Matthieu 25
25
1Ke ndè té ke nou, béh kö ke dara a to tokou mare lo ngamandédjé dòkou ke djï lampe lodè, dèdè ntéh ta kinga dingao ke siki.
2Mi horodè té to ndjè mbedjé, ke mi to ndjè kemkarèdjé.
3Mbata tokou dèdè ke nto mbedjé ndjï lampe lodè dèdè doun oubou dao né ang.
4A dèdè ke nto ndjè kemkarèdjé ndjï lampe lodè ke oubou mè kouè té.
5Tokou dingao ke siki nai deo eo, bi dadè toï dao ntibi.
6Ke mè tilti, do kila mber ke tarr, Woidjé dingao ke siki. Etéhdjé ta kingè.
7Bana ngamandédjén lé toï ï da lampe lodè.
8Dèdè ke nto mbedjé mpa ke ndjè kemkarèdjé, Aridjédjè mare oubou lampe losè, mbata lampe ngädjè woei.
9Dèdè ke kemdè arè ntél tar daredè mpana, Eë, oubou mbata lodjè ke ngäsè goto, abidjé rò ndjè labedjé té, ndokoidjé mbata losè.
10Tokou dao ta kao ndoko, dingao ke siki téh mbä, dèdè ke nda né lodè toï dande ke dingao ke siki mbata mourou kisi kei, ke doutou tadeo kei.
11Gè té mare ngamandédjén lé dé tò, dèdè mpana, Mbaibé Seigneur, Mbaibé Seigneur, òrou aredjè.
12A nè ntél tar mpana, Tokoro ma mpa maresè, mam ngerésè ang.
13Tokou ban ngemidjé, mbata sésè egeridjé ndò aséh kade ang.
14Mbata to tokou doou ke ata kao mare béh té, nè mmar beredjé la, nè naredè né la djidè té.
15Nè nare narè talent mi bere ke kada, nare narè djo yéh ke kada, yéh ke mare kada narè narè kada, ase kemkarè lodè kada kada. Bana nè nao loou la.
16Loshénè loshénè nè ke ntaa narè talent mi, nao nda nè mare narè, ke nè ninga mare narè talent dè té mi.
17Tokou ban tò, nè ke ntaa narè talent djo, nè ninga mare narè talent dè té djo.
18A nè ke ntaa narè talent kada, nè nao nourou bwa nange, niyaa né narè lo ebèèdjè kendé.
19Gè té ndò baya baya, ebèè beredjé nèn tél, ntoura tar narè kedè.
20Nè ke ntaa narè talent mi ntéh, ndé ke mare narè talent mi, mpana, Ebemdjè, leo arem narè talent mi, wo, ma minga mare narè talent dè té mi.
21Ebèèdjè pa arè, I da madji, bere ke madji ke ndjè mè ndaa kai, i da ke mè ndaa kaï ke né ke ngadji, ma ma kari ta ngem né nya, edé isi ke koukou lo ebeidjè.
22Nè ke ntaa narè talent djo to, nè ntéh mpana, Ebemdjè, leo arem narè talent djo, wo, ma minga mare narè talent dè té djo.
23Ebèèdjè pa arè, I da madji, bere ke madji ke ndjè mè ndaa kaï, i da ke mè ndaa kaï ke né ke ngadji, ma ma kari ta ngem né nya, edé isi ke koukou lo ebeidjè.
24Nè ke ntaa narè talent kada to, nè ntéh mpana, Ebemdjè, mam ngeré i to doou ke ngeng, i oudja ko loou té ke i doubou né té ang, ke i mbòn loou té ke i to né kendé ang.
25Tokou ban bel dam, ma mao miyaa narè loi nange. Wo, né loi éh nèn.
26A ebèèdjè tél tar arè pana, I bere ke ndjè dabe ke madjang. I geré ke ma moudja ko loou té ke mam ndoubou né té ang, ke ma mbòn loou té ke mam nto né kendé ang wa?
27Bana to tar loi ta kïya narè lom ke dji ndjè ngem narè té, tokou ban ndò ke mam ndé ma mase kinga narè lom ke mare narè dè té.
28Tokou ban etaaidjé narè talent ke dja té, aridjé nè ke néh ke narè talent dòkou.
29Mbata dèdè toï ke déh ke né da karedè marè dè té, ke dèdè da kéh ke né baya baya, a nè ke néh ke né ang, lé né ke to dja té ka da taa.
30Ilaidjé bere ke ndjè dabe ke madjang londoul té ke daka, loou té ke nou dooudjé a no ke man kemdè ke da kousa ngangedè.
31Ndò ke Ngon lo doou dé ke ndokoo la, ke angedjé toï dé sa, ndò té ke nou nè na kisi dò ngèndé té la ke ndokoo.
32Gel dooudjé toï a mbona nòè té, nè na kai horodè kada kada tokou ndjè koul batidjé kai batidjé ke biandjé.
33Nè na kounda batidjé ke er kòlè té, a biandjé ke er gèlè té.
34Bana Mbaibé a pa kare dèdè ke er kòlò té, Edéidjé, sésè ke ingaidjé mè madji lo Bòi, etaaidjé béh ko to né ndouba ke nda mbata losè dongor baa nange nèn to.
35Mbata boo dam a sésè aremdjé mourou, kounda man öm a sésè aremdjé maih, mam nto ndjè mbaa a sésè etaamdjé.
36Ma méh ke koubou ang a sésè oulaidjé koubou rom té, mam nto ke rò too a sésè edéidjé womdjé. Ma misi mè kei koula té a sésè edéidjé rom té.
37Bana ndjè ke gaté gaté a tél tar karè, Mbaibé, ndò di baa djèdjè djoi ke boo dai a djèdjè djari mourou, aséh kounda öi a djèdjè djari man aih wa?
38Ndò ke da baa djèdjè djoi ndjè mbaa a djèdjè ntaai, aséh djoi ke koubou ang a djèdjè djoula koubou ròi té wa?
39Ndò ke da baa djèdjè djoi ke rò too, aséh djoi mè kei koula té, a djèdjè djao ròi té wa?
40Mbaibé a tél tar aredè, Tokoro ma mpa maresè, mbata sésè edaidjé né are nè kada ke ngadji ke horo ngakömdjé nèn, sésè edaidjé né arem.
41Bana nè na pa kare dèdè ke er gèlè té, Abidjé, ïyamdjé sè ndjè né tadji, abidjé mè pourou té ke ke ndò ke ndò ke nda mbata Satan ke angedjé la.
42Mbata boo dam a sésè aremdjé mourou ang, kounda öm a sésè aremdjé man maih ang.
43Mam nto ndjè mbaa a sésè etaamdjé ang, ma méh ke koubou ang a sésè oulaidjé koubou ròm té ang, mam nto ke rò too ke misi mè kei koula té, a sésè edéidjé ta kom ang.
44Bana dèdè da tél tar tò, Mbaibé, ndò ke da baa djèdjè djoi ke boo dai, aséh kounda öi aséh ndjè mbaa, aséh ke koubou loi goto, aséh ke rò too, aséh mè kei koula té, baa djèdjè nda djari ang wa?
45Bana nè na tél tar karedè, Tokoro ma mpa maresè, mbata sésè edaidjé né are dèdè ke ngadji horodè té kada nèn ang, sésè edaidjé arem ang tò.
46Dèdè da kao loou ongou té ke ke ndò ke ndò, a ndjè ke gaté gaté a kao loou tébe té ke ke ndò ke ndò.
Currently Selected:
Matthieu 25: KL1960
Highlight
Share
Copy
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
