Matiyu 9

Yeesɔ masɛ zang ɓɔɔ bii vɔ katɔ ɓɛɛ

(Mar 2:1-12; Luk 5:17-26)

1Yeesɔ vang tonsi, a ta rang a ka gari ɓiɓɛ. 2A zang atɛ wu, zang ɓɔɔ bii ɓiɓɛ vɔ katɔ ɓɛɛ, zang ta ka laa. Yeesɔ zi naa ɓɔɔ zang kaɓa ri shing danggn ka bii Kpanti Laa, a kɔɔ zang ɓɔɔ bii ɓiɓɛ vɔ katɔ tɔɔ, “Jaa mɛɛ, mɔ́ɔ rɛ̃rɛ kpang. N yaa mɔɔ gbalang vuu shi kpang ɓaaɓɛ tɔ.”

3A zang ɓɔɔ ri tusu zang vuu, rangkɛ kana naa ɓarɛ tɔɔ, “Yɔɔ keɓe, rangkɛ ruu shi kpang ka yuu Kpanti Laa.”

4Yeesɔ ti zi vuu ɓɔɔ ri rɛ̃rɛ ka yeti ɓarɛ ɓi tɔ. A hɛ̃ɛ ri tɔɔ, “Nɔɔ rɛ̃rɛ vuu shi kpang vi ka yeti manɛ nɔngkɔ viya? 5Ɓɔɔ kpãa kpang ka teteng yee keɓe kiya, ɓɔɔ zang kɔɔ nɛɛ, ‘Zang yaa mɔɔ gbalang vuu shi kpang ɓaaɓɛ tɔ.’ Nɛɛ ɓɔɔ zang kɔɔ nɛɛ, ‘Seepaa ta, mɔɔ rarɛ wiya’? 6N másɛ̀ yɔɔ keɓe ditɔ, tɔ̀ɔ, nɔ́ɔ zi kati nɛɛ, zang a Jaa Shɔnzang naa tɔ, ka koo keɓe, nɛɛ wu yaa zang gba lang vuu shi kpang ɓarɛ.” A Yeesɔ kɔɔ yɔɔ ɓɔɔ bii vɔ katɔ nɛɛ, “Seepaa ta, mɔɔ tuu laa ɓɔɔ zang ta mɔɔ kagn, mɔɔ daa gãa.”

7A yɔɔ ɓɔɔ bii vɔ katɔ, seepaa a tuu laa ɓɔɔ zang ta wu kagn daa gãa ɓiɓɛ kati. 8Zang dɔɔli ɓɔɔ ri kpalɛ zɔɔ, ri zi naa weɓe, ri mã naa ka danggn, a ri dɔɔ Kpanti Laa kati. Kaa ruu ɓɔɔ, wukɔ a zang naa vuu keɓe palɛnang ɓɛɛ.

Naa ɓɔɔ Yeesɔ ɓaa Matiyu nyaa ɓɛɛ

(Mar 2:13-17; Luk 5:27-32)

9Yeesɔ seepaa tɔ, daa kana gbalang, a zi yɔɔ ɓɔɔ zang ɓaa nɛɛ Matiyu nwang tɔ ki yeti jaka saka tipi tanang. A Yeesɔ ɓaa wu nyaa, kɔɔ wu tɔɔ, “Dũng m ta.”

A Matiyu seepaa dũng Yeesɔ Kati.

10Yeesɔ daa nwang tɔ ka nɔng vuu shaanang ka gãa Matiyu, nɛɛ zang ɓɔɔ ri mantɛ vuu ka bii ɓiɓɛ ɓɛɛ. A zang ɓɔɔ ri ta saka tipi, nɛɛ zang ɓɔɔgn ɓɔɔ ri dũng nyaa ɓɔɔ Laa dang kpang ɓɛɛ, ri naa nwang nɛɛ wu. 11Ɓu doo ɓɔɔ zang Farisi ri zi naa weɓe, ri hɛ̃ɛ zang ɓɔɔ ri mantɛ vuu ka bii Yeesɔ nɛɛ, “Maalang manɛ shaa vuu nɛɛ zang ɓɔɔ ri ta saka tipi, nɛɛ zang ɓɔɔ ri dũng nyaa ɓɔɔ Laa dang kpang ka ruu viya?”

