Habagugu 2
2
1Anduane Homogohondo i̱na genda ho howa bi lamirugoni ibugua agi ladai birabe hondolebi mani bi agi loliyanaga langirabe hondolebi i̱na i̱naga mamage holenaga anda mbira luni daliga bu kagoria iraga howa hondo harogoni.
Anduane Homogohanda Habaguguhondo bi halu mende ladai binigo ogo
2Anduane Homogo ibugua ladai bialu lalu, Manane í̱hondo walia hole kogo í̱na dindi dongoma mbaraleni bayuwaore gilibu ngelabe. Dagalaragome hai nabi abale dagalelo wále tigatiga gilibu ngelabe. 3áyu ogoni ndo awe lola holebiragonaga manda buwa gilibu ngelabe. Anigoyu horo langeroru bulubadagoni abale ibalu walia harogo damene bibahende larodagua lola hai holebira. Hendore bigi bini mbau lolebiragoyu mbira pugu wanahe biaiore holebira.#Hi 10.37 4Bi o larogo gilibu wia. Ko biaga karu yo pialu napolebira. Anigo wali agali mini tigabiwi Anduane Homogohondo mini mbiraore wu karu ti haabo holebira, lalu, Bi kira ogoni gilibu wia, lene.#Lm 1.17; Ga 3.11; Hi 10.38
Ko biagaru kagoria ko anda ibulebira lenego ogo
5Homogorume dewaore wulenaga ke̱ halu miaga ka. Agali urunime dimagoli halu mine howa tini hangu mitangi bialu homogo hole hai hangu bialu kane homa ibugua harula nalagadagua tigua homogo timbuniore hole hame dege laga ka. Babilonoali uruni ti ogonidagua biaga karume wali agali tara tara paluyu pedarunaga dindi ngaru karulama puabo haga ka. 6Dindi karulenegonaga wali agali karume ti handaya ho haga karuhondo mo yo hondowa mege bialu bi ogobi lolebira. Tigua agali ko biagaruhondo lalu, Táninaga wini ndo mendealinaga winiru page biaga kamiru ko timbuni tá kamigoria tagira ibulebira. Tá dano ho hene karuhondo hongo howa ngiadai bialu ngia tago halu ngidaba laabo halu táni ke̱ howa mali agira halu mo homogo ho holeberamibe, lolebira.
7Tá ala dano ho harimirume ti abaleore wayali ha aribia holebira. Ani wayali howa dano aribia halu danoali biaru tigua táhondo abaleore yadai bialu ngia tago hadaba, lolebira. Tánaga waitigiru abaleore ibuwa ti mo mogola howa tánaga mbirale wirimiru heba mo yalu piai holebira. 8Wali agali dindi tara tarani paluyu pedaru tinaga mbirale wiaru tá karulai halu wali agali ogoriani hearubi bo wahai halu tano wiarubi bo haealo bagabu wahai harimi. Ani birimigoyu wali agali ogoningi yu wahene biarume tábi balu mbirale wirimidaruni ti karulalu mo yalu piai holebira.
9Ko timbuni tá kamigoria tagira ibulebira. Agali maru homelo bo wahalu mbirale dewaore page bialu mini wirimirume tánaga dameneru mo homogo ho heledami. Ani bu heledamigo tá kamigoria ko mbira anda ibulani hondowa tá bayaore awadaga holenaga andarubi hagirarubi hongoheore bu heledamigoni. 10Anigo tágua koorene ko urunibi birimigome taga gibi holene tánaga dameneru heagoha yu anda ibirimi. Wali agali dindi tara tarani paluyu pearu bo mburi lalu birimigome tánibi nde bo mburi lolebira. 11Anda hongo timbuniore helo anda hai pabe ege to̱le̱me bima irigi harimi. Ege to̱le̱ pabe birimirume, Tá koore bialu harimi, lalu anda dabira karumebi ani dege lambare bulebira.
12Ko timbuni tá kamigoria tagira ibulebira. Tagira ibulubadago irane tágua tano timbuni bulenaga wali agali garabaya biabe ale bilalu dewa homayagonaga daramani bialu harimi. Tánaga tano hongohe helo mana ko timbuni birimigome tano ogoni bu helarimi. 13Dindi tara tara karularimigo wali agali hearume tánaga garabaya biabe ale bia hayago biabe ogoni nagalone holebira. Tágua bibahende biyaruni hagua hungula bialu do mundu lai holebira. Anduane Homogo Hongo Haiheore kagome ani bulebira. 14Iba solowara to̱lo tagi howa birame kadagua wali agali dindi bibahendeni karume Anduane Homogonaga mini daliga taraore ngagobi ibu hongo gibiorehe kagobi wali agali bibahendeme manda biai holebira.#Iba 22.27; Ais 11.9; Seg 14.8-9
15Ko timbuniore tá kamigoria tagira ibulebira. Hameigini tara tara kaware bu hearu tihondo lembo timbuni howa mo ko halu ogodagua birimi. Tágua wali agalime waini iba mo na howa lulu yu halu agaru golo wahowa taga nahe hagadagua tánibi ogonibi dege howa handaya ho harimi.#Pig 9.22; Hos 7.5 16Ogonidagua dege Anduane Homogohanda tábi taga halimulo mini lene timbuni kamiruni bame halu mo dindiha haragola tánibi pani nalu taga ho holeberami. Taga holene ogonime tá ala mini lene harimigo mo wahalu tá mo dindiha helolebira. 17Tágua Lebanono dindini irabu timbuni wiaru dibu ibira harimidagua Anduane Homogo ibugua tábi nde dibu ibira helolebira. Nogo gabua tara tara irabu ogoniha ibaga bialu piaga biaru barimi. Ani barimigo nogo uruni ariame tá halu mbira mo gi̱la halu bolebira. Uruni bulubadaruni irane tágua wali agali dewaore dindi bibahendeni hearubi bo wahaga bialu tanobi mo ko harimigome ko ogonibi tá kamigoria tagira ibulebira.
18Tágua tánaga dama lowa gime wabinigome mbirale mbira agi biagabe. Bame agali gime wabini ogonime mbirale mbira nabiaga. Mbirale gime wabini bi nalaga ogonibime wabiagane kego í̱ biamogo agua bulebirabe. 19Ko timbuni tá kamigoria tagira ibulebira. Ira gombedo minibi to̱le̱ gaibu mini ngaruhondobi hale holebada lowa bi hongo howa lalu, Heya, laga kami. Mbirale irame wabini ngarume, Galone ngaruni ogo ale nga, lalu tá walia hagabe. Ngolomebi silibamebi yári biaho berelagago ogoniha holenenaga buhe nawiaga ndobe.
20Anigo Anduane Homogo ibu ogonibi ndo ka. Ibu ibuninaga anda loma bia henegoha kago wali agali dindi bibahendeni kamirume ibu kagoria howa ema nabi bi nale halimu, lalu Anduane Homogohanda Habaguguhondo lamini.#Seg 2.13
Currently Selected:
Habagugu 2: HUI
Highlight
Copy
Compare
Share
Want to have your highlights saved across all your devices? Sign up or sign in
Huli Bible © Bible Society of Papua New Guinea, 2002.