ಲ್ ಯೇಸು ಎಣ್ಣ್‌ನದ್ ಎಂತ ಎಣ್ಣ್‌ಚೇಂಗಿ: 5ಒರ್ ಮನುಷ್ಯ ಕುರುನ ಬಿತ್ತ್‌ವಕ್ ಪೊರಟ್ ಪೋಚಿ. ಅಂವೊ ಆ ಕುರುನ ಬಿತ್ತ್‌ವಕ್ ಚಾಡ್‌ವಕ ಚೆನ್ನ ಕುರು ನಡ್‍ಪ ಬಟ್ಟೇಲ್ ಬುದ್ದತ್; ಅದ್‍ನ ಜನ ಚೌಟಿರ್‌ತ್, ಆ ಕುರುನ ಬಾನತ್‍ರ ಪಕ್ಷಿಯ ಬಂದಿತ್ ತಿಂದತ್. 6ಚೆನ್ನ ಕುರು ಪಾರೆಕಲ್ಲ್‌ರ ಮೇಲೆ ಬುದ್ದತ್. ಮೊಳಕೆ ಬಂತ್, ಪಿಂಞ ಪಸೆ ಇಲ್ಲತ ಕಾರಣ ಅದ್ ಒಣಂಗಿ ಪೋಚಿ. 7ಚೆನ್ನ ಕುರು ಮುಳ್ಳ್ ಪೊದೆಲ್ ಬುದ್ದಿತ್, ಅದ್ಂಡಕೂಡೆ ಬೊಳ್ಂದತ್, ಅನ್ನನೆ ಮುಳ್ಳ್ ಗಿಡ ಬೊಳ್ಂದಿತ್ ಅದ್‍ನ ನೆರ್‌ಕ್‌ಚಿ. ಚೆನ್ನ ಕುರು ಫಲವತ್ತಾನ ಮಣ್ಣ್‌ಲ್ ಬುದ್ದತ್. 8ಅಲ್ಲಿ ಅದ್ ಮೊಳಕೆ ಬಂತ್, ಒಂದಂಗ್ ನೂರಾಯಿತ್ ಫಲ ಕೊಡ್‍ತತ್. ಕ್‍ೕಪಕ್ ಕೆಮಿ ಉಳ್ಳಯಿಂಗ ಕ್‍ೕಳೀಂದ್ ಎಣ್ಣ್‌ಚಿ.

ಕಥೇರ ರೂಪತ್‍ರ ಉದ್ದೇಶ

(ಮತ್ತಾಯ 13.10–17; ಮಾರ್ಕ 4.10–12)

9ಅಕ್ಕ ಅಂವೊಂಡ ಶಿಷ್ಯಂಗ ನೀನ್ ಎಣ್ಣ್‌ನ ಕಥೇರ ರೂಪತ್‍ರ ಅರ್ಥ ಎಂತ್‍ೕಂದ್ ಅಂವೊಂಡ ಪಕ್ಕ ಕ್‍ೕಟತ್.

10ಅದ್ಂಗ್ ಅಂವೊ: ದೇವಡ ರಾಜ್ಯತ್‍ರ ಗುಟ್ಟ್ ನಿಂಗಕ್ ಗೊತ್ತಾಪನೆಕೆ ಮಾಡಿತುಂಡ್. ಆಚೇಂಗಿ ಬೋರೆಯಿಂಗಕ್:

ಅಯಿಂಗ ನೋಟುವ, ಆಚೇಂಗಿ ಒಂದು ಕಾಂಬುಲೆ,

ಅಯಿಂಗ ಕ್‍ೕಪ, ಆಚೇಂಗಿ ಒಂದು ಅರ್ಥ ಆಕತನೆಕೆ ಕಥೇರ ರೂಪತ್‌ಲ್ ಎಣ್ಣಿತುಂಡ್.#8.10 ಯೆಶಾಯ 6.9

ಯೇಸು ಕಥೇರ ರೂಪತ್‍ನ ವಿವರಿಚಿಡುವದ್

(ಮತ್ತಾಯ 13.18–23; ಮಾರ್ಕ 4.13–20)

