Dutaronome 26
26
Ee Nengepe Kanda Soo Mupwa Manjipala Anatu Maingi
1Moseseme pii leya. Anatumi yuu jilyamo dokona pao nyuo paleyami kande dokopa 2nakama range mendaki mendaki lao ee nengepe wakale wakale kanda soo manjo nyuo karo dokopa pisiki minyasi mendaki mendaki laonya paki pyuo minyuo misi lenge panda Anatumi rombo palyiyamo dokona parami. 3Yuu gii dokopa purisi rapu pyuo kararamo doko keta papala baa lamaiyuo, Nambana Kamongo Anatunya lenge kambu sipyamo dokona karo leto. Yuu baame namwana imbwange dupwa jero lao kana minyuo leyamo dokona epapu epo palyuo karo, larami.
4Dokopa purisi dokome nakamana pisiki minyasi doko nyepala nakamana Kamongo Anatu nenge kiso maingi kana pyare lasi dokona lenge kambusa minyuo pao retara. 5Retaparamo dokopa embame pii dasipa Kamongo keta pena lao lare. Nambana rakange kyawa doko baa yuu Arame range akali anda angi mendena pali nao banya ree palu lanyuo yuu yaki nyuo Isipi dokona palyuo karala peya. Nakamba yuu dokona peyaminyipa wambu malu ingya nayamopape enakana malu ingyapala ama rara porai ingyuo paleyami. 6Paleyaminyi dokopa Isipi wambu dupwame namwa randa joo kopetame rapu pipala karapusi ingyuo kendemande yulu pyakalapa lao nyuo suu leyami. 7Dopa piyaminyi dokopa namwana rakange kyawa dupwana Kamongo Anatu dokome nyisinya lao kyakale leyama dokopa baame namwa sepala randa andake nyuo koo keta palyuo kareyamano doko kandeya. 8Banya porainya renge dokome Isipi dupwa keta namwa kingi rekya lao nyiya. Baame wambumi yulu kanda nangepe yulu wambumi kando yamarangyuo pakanyi pyambungipi dupwa pyuo piya. 9Dopa pyuo namwa lanyuo dae epapala yuu kamongo amenge pingi nenge poro lao karenge dake jiya. 10Dokona dakepa nambame ee wara pyuo mupwa manjipunu dupwana Kamongome jiyamo dokona minyakamyuo epelyo.
Dopa lapala nenge paleta pisiki doko Kamongona lenge kambu dokona pyambwapala baa lao mona maiyuo kingi lakandare. 11Lakando lao embena Kamongo Anatu dokome bange keyange dupwa embape dee embena ree palu dupwa keta jiyamo doko kandapala baa kando ange andake lao karare. Dopa pyuo ange lao rae maiyuo kararaminyi dokopa Lipae akali dee akali wakale karala paengepe nakama role palenge dupwa pipya rae maiyuo yalya kando pisimana epena lare.
12Ee kana repo dokona yaka lao embena ee nengepe wambu piramo manjirinyi dokopa akalisa dusipana pingyu nyepala Lipae akalipi karala paenge akali muiyane waiyape dupwa maipa piri. Dopa pirinyi dokopa wambu palaminyi dokona nenge yangya naramopa nao palenale. Embame dopa pyuo maipala 13dokopa Kamongo doko lamaiyuo, Bange nengepe manju nyipunu akalisa dusipana pingyu nyepala emba jeroŋo lao dokona mende nambana anda dokona pyakuiyuo yalu pipunu see nalyamo, lamairi. Embame Lipae akalipi karala paengepe muiyane waiyape dupwa maiyapengeŋe langipinyi kandapi dokonako nambame maipunu pilyamo, lare. Bange akalisa dusipana pingyu nyuo maiyapengeŋe langipinyi pii dokona mende kamba lao kame soo kaeyapunde daa. 14Namba kumanda piso dokopa nenge pingyasa dokona mendepe nyuo naa nange. Nambame embena lenge kambu dokona poo pyasi ingyuo kara napalape dokopa nambana anda silyamo dokona mendepe nyuo kamanda minyuo paa nange. Dee dokona lapome nyuo wambu kumuyaminyi dupwana lao kiso mainginde daa. Kamongo embapa lao nambame kamba laa nalyo. Bange akalisa dusipana pingyu nyuo jepengeŋe lao letene dupwa pyuo otelyo. 15Embena yake panda poo pyasi dokona karo embena Isaraele wambu dupwa kandapala elyape keta piso kamonganyi nembape. Dopako pyuo namwana rakange kyawa dupwa pipya yuunde jeroŋo lalu lao lao kana minyapala yuu kamongo amenge pingi namwa jiinyi doko elyape keta pisinyi pyambwakape.
Kamongo Baa Rangena Wambu
16Epapu nakamana Kamongo Anatu dokome banya mawa pii dupwa minyalapa lao langilyamo. Dopa letamo dokona lao mona anda dokona piso minyiliŋi lao warombo soo karalapape. 17Epapu nakamana Kamongo Anatuŋu lao lao otapala baa rape rape lao kararama lao lalu lao lapala banya lowa pii dupwa minyuo karo baame pelapa lao laramuli pyuo kararama, letaminyi. 18Epapu Kamongome nakama baa rangena wambuŋu lao kando nyerono lalu lao leyamo dokona palyuo kando nyilyakande. Dopa pipala piso dokopa nakama banya lowape dee mawa pii kuki andakepe dupwa minyalapa lao langilyamo. 19Dopa pilyamo dokona baame nakama andanyi nembaramopa yuu liti menge baameko wasiyamo palaminyi rara dupwa pipya manda manja naramopa nakamame banya kingi doko londo lao lakandarami. Dopa piraminyipa baame nakama baa rangena wambu ingyuo paramiŋi lao lao kana minyiyamo dokona ingyuo para.
27:1—29:29 Wambu dupwame kata wakale wakale dupwana Anatu kamba lao karenge dupwa keta randa maiya. Dopa piyamopape wambu Anatunya pii warombo soo karenge dupwa elyape keta pisiya. Rombo 29 dokona yuu Moape dokona Anatumoo wambu dupwape wamba kana minyuo lalu lao leyaminyi dokona dee palyuo leyami.
Currently Selected:
Dutaronome 26: KYC
Highlight
Share
Copy
Want to have your highlights saved across all your devices? Sign up or sign in
The Shorter Old Testament and the New Testament in Kyaka Enga © Bible Society of Papua New Guinea, 1987.