Maik 5
5
Beteliyem baigala kanabate elamalelona gi
1Giwa:lana dalimunu gagile dololona baiga, a:dowali giwa:lana dala giwa:lama sa:leda:mu,
galabete a: gima sa:lete dololo.
Obaite Islaelpe apenapa
obape apayama lapolamadili.
2Ameta a: Beteliyam Epalata,
a: Yuda udaga kabigibega gobala kowabinapa elelo,
a: gobala etate na: gima saolamalelo.
Enobate Islael kabigibega apeyanapa elamalelo.
Obape gibalama sokate obape iniwa tepala asemite pa:la.
3Enoba gi asele Islael wa a: dololola
wete susa:gite pulagi aminamalelona tepama saolamalelo.
A:pite obape iyani menagigida:te gwama baigama pa:da:madili
Islael dima gwama ga:eda:mada:le.
4Obate lelate obape Sip iwa:la elamalelo
LODope kamalile, enoba obape LOD Godope kamalile.
Amale obaite galabe gi bini sa:lele edelamadili, amale obape kabigi gite
a:ibaiga a:yatada: atida:malelo.
5A:pite obate obaimunu gela elamalelo.
Galabe pawamina gita: Alikikimina gita:
Asiliyana lumate sa:dowali wa lapolamadilina kadepala
obaite sa:dowali ba:kelele kalekale a:na:mina ediyana baigale a:i saominamadili,
sa: 7 sip tida:na dalata:
gwama 8 gaganabina dalata: oba asakamina gima pakada:minamadili.
6Obaite giwa:la gilile Asiliya wa apeyana edelamadili,
a:pite giwa:la gili egete Nimlod wa apeyana edelamadili.
Obate Asiliyape apeyanapa gobala sa: wama alesa:te saolamalelo.
Obate sa:pe wa lapolamalelona tepala,
gwama sa:pe wa a:yatada:la a:i saomunamalelona tepala.
7Ya:ikobope na:sa:da:miyana luma menagigida:te,
waelabega luma gobala
LODope mimida:bi a:na:pi edeli.,
Gwama gwi pulu tila sidila dololona gi a:na:pi edeli,
obai lumama pa:pa enamadili
O luma pa:pa iwida:minini.
8Dibulama alete na:da:dele na:sa:da:miyana Ya:ikobope luma menagigida:te eta:mi a:ibaigada edelamadili,
luma waelabega gobala.
Laiyon a:na:pi da:niya gobana wa waida elelo.
Apela kanika:napa laiyon a:na:pi sip gagasila gobala elelo,
a:pite oba amowanapate pa:pa amowamalelo.
9Da:dowali mai giwa:lanadima pakakamite obai dapolete binibapida:minamdelewa.
A:pite a:dowali giwa:lana waelabegate sosawe eda:madili.
10 LODote laleo, a:ma kadepala
na: da: gobala da:dowali oso dapodamamalowa.
A:pite osote silida:minetedilina gawa sosaweda:minamalowa.
11Na: da:dowali wa gobana kabigida:na baiga dapodamamalowa,
a:pite da:dowali kakaleda:na eda: sasaba gagamunamalowa.
12Na: da:dowali wasiwa gi dapodamamalowa
a:pite da: pa:pa gwama wasiwape kamalima na:delamadelewa.
13Na: da:dowali maile a:na:da:mineyamana ikewa lopalata:
a:pite da: gobana awanana ba:keleta: dapodamamalowa,
a:pite da: pa:pa gwama obai dima baodelamadelewa,
a:mai enobai da:dowali mai gweya lopala.
14Na: da:pe Asela salo atilidolamalowa
a:pite da:dowali ididalimunu kabigida:na baiga waelabeyagai gagamunamalowa.
15Na: ilabegale ga:oladele da:dima da:pe sosawe gi wisa dapulamalowa.
Enoba na:pe gilalama pa:pa gima kamideyamana lumadima.
Currently Selected:
Maik 5: GBOTP
Highlight
Share
Copy
Want to have your highlights saved across all your devices? Sign up or sign in
Gogodala Bible Translation Project © Bible Society of Papua New Guinea, 2016.