Luki 24

Isa fagareŋɛ tawuli koe

1Sanden luŋɛ saguma piri, musenu ka tulu kuɲɛ diyama jigan anu be min tabɛnden, anu tagata a fɛ gaburudula tɔ. 2Anu ka a taran kure min be gabure da tɔ, a bata latallɛ sɔngɔ. 3Anu donta gabure butɔ, kɔnɔ anu ma Marige Isa fure taran ɲɔ. 4Awa, anu be wo kɔntɔfile tɔ, anu ka kayi fila yen sɔren anu kɛnna kisanna, kuta malanna be lajigiren anu ma. 5Kilaŋɛ ka musenu bita koola anu mɛn be anu kunsinden duge ma. Wo tɛmuɛ, wo kayenu ka a fɔ anu ye, anu ko: «Wo be mɔgɔ kende ɲinila fagabaganu tɛma fenna? 6A bele yan, a bata tawuli! A kumata wo ye ki min na nun Galile duge tɔ, wo ni wo talɔn; 7A ka a fɔ le wo ye nun, a ko aa fɛrɛ bele fɔ ale Adamadeŋɛ ni don junubutɔɛnu bolo, anu ni a jigan ka a banban lɔgɛ tɔ. A mɛn si tawuli a tele saba luŋɛ.» 8Musenu ka Isa la wo kumanu talɔn. 9Anu bɔɔreŋɛ gaburudula tɔ, anu saagita, anu ka kɛ koe bɛ ɲamakaran Isa la talibi tan nun dɔndɛ, nun a la mɔgɔ tɔɛ bɛ ye. 10Kɛ musenu be tabɛnden Mari Magidala kaa ma, anun Yuhana, anun Yaguba nɛɛnɛ Mari, anun muse donu minnu be anu masɔla. Anu ka wo koenu fɔ Isa la kiilanu ye, 11kɔnɔ wo kumanu mata kiilanu ye iko kuma tun, anu ma laa musenu la kuma la. 12Kɔnɔ Piyɛri kan wulita, a borita tagala gaburudula tɔ. A la kereŋɛ ɲɔ a butinta, a ma fenfen yen fɔ kasange. A la saagireŋɛ a bata, kɛ koe be a kɔntɔfiliren.

Isa ka a la talibi fila take kila tɔ ki min na

13Wo lun dɔndɛ yati le, Isa la talibi mɔgɔ fila bɔɔta talibenu tɛma anu be tagala saa lanma do tɔ, ka min tɔgɔ Emayusi. Wo saa nun Darisalamu tɛma, a si kilo tan nun dɔndɔ ɲɔgɔn bɔɔ. 14Anu be da masarala ɲɔgɔn tɛma wo koenu minnu bɛ be maren wo tele fila kɔtɔ. 15Anu be da masarala wagate min tɔ anu ni ɲɔgɔn maɲininka, Isa yɛtɛ ka a madon anu la, anu bɛ ka kila dɔndɔ makafu tagala. 16Anu ka Isa yen anu ɲa la, kɔnɔ anu ma nɔ a talɔnna. 17A ka anu maɲininka, a ko: «Wo be fen kuma masara tɔ ɲɔgɔn tɛma kila kunma?» Anu fila suunureŋɛ sɔta. 18Min tɔgɔ Kiliyopa, wo ka a jaabi, a ko: «Hali luntaŋɛnu minnu be Darisalamu, anu bɛ ka a lɔn min be maren saa butɔ kɛ tele fila kɔtɔ. I dɔrɔn de ma a lɔn ba?» 19Isa ka anu maɲininka, a ko: «Ko miniman de wo la?» Anu ka a jaabi, anu ko: «Min be maren Isa Nasarɛti kaa la. A la walenu nun a la kawande ka a yita le Ala nun mɔgɛnu bɛ ɲala, ka a fɔla nabiyonmɛ sɛnbɛma le mu a la; 20mɔ la sarika lakela kuntigenu nun mɔ la mansanu ka a don mɔgɛnu sagoe tɔ ki min na alako a ni makiiti ka a faga. Wo butɔ, anu ka a banban lɔgɔ bangalandeŋɛ tɔ, anu ka a faga. 21Mɔle kan be yigi saren nun ale le si bani Isirayila mɔgɛnu hɔrɔya. Min ɲan be saren kɛ koenu bɛ kunma: a tele saba luŋɛ le mu bi bɔɔla kɛ koenu mata. 22Muse donu be mɔ tɛma nɔn minnu ka kuma do fɔ mɔ ye, min ka mɔ kɔntɔfili a ɲinma la. Anu tagata gaburudula tɔ bi saguma piri, 23kɔnɔ anu to ma a fure taran gabure butɔ, anu nata, anu ka a fɔ mɔ ye, aa anu ka laamute yen, wo butɔ, maleka donu ka a fɔ anu ye, anu ko aa Isa be baluren. 24Wolo ka a ma, mɔ kafuɲɔgɛ donu bɔɔta mɔ tɛma anu tagata gaburudula tɔ. Anu ka a taran musenu ka a fɔ ki min na, a bɛ be ɲɔgɔnna le, kɔnɔ anu ma Isa wunde yen.»

25Isa ka anu jaabi, a ko: «Wole hakkili bɛlɛ! Nabiyonmɛnu ka minnu bɛ fɔ, han bi wo ma laa wonu la wo juse tɔ! 26A fɛrɛ bele fɔ Ala la mɔgɔ masubɛreŋɛ ni kɛ tɔɔrɛ sɔtɔ, jɔ a ni don a la nɔɔra tɔ.» 27Wo butɔ, fenfen be sɛbɛren a yɛtɛ la ko tɔ kitabuenu bɛ tɔ, ka fɔlɔ Taureta Musa han ka naa ke nabiyonmɛ tɔɛnu bɛ la kitabuenu ma, Isa ka wo bɛ fasari anu ye.