11ಈ ಕಥೇರ ರೂಪತ್‍ರ ಅರ್ಥ ಎಂತ ಎಣ್ಣ್‌ಚೇಂಗಿ: ಕುರು ದೇವಡ ವಾಕ್ಯ. 12ಬಟ್ಟೇಲ್ ಬಿತ್ತ್‌ನ ಜನ, ದೇವಡ ವಾಕ್ಯತ್‍ನ ಕ್‍ೕಪ, ಆಚೇಂಗಿ ಅಯಿಂಗ ಅದ್‍ನ ನಂಬಿತ್ ರಕ್ಷಣೆ ಆಕತನೆಕೆ ಸೈತಾನ ಬಂದಿತ್ ದೇವಡ ವಾಕ್ಯತ್‍ನ ಅಯಿಂಗಡ ಹೃದಯತ್ಂಜ ಎಡ್‌ತ್‌ರ್‌ವ. 13ಪಾರೆಕಲ್ಲ್‌ರ ಮೇಲೆ ಬಿತ್ತ್‌ನ ಜನ, ದೇವಡ ವಾಕ್ಯತ್‍ನ ಕುಶೀಲ್ ಬೆರಿಯ ಸ್ವೀಕಾರ ಮಾಡ್‌ವ, ಆಚೇಂಗಿ ಅದ್ ಅಯಿಂಗಡ ಒಳ್‍ಲ್ ಆಳವಾಯಿತ್ ಬೇರ್ ಪುಡಿಕತಗುಂಡ್, ಚೆನ್ನ ಕಾಲ ಮಾತ್ರ ನಂಬುವ, ಸೋದನೆ ಬಪ್ಪಕ ಅಯಿಂಗ ಬುದ್ದ್ ಪೋಪ. 14ಮುಳ್ಳ್‌ರ ಪೊದೆಲ್ ಬಿತ್ತ್‌ನ ಜನ ದೇವಡ ವಾಕ್ಯತ್‍ನ ಕ್‍ೕಪ, ಅಕ್ಕಣೆ ಪೋಯಿತ್, ಈ ಬದ್‍ಕ್‍ರ ದುಃಖ, ಐಶ್ವರ್ಯತ್‍ರ ಬೋಗ ಪಿಂಞ ಬೋರೆ ಬೋರೆ ತರತ್‍ರ ಇಚ್ಛೆಯಿಂಜ ನೆರಿಂಗಿತ್ ಫಲ ಕೊಡ್‍ಕತೆ ಇಪ್ಪ. 15ನಲ್ಲ ಮಣ್ಣ್‌ಕ್ ಬಿತ್ತ್‌ನ ಜನ ಕುಶೀಲ್ ದೇವಡ ವಾಕ್ಯತ್‍ನ ಕ್‍ೕಟಿತ್, ಅದ್‍ನ ಅಯಿಂಗಡ ನಲ್ಲ ಪಿಂಞ ಸತ್ಯವಾನ ಹೃದಯತ್‍ಲ್ ಬೆಚ್ಚಿತ್ ತಾಳ್ಮೆಯಿಂಜ ಫಲ ಕೊಡ್‍ಪ.

ಪಾತ್ರತ್‍ರ ಅಡಿಲ್ ಬೊಳ್‍ಚ

(ಮಾರ್ಕ 4.21–25)

