A:bak 2
2
1Na:dowali wa lawila sabala lelolamalowa
a:pite baiga ta sidila lelolamalowa.
Na: obatena: dima lalamalelona gilalama enamadolamalowa,
a:pite ne powa wisa gilala ma:ma ilapala gilala gima lalamalowamena gima enamadolamalowa.
LODope gilala wisa
2A:pite LOD gilala na: nanadele a:negelayana,
ne a: ituminanowamena gilala a: alulamalelo
a: masikamama sa:lele a:na:da:mu
a:pite egete guluda:te welamalelona lumagite awapale welamalelo.
3 #
Ibu 10:37
Gi ase ne a: ituminamalowamena gi omona:napa tepama enamadolamalelo,
enoba a:yatanapa gima lalelo
a:pite pa:pa ima: elamalelo.
Gite pa:pa sela saolamalelo, ameta a: atolomunamalelo,
gipe saola tepa pa:pa gi wani bega elamalelo.
4A: ti, oba na: awagana: elelo,
obate iwida:minanona gi pa: sogoda:na gi
ameta gi sogolanapate obape gibapimina gile elamalelo.
5Gibapi, waen wite oba gasuminnano,
oba na: awagana: eladele a:me binibapi elelo.
Gi ase obate olawa saba a:na:pi iyawa kabigibapi elelo
kaola a:na:pi obape iyawa pa:pa binilelo,
enobala obate baigabaiga waelabeyagai obaya oba dima gaogoda:mite
a:pite luma waelabeyagai dibulama alilelo.
6Obai waelabeyagaite ameta oba tuwataminadele a:negelalamadili,
lopala ilile alelote tilida:munamalelona lumagi sosawe bapi elamalelo
obate kamalile lumumunu lopala alelote ya:biya:bidanapa elelo.
Ma:ma gi a:na:da:mina gi a:ta:pi tepa dololamaleloya.
7A:dile lopala a:le aleliyana luma sela patimada:bega eda:madili.
Obai patimada:te a: dima sasiwa gi atamadili.
A:ma tepala obaite a: lapolamadili.
8Gi ase a: baigabaiga waelabegaimunu lopala ilile aleloyana,
enobala baigana luma eta:mite a:dowali lopala alelamadili.
Ase a: lumumunu dede a sasamunoyana,
a: lumumunu a:ita: kabigida:na baigata: gwama a:mai gobana luma waelabegata: a sosaweda:munoyana.
9Pa: sogolale obape wa begaminanona lumagi sosawe elamalelo
obate genama sidibegama a:na:miyana
obate galabele wama emola gima.
10A: luma waelabega dapola nabidi uwaladolo,
enoba gile a: a:dowali lumadima pisala datadele a:dowali kanika:wa wama miyana.
11Genama bilite gibaba eda:madili,
a:pite genama gobana waikola enoba siya menagi laelamadili.
12Powate dede samina gile kabiginapa baiga a:na:mnamalelona oba sosawe elamalelo,
a:pite kowabinapa baiga obape sosawe gile a:na:minamalelona oba sosawe elamalelo.
13 LODote gi a miyana
a:na:pi lumumunu oko ilate oloda:malelo,
gwama baigabaigana lumate a:le bonogowadelamadili.
14 #
Ais 11:9
A:ibaigate LODope lulila itawa ela gile tawa bega elamalelo
kalama wasewa wi tawate dolona gi a:na:p.
15Powate lumagite sika wi kabuwama samite obape sopodala dima dapulamalelona oba sosawe elamalelo,
obate wai kaka kabuwama sasamunote obai dima dapilowela obai daledale eda:te abadu edilila
oba obaimunu abadu gi tida:malelo.
16A: pisala gile, pa: lulilale tawa bega elamalelo.
Amapula a:dowali tepa a saowena. A: sika wi nidolote abadu elamalelo.
LODope mimiti ya:denapa maile dololona kabuwa a: dima pa:lelo,
a:pite a:dowali lulila pisala gite kawapilamalelo.
17E Lebanon wama kamali bega eloyana gite ameta a: lapolamalelo,
e wai dapoloyana kamali gite ameta a: dima kabiginapa emo gi atamalelo.
Ase a lumagipe dede a samiyana,
wata: kabigida:na baigata: a:pite a:mai gobana lumata: sosawe dapola bega eyana.
18Lumagite maile ididaligi a:na:miyana, a:ma ididaligipe kamali ba:maya.
Ididaligite sewata gi ituda:mineno.
Ya:ma lopala a:na:miyana lumagite obaya obate a:na:miyana lopala gibapimineno,
obate a:na:da:minenona lopala gilala pa: itawada:na.
19Powate lumagite i dima ma:na:pi lala elamalelona, a: kanika:wa ege ya:ma lumagi sosawe bapi elamalelo,
o powate lumagite kanika:wa bininapa ba:kele dima lalamalelona, a: salete pata.
Ya:mai lopala nabidi ituda:mina gi pa: itawada:.
Lumate golodota: silibata:le a kawapidiyana,
eta ipopona:da:te oba gobala pa:pa dololo.
20Ameta LOD obape awana genamala elelo,
awapa a:ibaigana lumate obape sososko palala gelada edelamadili.
Currently Selected:
A:bak 2: GBOTP
Highlight
Share
Copy
Want to have your highlights saved across all your devices? Sign up or sign in
Gogodala Bible Translation Project © Bible Society of Papua New Guinea, 2016.