Yaya 18

Isa bita koe

1Isa to banta wo kumanu fɔla wagate min tɔ, a nun a la talibenu bɔɔta anu tɛgɛta Kidirɔn kɔɔ fole la. Wo ka a taran, sunte do be ɲɔ, anu donta wo butɔ. 2Awa, Judasi min be naala a janfala, ale tugun ka wo dula lɔn, bayi Isa nun a la talibenu darita madɛnna le ɲɔ. 3Sarika lakela kuntigenu nun Farisinu ka kɔsɔbilenu don Judasi bolo. A mɛn ka Rɔmu kaanu sɔɔri kuruŋɛ banba sɔtɔ. Lanpuenu be anu bolo anun ta lɔgɛnu anun kɛlɛmafeŋɛnu. Awa, Judasi ka wonu bɛ doni a fɛ sunte tɔ. 4Isa to ka a lɔn min be naala a masɔtɔla, a bɔɔta a ka a fɔ anu ye, a ko: «Wo be ɲɔmɔ ɲinila?» 5Anu ka a jaabi: «Isa Nasarɛti kaa.» A ko: «Nde le mu ka.» Judasi min be a janfala, wo tugun be sɔren anu tɛma. 6Isa to ka a fɔ anu ye: «Nde le mu ka», anu ka anu masagi kɔma, anu boeta duge tɔ. 7A mɛn ka anu maɲininka tugun: «Wo be ɲɔmɔ ɲinila?» Anu ko: «Isa Nasarɛti kaa.» 8Isa ka anu jaabi, a ko: «N ɲan bata a fɔ wo ye, nde le mu ka. Wo butɔ, ka wo be nde le ɲinila, wo n na kɛ talibenu kan to ɲɔ, anu ni taga.» 9A ka wo fɔ le, alako a la kuma ni lakamali, a ka min fɔ nun,#18:9 Kɛ kitabue sora 6, haaya 39 anun sora 17, haaya 12. a ko aa a Baaba ka min bɛ don a bolo, hali dɔndɔ ma sama anu ɲaama. 10Wo ka a taran, faŋɛ be Simɔn Piyɛri bolo. A ka a labɔɔ a laa tɔ, a ka joŋɛ do bolo ɲinma tole tɛgɛ a la. Wo joŋɛ tɔgɔ le Maliku. A mu sarika lakela kuntigi banba la joŋɛ le la. 11Awa, Isa ka a fɔ Piyɛri ye, a ko: «I la faŋɛ don a laa tɔ. N Baaba be ɲagankata min nagiriren n ɲɛ, fɔ n ni sɔn wo la.»

Isa doni koe Hanasi nun Kayifa dula

12Awa, sɔɔri kuruŋɛ nun anu la mansa banba, nun Yahudenu la kɔsɔbilenu ka Isa bita, ka a kiti. 13Anu ka a doni Hanasi fɔlɔ dula, bayi Hanasi la den musereŋɛ be sigiren Kayifa ye. Wo ka a taran, ale Kayifa le mu sarika lakela kuntigi banba la wo saŋɛ la. 14Ale Kayifa le ka kɛ malase dii nun Yahudenu ma, a ko: «Mɔgɔ dɔndɔ la fagala jama la ko la, wolo fisa.»#18:14 Kɛ kitabue sora 11, haaya 50.

Piyɛri ka a yɛtɛ lasama Isa ma ki min na

15Simɔn Piyɛri nun talibe dɔndɔ ka Isa jokki. Wo talibe mu sarika lakela kuntigi banba lɔnɲɔgɛ le la. Wolo ka a ma, wo talibe nɔta donna sarika lakela kuntigi banba la boŋɛ butɔ, anu ka Isa ladon ka min na. 16Kɔnɔ Piyɛri kan tota sɔren bara tɔ le, bonda kɛnna. Wo talibe doe, min mu sarika lakela kuntigi banba lɔnɲɔgɛ la, wo tagata kuma muse ye min be bonda kantala, a ni Piyɛri ladon. 17Piyɛri la dondeŋɛ, wo muse bonda kantalá ka a fɔ a ye: «Ale Isa la talibe do ma ile tugun na ba?» Piyɛri ka a jaabi: «Ale ma nde la de!» 18Wo ka a taran, joŋɛnu anun kɔsɔbilenu be ta saren kenbue tɔ, bayi kima be bɔɔla. Anu tota anu balala ɲɔ. Piyɛri tugun ka a madon anu la, a tota sɔren ɲɔ a be a balala.

