Matiyu 5

Yeesɔ tusu zang vuu ka yuu kɔpɔ

(Luk 6:20-23)

1Yeesɔ zi zang ɓɔɔ ri kpalɛ zɔɔ ka bii ɓiɓɛ gaagaa, a vang kɔpɔ, daa nwang ka tipi. Zang ɓɔɔ ri mantɛ vuu ka bii ɓiɓɛ, ri naa kpalɛ zɔɔ ka bii ɓiɓɛ. 2A gaa ri yuu vuu tusunang kati, tɔɔ,

3“Tĩnang tãanang ɓi ɓɔɔ zang ɓɔɔ ri zi tɔ nɛɛ,

vuu Suru Laa ɓi kagn naa ɓarɛ kpang,

Laa naa a rikɔ vuu tɔ̃ɔ ɓɔɔ wu a zang ɓɔɔ ri ta wu,

nɛɛ wukɔ kpanti ɓɛɛ.

4Tĩnang tãanang ɓi ɓɔ̀ɔ́ zang ɓɔɔ ri káa katɔ ɓɛɛ,

Kpanti Laa naa àlɛ́ ri miiri ditɔ.

5Tĩnang Tãanang ɓi ɓɔɔ zang ɓɔɔ ri tuu yuu kpang ɓɛɛ.

Laa naa a ri vuu ɓɔɔ wu kɔɔyi,

nɛɛ wu a ri ɓɛɛ.

6Tĩnang Tãanang ɓi ɓɔɔ zang ɓɔɔ ri kasɛ katɔ gbãng gbãng nɛɛ ri palɛ vuu

ɓɔɔ Kpanti Laa kasɛ nɛɛ yeti ɓarɛ gbete ɓɛɛ.

Laa naa a ri gbalang ditɔ ri palɛ vuu keɓe.

7Tĩnang Tãanang ɓi ɓɔɔ zang ɓɔɔ gn zang kɔng ri katɔ.

Gn ɓarɛ naa kɔng Kpanti Laa ditɔ jong.

8Tĩnang Tãanang ɓi ɓɔɔ zang ɓɔɔ ri dũng Laa nɛɛ yeti gbete ɓɛɛ.

Rikɔ naa zi Kpanti Laa.

9Tĩnang Tãanang ɓi ɓɔɔ zang ɓɔɔ ri kasɛ nɛɛ

zang nwang ka nyaa zɔɔ ɓɛɛ.

Zang naa ɓaa rikɔ nɛɛ wujɛ Laa.

10Tĩnang Tãanang ɓi ɓɔɔ zang ɓɔɔ zang dang ri jĩng,

ka ruu ɓɔɔ, ri palɛ vuu tɔ̃ɔ ɓɔɔ Kpanti Laa kasɛ ɓɛɛ.

Laa naa a rikɔ vuu tɔ̃ɔ ɓɔɔ wu a zang ɓɔɔ ri ta wu, nɛɛ wukɔ Kpanti ɓɛɛ.

11“Tĩnang Tãanang ɓi ɓɔɔ manɛ kɔ, naa zang dãa nɔɔ, zang dang nɔɔ jĩng, a zang ti kɔɔ ruu shi kpang nɛɛ sèé ka yuu manɛ, ka ruu ɓɔɔ, nɔɔ zang mɛɛ ɓɛɛ. 12Nɔɔ dɔɔ bii ta, nɔ́ɔ ti tãa tĩnang, ka ruu ɓɔɔ, Kpanti Laa shing nɔɔ vuu ɓɔɔ kagn lapa ɓɛɛ. Zang dàng zang nyaa shonang Kpanti Laa ɓɔɔ ri a ka tĩng manɛ jĩng doo nɔngkɔ.

Tãa nɛɛ nɔng yakɛnang ɓɔɔ ka koo ɓɛɛ

(Mar 9:50; Luk 14:34-35)

13“Nɔkɔ tãa ka koo keɓe. Naa lanang tãa nɛɛ takpang, zang pálɛ̀ bɛ̀ɛ́ wu ri tãa tɔkn viya? Zang pálɛ̀ vuu ɓi tɔ̀ɔ́ nɔng kpang. Zang vang ɓi kaa tɔ, zang naalɛ nɛɛ doo.

