Ko fɔlɔfɔlɛ 26

Isiyaka nun Abimelɛki

1Kɔnkɛ donta jamanɛ la, Iburahima jamanɛ kɔnkɛ anun kɛ kɔnkɛ, anu ma ma dɔndɔ la. Wo butɔ, Isiyaka tagata Filisiti kaanu la mansa Abimelɛki bata, Gerari saa tɔ. 2Alatala ka a yɛtɛ labɔɔ Isiyaka ma, a ka a fɔ a ye, a ko: «I kana jigi Misira; n be jamanɛ min yitala i la, i si to ɲɔ le. 3I si wagati do latanbi kɛ jamanɛ tɔ. N si to i fɛ n ni barikɛ sa i la ko tɔ. N si wo dula bɛ dii i nun i bɔnsɛnu ma, alako n ni n na lahire dalafa, n ka n kali min na i baaba Iburahima ye. 4N si i bɔnsɛ lasiya iko loolenu be siyaren ki min na kantɔ, n si wo duge bɛ dii anu ma. Dunuya mɔgɛ min bɛ be duge kunma, a bɛ si hɛra sɔtɔ i bɔnsɛnu fɛ, 5bayi Iburahima bata n na kuma bita, a ka n na yamɔre labatu, anun n na sariyanu. N ka min fɔ a ye, a ka wo bɛ labatu.» 6Wo butɔ, Isiyaka sigita Gerari.

7Ɲɔ mɔgɛnu ka Isiyaka maɲininka a la muse la ko la, a ka a fɔ a ko a dɔgɔ musuma le. A ma suusɛ a fɔla anu ye a la muse le mu Rebeka la, a be kilanden ɲɔ mɔgɛnu kana a faga a la muse la ko la, bayi a kɛɲa bɛnta. 8Isiyaka la mɛreŋɛ Gerari, lun do, Filisiti kaanu la mansa Abimelɛki ka a ɲa labɔɔ a la wundare la, a ka Isiyaka nun a la muse Rebeka yen anu be tolonna. 9Abimelɛki ka Isiyaka kele, a ka a fɔ a ye, a ko: «I la muse yati le mu. I ka a fɔ mɔ ye fenna i dɔgɔ musuma le mu?» Isiyaka ko: «N ka wo fɔ kilaŋɛ le la alako anu kana n faga a la ko la.» 10Abimelɛki ko: «I ka fen ma mɔ la ka? Donden mɔgɛ do ma bɔɔ n na jama tɛma a ni kafu i la muse fɛ. Wo tɛmuɛ ile la ko bata a ma mɔ bata tiɲare ma.» 11Abimelɛki ka a fɔ a la jama bɛ ye, a ko: «Mɔgɔ min tini maga Isiyaka la, ka wo ma a la muse la, n si naa wo tigi faga.»

12Wo saŋɛ la, Isiyaka ka sɛnɛ sa wo jamanɛ tɔ. Alatala ka barikɛ sa a la sɛnɛ tɔ: a ka min sɛnɛ a ka wo ɲɔgɔn kɛmɛ tɛgɛ. 13Isiyaka ka harige sɔtɔ, a la harige sɔtɛ tota takafula, han a mata banná belebele la. 14Kolofen lanma nun a banba mɔɔle bɛ be a bolo, joŋɛnu tugun siyama be a bolo. Wo butɔ, Filisiti kaanu ka a bɛsɛnkɔnnɛya.