Sarika lakela kuntigi banba la Isa maɲininka koe

19Wo tɛmuɛ, sarika lakela kuntigi banba ka Isa maɲininka a la talibenu nun a la karaŋɛ kɛɲa ma. 20Isa ka a jaabi, a ko: «Nde bata kuma fɔ a beeyareŋɛ la jama bɛ ye. N be kɛnɛ mɔgɛnu karanna kawandi ma boŋɛnu butɔ, anun Ala batu boŋɛ le tɔ, Yahudenu bɛ be madɛnna ka min na; n ma fenfen fɔ dogoŋɛ tɔ. 21Wo butɔ, i be n maɲininkala fenna? Minnu ka n kulɛ mɔɛ, wonu maɲininka: nde ka min fɔ anu ye, ande ka wo lɔn.» 22Isa to banta wo fɔla, kɔsɔbile minnu be sɔren ɲɔ wonu dɔndɔ ka a bantilan, a naata na a fɔ: «I be sarika lakela kuntigi banba jaabila ɲɔgɔnna le ba?» 23Isa ka a jaabi, a ko: «Ka n ka kuma koroŋɛ le fɔ, i ni wo kuma koroŋɛ yita. Kɔnɔ ka kuma ɲinma le, i be n bantilanden fenna?» 24Awa, wo ɲininkare ban kɔma, Hanasi ka a kitireŋɛ lasanba sarika lakela kuntigi banba Kayifa ma.

Piyɛri a yɛtɛ lasama koe Isa ma tugun

25Wo wagate ma, han bi Simɔn Piyɛri be sɔren ɲɔ, a be a balala. Wo butɔ, anu ka fɔ a ye: «Isa la talibe do ma ile tugun na ba?» Kɔnɔ Piyɛri ka sɔsɔre ma, a ko: «Nde ma de!» 26Sarika lakela kuntigi banba la joŋɛ do be ɲɔ. Piyɛri ka wolo bareŋɛ tole tɛgɛ. Wo ka a fɔ Piyɛri ye: «N ma i yen de nun sunte tɔ, wo nun Isa?» 27Piyɛri mɛn ka sɔsɔre ma tugun. Dontoŋɛ keketa kisanna.

Isa makiiti koe Pilati bata

28Anu ka Isa labɔɔ Kayifa dula saguma piri, anu ka a doni gominɛ bata. Kɔnɔ Yahudenu to si naa Hɔrɔya Sale dɔmɔre ma, ande ma don ɲɔ butɔ, alako anu kana kɔ́sɛ́ sɔtɔ. 29Wolo mu, mansa Pilati bɔɔta, a ka anu taran bara tɔ, a ka anu maɲininka: «Wo be kɛ kaye siɲɛren fen na ko la?» 30Anu ka a jaabi, anu ko: «Ka kɛ kaye ma ko koroŋɛ le ma nun, mɔ te na a don i bolo nun.» 31Pilati ka a fɔ anu ye, a ko: «Wole ká a doni, wo ni a makiiti, wo la sariya kɛɲa ma.» Yahudenu ka a fɔ a ye: «A bele dagɛren mɔ ye mɔ ni mɔgɛ makiiti han a ni faga.» 32Wo butɔ, anu ka Isa la kuma lakamali ɲɔgɔnna le, a to ka a faga ɲa fɔ.#18:32 Kɛ kitabue sora 12, haaya 32-33.

33Pilati mɛn donta a la mansa boŋɛ butɔ, a ka Isa makele. A ka a maɲininka, a ko: «Ile le mu Yahudenu la mansa la ba?» 34Isa ka a jaabi, a ko: «Ile yɛtɛ le be wo miraren ba, ka mɔgɔ donu le be n na ko fɔren i ye?» 35Pilati ka a jaabi, a ko: «Bɔ, Yahude le mu nde la ba? I siiɲɔgɛnu nun sarika lakela kuntigenu le bata i don n bolo. I nɔn ka fen de ma?» 36Isa ka a jaabi, a ko: «N tɛn mansaya ma kɛ dunuyanɛŋɛ la. Ka n tɛn mansaya mu kɛ dunuya yannɛŋɛ le la nun, n na kɛlɛ malanu si kɛlɛ ma n ɲɛ le nun, alako n kana to Yahudenu sagoe tɔ. Kɔnɔ kɔtɛ n tɛn mansaya ma yannɛŋɛ la.» 37Pilati ka a fɔ a ye: «Yaga, mansa le mu i la?» Isa ka a jaabi, a ko: «Ile yati bata a fɔ, ka a fɔla mansa le mu n na. N nata dunuya, alako le n ni ma tɔɲa seede la, iyon, n sɔtɔta wolo la. Min bɛ be tɔɲa fɛ, wonu si anu tolomasɔ le n na kuma la, ka a bita.» 38Pilati ka a fɔ a ye, a ko: «Fen mu tɔɲa la?»

Isa makiiti koe han a la faga

Pilati to banta wo fɔla, a mɛn tabɔɔta bara tɔ, a ka Yahude kuntigenu taran, a ka kuma fɔ anu ye: «Nde ma fenfen koron yen kɛ kaye la, a si makiiti min na. 39Kɔnɔ n be dariren de san yo san Hɔrɔya Sale, n si gelemanɛ dɔndɔ boloka le wo ye. Awa, wo be diren de, n ni Yahudenu la mansa boloka wo ye ba?» 40Anu mɛn ka sɔnkɛ layɛlɛ, anu ko: «Ade! Kɛ ma! I ni Barabasi le boloka!» Adun, Barabasi kan mu boenmalá le la.

Currently Selected:

Yaya 18: MOG

Highlight

Copy