Koula 8
8
1Saul ndiki gè kedè ta tòlè.
Ndò té ke nou tokou ngätar oso do dooudjé té ke kei Allah té ke Jérusalem, dèdè toï nsärèna nange té ke Judée ke Samarie toï, ndjè kouladjé ndja nai.
2Mare dooudjé ke ngem tar lo Allah doubou Etienne, dèdè nnè nya mbata la.
3A Saul toudjou dooudjé ke kei Allah té, nè nao mè kei té kada kada, nwaa dingaodjé ke dènèdjé, niladè kei koula té.
4Tokou ban dèdè ke nsärèna, dao loou té ke dang dang, dèdè mpa tar lo Allah.
5Philippe ao mare béh té ke Samarie kada, nè mpa tar lo Christ naredè.
6Dooudjé baya baya ndiki gè naaté ke tar ke Philippe pa aredè, tokou dèdè do tar la ke do né tòdjou ke nè nda.
7Mbata ndildjé ke madjang ao téh mè dooudjé té baya baya ke to ndjè woeidjé, dèdè dourouki ke tarr. Dooudjé baya baya ke debe ròdè woei, ke dèdè ke doso mete, rò too lodè goto.
8Tokou ban koukou dousou mè béh té nèn nya.
9Doou kada éh nou ria na Simon, nè nto ndjè ndön né mè béh té dongor, ke nare mè dooudjé ke Samarie ounda dò biä, nè mpana nè ndja nto to tokou doou.
10Dèdè toï do tar la madji, dooudjé ke ngadji ke tokou dooudjé mpana, Doou nèn to singa lo Allah nèn ke dèdè mmar to Tokou né ke bo.
11Dèdè do tar la mbata ndò gè eo nè nare mèdè ounda dò biä ke né ndön la ke nè nda.
12A gè té dèdè do mèdè té tokou Philippe pa tar ke madji lo béh ko lo Allah ke ri Jésus Christ, dèdè dinga baptême, dingaodjé ke dènèdjé tò.
13Simon ndja wo mèa té tò, gè té ke nè ninga baptême mbä, nè nao nisi ke Philippe. Mèa ounda do biä tokou nè no né tòdjou ke tokou né mori ke Philippe da.
14Tokou ndjè kouladjé ke isi Jérusalem té wo na dooudjé ke Samarie té oun tar lo Allah mbä, dèdè doula Pierre ke Jean ròdè té.
15Tokou dèdè ndé mbä, dèdè ndoudjou Allah mbata lodè, mbata kare dèdè dinga Ndil ke madji toï.
16Mbata nè nai ndé do doou té kada ang bai, dèdè dinga baptême ke ri Mbaibé Jésus ba.
17Tokou ban Pierre ke Jean dila djidè dodè té, dèdè dinga Ndil ke madji toï.
18Tokou Simon wo dèdè dinga Ndil deo kila dji ndjè kouladjé do dooudjé té, nè ndiki ta karedè narè,
19Mpana, Aremdjé singa nèn to, tokou ban doou ke ma mila djim dè té ase kinga Ndil ke madji toï tò.
20A Pierre pa arè, Narè loi toudjou deo kadaba sei, mbata i ounda mei ta kinga né kinga ba lo Allah deo narè té.
21Mare koula aséh tar nèn kada to tar loi ang, mbata mei to gatang kem Allah té.
22Tokou ban mbeté kedji né da ke madjang loi nèn, edoudjou Mbaibé Seigneur baa Allah a kïya kedji ke madjang ke to mei té.
23Mbata ma mo i to mè ongou té, ke mei ate käng ke né ke madjang toï.
24Simon tél tar pana, Edoudjidjé Mbaibé Seigneur mbata lom, mbata tar kada ke sésè epaidjé nèn ase kare dé dòm té ang.
25Tokou ban, tokou dèdè mpa tar nadji, ke dèdè ntòdjou tar lo Mbaibé Seigneur mbä, Pierre ke Jean ntél dao ke Jérusalem té, dèdè mpa tar ke madji béh té ke Samarie baya baya.
26A ange lo Mbaibé Seigneur kada pa are Philippe, Ï tarr ao er ke ber, ao ke deo bo ke téh Jérusalem ao Gaza. Deo nèn to deo ke mè kòr té.
27Nè nï tarr, nè nao. Wo doou kada ke to Éthiopien, doou ke òrou gemè, nè nto tokou ndjè koula lo Candace, mbai ke dènè lo dooudjé ke Éthiopie. Nè nto ndjè ngem né kinga toï lo dènè nèn. Nè nao Jérusalem té mbä ta wal Allah.
28Tokou nè nao ntél, nè nisi mè pousse sounda té, nè nao ntoura maketourou lo prophète Ésaïe.
29Ndil ndja pa are Philippe, Ao ngosiba mbòr pousse té nèn.
30Tokou ban Philippe aïn ao rè té, nè no doou nèn ao toura maketourou lo prophète Ésaïe. Nè ndoudjè, I geré né ke ao toura nèn wa?
31Nè mpana, Mase ta geré to di, tokou doou tòdjoum ang wa? Nè ndoudjou Philippe ta kai kao kisi sa.
32Tar ke nè ntoura mè maketourou té lo Allah to ban,
Nè nto tokou bati ke dèdè dao sa ta tòlè,
Aséh tokou ngon bati ke isi tè moundou nò dooudjé té ke ngisa bi rè,
Tokou ban nè nteï tè ang.
33Mè tar ròkoul té la dèdè mbeté ta gange saria la gaté gaté,
Na a kase tòdjou gel dooudjé la wa?
Mbata dòrou tébe la ke nange nèn.
34Nè ke nòrou gemè mpa nare Philippe, Mam ndoudji, prophète pa tar lo doou ke di wa, tar la ndja aséh tar lo mare doou wa?
35Tokou ban Philippe òrou tè, nè nounkotè ke tar maketourou nèn, nè ntòdjè tar ke madji lo Jésus.
36Tokou dèdè dao deo bo, dèdè ntéh mare man té, nè ke nòrou gemè mpa, Wo, man to nèn, di a òkou deo ta karem minga baptême wa?
37Philippe pana, Tokou i wo mei té toï, i ase. Nè ntél tar mpana, Ma mo mem té ke Jésus Christ to to Ngon lo Allah.
38Nè nare pousse arr loou kada, dèdè djokem dao mè man té, Philippe ke nè ke nòrou gemè, ke Philippe dè baptême.
39Tokou dèdè ntéh man ke daka, Ndil lo Mbaibé Seigneur oun Philippe ke dang, nè ke nòrou gemè noè marè ang nga. Nè nao deo la ke koukou nya.
40Dinga Philippe béh té ke Azot, tokou nè nao ndai, nè mpa tar ke madji mè béh té toï nderèng nè ntéh Césarée.
Currently Selected:
Koula 8: KL1960
Highlight
Share
Copy
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
