Esta 9
9
Yu lumate giwa:la eda:te ganabi lapila egiyana gi
1Naba 12 napa Ada samosope naba 13 kadepa saoyana, a:ma enoba kanabate layana gilala awapamina kadepa. A:ma kadepala giwa:lanate Yu luma dapolamadili ameta gi pa:pa a:na:pi dola eyala, Yu lumate giwa:lana a:ima itoda:miyana. 2Kanaba Sekesisete tiloyana wa kabigibega gobala Yu luma waelabegate giwa:lama enamadiliyana. A:pite a:ma wa gobala ediliyana luma waelabeya:gai iya:ta: Yu luma emoda:dele eta gi obai dima pa:pa a:na:miyana. 3Kanaba Sekesisepe a:iya:dela eta:mi wa gogobala ediliyana lumata: gabamani dalata: kanaba dalagipe oko tiliyana lumata: obai waelabeya:gaite Modekai emoda:dele Yu luma amodiliyana. 4Kanabate tiloyana wa kabigibega gobala luma waelabegaite itawa ediyana kanaba dalagite Modekaipe gagi obai gobala sidima pakamiyana gi. Oba enobala kamali egete tepa waelabegala a:ma kamalida eloyana.
5Yu lumate obai dima giwa:la ediliyana luma giwa:la gilile dapoliyana, obaite giwa:lana dapote sosaweda:miyana, a:pite obaite obaimunu iwiminale obai dima giwa:la edeliyana lumadima gi a:na:miyana. 6A:pite Susa kabiginapa baiga gobala Yu lumate 500 luma dapuyana. 7Gwama Yu lumate ma:ma dala iyata: dapoliyana Pasandata: Dalpon, Aspata. 8Polata, Adalia, Alidata, 9Pamasta, Alisai, Alidai, Baiyata, 10a:pite Yu lumadima giwa:lanapa dalagi Amadatape mata Amanape sege 10 iya:ta: dapoliyana. Ameta obaite giwa:lanapimunu lopala pa:pa aledaminiyana.
11A:ma kadepala Susa kabiginapa baiga gobala Yu lumate dapoliyana giwa:lana luma naba a:yata egete na:da:te kanaba dalagi ituwamiyana. 12Kanaba dalagi amale kanaba susa:gi Esta anayana, Yu lumate ma:ma Susa kabiginapa baiga gobala 500 dala dapolete kaokominiwina. Amanape sege 10 dapomiwina. Na: iwalelalowa ne tida:lowamena eta:mi wa papala Yu lumate luma waelabega dapolili. Enobala amapula a: na:dila powa lopala egela iwiminamalona, na: a: dima atamalowa, gwama a: powa gima na: nanamalona na: ya:ma lopala a: dima atamalowa.
13Esta amale kanaba dalagipe gilala wisa eladele layana, kanaba a: iwiminamalona geda: Susa baigala edilina Yu lumadima a: kamali datamalelo. Obaite dapoliwina Amanape 10 segemunu obebe tao madama saesa:minete tao tipima lidiminamadili.
14Amale kanaba dalagi a:ma gilala awapage layana. Susa baigala edilina Yu luma waelabeya:gai dima gilala laiyala obaite Amanape 10 sege madama tao sa:esa:minete tao tipima lida:miniyana. 15Ada samosola naba 14 tepanapa kadepala Yu lumate Susa kabiginapa baigala gwama menagi eda:te eta:mi 300 giwa:lana luma dapoliyana, ameta obaimunu lopala pa:pa aleliyana. 16A:pite eta:mi wa papalale ediliyana Yu luma iya:ta: menagi eda:te kamalile obaiya obai amowada:dele giwa:lana dapoliliyana, enoba 75,000 giwa:lana lumate kaokoliyana, ameta Yu lumate obaimunu lopala pa:pa aledaminiyana. 17A:ma gite Ada samosope naba 13 kadepala saoyana, a:pite naba 14 kadepala Yu lumate giwa:la gi pa:pa a:na:miyana, obai ameta poko eda:dele sa:keladiliyana.