16ದಾರೂ ಬೊಳ್‌ಚತ್‍ನ ಕತ್ತಿತ್ ಪಾತ್ರತ್‌ಂಜ ಮುಚ್ಚ್‌ವುದೂ ಇಲ್ಲೆ, ಕಡಿಕೆರ ಅಡಿಲ್ ಬೆಪ್ಪದೂ ಇಲ್ಲೆ. ಒಳ್‍ಕ್ ಬಪ್ಪ ಜನಕ್ ಬೊಳಿ ಕಾಂಗಂಡೂಂದ್ ಅದ್‍ನ ಒರ್ ಎತ್ತರವಾಯಿತುಳ್ಳ ಬೊಳ್‍ಚ ಕಂಬತ್‍ರ ಕೊಡಿಲ್ ಬೆಪ್ಪ. 17ಪೊರಮೆ ಬಕ್ಕತೆ ಇಪ್ಪ ಗುಟ್ಟ್ ಒಂದು ಇಲ್ಲೆ, ಒಳ್‌ಪ್‌ಚ್ಚಿಟಂಡ್ ಉಳ್ಳದೆಲ್ಲ ಪೊರಮೆ ಬಪ್ಪ, ಮುಚ್ಚಿತುಳ್ಳದೆಲ್ಲಾ ಬೊಳಿಕ್ ಬಪ್ಪ. ಆನಗುಂಡ್ ನಿಂಗ ಎಂತ ಕ್‍ೕಪಿರ, ಅದ್‍ನ ಎಚ್ಚರತ್‍ಲ್ ಕ್‍ೕಳಿ. 18ಉಳ್ಳಯಿಂಗಕ್ ಇಂಞು ಕ್‍ಟ್ಟ್‌ವ, ಇಲ್ಲತಯಿಂಗಕ್ ನಾಕ್ ಚೆನ್ನ ಉಂಡ್‍ೕಂದ್ ಗೇನ ಮಾಡಿಯಂಡಿಪ್ಪದ್‍ನ ಸಹ ಎಡ್‌ತ್‌ರ್‍ವಾಂದ್ ಎಣ್ಣ್‌ಚಿ.

ಯೇಸುರ ಅವ್ವ ಪಿಂಞ ತಮ್ಮಣಂಗ

(ಮತ್ತಾಯ 12.46–50; ಮಾರ್ಕ 3.31–35)

19ಅಕ್ಕ, ಅಂವೊಂಡ ಅವ್ವನು ತಮ್ಮಣಂಗಳು ಅಂವೊಂಡ ಪಕ್ಕ ಬಾತ್. ಆಚೇಂಗಿ ದುಂಬ ಜನ ಇಂಜಾಂಗ್ ಯೇಸುರ ಪಕ್ಕ ಪೋಪಕ್ ಕಯಿಂಜಿತ್‌ಲ್ಲೆ. 20ಅಕ್ಕ, ನೀಡ ಅವ್ವ ಪಿಂಞ ತಮ್ಮಣಂಗ ನಿನ್ನ ಕಾಂಬಕಾಯಿತ್ ಪೊರಮೆ ನಿಂದಂಡುಂಡ್‍ೕಂದ್ ಯೇಸುಕ್ ಎಣ್ಣ್‌ಚಿ.

21ಅದ್ಂಗ್ ಅಂವೊ: ದಾರೆಲ್ಲಾ ದೇವಡ ವಾಕ್ಯತ್‍ನ ಕ್‍ೕಟಿತ್ ಅದ್ಂಡ ಪ್ರಕಾರ ನಡ್‍ಪ ಅಯಿಂಗಳೇ ನಾಡ ಅವ್ವ ಪಿಂಞ ಅಣ್ಣತಮ್ಮಣಂಗಾಂದ್ ಎಣ್ಣ್‌ಚಿ.

ಯೇಸು ಬಿರ್‌ಗಾಳಿನ ಶಾಂತಿ ಮಾಡ್‍ವದ್

(ಮತ್ತಾಯ 8.23–27; ಮಾರ್ಕ 4.35–41)

