Luc 12
12
1Ndò tar té ke nèn, tokou dooudjé dourou baya baya mbona tokou ban dèdè mbòï dò gòlna, Jésus ounkotè pa tar kare ndjè kao gè tédjé dongor, Ngemidjé mbata tar oum lo Pharisiendjé, ke to tar kere.
2Né kada ke iyaa ke a téh ke daka ang goto, aséh né ke yarè ke da geré ang goto.
3Né toï ke sésè epaidjé gongeï té, da ko ke lokarè té, né toï ke sésè òdjidjé tarè mè kei té hoi, da pa ke tarr dò kei té.
4Ma mpa maresè ndjè bokoradjé lom, edaidjé bel lodè ang ke ntòl da rò, ke gè té dase ta da mare né ang.
5Ma ma tòdjousè nè ke asidjé da bel la, ebelidjé nè ke gè té nè ntòl dooudjé, singa la to ta kiladè loou kem pourou té. Aa, ma mpa maresè, ebelidjé nè ndja.
6Dèdè ndoko kolé mi mbata ngan narè djo ang wa? Ke mè Allah woei dò mare lodè kada ang.
7Bi dòsè ntoura toï mbä. Edaidjé bel ang, sésè madji wotaidjé kolé nya.
8Ma mpa maresè, dooudjé kada kada toï ke pa tar lom no dooudjé té, Ngon lo doou a pa tar lodè no angedjé té lo Allah tò.
9A nè ke mbetem no dooudjé té, da mbetè no angedjé té lo Allah tò.
10Dooudjé kada kada toï ke pa tar madjang dò Ngon té lo doou, dase kïya madjang lodè, a nè ke mpa tar sä ke Ndil ke madji toï, da kïya madjang la ang.
11Tokou dèdè dao kesè kei Allah té no mbaidjé té, ke no ndjè ko béhdjé té, aridjé mèsè sangesè ang, mbata sésè a télidjé tar aséh a paidjé tar di wa.
12Mbata Ndil ke madji toï a tòdjousè lé té ndja tar ke sésè a kasidjé pa.
13Doou kada horo dooudjé té ke baya baya pa arè, Ndjè tòdjou tar, epa are ngoköm ta kai né ndouba karem.
14Jésus pa arè, Doou, na arem misi ndjè gange tar, aséh ndjè kai né karesè wa?
15Nè mpa naredè, Ngemidjé madji, ngemidjé mbata tar da mè toï, mbata tébe lo doou to mè né té ke baya nya ke to dja té ang.
16Nè mpa tar gousou naredè, mpana, Ndòò lo doou ké ndjè né kinga nya an kandè ke baya nya.
17Nè nedji mèa té ndja, Ma ma da di wa, mbata dam ta ngem ko lom ase ang?
18Nè mpana, Ma ma da né nèn, ma ma toudjou dam lom toï, ma ma da maredjé ke bo wota. Ma ma ngem ko ke né lom toï kendé.
19Ma ma pa kare mem, Mem, né loi to nya, ase mbata bal baya baya. Ewaa ròi, ön mourou, aih, ndam.
20A Allah pa arè, Mbe. Tilti nèn ndja da doudjou ndil loi ta tél nè, ke né toï ke i da mba a to to lo na wa?
21To tokou ban ke doou ke mbön né kinga mbata la ndja, a nè mbön né kinga mbata Allah ang.
22Jésus pa are ndjè kao gè tédjé, Tokou ban ma mpa maresè, esangidjé mèsè mbata tébe losè ang, mbata a köndjé mourou di wa, aséh mbata da ròsè ang tò koubou di baa a koulaidjé wa?
23Mbata tébe losè to né ke wota mourou, ke ròsè to né ke wota koubou.
24Woidjé tar lo egändjé, dèdè ndoubou kandé ko ang, dèdè doudja ang, dèdè déh ke dam aséh kei ngem kandé ko ang, a Allah aredè mourou. Sésè madji nya wotaidjé eldjé ang wa?
25Doou ke da horosè té ke mèa sangè, ase ta da rè kare ngal wota wa?
26Tokou ban, tokou sésè asidjé ta da né ke ngadji tokou ban ang, esangidjé mèsè mbata kese né mbata di wa?
27Woidjé tar lo ndidjadjé tokou dèdè ntòkou, dèdè nda koula ang, dèdè nsoré ang. Ma mpa maresè, Salomon ndja ke né ndokoo la toï oula koubou ke koura tokou mare kada lodè ang.
28Tokou Allah da né ke koura ban are mou ke mè ndòò té bokonè, a bara da kila pouro, nè na koulasè koubou wota nya ang wa, sè dooudjé ke ndjè ko mè tédjé ngadji?
29Tokou ban ebiridjé né ke ta kousa ang, aséh né ke ta kaih ang, aséh aridjé mèsè sangesè ang tò.
30Mbata gel dooudjé toï ke nange nèn sange nédjé ban, a Bòsésè geré né nèn ke dousè.
31Ase kare esangidjé béh ko lo Allah, ke da karesè né nèn toï tò.
32Edaidjé bel ang, ngan batidjé, mbata Bòsésè wo madji ta karesè béh kö ndja.