Pulim poko gi
18Susa baigala ediliyana Yu luma ameta naba 13 ta: 14 ta: kadepa saki gobala obai dima giwa:la ediliyana lumada giwa:la ediliyana. A:pite naba 15 kadepala obai giwa:la gi pa:pa a:na:miyana, obai ameta poko eda:dele sa:keladiliyana.
19Yu luma enobala obaite ediliyana kokowabina baiga baigala ma:ma Ada samosope naba 15 kadepala poko eda:dele sa:keladiliyana, obaite etate etadima nagala lopala ameta atate edilidiyana.
20Modekai amale a:ma gite eyana gi letama alilote, kanaba Sekesisete tidoloyana wa kabigibegama Yu lumate ediliyana sabama auwada:minoyana. Auwana lumata: gwama wasegela ediliyana lumata: dima, 21obaite 14 ta: 15 ta: kadepala Ada samosola gogo waelabega gobala ma:ma kadepa saki gobala Yu lumate sa:kelada:dele poko edeledelamadili, 22ma:ma kadepa saki gobala, Yu lumate obai dima giwa:la ediliyana lumumunu giwa:la gobala obaiya obai amowadiyana. Ma:ma samoso gobala obaimunu gwana gobala gwana saweda: gite dowatiliyana gite ameta sa:kela ediyana, enobala Modekai leta Yu lumadima auda:minadele obai danayana, obaite ma:mai kadepa saki gobala kabiginapa poko eda:dele, lopala binina lumadima nagala edeledelamadili, bayata: gwama nagala lopalata:.
23Yu lumate Modekaite obai dima auwada:miyana leta tida:lete obaite gima kamidiyana. Ya:ma poko gogo waelabega gobala a:na:minetedelamadili. 24Amedatape mata Aman enoba Agagape wapiki palanapa dalagi, Yu lumadima giwa:lanapa eloyana, obate Yu luma dapola kadepa gi itawa elamalale iwiminadele gigitiwa #9:24 Enoba pul gititiwa gi a:na:miyana. gi a:na:miyana. 25Estate a:ma gilala kanaba dalagi anayana tepala, obate gilala a:na:da:mienetediliyana luma danaya, obaite letama a:na:da:minete, Amanate Yu luma dapolama apilelona gi ameta isola:mite obata: obape segeta:dima saowela amale tao tipi da:minamadili. 26Enobala ma:mai kadepa saki pulim kadepa elili, gi ase leta gobama aliliyana gita: obaite tida:liyana gita: gwama obai dima saodiyana gile. 27Yu lumate ma:ma kadepa saki babalama miyana, gogo waelabega gobala obaimunu a:iwanima na:da:te saoda:, ya:mai kadepa saki iwaleda:dele pa:pa kobele eda:te edelamadili. 28Ma:mai kadepa saki Yu lumate obaimunu noneya gobala obai miya wala edeledelamadilina, eta:mi wa papala o kabiginapa baiga gobala edeledelamadilina tepala obaite ma:ma enoba kabiginapa Pulim kadepa gogo waelabega gobala sa:kelada:dele iwaleledelamadili, obaimunu a:iwanima saoda: pa:pa kobele eda:madili.
29Enobala Abilaipe aminagi kanaba susa:gi Estata: Modekai Yu dalagita: gwama leta a:na:miyana, Modekaite lope a:na:miyana leta pulim gima amowadele gi kakalaminamada:le. 30Modekaite a:na:miyana leta amale Pesia wa gobala dowatiliyana 127 wa gobama auwada:miniyana, enoba kanaba Sekesisete tidoloyana wa waelabega, obaite gelada giwa:la bini a: edelamada:le. 31Na: Modekai gwama kanaba susa:gi Esta sa: saki ma:ma babala da:dima midamena:. Enoba da:ta: gwama da:dowali a:iwanima na:da: da: ma:ma kabiginapa pulim kadepa gi kakalele gwalite pa:pa kobele eda:madelewa, da: baya awana eda:te ameta kabigibegale gwana saweda: gida adimadelamadelewa. 32Estate ma:ma pulim gi babalama miyana gilala pepama miyana dololomina gima.
Currently Selected:
Esta 9: GBOTP
Highlight
Share
Copy
Want to have your highlights saved across all your devices? Sign up or sign in
Gogodala Bible Translation Project © Bible Society of Papua New Guinea, 2016.
