Malak 2
2
LODote guwali dala danadoloyana gi
1Ma:ma enoba LODote guwali dala dima lalelona gilala. Ma:ma enoba da: guwali dalimunu gilala. 2Da:pe a:na:mina gile na: ewamenamadelewa. Da: na:pe gilala pa:pa enamada:madelewamena, na: da: iwida:minamalowa. Da:dowali okole alelamadelewamena lopala ne iwida:minamalowa, da: tila, na: ya:ma gi a a:na:muwamena, gi ase da:pe gwana gobala kabigibegale na: iwalela gi pa:pa dololo.
3Na: da:pe wapiki palana luma mata baiga dapolamalowa, a:pite da:pe awanana nagala lopala maladile, da:pe sosoko papada:minamalowa, amale a:ma maladi ba:ba:mininina sabama da: iya:ta: ba:ba:minamalowa. 4#Nam 3:11-13Opa:ya elamalelo. Dolamunamalelona gi layamana.
5 #
Nam 25:12
Ne obaida bata ete miyamana gite obaida dololamalelona gi enoba, kanika:wa gita: gwama gela gita:. Ma:ma enoba ne obai dima datayamana gi, obaitena: dima gima kamida: gima. Ya:ma kadepala obaite na:pe gilalama emoda:dele gima kamidiliyana. 6Gibalama sogola itumina gilalate obaimunu magatale dololoyana, a:pite gasumitada: gilalate obaimunu magata pila pa:pa dololoyana. Obaite na:da gelada wamidiliyana a:pite gibalama awapa bapile edeliyana. Amale obaite luma waelabeyagai sosawe a:na:da:mina gile wama eseda:miyana.
7Guwali dalagidila awapa lumate Godope gibalama gi itawa eda:madili. Gwama obape magatale lumate awapa Godope iwimina gi a:na:mina gi itawa eda:madili, gi ase oba enoba LOD Kamalinapape gilala lada:napa. 8Da: ameta gibalama nabidi a elatete da:pe a:na:da:mina gile eta:mi lumumunu a:i gagaminadele obai iya:ta: a:ma sosawe gi da:da a:na:da:minini, LOD Kamalinapate enoba gilala lalelo, da: ne Libai lumada gibalama bata ete miyamana gi a ka:ka:minenewa. 9Na: enobala luma waelabeyagimunu sosoko palala da: pa: awapada:na lumage lalelowa, de a:ma gipe alikikimina gi gobala gi bini meneda edelamada:le. Gi ase da: ne iwiminowamena gima pa:pa kamida:te a:na:daminenewa. Da: ameta luma waelabeyagai pa:pa na:dowali babalada awapale obai amowadelewa.
Yuda lumate Godope gilala elatiyana gi.
10Sa: waelabeyagai sa: wawa pa: menagita, pa: God menagite sa: a:na:sa:munoyanata. Enobala sa: powa gi asele sa:pe eta:mi ya:denadima se gibapile gi a:na:da:minamada:le gi alilimana bata gi ka:ka:minena:ya. Enoba sa:pe iniwali kakabeyate Gododa gibalamale bata gi miyana gi.
11Yuda wana lumate pa: awapanapa sosawe gi a a:na:miyana. Obaite Godope bata gi a ka:ka:miniyana Islael wa kabigibegala, a:pite Yelusalem baigala LODote awele iwaleloyana genamale pa:pa awanale eda:dele eta:mi wana ididali balelada:miniyana atoda aulitali edeliyana. 12Ya:mai luma gobale powate lumagite ma:ma gi a:na:miyana, LOD obate ya:ma lumagi Ya:ikobipe gagasila gobala wama galaminamalelo. Obate LOD Kamalinapadima nagala lopla pa:pa alete pa:tolamalelo.
13A: gwama eta gi a:na:minamalelo, a: LODope awana ba:kele genama a:pe tao gobanapa wi gagabile baominamalelo a:pite a: adimada:dele bauminamalelo. Gi ase LODote e a:pe maile alete pa:wena nagala lopalama pa:pa awapage lalamalelona gile a: adimada:dele sabeolamalelo. 14A: amale anate tila gi lalamalelo, powa gi aseleya. Gi ase LOD obate gibaba elelo. A:e gwaliyana susa:gi, gi ase a:e oba gwalite eloyana gibalama bata gi a ka:miyana, a:pite apela kanika: tepala obate a:pe sopodalagi elelo a:pite gibalamale bata gi miyamana Gododale.
15 LOD obai pa:pa a:na:da:munoyanata, obaite menagi bapi elamalale.#2:15: Gilala bapi gobala pa:pa Godote obaIbulu gilala pa:pa kekela dololo. Obaite limole gwama sepole obape elili. A:pite obai powa gi asele menagi bapi eliliya. Gi ase obaite God imimina luma ilama sege mata aminamadili. Enobala da: da:ya da: sa:lele tidela, da:pe limo gobala a:pite de apeda: kanika: tepala aulitali edeleyamana gi ege gwama tatalada:minamadelewa.
16Na: dalagi elatela gi gwama susa:gi elatela gima ga:olelowa, Islael lumumunu LOD Godote lalelo. A:pite na: ga:olelowa da: gobala dalagite obape susa:gidima pa: awapanapa gi a:na:minamalelona gima, LOD Kamalinapate lalelo. Enobala da: sa:lele edelamadelewa.
Gi bamina kadepa
17Da: da:pe gilalale LOD gamobega minenewa. De lalelewa, se LODope tao luliyabale sosawena gi a:na:da:mina:mena gite obadila sa:lenapa gi elelo, a:pite oba sa:kelalo. Gwama de lalelelewa, ma:ma God oba sogoda:na gi babamida:napa ba:maya.
Currently Selected:
Malak 2: GBOTP
Highlight
Share
Copy
Want to have your highlights saved across all your devices? Sign up or sign in
Gogodala Bible Translation Project © Bible Society of Papua New Guinea, 2016.