22ಒರ್ ದಿವಸ ಯೇಸು ತಾಂಡ ಶಿಷ್ಯಂಗಡ ಕೂಡೆ ದೋಣಿಕ್ ಪತ್ತಿತ್: ನಂಗ ಕೆರೆರ ಆಬರಿಕ್ ಪೋಕನಾಂದ್ ಎಣ್ಣ್‌ಚಿ. ಅನ್ನನೆ ಅಯಿಂಗಳು ಪೊರಟತ್. 23ದೋಣಿ ಪೋಯಂಡಿಪ್ಪಕ ಯೇಸು ವರೀರ್‌ತ್. ಒಮ್ಮಕೆ ಜೋರಾಯಿತ್ ಕೆರೆಲ್ ಬಿರ್‌ಗಾಳಿ ಬೀಜಿತ್, ದೋಣಿಲ್ ನೀರ್ ದುಂಬಿಯಂಡಿಂಜಗುಂಡ್ ಬಾರಿ ಅಪಾಯತ್‍ಲ್ ಇಂಜತ್. 24ಅಯಿಂಗೆಲ್ಲ ಅಂವೊಂಡ ಪಕ್ಕ ಪೋಯಿತ್ ಎಪ್ಪ್‌ಚಿಟ್ಟಿತ್, ಉಪಾದ್ಯನೇ, ಉಪಾದ್ಯನೇ ನಂಗ ನೀರ್‌ಲ್ ಮುಳ್‍ಗಿಯಂಡುಂಡ್‍ೕಂದ್ ಎಣ್ಣ್‌ಚಿ. ಯೇಸು ಎದ್ದಿತ್ ಗಾಳಿನ ಪಿಂಞ ಅಲೆನ ಮುಂಡತ್‌ಪ್ಪಕ್ ಆಜ್ಞೆ ಮಾಡ್‍ಚಿ. ಅಕ್ಕಣೆ, ಗಾಳಿ ನಿಂದಿತ್, ಶಾಂತಿ ಆಚಿ. 25ಯೇಸು ಅಯಿಂಗಳ ನೋಟಿತ್: ನಿಂಗಡ ನಂಬಿಕೆ ಎಲ್ಲೀಂದ್ ಕ್‍ೕಟತ್.

ಅಯಿಂಗ ಬೊತ್ತಿತ್, ಆಶ್ಚರ್ಯ ಆಯಿತ್: ಗಾಳಿಯು ಅಲೆಯು ಇಂವೊಂಗ್ ಬಗ್ಗಿತ್ ನಡ್‍ಂದಂಡುಂಡಲ್ಲ, ಈ ಮನುಷ್ಯ ದಾರಾಯಿತಿಕ್ಕೂಂದ್ ಅಯಿಂಗಯಿಂಗಳೇ ತಕ್ಕ್ ಪರ್‌ದಂಡಿಂಜ‌ತ್.

ಯೇಸು, ಕೂಳಿ ಪುಡ್‌ಚ ಮನುಷ್ಯನ ವಾಸಿ ಮಾಡ್‍ನದ್

(ಮತ್ತಾಯ 8.28–34; ಮಾರ್ಕ 5.1–20)

26ಪಿಂಞ ಗಲಿಲಾಯ ಕೆರೆರ ಆ ಬರೀರ ಗೆದರೇನರ ನಾಡ್‍ಕ್ ಪೋಚಿ. 27ಯೇಸು ದೋಣಿಯಿಂಜ ಇಳ್ಂಜದು ಕೂಳಿ ಪುಡ್‌ಚಿತುಳ್ಳ ಒರ್ ಮನುಷ್ಯ ಅಂವೊಂಗ್ ಎದ್‍ರ್‌ಲ್ ಬಂದತ್. ಅಂವೊ ದುಂಬ ದಿವಸತ್ಂಜ ಬಟ್ಟೆ ಇಡತೆ, ಮನೆಲ್ ವಾಸ ಮಾಡತೆ, ತೂಟ್‌ಂಗಳತ್‌ಲ್ ವಾಸ ಮಾಡಿಯಂಡಿಂಜತ್. 28ಆ ಕೂಳಿ ಪುಡ್‌ಚ ಮನುಷ್ಯ ಯೇಸುನ ಕಂಡದು ಜೋರಾಯಿತ್ ಕೂತ್ ಕೊಡ್‌ತಿತ್, ಯೇಸುರ ಕಾಲ್‌ಕ್ ಬೂವಂಜಿ: ದೇವಾದಿ ದೇವಡ ಮೋಂವೊನಾನ ಯೇಸುವೇ, ನನ್ನಗುಂಡ್ ನೀಕ್ ಎಂತಾಂಡು? ನಾಕ್ ದಯಬೆಚ್ಚಿತ್ ಶಿಕ್ಷೆ ತರತೇಂದ್ ಎಣ್ಣ್‌ಚಿ. 29ಎನ್ನಂಗೆಣ್ಣ್‌ಚೇಂಗಿ, ಯೇಸು ಅಂವೊನ ಪುಡ್‍ಚಿತ್ಂಜ ಕೂಳಿಕ್: ನೀನ್ ಅಂವೊನ ಬುಟ್ಟಿತ್ ಪೋಂದ್ ಆಜ್ಞೆ ಮಾಡಿತ್ಂಜತ್. ಆ ಕೂಳಿ ದುಂಬ ಕಾಲತ್ಂಜ ಇಂವೊನ ಪುಡ್‌ಚಿತ್ಂಜತ್. ಆ ಮನುಷ್ಯನ ಸರ್ಪಣಿಲ್ ಕೈಕಾಲ್‌ನ ಕೆಟ್ಟಿತ್ ಇಟ್ಟತೇಂಗಿಯು ಸರ್ಪಣಿನ ಪೊಳಿಪಂಜಿ, ಆ ಕೂಳಿ ಅಂವೊನ ಮಣಬೂಮಿಕ್ ದೌತ್‍ವಕಿಂಜತ್. 30ಅಂವೊನ ನೋಟಿತ್: ನೀಡ ಪೆದ ಎಂತ್‍ೕಂದ್ ಕ್‍ೕಟತ್.