33Elabidjé né losè, aridjé né kare ba dooudjé, edaidjé bòl mbata losè ke tir ang, ke né kinga ke dara ke a nai ang, loou ke ndjè boukou kada téh té ang, ke ndirbòrou kada toudjou né kendé ang to.
34Mbata loou té ke né kinga losè to kendé, mèsè a to kendé tò.
35Etoidjé beresè madji, aridjé lampe losè ndokoo.
36Isidjé tokou dooudjé ke ngebe ebèèdèdè, tokou nè nï loou mourou kisi kei té lo basä ke taa dènè ntél, tokou ban dèdè dase kòrou tadeo kei loshénè loshénè, tokou nè nounda tadeo kei.
37Madji éh ke nganlokisidjé ke tibi ang tokou ebèèdèdè dé. Tokoro ma mpa maresè, nè na tò koubou berè té ndja, nè na karedè disi ta table té, ke nè na dé da karedè.
38Tokou nè ndé ke dò bakebé, aséh tokou ta lokarè, tokou nè ningadè ngebe ban, madji éh ke nganlokisidjé nèn.
39Egeridjé yèn, tokou ndjè kei geré tilti ke ndjè boukou a dé, nè na kisi tarr, ke nè na karè ntoudjou kei la ang.
40Sésè asidjé ngem madji tò, mbata Ngon lo doou ao dé ke kade ke sésè ngebidjé ang.
41Pierre pana, Mbaibé Seigneur, i pa tar gousou nèn mbata lodjè aséh mbata dooudjé toï wa?
42Mbaibé Seigneur pana, Bana na to ndjè ngem né ke mè ndaa kaï ke kemkarè, ke ebèèdjè oundè to ndjè ngem dooudjé ke kei té la, ta karedè mourou lodè tokou kade ase kon mourou wa?
43Madji éh ke ngonlokisi nèn, ke ebèèdjè ingè nda tokou ban ndò ke nè ndé.
44Tokoro ma mpa maresè, nè na karè nisi ndjè ngem né la toï.
45A tokou ngonlokisi nèn pa ke mèa té, pana, Ebemdjè a dé ndjange ang, ke nè nounkotè ta tounda nganlokisidjé ke dingao, ke nganlokisidjé ke dènè, ke ta kon mourou ke ta kaih ta kare koto dè nya,
46Ebèè ngonlokisi nèn a dé ndò ke nè ngebè ang, ke kade ke nè ngeré ang, nè na toundè djaketa djaketa, ke nè na kilè loou té kadaba ke ndjè ke wo mèdè té ang.
47Ngonlokisi ke geré né ke ebèèdjè ndiki, a nè nda aséh ngem ta da tokou ebèèdjè ndiki ang, nè na toundè nya.
48A nè ke ngeré ang, ke nda né ta kinga kounda, nè na toundè ngadjiba. Dooudjé kada kada toï ke inga né nya, da doudjoudè mbata mare né nya, ke nè ke dooudjé arè né nya, dèdè da doudjè mbata mare né wota.
49Mam ndé ta kila pourou dò nange té nèn, di a mam ndiki, baa ta kare ö loshénè ba.
50Ma méh ke baptême ke ma mase kinga, ke ma misi ke mè woul ang nderèng nda baa.
51Edjidjé mèsè té ke mam ndé ta kare mè woul dò nange té nèn wa? Eë, ma mpa maresè, mam ndé ta kare tar kaina.
52Mbata ke ndò té ke nèn, mè kei té kada dooudjé mi a kaina, ndjè ke mouta a kai ke ndjè ke djo, ndjè ke djo a kai ke ndjè ke mouta.
53Dèdè da kaina, bo ngon a kai ke ngonè ke dingao, ngon ke dingao a kai ke bèdjè, ko ngon a kai ke ngonè ke dènè, ngon ke dènè a kai ke këndjè, moum dènè a kai ke dènè lo ngonè, ke dènè lo ngon a kai ke moumèdjè.
54Nè mpa nare dooudjé ke baya baya tò, Tokou sésè woidjé ndi ke il ao ï loou ke kade woei, sésè epaidjé loshénè ba ndi ao dé ta kere, ke yèn da tokou ban.
55Tokou sésè woidjé lél ke er té ke ber oula, sésè epaidjé, Loou ata tounga nya, ke yèn da tokou ban.
56Sè ndjè kere ngemdjé. Sésè egeridjé ta kòrou gel tar lo né ke nange nèn ke dara tò, mbata di a sésè egeridjé ta kòrou gel tar né ke loshénè nèn ang wa?
57Mbata di a sésè ndja egangidjé tar gaté gaté ang wa?
58Tokou i ao no mbai té ke doou ke toula dòi, esange ta da sa tar tokou naidjé deo bo, na dòmadjang a na kwaai kao sei no ndjè gange saria té, ke ndjè gange saria a kilai dji padja té, ke padja a kilai kei koula té.
59Ma mpa mari, i a téh daka ndò kada ang, sar i a kouka ngon narè ke to dòbon baa.
Currently Selected:
Luc 12: KL1960
Highlight
Share
Copy
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
