Sekal 1
1
Lumate gwama LOD dima pa:da:mada:le awada:miyana gi
1Kanaba Daliyusipe naba 2 gogola, 8 samosola LODope gilalate wala gilala lada:napa dalagi Sekalayadima pa:yana. Sekalaya enoba Belekayape mata, a:pite Belekaya enoba Idope mata. LODote a:negelayana.
2 LOD kabigibegale a:dowali iniwali kakabeyadima ga:oloyana. 3Enobala a: lumadima ma:ma gilala lado. Ma:ma enoba LOD Kamalinapate lalelona gilala, LOD Kamalinapa a:nege lalelo, da:na: dima gwama pa:da:la, a:pite na: da:dima gwama pa:lamalowa, LOD Kamalinapate, lalelo. 4Da: ege da:dowali iniwali kakabeya a:na:pina edela, lope tepala edeliyana wala gilala lada:nate obai dima ma:na:pi lala edeliyana. LOD Kamalinapate a:nege lalelo, da: de sosawe gi gobala wamidelete a:pite sosawe a:na:da:minenewamena gi na:sa:da:mite eseda:la. Ameta obai na:dowali gilala pa:pa enamada:te gima pa:pa kamidiyana. LOD enoba gi lalelo. 5Amapula tepala da:dowali iniwali kakabeyata: wala gilala lada:na dalata: ba:miya. Obai elomina tepala edilita. 6Ameta na: na:dowali gi saolana wala gilala lada:na dalale gilalata: babalata: gwalemonoyamana, ameta obai gwana kalekalebeyagai ediyana a:pite alikikimina itawa ediyana.
A:ma gile obaite gi iwalela opa:yada:mite a:nege laiyana, LOD Kamalinapate sa:dima a a:na:miwina, sa:dowali a:na:da:mina gita: sosawena gita: obaite iwda:mininina gida awapale. Gi ase ya:ma enoba obape iwimina gi.
Dabema i gobala lelaloyana dalagipe gi
7Naba 24 napa kadepala enoba naba 11 tepanapa Sebat samosola, kanaba Daliyuspe sakinapa gogola, LODope gilalate wala gilala lada:napa dalagi Sekalaya dima pa:yana. Sekalaya enoba Belekayape mata, Idope a:iwa. Sekalayate a:negelayana.
8Isa tepala na: inigwile gi tiliyamana, a:pite na:pe lopa palala dalagite wasanapa oso sidima manate weloyana, oba dabema gobala lelaloyana. Obape baiga ya:dela litatiliyana eta:mi oso enobai wasanapata: mabi wasanapata: a:pite sa:kewanapata:.
9Na: amale a:nege layamana, nagala na:pe LOD, ma:mai powa lopalaya.
Na:da gwalemonoyana pa:li dalagi amale na:pe gilala wisa eyana. Obate a:negelayana, na: obaimunu gi a: ituminamalowa.
10Amale dabema#1:10 Dabema i, ma:ma i gibalama gi Ibulu gobala pa:pa kekela dololo. i gobala lelaloyana dalagite sa:lele layana, LODote a:ibaiga kabigi begama auda:miwina lopala.
11A:pite obaite pa:da:te dabema i gobala lelaloyana LODope pa:li dalagi dima gibaba ediyana. Sa: a:ibaiga wa kabigi begama a pa:na:da:mena, a:pite gi tila:mena wa kabigi bega a:me gobala eda:dele gelada edili.
12Amale LODope pa:li dalagite a:negelayana, Kamalinapa LOD, a: 70 gogo Yelusalem baigata: Yuda wana kokowabina baigata: dima mene eloyana. A: powa tepa gigisa begale kabiginapa awe nagala gi gwalite lelolamaleloya. 13Amale LODotena: dima gwalemonoyana pa:li dalagi dima gelamina gilalata: kamalimina gilalata: gwalemonoyana.
14Amalena: dima gwalemonoyana pa:li dalagite a:negelayana, a: ma:mai gilala lado. Ma:ma enoba Kamalinapa LODote lalelona gilala. Na: kabigi begale Yelusalemata: gwama Sayonta: awe iwalelelale iwaleda:lowa. 15Na: kabigi begale ga:olelowa gelada a: edelina eta:mi baiga gima. Na: pa:pa begale na:dowali lumadima mene eloyamana, ameta eta:mi baigana lumate obai kabigibegale sosaweda:miniyana obaimunu mene gobala.
16Enoba gile ma:ma enoba LODote lalelona gilala, na: gwama kabiginapa gela gida Yelusalem baigama welamalowa a:pite a:ma wala lumate na:pe genama gwama a:na:minamadili. A:pite awapamina taote Yelusalem baiga a:yatama welamalelo, LOD Kamalinapate enoba gi lalelo.
17Wasegema gilala lado, ma:ma enoba LOD Kamalinapate lalelona gilala. Na:dowali lumate edelina kokowabina baiga waelabegale sa:sa:lena gite tawada:te dowatelamadili, a:pite LODote Sayon gwama gelamite, Yelusalem omona:malelo.
Kalita sakisakita: ile lopala a:na:da:mida:na dala sakisakita: gi
18Amale na: tao sidima lotobada:te kalita sakisaki tida:yamana. 19Na:da gwalemonoyana pa:li dalagi anayamana, ma:ma powa lopalaya.
Obate na:pe gilala wisa eyana. Ma:ma enobai kalita, obaite Yudata: Islaelata: gwama Yelusalemata: wama opa:pa:ya auda:mina ediyana.
20Amale LODote ile lopala a:na:da:minetediliyana dala sakisaki gi na: ituna:miyana. 21Na: amale layamana, obai powa gi a:na:minamada:le pa:diliya.
Obatena: dima layana, ma:ma enoba Yuda wa opa:ya auwamina eyana kalita sakisaka, amale etate obape ganabi pa:pa pakaminamalale, ameta ile lopala a:na:da:mida:nate pa:da:te obai emosa:mina gi datiyana. Obaite Yuda wa a:ima etomite sosawemiyana a:ibaiga dapolamada:le pa:diwina.
Currently Selected:
Sekal 1: GBOTP
Highlight
Share
Copy
Want to have your highlights saved across all your devices? Sign up or sign in
Gogodala Bible Translation Project © Bible Society of Papua New Guinea, 2016.
