Matthieu 23
23
1Bana Jésus pa are dooudjé ke baya baya ke ndjè kao gè tédjé, pana,
2Ndjè da maketourou ndedjidjé ke Pharisiendjé disi ngèndé té lo Moïse.
3Tokou ban edaidjé ke woidjé tar ke dèdè mpa daresè, a edaidjé tokou dèdè nda ang, mbata dèdè mpa tar a dèdè nda ang.
4Dèdè nto né koto ke oi ke to ngeng ta koto, ke dèdè doundadè dòdam dooudjé té, a dèdè ndja a kòroudè ke ngao djidè kada ang.
5Dèdè nda né lodè toï ta kare dooudjé wo, mbata dèdè nda né ngadji lodè bo wota, ke dèdè nda koulaa ta koubou lodè ngal.
6Dèdè ndiki loou kisi ke madji ndò mourou kousou té, ke ngèndé ke kèté mè kei Allah té.
7Dèdè ndiki ta kare dooudjé dadè laphia nata té, ke ta kare dooudjé bardè ndjè tòdjou tar.
8Aridjé dooudjé barsè ndjè tòdjou tar ang, mbata ndjè tòdjou tar losè éh kada, ke sésè toï etoidjé ngakönadjé.
9Ebardjé doou kada to bòsésè nange nèn ang, mbata Bòsésè éh kada, nè ke néh dara.
10Aridjé dooudjé barsè ebèèdèdè ang, mbata ebèèsésè éh kada, Christ ndja.
11Nè ke néh mbo nouta horosè té, na to ngonlokisi losè.
12Doou ke ndoi rè ndja wota, nè na dé ngadji, a nè ke nda nè ndja ngadji da karè mbo nouta.
13Ongou a dasè, ndjè da maketourou ndedjidjé ke Pharisiendjé, ndjè kere ngemdjé, mbata sésè òkidjé dooudjé béh ko ke dara, mbata sésè ndja abidjé mè té ang ke aridjé dèdè ke ndiki ta kao mè té ta kande kendé ang.
14Ongou a dasè, ndjè da maketourou ndedjidjé ke Pharisiendjé ndjè kere ngemdjé, mbata sésè etaaidjé kei lo dènè ndoubadjé, ke sésè edoudjidjé Allah gosè eo ta kere dooudjé, mbata tar nèn sésè a kingaidjé saria bo wota.
15Ongou a dasè, ndjè da maketourou ndedjidjé ke Pharisiendjé, ndjè kere ngemdjé, mbata sésè ndjaidjé toura man katé té, ke do nange té ta kare doou kada tourou rè to Juif, tokou nè ntourou rè to Juif, sésè edèidjé ta kare ndé ngon ke loou kem pourou té gar djo wota ngäsè ndja.
16Ongou a dasè, ndjè kem tèdjé ke tòdjou deo mare ndjè kem tèdjé, ke epaidjé. Tokou doou oubou yo ke ri tokou kei Allah, né nèn a to né ke ba, a tokou doou oubou yo ke ri narè lor ke tokou kei Allah té, nè nase ta ngem rè.
17Sè mbedjé ke ndjè kem tèdjé, né di a to wota marè, narè lor aséh tokou kei Allah ke ngem narè lor karè ndé madji toï wa?
18Sésè epaidjé, Tokou doou oubou yo ke ri bann, né nèn a to né ke ba, a tokou doou oubou yo ke ri né kare ba ke to dò bann té, nè nase ta ngem rè.
19Sè dooudjé ke ndjè kem tòdjé, né di a to wota marè, né kare ba aséh bann ke ngem ta kare né kare ba dé madji toï wa?
20Tokou ban nè ke noubou yo ke ri bann, noubou yo ke ri né ke né toï ke to dè té.
21Nè ke noubou yo ke ri tokou kei Allah, noubou yo ke ria ke do nè té ke to mè té.
22Nè ke noubou yo ke ri dara, noubou yo ke ri ngèndé lo Allah, ke do nè té ke nisi dè té.
23Ongou a dasè, ndjè da maketourou ndedjidjé ke Pharisiendjé, ndjè kere ngemdjé, mbata sésè oukaidjé dîme kam menthe, ke kam aneth, ke kam cumin, ke ïyaidjé tokou tar ndedji ke bo wota, ta gange tar gaté gaté ke mè madji ke ko mè té. To tar losè ta da yéh nèn, ke to tar losè ta kare maredjé ikisè ang.
24Sè ndjè kem tèdjé ke tòdjou deo mare ndjè kem tèdjé, sésè ekaidjé ngan kem ke man té kòrou, a ouridjé da djambal.
25Ongou a dasè, ndjè da maketourou ndedjidjé ke Pharisiendjé, ndjè kere ngemdjé, mbata sésè etokoidjé giri ngonarè ke kaa, a ke mè té dèdè dousou ke tar boukou ke tar boo da rè madjang.
26I Pharisien ke to ndjè kem tè, toko mè ngonarè ke kaa dongor, tokou ban yèdo ke girè té ase goto tè.
27Ongou a dasè, ndjè da maketourou ndedjidjé ke Pharisiendjé, ndjè kere ngemdjé, mbata sésè etoidjé tokou dèbare ke dòrou ke pòr, ke to madji girè té ke daka, a mè té dousou ke singa dooudjé ke woei, ke né yem toï.
28Tokou ban sésè tè, kem dooudjé wosè ke daka tokou gaté gaté, a ke mèsè té dousou ke tar kere ke né ke madjang.
29Ongou a dasè, ndjè da maketourou ndedjidjé ke Pharisiendjé, ndjè kere ngemdjé, mbata sésè edaidjé dèbare prophètedjé, ke ndangidjé dèbare dooudjé ke gaté gaté.
30Ke epaidjé, Tokou djèdjè djisi tébe ndè té lo kadjèdjè ke leo, djèdjè dja ndiki gè kedè ta kongou mese prophètedjé ang.
31Tokou ban sésè epaidjé tar nadji dèsè té ndja, ke sésè etoidjé ngan lo ndjè ke tél prophètedjé.
32Tokou ban edaidjé ta kare kòdjou lo kasésè a dousou.
33Sè lidjé, sè ngan horomahodjé, sésè a kaïndjé saria loou kem pourou deo di té wa?
34Tokou ban ma moula prophètedjé ke ndjè kemkarèdjé ke ndjè da maketourou ndedjidjé ròsè té, sésè a tòlidjé maredjé horodè té dè kake dèse té, sésè a toundaidjé maredjé horodè té mè kei Allah té losè, ke a ngäidjédè ke tar ke béh kada nderèng mare béh.
35Ta kare mese ke gaté gaté toï ke ongou nange nèn dé dòsè té, ounkotè ke mese lo Abel, doou ke gaté gaté, nderèng mese lo Zacharie, ngon lo Barachie, ke sésè etòlèdjé dana tòkou kei Allah té horo bann té.
36Tokoro ma mpa maresè, né nèn toï a dé dò gel dooudjé té nèn.
37Jérusalem, Jérusalem, ke tòl prophètedjé, ke tila dèdè ke douladè dari ke err. Gar baya mam ndiki ta mbòn ngani naaté, tokou kö koundja mbòn nganè kö bakè té, a sésè ndikidjé ang.
38Wo, kei losè a dé kari ba,
39Mbata ma mpa maresè, sésè a komdjé marè ang nga sar sésè a paidjé, Madji éh ke nè ke ndé ke ri lo Mbaibé Seigneur.
Currently Selected:
Matthieu 23: KL1960
Highlight
Share
Copy
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