14“Nɔkɔ nɔng yakɛnang ka koo keɓe. Gãa ɓɔɔ zang mãa ka nɔng dɛɛrɛ, waasɛ bii ɓi jong kpang. 15Zang ti mang waa zàáng sɔɔ ɓi jong, zang zuu nɛɛ gãntang kpang. Zang shing ɓi ka yuu vuu kɔ jong, tɔɔ wu yakɛ zang nɔng kati. 16Ka ruu nɔngkɔ, nɔɔ palɛ vuu tɔ̃ɔ manɛ waasɛ̃ ka jĩng zang, tɔ̀ɔ ri zi shonang tɔ̃ɔ manɛ, ri dɔ̀ɔ Daa manɛ ɓɔɔ lapa kati.”

Vuu ɓɔɔ Yeesɔ tusu ka yuu Ruu Laa ɓɔɔ Musa bee ɓɛɛ

17“Nɔ́ɔ tɔɔ kpang, nɛɛ n arɛ, nɛɛ n naa kɔ̃sɔ nyaa dannang Musa nɛɛ vuu ɓɔ̀ɔ zang nyaa shonang Laa ri túsú ɓɛɛ katɔ kpang. N arɛ nɛɛ tɔɔ n naa shingnɛ ri ɓee nyaa katɔ kɔ jong. 18N kɔ̀ɔ́ nɔɔ ruu ɓɔɔ niizang kɔ nwani, lapa nɛɛ tipi ri nɛɛ doogn, vuu gbete ka teteng rɛɛ vuu ɓɔɔ Musa beeyi naa shaarɛ kpang. Ri naa ɓee nyaa ditɔ nandon. 19Ka ruu nɔngkɔ, naa shɔnzang ɓɔɔ ɓa nyaa ɓɔɔ Laa dangnɛ, a ti tusu zang naa ɓɔɔ ri ɓa ɓɛɛ jong, wukɔ zang tɔkɔlɔng ka teteng zang ɓɔɔ Laa naa roo Kpanti ka yuu ɓarɛ ɓɛɛ. A zang piti ɓɔɔ dũng Ruu Laa keɓe, a ti tusu zang nɛɛ ri dũng jong, wukɔ zang bang ka teteng zang ɓɔɔ ri ka yeti kpanti ɓɔɔ Laa roo ɓɛɛ. 20N kɔɔ nɔɔ naa tɔ̃ɔ manɛ ɓá ɓɔ̀ɔ́ zang ɓɔɔ ri tusu zang labeenang nɛɛ ɓɔ̀ɔ́ zang Farisi kpang, nɔɔ naa daa manɛ ka nɔng ɓɔɔ Laa naa roo kpanti kpang tingkiring.”

Vuu ɓɔɔ Yeesɔ tusu ka ruu Gnvɔ ɓɛɛ

(Luk 12:57-59)

21“Nɔɔ tãa naa ɓɔɔ Kpanti Laa kɔɔ zang ka tĩng tɔ. Kpanti Laa tɔɔ, ‘Mɔɔ nyɔ shɔnzang vɔrɔ kpang. Ka ruu ɓɔɔ zang piti ɓɔɔ nɛɛ nyɔ zang vɔrɔ, zang naa jɛ̃ɛ wu ruu katɔ.’ 22A kãntang keɓe, n kɔɔ nɔɔ, naa shɔnzang ɓɔɔ tuu gnvɔ nɛɛ ɓeezung, zang naa jɛ̃ɛ wu ruu katɔ. Naa shɔnzang ɓɔɔ ti kɔɔ ɓeezung nɛɛ ‘Rang waati keɓe.’ Zang daa nɛɛ wu ka dabang kpanti. Naa zang ɓɔɔ ti ɓaa ɓeezung nɛɛ ‘Shoko.’ Zang tasɛ wu ka waa. 23Ka ruu nɔngkɔ, mɔɔ nɛɛ tɔɔ mɔɔ a Laa vuu ka nɔng ɓɔɔ zang dɔɔ Kpanti Laa vuu kagn, a mɔɔ naa kpaa danggn vuu ɓɔɔ mɔɔ lasɛ ɓaazung yeti nɛɛ mani ɓɛɛ, 24yaa vuu ɓɔɔ mɔɔ tɔɔ mɔɔ a Kpanti Laa ka nɔngkɔ ka gbongkarɛ, mɔɔ daa gaa wu, wu yaa mɔɔ gbalang. Tɔɔ mɔɔ gbãayu, mɔɔ naa a Kpanti Laa vuu ɓaaɓɛ kati.