28Anu to sutuyata saa lanma la anu be tagala ka min na, Isa ka a yɛtɛ ma tanbibaga la, 29kɔnɔ anu ka a karahan, anu ka a fɔ a ye: «Yandi, i ni to mɔ bata yan, bayi ɲɔ bata wuli pinpila, sue si don kɔtɛ.» Wo butɔ, anu bɛ donta boŋɛ tɔ, to koe la ɲɔ anu fɛ. 30Anu bɛ to ka dɔmɔ dɔmɔ koe fɔlɔ, Isa ka dɛgɛ jigan a ka tantue lataga Ala ma, a ka dɛgɛ makuntu a ka a fatan anu ma. 31Wo butɔ, anu fila bɛ hakkile ka a yen, anu ka a talɔn, kɔnɔ a muttɛta anu la ɲɔ. 32Anu fila ka a fɔ ɲɔgɔn ye, anu ko: «A to be kumala mɔ ye kila kunma, a be kitabuenu fasarila mɔ ye wagate min tɔ, kaa mɔ juse ma diya le mɔ ye?» 33Wo wagati dɔndɛ la, anu fila wulita, anu saagita Darisalamu. Anu ka Isa la talibi tan nun dɔndɛ taran anu be madɛnden ɲɔ, anun anu kafuɲɔgɛnu. 34Wonu ka a fɔ anu ye, anu ko: «Tɔɲa yati le: mɔ Marige bata tawuli faga tɔ! A bata bɔɔ Simɔn yati ma!» 35Wo butɔ, ande tugun ka anu tɛŋɛ fɔ. Min mata kila kunma, anun anu ka Isa talɔn ki min na dɛgɛ makuntu wagate, anu tota wo bɛ ɲamakaranna.

Isa bɔɔ koe talibenu ma

36Anu to be kɛ kuma fɔla, Isa faŋɛ sɔta anu tɛma kisanna, a ko: «Ala mu wo juse sala!» 37Anu bɛ mafuta anu kilanta, a be toren anu ye anu be beele le yenden. 38Kɔnɔ Isa ka a fɔ anu ye, a ko: «Wo juse be ɲatadonden fenna? Mira be nala wo juse tɔ fenna? 39Wo ni n bolenu fɛlɛ, anun n kɛŋɛnu. Nde le yati mu! Wo n mabita, wo n fɛlɛ: sube nun kole be nde tɔ iko wo be a yenden. Sube nun kole dun bele beele tɔ.» 40A to ka wo fɔ anu ye, a ka a bolenu nun a kɛŋɛnu yita anu la. 41Hali anu to be sɛɛwaren, anu ma ban laala betunna, anu be kɔntɔfiliren. Wolo mu a ka a fɔ anu ye, a ko: «Dɔmɛ bele wo bolo yan ba?» 42Wo butɔ, anu ka yɛgɛ yilandeŋɛ kunte jigan anu ka a dii a ma. 43A ka a jigan, a ka a dɔmɔ anu ɲala.

44Wo kɔma, a ka a fɔ anu ye, a ko: «N be wo fɛ fɔlɛ tɔ wagate min tɔ, n tota wolo fɔla wo ye, ka fenfen be sɛbɛren n na ko tɔ, a fɛrɛ bele fɔ wo bɛ ni kamali. Min be sɛbɛren Taureta Musa tɔ, anun nabiyonmɛ tɔɛnu la kitabuenu tɔ, anun Jaburu kitabue tɔ, wo bɛ ni kamali.» 45Wo butɔ, a ka hakkile dii anu ma alako ka anu si kitabuenu fahamu. 46A ka a fɔ anu ye, a ko: «A be sɛbɛren kaa le, ka a fɔla Ala la mɔgɔ masubɛreŋɛ si ɲagankata le, kɔnɔ a la faga tele saba luŋɛ, a si tawuli le. 47A la ko kibare si lake Darisalamu fɔlɔ, jɔ a ni lake dunuya seenu bɛ ma, Ala la mɔgɔ masubɛreŋɛ tɔgɛ la, ka a fɔla anu ni tuubɛ, alako anu ni junubu kafare sɔtɔ. 48Wole le mu kɛ koenu seedenu la. 49N Baaba ka lahire min nakiti wo ye, nde si wo lasanba le wo ma.#24:49 Injila Yaya be min sɛbɛren, sora 14, haaya 16-17 fɛlɛ. Wole kan kana bɔɔ Darisalamu saa butɔ han Ala sɛnbɛ tini bɔɔ saŋɛ tɔ wagate min tɔ ka jigi wo kunma.»

50Wo kɔma, a ka anu labɔɔ saa tɔ, a ka anu doni han Betani saa mafanna. Anu la kereŋɛ ɲɔ, a ka a bolo fila layɛlɛ, a dubata anu ye. 51A be dubala anu ye wagate min tɔ, a nun anu fatanta, a yɛlɛta saŋɛ tɔ. 52Anu to ka a ban sujudula a ye, anu saagita Darisalamu sɛɛwa belebele la. 53Awa, tɛmuɛ bɛ anu tota Ala tantula Ala batu bon banba butɔ.

Currently Selected:

Luki 24: MOG

Highlight

Copy