ಅಂವೊ: ನಾಡ ಪೆದ ಲೇಗಿಯೊನ್#8.30 ಲೇಗಿಯೊನ್ ಎಣ್ಣ್‌ಚೇಂಗಿ, ಸುಮಾರ್ ಆರಾಯಿರ ಸಿಪಾಯಿಂಗಡ ಕೂಟಾಂದ್ ಅರ್ಥ. ಎಣ್ಣಿತ್ ಎಣ್ಣ್‌ಚಿ. ಸುಮಾರ್ ಕೂಳಿಯ ಅಂವೊಂಡ ಒಳ್‍ಲ್ ಇಂಜಾಂಗ್ ಅಂವೊ ಇನ್ನನೆ ಎಣ್ಣ್‌ಚಿ. 31ಅಯಿಂಗಳ ನರಕಕ್ ಅಯಿಪಕ್ ಆಜ್ಞೆ ಮಾಡತೇಂದ್ ಬೋಡಿಯಂಡತ್. 32ಅಕ್ಕ, ಕುಂದ್‌ರ ಪಕ್ಕ ದುಂಬ ಪಂದಿಯ ಮೇಯಿಜಂಡ್ ಇಂಜತ್. ಆ ಕೂಳಿಯ, ಆ ಪಂದಿಯಡ ಒಳ್‍ಕ್ ಪೋಪಕ್ ಅನುಮತಿ ಕೊಡ್‍ೕಂದ್ ಯೇಸುನ ಬೋಡಿಯಂಡತ್. ಅಂವೊನು ಅಯಿಂಗಕ್ ಅನುಮತಿ ಕೊಡ್‍ತತ್. 33ಅನ್ನನೆ ಕೂಳಿಯ ಆ ಮನುಷ್ಯಂಡ ಮೇಲ್ಂಜ ಬುಟ್ಟ್ ಪೋಯಿತ್ ಪಂದಿಯಡ ಒಳ್‍ಕ್ ಕೂಡಿಯಂಡತ್; ಅಕ್ಕ, ಆ ಎಲ್ಲಾ ಪಂದಿಯಳು ಓಡಿ ಪೋಯಿತ್ ಅಲ್ಲಿಂಜ ನೇರೆ ಕೆರೆಕ್ ಬುದ್ದಿತ್ ಮುಳ್‍ಗಿ ಚತ್ತ್ ಪೋಚಿ. 34ಪಂದಿಯಳ ಮೇಪ ಜನ ಇದ್‍ನ ಕಂಡಿತ್ ಓಡಿ ಪೋಯಿತ್ ಪಟ್ಟಣತ್‍ಲ್ ಪಿಂಞ ಸುತ್ತ್‌ಮುತ್‍ಲುಳ್ಳ ಎಲ್ಲಾರ್‌ಕು ಈ ಸುದ್ದಿನ ಎಣ್ಣ್‌ಚಿ. 35ಅಕ್ಕ ಜನ ಎಲ್ಲಾ ಎಂತ ಆಚೀಂದ್ ನೋಟ್‍ವಕ್ ಯೇಸುರ ಪಕ್ಕ ಬಾತ್, ಅಕ್ಕ ಆ ಕೂಳಿ ಪುಡ್‌ಚ ಮನುಷ್ಯಂಡ ಬುದ್ದಿ ಚಾಯಾಯಿತ್, ಮೇಲ್‌ಕ್ ಬಟ್ಟೆ ಇಟ್ಟಿತ್ ಯೇಸುರ ಕಾಲ್‍ರ ಅಡಿಕ್ ಅಳ್‌ತಿತ್ ಇಂಜಾನ ಕಂಡ್, ಪೋಡಿ ಆಚಿ. 36ಇದ್‍ನ ಕಂಡ ಜನ, ಬೋರೆ ಜನಕೆಲ್ಲಾ ಕೂಳಿಪುಡ್‌ಚಂವೊಂಡ ವಿಷಯತ್‍ನ ಅರಿಚಿಟ್ಟತ್. 37ಅಕ್ಕ ಆ ಪ್ರಾಂತ್ಯತ್‍ರ ಜನ ನೀನ್ ಇಲ್ಲಿಂಜ ಪೋಯಿರ್, ನಂಗಕ್ ದುಂಬ ಪೋಡಿ ಆಯಂಡುಂಡ್‍ೕಂದ್ ಯೇಸುಕ್ ಎಣ್ಣ್‌ಚಿ. 38ಕೂಳಿ ಪುಡ್‌ಚಿತ್ಂಜಂವೊ ಯೇಸುಕ್, ನಾನ್ ನೀಡ ಕೂಡೆ ಬಪ್ಪೀಂದ್ ಎಣ್ಣ್‌ಚಿ.