25“Nɔɔ nɛɛ daa nɔng ruu jɛ̃ɛnang, nɔɔ mã zɔɔ naa nɛɛ zang ɓɔɔ ɓàa mɔɔ nyaavaa pati ka gbalang. Ka ruu ɓɔɔ, zang ɓɔɔ ɓaa mɔɔ nyaavaa nɛɛ daa tuu mɔɔ wu a zang ruu jɛ̃ɛnang, zang ruu jɛ̃ɛnang tuu mɔɔ a jaa doo kpanti ri loo mɔɔ ka sãa ɓɛɛ. 26N kɔɔ mɔɔ ruu ɓɔɔ niizang kɔ nwani, mɔɔ hàngsɛ́ nyaa saka shunang ka gbongkarɛ nandon tɔ̀ɔ, zang wu naa nwangsɛ mɔɔ.

Vuu ɓɔɔ Yeesɔ kɔɔ ka yuu roonang nɛɛ soro zang ɓɔɔgn

(Mar 9:43-47)

27“Nɔɔ tãa ruu ɓɔɔ Kpanti Laa kɔɔ zang tɔ. Kpanti Laa tɔɔ, ‘Mɔɔ ɓang bii nɛɛ soro zang ɓɔɔ kpang.’ 28A kãntang keɓe n kɔ̀ɔ́ nɔɔ, zang ɓɔɔ nɛɛ zi zang soro, a suru bii daa wu nɛɛ wu, ɓang bii ɓi tɔ nɛɛ wu ka yeti ɓiɓɛ. 29Jĩng nakn ɓaaɓɛ kɔ nɛɛ shing mɔɔ mɔ́ɔ palɛ vuu shi kpang zɔ̃ng ta mɔɔ tasɛ. Nwang nɛɛ jĩng dang gbete gbã̀ágbãa, ka nung ɓɔɔ zang nɛɛ daa tasɛ bii bang ɓaaɓɛ ka waa dɔ̃ɔ gbete ɓɛɛ. 30Náa nakn ɓaaɓɛ kɔ nɛɛ ti shing mɔɔ mɔ́ɔ palɛ vuu shi kpang, dɔng ta mɔɔ tasɛ. Nwang nɛɛ naa dang gbete kɔ gbã̀ágbãa, ka nung ɓɔɔ zang nɛɛ daa tasɛ bii bang ɓaaɓɛ ka waa dɔ̃ɔ gbete ɓɛɛ.”

Vuu ɓɔɔ Yeesɔ kɔɔ ka ruu soro hinnang ɓɛɛ

(Mat 19:9; Mar 10:11-12; Luk 16:18)

31“Ruu Laa ɓɔɔ Musa beeyi kɔɔyi tɔɔ, zang ɓɔɔ nɛɛ hing soro ɓiɓɛ, wu a wu labeenang soro hinnang ka naa. 32A n kɔɔ nɔɔ, naa soro zang roo nɛɛ zang ɓɔɔgn kpang, a varɛ ɓiɓɛ hing wu, varɛ ɓiɓɛ kɔ shing wu palɛ dũndũng. Zang ɓɔɔ nɛɛ shing soro ɓɔɔ zang hing katɔ, pálɛ̀ ɓi doo dũndũng kɔ.

Vuu ɓɔɔ Yeesɔ kɔɔ ka Ruu Laa tũnnang

33“Nɔɔ tãa ruu ɓɔɔ Laa kɔɔ zang ka tĩng ɓɛɛ tɔ. Laa tɔɔ, ‘Mɔ́ɔ tũng vuu nɛɛ sèé kpang. Palɛ vuu ɓɔɔ mɔɔ a Kpanti Laa nyaa nɛɛ mɔɔ palɛ wu ɓɛɛ katɔ.’ 34N kɔ̀ɔ́ nɔɔ, nɔ́ɔ tũng vuu kpang tingkiring. Nɔ́ɔ ti tũng vuu nɛɛ lapa kpang, ka ruu ɓɔɔ lapa keɓe, wukɔ nɔng nwannang Kpanti Laa ɓɛɛ. 35Nɔ́ɔ ti tũng vuu nɛɛ tipi keɓe kpang kɔ doori, ka ruu ɓɔɔ, tipi ɓi nɔng ɓɔɔ Kpanti Laa tɛ̃ɛ doo kagn ɓɛɛ. Nɔ́ɔ ti tũng vuu nɛɛ Urushalima kpang, ka ruu ɓɔɔ, wukɔ Gãa bang Kpanti Laa ɓɛɛ. 36Nɔ́ɔ ti tũng vuu nɛɛ yuu manɛ kpang, ka ruu ɓɔɔ, nɔɔ zunung naa ɓɔɔ nɔɔ risi suuyuu manɛ gbete wu rì puru kɔ vĩiri kpang ɓɛɛ. 37Yee ɓɔɔ nɔɔ rang piti wu di nyaa ka, ‘Nn.’ Nɛɛ, ‘Kpang kɔ shɛ̃ɛning’. Yee ɓɔɔ nɛɛ ɓa ‘Nn.’ Nɛɛ, ‘Kpang katɔ, a ɓi kaa nɛɛ bii Sheetang, zang shi kpang.’

