Matthieu 27
27
1Tokou loou arè mbä, tòkou ndjè kòrdjé ke tòkou dooudjé horo dooudjé té ndedjina ta kare ntòl Jésus.
2Dèdè ntò Jésus dao sa darè Pilate, ke to ndjè kö nange.
3Tokou Judas, ndjè ndokè, wo dèdè ngange saria yo dè té, nè mbeté kedji né da ke madjang la, nè ntél ke narè argent dòmouta rò tòkou ndjè kòrdjé té ke tòkou dooudjé.
4Nè mpana, Mam nda né ke madjang mbata mam ndoko mese ke madjang goto kendé. Dèdè mpana, Yèn to tar lodjè wa? Yèn to tar loi.
5Nè nila narè argent nange mè tòkou kei Allah té, nè ntéh daka. Nè nao ntò gòsè ndja ke koulaa nna tarr.
6Tòkou ndjè kòrdjé oun narè argent pana, Deo tar ndedji té to madji ta kiladè sandoukou narè té ang, mbata to narè mese.
7Tokou ban dèdè ndedjina horodè té, dèdè ndoko ndòò lo ndjè kouba andji ke narè nèn, ta doubou ndjè mbaadjé kendé.
8Tokou ban dèdè mmar ndòò nèn, Nange mese sar bokonè.
9Bana tar ke prophète Jérémie pa leo, dé to tar ke tokoro, pana, Dèdè doun narè argent dòmouta, narè ndoko doou ke mare ngandjé lo Israël toura dè té leo.
10Dèdè daredè mbata ndòò lo ndjè kouba andji, deo kadaba tokou Mbaibé Seigneur tòdjoum.
11Bana Jésus arr nò ndjè kö nange té, ndjè kö nange doudjè, I to Mbaibé lo Juifdjé wa? Jésus pa arè, I pa ban.
12Tokou tokou ndjè kòrdjé ke tokou dooudjé ntoula dè, nè ntél tar kada ang.
13Bana Pilate pa arè, I wo tar ke baya ke dèdè mpa dòi té ang wa?
14Nè ntél mpa tar kada narè ang, ntél tar dò tar toula kada ang, tokou ban mè ndjè kö nange edji nya.
15Bana ke ndò tokou mourou té toï, to tar lo ndjè kö nange ta kòrou ndjè kei koula kada kare dooudjé ke baya, nè ke dèdè ndikè.
16Ndò té ke nou, dèdè déh ke tòkou ndjè kei koula kada, ria na Barabbas.
17Tokou ban, tokou dèdè mbòna mbä, Pilate pa aredè, Sésè ndikimdjé ta kòrou na karesè wa, Barabbas aséh Jésus, nè ke mmarè na Christ?
18Mbata nè ngeré dèdè dare Jésus dja tè mbata mè dadè.
19Tokou nè nai nisi dò ngèndé gange saria té, dènè la oula rè té pana, Eda né kada ke doou ke gaté gaté nèn ang, mbata ma minga ongou nya mbata la bokonè ke ni.
20A tòkou ndjè kòrdjé ke tòkou dooudjé ndedji dooudjé ta doudjou mbata Barabbas, ke ta tòl Jésus.
21Ndjè kö nange pa aredè mare bai, Sésè ndikimdjé ta kòrou na karesè horodè té ke djo nèn wa? Dèdè mpana, Barabbas.
22Pilate pa aredè, Bana mam nda di ke Jésus, nè ke mmarè na Christ wa?
23Dèdè toï mpana, Are ntòlè dò kake dèse té. Nè mpana, Mbata di wa, nè nda né ke madjang di wa? A dèdè mpa ke tarr wota, Are ntòlè dò kake dèse té.
24Tokou ban, tokou Pilate wo nè nda pi, a boula nya ao ï, nè noun man, nè ntoko dja nò dooudjé té ke baya mpana, Tar mese lo doou ke gaté gaté nèn òrou dòm ang, to tar losè ndja.
25Dooudjé toï tél tar pana, Are mese la to dòdjè té ke dò ngandjé té.
26Tokou ban nè nòrou Barabbas naredè. Gè té a nè nounda Jésus ke djoula, nè nwèè naredè ta kare ntòlè dò kake dèse té.
27Bana ndjè pouroudjé lo ndjè kö nange ao ke Jésus mè kei gange saria té, dèdè mbòn ndjè pouroudjé lodè toï nòè té.
28Dèdè dòrou koubou la toï, doula tokou koubou ke kasè rè té.
29Dèdè doudjou djòkedò konn, doula dè té, dèdè doula kòbou dja té ke kòl. Dèdè dongou mekedjé gòldè nange nòè té, dèdè nkoukè mpana, Laphia, Mbaibé lo Juifdjé.
30Dèdè ntiwëré kèmè té, dèdè ntaa kòbou ntounda dè.
31Gè té ke dèdè nkoukè mba, dèdè dòrou tokou koubou, dèdè doula koubou la ndja rè té, ke dèdè dao sa ta tòlè do kake dèse té.
32Tokou dèdè dao ndja daka, dèdè dinga doou kada ke Cyrène, ria na Simon, dèdè dwaa doou nèn ta karè noto kake dèse lo Jésus.