39ಆಚೇಂಗಿ ಯೇಸು: ನೀನ್ ನೀಡ ಮನೆಕ್ ಪೋ. ಅಲ್ಲಿ ಎಲ್ಲಾರ್‌ಕು ದೇವ ನೀಕ್ ಎಂತ ಮಾಡ್‍ಚೀಂದ್ ಎಣ್ಣ್‍ೕಂದ್ ಅಂವೊನ ಅಯಿಚತ್. ಆ ಮನುಷ್ಯ, ಯೇಸು ಅಂವೊಂಗ್ ಎಂತ ಮಾಡ್‍ಚೀಂದ್ ಅಲ್ಲಿಯತ್‍ರ ಪಟ್ಟಣಕ್ ಪೋಯಿತ್ ಎಲ್ಲಾರ್‌ಕು ಎಣ್ಣ್‌ಚಿ.

ಚತ್ತ್‌ಪೋನ ಮೂಡಿ ಪಿಂಞ ಸೌಕ್ಯ ಇಲ್ಲತ ಪೊಣ್ಣಾಳ್

(ಮತ್ತಾಯ 9.18–26; ಮಾರ್ಕ 5.21–43)

40ಯೇಸು ಕೆರೆರ ಆಬರಿಕ್ ಪೋಪಕ ಎಲ್ಲಾರು ಯೇಸುಕ್ ಪಾರಕಾತಂಡ್ ಇಂಜತ್. ಅಂವೊನ ಕುಶೀಲ್ ಸ್ವಾಗತ ಮಾಡ್‍ಚಿ. 41ಅಕ್ಕ ಸಬಾಮಂದಿರತ್‍ರ ಅದಿಕಾರಿಯಾಯಿತ್ಂಜ ಯಾಯೀರ ಎಣ್ಣುವ ಒರ್ ಮನುಷ್ಯ ಬಂದಿತ್ ಯೇಸುರ ಕಾಲ್‌ಕ್ ಬೂವಂಜಿ, ಪನ್ನೆರಂಡ್ ಬಯಿತ್ ಉಳ್ಳ ತಾಂಡ ಒರೇ ಮೋವ ದುಂಬ ಕಾಯಿಲೆ ಬಂದಿತ್ ಚಾವನೆಕೆ ಉಂಡ್, ನಿಂಗ ನಾಡ ಮನೆಕ್ ಬಾರಿ ಎಣ್ಣಿಯಂಡ್ ಬೋಡಿಯಂಡತ್. ಯೇಸು ಅನ್ನನೆ ಅಂವೊಂಡ ಕೂಡೆ ಮನೆಕ್ ಪೋಪಕ ಅಲ್ಲಿ ದುಂಬ ಜನ ಇಂಜಗುಂಡ್, ಜನ ಅಂವೊನ ನೆರ್‌ಕ್‌ಚಿ. 42ಅಲ್ಲಿ ಒರ್ ಪೊಣ್ಣಾಳ್ ಪನ್ನೆರಂಡ್ ಕಾಲತ್ಂಜ ಚೋರೆ ಪೋಪ ರೋಗತ್‍ಲ್ ಕಷ್ಟಪಟ್ಟಂಡಿಂಜತ್. 