Vuu ɓɔɔ Yeesɔ kɔɔ ka ruu vuu lɔngsɔnang ɓɛɛ

(Luk 6:29-30)

38“Nɔɔ tãa ruu ɓɔɔ Laa kɔɔ zang ka tĩng ɓɛɛ tɔ. Laa tɔɔ, ‘Zang wu lɔ́ngsɔ́ jĩng nɛɛ jĩng. Zang wu ti lɔ́ngsɔ́ tãri nɛɛ tãri kɔ doori.’ 39A n kɔɔ nɔɔ, nɔ́ɔ lɔngsɔ vuu shi kpang ɓɔɔ zang palɛ nɔɔ ɓɛɛ, nɛɛ vuu shi kpang kɔ doori kpang. N kɔɔ nɔɔ, zang nɛɛ nyɔ mɔɔ ka kashoo ɓɔɔ nakn, mɔɔ raa wu ɓɔɔ nagang jong. 40Zang ɓɔɔ nɛɛ tɔɔ wu ɓaa mɔɔ nyaavaa, nɛɛ tɔɔ wu ta fɔ̃ɔrɔ ɓaaɓɛ, a wu nɛɛ ɓɔɔ mɔɔ zuu sɔ̀ɔrɔ́ nɛɛ mani piti. 41Zang ɓɔɔ nɛɛ tɔɔ, wu shing mɔɔ nɛɛ gbãng gbãng ning, mɔɔ shing wu mɛli gbete, daa nɛɛ wu mɛli ziti. 42Zang ɓɔɔ nɛɛ gàa vuu ka naa ɓaaɓɛ, mɔɔ zãa wu kpang. Shɔnzang ɓɔɔ nɛɛ tɔɔ wu ti ta vuu nyaa kɔ́pɔ́ ka naa ɓaaɓɛ mɔɔ ti a wu.

Mɔ́ɔ kasɛ ruu zang ɓɔɔ mɔɔ zi zɔɔ nɛɛ jĩng nɛɛ wu kpang ɓɛɛ

(Luk 6:27-28, 32-36)

43“Nɔɔ ti tãa ruu ɓɔɔ Laa kɔɔ zang ka tĩng ɓɛɛ tɔ. Laa tɔɔ, ‘Nɔɔ kàsɛ́ ruu zang ɓɔɔ kasɛ nɔɔ katɔ, nɔ́ɔ bɛ̃ɛ zang ɓɔɔ nɔɔ shing jĩng nɛɛ zɔɔ kpang ɓɛɛ.’ 44A n kɔɔ nɔɔ, nɔɔ kàsɛ̀ ruu zang ɓɔɔ nɔɔ shing jĩng nɛɛ zɔɔ kpang katɔ. Nɔɔ ti gaa Kpanti Laa ka ruu zang ɓɔɔ ri dang nɔɔ jĩng ɓɛɛ, 45tɔ̀ɔ nɔɔ nwang wujɛ Daa manɛ ɓɔɔ ka lapa kati. Ka ruu ɓɔɔ Kpanti Laa shingnɛ laa ɓiɓɛ wu nwang ka yuu zang shi kpang nɛɛ zang tɔ̃ɔ piti ɓɛɛ. Ti a zang ɓɔɔ tɔ̃ɔ nɛɛ zang shi kpang mii lapa katɔ ɓɛɛ. 46Naa nɔɔ kàsɛ́ ruu zang ɓɔɔ ri kasɛ ruu manɛ kɔ shɛ̃ɛning, nɔɔ naa walɛ ɓu vi ka bii Kpanti Laa viya? Zang ɓɔɔ ri ta saka tipi, ri palɛ wu nɔngkɔ doori kpang ya? 47Naa nɔɔ ti jee rɛɛ ɓaazung kɔ nyaa shɛ̃ɛning, nɔɔ ɓa rɛɛ zang ɓɔɔ ɓu kaa nɛɛ viya? Zang ɓɔɔ ri dũng Kpanti Laa kpang, ri palɛ ɓu doo nɔngkɔ kpang ya? 48Ka ruu nɔngkɔ, nɔɔ nwang zang tɔ̃ɔ doo naa ɓɔɔ Daa manɛ ɓɔɔ ka lapa nwang ɓɛɛ kɔ.

Currently Selected:

Matiyu 5: mzmNT

Highlight

Copy