15Wolo ka a ma, a baaba Iburahima la joŋɛnu ka kɔlɔŋɛnu minnu soe a jamanɛ, anu ka bangue sa wo kɔlɔŋɛnu bɛ butɔ, anu ka anu dese. 16Abimelɛki ka Isiyaka kele, a ka a fɔ a ye, a ko: «I ni bɔɔ mɔ bata yan. I harige sɛnbɛ kolo mɔ tɛŋɛ ko.» 17Isiyaka bɔɔta ɲɔ, a tagata to Gerari dugula, a sabatita ɲɔ. 18Anu ka kɔlɔŋɛnu soe Iburahima jamanɛ wo dula le tɔ. A la fagareŋɛ kɔma, Filisiti kaanu nata wo kɔlɔŋɛnu dese. Isiyaka la kereŋɛ wo dula tɔ ɲɔ, a ka wo kɔlɔŋɛnu bɛ tabɔɔ. A baaba ka tɔgɛ min sa anu la, Isiyaka ka wo tɔgɔ dɔndɛ le sa anu la. 19Lun do, Isiyaka la joŋɛnu ka kɔlɔŋɛ do soe dugula, anu keta tenge ma. 20Kolofen kantalanu nata bɔɔla Gerari, anu ka Isiyaka la kolofen kantalanu kɛlɛ, anu ka a fɔ, anu ko: «Kɛ tenge mu mɔ tɛŋɛ le la.» Isiyaka ka wo kɔlɔŋɛ tɔgɔ sa «Esɛki», bayi anu kɛlɛta a kunma. 21Isiyaka la mɔgɛnu ka do tugun soe, kɔnɔ Gerari kaanu nata anu ka kɛlɛ ma wo tugun kunma. Isiyaka ka wo tɔgɛ sa «Setani». 22A bɔɔta wo dula tɔ, a tagata dula do tɔ a ka kɔlɔŋɛ do tugun soe ɲɔ. Mɔgɔ yo ma anu kɛlɛ wo fɛ. Isiyaka ka wo tɔgɔ sa «Rehoboti», bayi a ko: «Kɔtɛ Alatala bata mɔ hɔrɔya. Wo mɔ si sɔnɔya sɔtɔ le kɛ duge tɔ.»

23Isiyaka bɔɔta ɲɔ a tagata Bɛri-Seba. 24Alatala ka a yɛtɛ labɔɔ a ma wo sue tɔ, a ka a fɔ a ye, a ko:

«Nde le mu i baaba Iburahima la Ala la;

N be i fɛ, wo butɔ, i kana kilan.

N si barikɛ sa i la ko tɔ n ni i bɔnsɛ lasiya,

n na jondeŋɛ Iburahima la ko la.»

25Isiyaka ka sarika bintandula ɲiɲa a ka Alatala batu. A ka a la tanta sɔ wo dula tɔ, a la joŋɛnu ka kɔlɔŋɛ soe ɲɔ.

26Abimelɛki nun a la malasiilá Ahusati anun a la kɛlɛ ma kuntige Pikoli bɔɔta Gerari, anu nata Isiyaka fɛlɛ. 27Isiyaka ka anu maɲininka, a ko: «Wagati do tanbita, wo ka n kɔn de, wo ka n bee wo bata. Fen de be a maren wo be naren n bata?» 28Anu ka a jaabi, anu ko: «Mɔ bata a yen Alatala be i fɛ. Wolo ka a ma mɔ ka a fɔ mɔ ni na i bata mɔ ni mɔ lakali ɲɔgɔn ye. Mɔ be naren wolo la. Kɔtɛ, wo mɔ lahire kiti ɲɔgɔn tɛma. 29I kali mɔ ye ka a fɔla i te ko koroŋɛ ma mɔ la, iko mɔle tugun to ma i bita bita ɲa koroŋɛ la. Mɔ ka ko ɲinma tun de ma i ye. Mɔ ka i boloka, i tagata hɛra tɔ. Kɔtɛ i bata ma Alatala la dubadeŋɛ la.» 30Wo butɔ, Isiyaka ka dɔmɔ ɲinma siyama ɲiɲa anu ye, anu ka dɔmɔre ma anu ka je min. 31Wo saguma piri anu wulita, anu ka anu kali ɲɔgɔn ye. Wo la bɔɔreŋɛ a la, Isiyaka saarata anu la. Anu bɔɔta hɛra butɔ, anu tagata.

32Awa, wo lun dɔndɛ tɔ, Isiyaka la joŋɛnu bɔɔta kɔlɔn soedula anu nata a fɔ a ye, anu ko: «Mɔ bata kɔlɔŋɛ soe mɔ bata ke je ma.» 33Isiyaka ka wo kɔlɔŋɛ tɔgɔ sa Seba, wo be a fɔren de «Kalire». Wolo be a maren wo saa be tɔgɔ fɔla han bi Bɛri-Seba.

Esayu la musu fila

34Esayu la sɔtɛ to ka san bi naani bɔɔ, a ka Bɛri la den musereŋɛ Yudita futu. Bɛri mu Hɛti kaa le la. Wo kɔma, a ka Elɔn na den musereŋɛ Basimati tugun futu. Elɔn tugun mu Hɛti kaa le la. 35Wo musu fila la ko ka Isiyaka nun Rebeka nɛ tɔɔrɔ koola.

Currently Selected:

Ko fɔlɔfɔlɛ 26: MOG

Highlight

Copy