43ವೈದ್ಯಂಡ ಪಕ್ಕ ಪೋಯಿತ್ ದುಂಬ ಖರ್ಚಿ ಮಾಡಿತು, ದಾರ್‌ಕು ಅವಳ ವಾಸಿ ಮಾಡ್‌ವಕ್ ಕಯಿಂಜಿತ್‌ಲ್ಲೆ. 44ಅವ ಯೇಸುರ ಬಯ್ಯ ಬಂದಿತ್ ಯೇಸುರ ಬಟ್ಟೇರ ಒರ್ ತುದಿನ ಮುಟ್ಟ್‌ಚಿ; ಅಕ್ಕನ್ನೆ ಅವಡ ಚೋರೆ ಪೋಪ ಕಾಯಿಲೆ ನಿಂದ್ ಪೋಚಿ.

45ಅಕ್ಕ ಯೇಸು: ದಾರ್ ನನ್ನ ಮುಟ್ಟಿಯೇಂದ್ ಕ್‍ೕಟತ್.

ಅಕ್ಕ: ನಂಗಕ್ ಗೊತ್ತಿಲ್ಲೇಂದ್ ಜನ ಎಣ್ಣ್‌ಚಿ.

ಪೇತ್ರ ಪಿಂಞ ಅಂವೊಂಡ ಕೂಡೆ ಇಂಜಯಿಂಗ: ಉಪಾದ್ಯನೇ, ದುಂಬ ಜನ ನಿನ್ನ ನೆರ್‌ಕಿಯಂಡ್ ಉಂಡ್ ಪಿಂಞ ದಾರ್ ನನ್ನ ಮುಟ್ಟಿಯೇಂದ್ ಎನ್ನನೆ ಕ್‍ೕಪಿಯಾಂದ್ ಕ್‍ೕಟತ್.

46ಅದ್ಂಗ್ ಯೇಸು: ಆಚೇಂಗಿ ನನ್ನ ದಾರೋ ಮುಟ್ಟಿಯತ್, ನಾಡ ಮೇಲ್ಂಜ ಶಕ್ತಿ ಪೊರಟಿತ್ ಪೋನನೆಕೆ ಆಚಿ. 47ನನ್ನ ಕಂಡ್‌ಪುಡ್‌ಚಿರ್‌ತ್ ಎಣ್ಣಿಯಂಡ್ ಆ ಪೊಣ್ಣಾಳ್‌ಕ್ ಗೊತ್ತಾಚಿ. ಅವ ನಡ್‍ಗಿಯಂಡ್ ಬಂತ್ ಯೇಸುರ ಕಾಲ್‌ಕ್ ಬುದ್ದಿತ್ ಎಲ್ಲಾಡ ಮಿಂಞತ್‍ಲೇ ಅವ ಅಂವೊನ ಮುಟ್ಟ್‌ನ ಕಾರಣ, ಅವಡ ಕಾಯಿಲೆರ ವಿಷಯ, ಎನ್ನನೆ ಕಾಯಿಲೆ ವಾಸಿ ಆಚೀಂದ್ ಎಲ್ಲಾ ವಿಷಯತ್‍ನ ಯೇಸುಕ್ ಎಣ್ಣ್‌ಚಿ.

