Nayu 3
3
Ninebape sosawe wisa gi
1Ya:ma kabiginapa baiga titimite sosaweminamadili, lumumunu dede tawa bega,
sewata gi tawabega,
ilile aleliyana lopala gi tawabega,
a:ma wa gobana sa:sa:lena lopala waelabeyagai ameta, amale lumate ilile alela gi pa:pa ekeminamadili.
2Osope tao pa:pa:te gwaledelilina siya enama,
giwa:la gawape wilite gwaledili,
osomunu gugula: siyate gwalelalo,
sakana giwa:la gawate sikasika edelina siya enama.
3Osole mitatilina giwa:lana dalate obaimunu osole giwa:lama sela na:da: bega edeli.
Giwala gili waisota:
gili kibilita: kadepate tuda:lo.
Obaite luma waelabeyagai dapolili,
kaokoda:na luma tilida:mina beyagai
ameta obebe domona pa: awapa,
lumate enobai obebele a:i gagaminini,
4ma:ma gite saowena gi ase oba dala bibilinapa susa:gi a:na:pi iyawa kabigibega eloyana,
a:lowa kabigibega, wasiwa gi a:na:da:mina kamalibega,
obape iyawa gile luma aleloyana, obape wasiwa gile luma dibulama aliloyana.
5 LOD Kamalinapate a:negelalelo, Niniba na: a: dima wisa atamalowa.
A:dowali matiya na: pakima:te a:dowali sosoko kawapima:malowa.
A:e abadu elelona gi na: baigabaiga waelabega ituda:minamalowa,
obaite a: e pisala elelona gi tilamadili.
6Na: gwale a: kawapilamalowa,
ne a: pisalaminamalowa,
a:pite lumate a: tilite iyaminamadili.
7A: tilamadilina lumate a: elatete wama guguladele a:negelalamadili,
Nineba kabiginapa baiga a titimiwina, powate oba gwanasaweda: elamaloya.
A: balelaminamalale lumagi miyale tilamalowaya.
8Niniba a: pa: Tebes baigape sogola a:na:pi,
Na:il wasewa gegedanapa baiga,
wite a: gwanamamite dololo.
A:ma Na:il wasewate obape a:wa saba elelo, a:pite wite obape ta elelo.
9Itiyopiya wa enoba obape kamali sokate eloyana, Isipt iya:ta: enoba a:na:pi elamalelo a:yata bini.
Put lumata: Libiya lumata: enobai oba amowana edeliyana.
10Ameta giwa:lanate oba taole papamite
dibulama gwalite na:diyana.
Obai obape sekowabi nabidi atakawa tepala
dapoladele alisasi ta:temina ediyana.
Obai gititiwa gi a:na:mite kanabape okona dala alelete
a:pite obape kabigida:na dala auli taole papada:miniyana.
11Nineba, a: obaida dalagile sika nidolote daledale elamalelo,
a: a:dowali giwa:lanapate a: lapola
gile emo saba uwalolamalelo.
12A:dowali tale gwanamada:mida:na kabiginapa baiga waelabeyagai
mukusada:na kipa adami a:na:pi,
a:pite nananapate adami i susumiwela
adami obape magata gobama nisisilamadili.
13A:dowali giwa:lana dala tido,
obai waelabeyagai enoba ato a:na:pi edeli.
Giwa:lanate sa:eda:mada:le a:dowali baiga ta
ogosa waelabeyagai gaegelete dowatili,
ogosa kakamina i a ilate oloda:yana.
14Giwa:lanate a: gwanamaminini enobala a: nida: wi a:itu,
baiga ta kakala:mi.
A: masikamata:
ba:keleta: sa:leda:mite
ta gwama a:na:mi.
15Ilate a:mala a: ololamalelo,
giwa:la gili waisote a: ta:minamalelo
sa:sa: a:na:pi lapote naonamalelo.
A:pite sa:sa: a:na:pi waeda:la,
tagada: a:na:pi waeda:la.
16A: a:dowali ewada: saba apeyana naba a sidima pakamiwina,
obai a waeda:te kadepa sidina ibina a:na:pi ediwina,
sa:sa: a:na:pi obai pa:da:te a:ile apedilina lopala waelabeyagai
nanale nanete wama puwida:te na:da:madili.
17A:dowali lawilana dalata: tagada: a:na:pi
kabigida:na dala enobai tagada: gagasida: a:na:pi,
ga:ga: tepala obai baiga tama mitatelete edili,
a:pite kadepa saowela obaite puwida:te na:da:madilina
saba gi luma pa: itawada:.
18Asiliya wanapa kanaba, a:dowali sip tida:na dala tenedili,
a:dowali kabigida:na dala teneda:mada:le a dowatiwina.
A:dowali luma giwa:lanate saka sidima datate na:diwina,
obai gwama alete pa:la lumagi bini.
19A:dowali apapaya gwama sa:lemina lumagi bini,
a: enoba apapayale kaolamalelo.
E dilamalelona gi enamada:madilina luma waelabeyagai
mai pupuda:minamadili,
gi ase obai itawada:
e a:na:da:munoyana sosawena gi.
Currently Selected:
Nayu 3: GBOTP
Highlight
Share
Copy
Want to have your highlights saved across all your devices? Sign up or sign in
Gogodala Bible Translation Project © Bible Society of Papua New Guinea, 2016.