33Tokou dèdè ntéh loou té ke mmarè na Golgotha, ke pana, Loou singa do,
34Dèdè darè vin ke dèdè mpolè ke keiël ta kare naih, a tokou nè nnaa, nè mbeté ta kaih.
35Tokou dèdè ntòlè do kake dèse té mba, dèdè nkai koubou la horodè té deo dòò né mbadi té.
36Bana dèdè disi nange, dèdè ngemè nou.
37Do loou ke dè té, dèdè dounda maketourou gange saria la ke pana, Yèn to Jésus Mbaibé lo Juifdjé.
38Bana dèdè ntòl ndjè boukoudjé djo do kake dèse té sa, kada er kòl, kada er gèl.
39Dèdè ke ndai nou nkoukè, doun dòdè,
40Dèdè mpana, I ke ndiki ta toudjou tokou kei Allah, ke ta da marè ke ndò mouta, adji ròi ndja. Tokou i to Ngon lo Allah, edisi nange ke do kake dèse té.
41Tòkou ndjè kòrdjé ke ndjè da maketourou ndedjidjé ke tokou dooudjé nkoukè ban to, mpana,
42Nè nadji mare dooudjé, nè nase kadji rè ndja ang. Nè nto Mbaibé lo Israël, are nè ndisi nange ke do kake dèse té loshénè, a djèdjè dja ko mèdjè té sa.
43Nè nounda mèa do Allah té, are Allah adjè bashénè tokou nè ndiki gè sa, mbata nè mpana, Mam nto Ngon lo Allah.
44Ndjè boukoudjé ke dèdè ntòldè dò kake té sa, dèdè ntadjè deo kadaba tokou ban tò.
45Bana tokou kade arr dana ase misä, loou ndoul dò nange té toï nderèng kade tél ase djikada.
46Ke kade djikada Jésus pa ke tarr, Éli, Éli, lama sabachthani? Yèn pana, Allah lom, Allah lom, mbata di a i ïyam nga wa?
47Mare dooudjé ke arr ngosiba nou, tokou dèdè do tar nèn, dèdè mpana, Doou nèn bar Élie.
48Kada ke horodè té aïngòrou loshénè loshénè, noun kougal dousou ke vin ke mase, nto ke kòbou noula ta karè naih.
49Maredjé toï pana, ïya, aredjè djo tokou Élie a dé ta kadjè.
50Jésus pa ke tarr marè wota, ke noula ndil la.
51Wo, tokou koubou mè tokou kei Allah té tir dana djo, ï tarr tir nderèng òrou nange. Nange yè ke err ria.
52Ta bwa yo teï, ke mare rò ndjè ko mè tédjé nya ke woei leo ï.
53Tokou Jésus ï mba nga dèdè ntéh bwa yo té ke daka, dèdè dao mè béh té ke madji toï, dèdè ntéh no dooudjé té ke baya.
54Tokou ndjè ngem ndjè pouroudjé ke dèdè ke déh sa ke dao ngem Jésus, do nange yè ke né ke téh, bel dadè nya, dèdè mpana, Tokoro doou nèn to Ngon lo Allah.
55Dènèdjé baya éh tén to, dèdè darr dèbè eo ta ko tar, dèdè ke dï Galilée té dao go Jésus té nda sa.
56Marie Magdala, ke Marie ko Jacques ke Joseph, ke ko ngandjé lo Zébédée éh horodè té.
57Tokou kade woei mba, doou ke ndjè né kinga ke Arimathée dé, ria na Joseph, nè ndja nto ndjè kao go Jésus té to.
58Nè nao rò Pilate té, ndoudjè mbata nin Jésus. Bana Pilate are tè ta karè.
59Joseph oun nin lé, nè nkè ke koubou lin ke madji.
60Nè ndoubè mè bwa yo té la ndja, ke nè nourou mè tokou err té leo, nè nila tokou err ta bwa yo tén, nè nao.
61Marie Magdala ke mare Marie, dèdè déh nou, disi mbòr bwa yo té.
62Ke bara, ke to ndò gè té ndò da né Pâque, tokou ndjè kòrdjé ke Pharisiendjé mbona rò Pilate té.
63Dèdè mpana, Mbai, mèdjè olè do tar té ke ndjè kere ngem nèn pa tokou nè nisi kem ba, Gè té ndò mouta ma ma kï.
64Tokou ban are tai ta kare ngem dòbarè ngeng nderèng ase ndò mouta, mbata dòmadjang a ndjè kao gè tédjé a dé boukou ninè, baa da pa kare dooudjé, Nè nï mè bwa yo té mba, bana tar ngem ke goukou a to madjang wota yéh ke dongor.
65Pilate pa aredè, Sésè éhdjé ke ndjè pouroudjé ta ngem, abidjé, ngemidjé tokou sésè asidjé.
66Tokou ban dèdè dao, dèdè doutou ta bwa yo ngeng ke err ke rëté kèmè, ke ndjè pouroudjé ta ngem éh kedè.
Currently Selected:
Matthieu 27: KL1960
Highlight
Share
Copy
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