48ಯೇಸು ತಿರಿತ್ ಅವಳ ನೋಟಿತ್: ನಾಡ ಮೋಳೆ, ದೈರ್ಯ ಎಡ್‌ತ, ನೀಡ ನಂಬಿಕೆ ನಿನ್ನ ವಾಸಿ ಮಾಡ್‍ಚಿ, ನೀನ್ ಚಾಯಿತೆ ಶಾಂತಿಲ್ ಪೋಂದ್ ಎಣ್ಣ್‌ಚಿ.

49ಯೇಸು ಇನ್ನನೆ ತಕ್ಕ್ ಪರ್‌ದಂಡ್ ಇಪ್ಪಕ ಯಾಯೀರಂಡ ಮನೇಯಿಂಜ ಒಬ್ಬ ಬಂದಿತ್: ನೀಡ ಮೋವ ಚತ್ತ್ ಪೋಚಿ! ಯೇಸುಕ್ ಇಂಞು ತೊಂದರೆ ಕೊಡ್‌ಕತೇಂದ್ ಎಣ್ಣ್‌ಚಿ.

50ಯೇಸು ಇದ್‍ನ ಕ್‍ೕಟಿತ್: ನೀನ್ ಬೊತ್ತತೆ, ನನ್ನ ನಂಬ್, ಕುಂಞಿ ಚಾಯಾಪಾಂದ್ ಯಾಯಿರಂಗ್ ಎಣ್ಣ್‌ಚಿ. 51ಯೇಸು ಯಾಯೀರಂಡ ಮನೆಕ್ ಪೋಯಿತ್, ಪೇತ್ರ, ಯೋಹಾನ, ಯಾಕೋಬ ಪಿಂಞ ಕುಂಞಿರ ಅಪ್ಪವ್ವನ ಬುಟ್ಟಿತ್ ಬೋರೆ ದಾರ್‌ನು ಅಂವೊಂಡ ಕೂಡೆ ಒಳ್‍ಕ್ ಪೋಪಕ ಬುಟ್ಟಿತ್‌ಲ್ಲೆ. 52ಎಲ್ಲಾರು ಕಂಞಿಕಾಯಿತ್ ದುಃಖಿಚಿಟ್ಟಂಡು ಮೊರಟಂಡು ಇಂಜಾನ ಕಂಡಿತ್, ಕುಂಞಿ ವರಿಯಂಡ್ ಉಂಡ್ ದಾರೂ ಮೊರಡತಿ ದುಃಖಪಡತೀಂದ್ ಯೇಸು ಎಣ್ಣ್‌ಚಿ. 53ಅಯಿಂಗ ಎಲ್ಲಾರ್‌ಕು ಕುಂಞಿ ಚತ್ತ್ ಪೋಚೀಂದ್ ಗೊತ್ತಾನಗುಂಡ್ ಯೇಸುರ ತಕ್ಕ್‌ಕ್ ಅಯಿಂಗ ಎಲ್ಲಾರು ತೆಳ್‍ಚತ್. 54ಆಚೇಂಗಿ ಯೇಸು ಅವಡ ಕೈಯಿನ ಎಡ್‍ತಿತ್ ಕುಂಞಿನ ಏಳ್‍ೕಂದ್ ಎಣ್ಣ್‌ಚಿ. 55ಅವಡ ಜೀವ ಪುನಃ ಬಂತ್ ಅಕ್ಕನೆ ಅವ ಎದ್ದ್‌ಚಿ. ಯೇಸು ಕುಂಞಿಕ್ ಎಂತೇಂಗಿ ತಿಂಬಕ್ ಕೊಡೀಂದ್ ಎಣ್ಣ್‌ಚಿ. 56ಕುಂಞಿರ ಅಪ್ಪವ್ವಂಗಕ್ ಆಶ್ಚರ್ಯ ಆಚಿ. ಯೇಸು ಅಯಿಂಗಕ್ ಈ ವಿಷಯತ್‍ನ ದಾರ್‌ಕು ಎಣ್ಣ್‌ವಕ್ಕಾಗಾಂದ್ ಎಣ್ಣ್‌ಚಿ.

Currently Selected:

ಲೂಕ 8: ಕೊಡವ

Highlight

Copy