12Ɓɔɔ Yeesɔ tãa naa weɓe, a kɔɔ ri tɔɔ, “Zang ɓɔɔ bii kɔng ri kpang, ri daa bii zang ɓɔɔ pàlɛ́ zang kɔnang ɓi kpang. Ɓi zang ɓɔɔ bii kɔng ri katɔ kɔ ri daa shɛ̃ɛning. 13Nɔɔ kãa dĩiri yèé Laa ɓɔɔ kɔɔyi tɔɔ, ‘N kasɛ m ruu vuu vaa ɓɔɔ zang dɔɔ m kpang, n kasɛ nɛɛ gn zɔɔ wu kɔng nɔɔ katɔ kɔ jong.’ N arɛ, nɛɛ n naa ɓaa nyaa ka zang tɔ̃ɔ nɛɛ ri kɔ̃sɔ yeti ɓarɛ kpang. N arɛ nɛɛ n naa ɓaa nyaa m ka zang ɓɔɔ ri palɛ vuu shi kpang ɓɛɛ.”

Ruu nyaalaa sennang ɓɔɔ zang hɛ̃ɛ Yeesɔ ɓɛɛ

(Mar 2:18-22; Luk 5:33-39)

14A zang ɓɔɔ ri mantɛ vuu ka bii Yɔhana naa arɛ hɛ̃ɛ Yeesɔ tɔɔ, “Rùu seng nyaalaa nɛɛ zang Farisi, a zang ɓɔɔ ri mantɛ vuu ka bii ɓaaɓɛ, ri sèng ɓarɛ kpang ka ruu viya?”

15Yeesɔ kasɛ ri nyaa tɔɔ, “Sinyɛ ɓeevɛ ɓeesang ri seng nyaalaa ka diki ɓɔɔ, sinyɛ ɓeevɛ doo nɛɛ ri ɓɛɛ ya? Diki ɓɔɔ zang naa tuu sinyɛ ɓeevɛ kagn a doo naa, tɔɔ ri naa seng nyaalaa kati.

16“Zang lù fɔ̃ɔrɔ gbaala ɓi jong nɛɛ sɛ̃ɛ fɔ̃ɔrɔ ɓɔɔ shɔɔ kpang. Ka ruu ɓɔɔ, fɔ̃ɔrɔ shɔɔ naa lɔɔsɔ ɓɔɔ gbaala, yaa yeng kaa bang dɔɔli ɓɛɛ. 17Zang ti tɛ̃ɛ sàa shɔɔ ɓi jong ka yeti zàáng gbaala ɓɔɔ zang palɛ nɛɛ koo ɓɛɛ kpang. Náa zang tɛ̃ɛyi, sãa zàáng katɔ. Sàa ti tɛ̃ɛ ɓi ka tipi. A naa zang tɛ̃ɛ sàa ɓɔɔ shɔɔ ka zàáng ɓɔɔ shɔɔ kɔ doori, zàáng lasɛ kpang, saa ti tɛ̃̀ɛ ka tipi kpang.”

Ruu jaa soro ɓɔɔ lee naa ka fɔ̃ɔrɔ Yeesɔ, nɛɛ jaa ɓɔɔ Yeesɔ masɛ ɓɛɛ

(Mar 5:21-43; Luk 8:40-56)

18Yeesɔ rang yee doo naa ka nyaa nɛɛ ri, yɔɔ zang bang Yahudi arɛ naa tang nɛɛ gutu ka tĩng ɓiɓɛ. A kɔɔ Yeesɔ tɔɔ, “Jaa mɛɛ ɓɔɔ soro kɔng vɔrɔ doo kãntang, arɛ mɔɔ daa ĩi wu naa ɓaaɓɛ jong ka bii, tɔɔ wu gãntɛ jĩng kati.”

19A Yeesɔ seepaa, daa kaa nɛɛ wu nɛɛ zang ɓɔɔ ri mantɛ vuu ka bii ɓiɓɛ ɓɛɛ.

20Yeesɔ daa kana gbalang, a jaa soro ɓɔɔ zĩi kpaa wu daa sáa kopi tu ziti, arɛ naa lee naa ka nyaa fɔ̃ɔrɔ ɓiɓɛ nɛɛ knti. 21Kɔɔ ka yeti ɓiɓɛ tɔɔ, “Naa n lee naa ka fɔ̃ɔrɔ ɓiɓɛ kɔ shɛ̃ɛning, kɔnang mɛɛ, waa nyaa katɔ.”

22A Yeesɔ raa jĩng kɔɔ wu tɔɔ, “Mɔ́ɔ yaa danggn naa kpang manjaa, danggn ɓɔɔ mɔɔ shing ka bii Kpanti Laa masɛ mɔɔ tɔ.” A kɔnang yaa jaa soro bii kaa tantɛnang ka làa kaɓa.

23Yeesɔ naa shɛ̃ɛ gãa yɔɔ zang bang tɔ, a zi zang ɓɔɔ ri jee leere nɛɛ zang ɓɔɔ ri kaa nyavɔ ri gòoró nyaa kana. 24A Yeesɔ kɔɔ ri tɔɔ, “Nɔɔ nwang ta ka biling. Jaa keɓe vɔ ɓi ka takpang, roo ɓi katɔ waati.” Ɓɔɔ ri tãa naa weɓe, ri laarɛ wu. 25Zang nwangsɛ zang ɓɔɔ ri kpalɛ zɔɔ ka nɔng vɔrɔ tɔ ka biling nandon, a Yeesɔ daa ka yeti gãa, daa yi jaa kaa naa, a jaa yupaa kati. 26Nyaa vuu kɔ Yeesɔ palɛ ɓee, bàa tipi kaɓa kaa nandon.

Zang jĩng ringtang ziti ɓɔɔ Yeesɔ masɛ ɓɛɛ

27Yeesɔ seepaa tɔ, daa kana gbalang, a zang jĩng ringtang ziti ri dũuru wu ka knti. Ri ti mɛɛrɛ nyaa kana nɛɛ, “Jaa zɔ̃ng Dawuda gn ɓuru wu kɔng mɔɔ jong.”

28A Yeesɔ naa hãa nyaa ka yeti gãa ɓɔɔgn, a ri naa a ka bii ɓiɓɛ. Yeesɔ hɛ̃ɛ ri tɔɔ, “Nɔɔ zi tɔ ka yeti manɛ, nɛɛ n zunung vuu keɓe palɛnang katɔ ya?”

A ri kasɛ wu nyaa tɔɔ, “Nn, rùu zi tɔ, mɔɔ zunung katɔ Kpanti.”

29A Yeesɔ lee naa ka jĩng ɓarɛ, a kɔɔyi tɔɔ, “Wu nwang ta ka naa ɓɔɔ nɔɔ shing danggn ɓɛɛ.” 30A jĩng ɓarɛ ɓèlè kaa tɔkn. A Yeesɔ shaarɛ ri nyaa tɔɔ, “Nɔ́ɔ daa kɔɔ zang ɓɔɔ kpang.”

31A ri daayi, ri daa kɔɔrɔ zang ruu ɓiɓɛ ka tipi kaɓa nandon.

Zang nyaa nɔɔ katɔ ɓɔɔ Yeesɔ masɛ ɓɛɛ

32Zang ɓɔɔ ri kpalɛ zɔɔ ka bii Yeesɔ, ri seepaa daanang tɔ, a zang atɛ Yeesɔ zang nyaa nɔɔ katɔ, ɓɔɔ suru shi kpang ka bii ɓiɓɛ kati. 33Yeesɔ nwangsɛ suru shi kpang tɔ, a zang ɓɔɔ nyaa nɔɔ katɔ naa rang yee kati. Ɓɔɔ zang ɓɔɔ ri kpalɛ zɔɔ ka bii Yeesɔ ri zi naa weɓe, ri mã naa ka danggn, a ri kɔɔyi tɔɔ, “Ruu zi vuu ɓɔɔ naa weɓe gngn ka tipi Isirela kpang.”

34A zang Farisi ri tɔɔ, “Yɔɔ keɓe nwangsɛ suru shi kpang ɓi doo nɛɛ naa ɓɔɔ kpanti suru shi kpang a wu kɔ.”

Zang dɔɔli ɓɔɔ gn ɓarɛ kɔng Yeesɔ ɓɛɛ

35A Yeesɔ daarɛ ka gari bang nɛɛ ɓɔɔ tɔkɔlɔng piti. Tusu zang vuu ka gãa zɔɔ kpalɛnang Yahudi, a ti rang zang ruu tɔ̃ɔ kpanti roonang Laa. A masɛ zɔ̃ng kɔnang ɓɔɔ yiki zang nɛɛ vuu ɓɔɔ palɛ ri nandon. 36Yeesɔ pɛ̃ɛrɛ zang nimbang ɓɔɔ ri kpalɛ zɔɔ, a gn ɓarɛ kɔng wu, ka ruu jĩng ɓɔɔ ri dang ɓɛɛ. Zang ɓɔɔ yi ri naa ka bii kpang. Ri nwang naa mɛ̀ɛrɛ́ ɓɔɔ jagãng ɓarɛ kagn kpang ɓɛɛ. 37A raa jĩng kɔɔ zang ɓɔɔ ri mantɛ vuu ka bii ɓiɓɛ tɔɔ, “Zee zũng tɔ dɔɔli, a zang yeenang ri haa kaa takpang. 38Nɔɔ gaa Laa ɓɔɔ wukɔ zang jaa ɓɛɛ ta, wu shong zang zee yeenang ka jaa ɓiɓɛ.”

Currently Selected:

Matiyu 9: mzmNT

Highlight

Copy