aYohana 19

A to̱ aYeso amok riku

1Iyong aBilatus sak a ta se whereng aYeso. 2Ne ásozha'me karam ikiritsan nong á ta te aYeso'me rice. Ne á kute kuwe̱n kukpiin kuseng kyo̱ndi kufe agwo̱m. 3Á yiir be̱s nufu ne á fe̱ ye, “Kunom ra be rigwo̱m, agwo̱m áner Yahuda.” Ne á yiir ku tsosok nanyisi.

4aBilatus bun a wuruk gbak a tá fe̱ be áfe aYahuda'me ye, “Di yin, mi ta ka tun yin'e nong tà ren yin ye mi tú se̱ a nye rine̱n ike̱ng ikak ife nong a tu ku to̱ amok baꞌ.” 5Nizen iya aYeso tá wuruk an te ribong ikiritsan be awe̱n kukpiin ame ne aBilatus fe̱ be ba ye, “To̱, aner'e na!”

6Kum ágbang átsi ne áfe a tá tor karo̱'me, a tá fa ku di, ne á tasak ye, “A ku tigak, A ku tigak.” Amma aBilatus fe̱ be ba ye, “Yin ku sok yin nong ta su ku tigak yin, mi tú ku se̱ be nye rine̱n ike̱ng ikak nong tu ku to̱ amok baꞌ.”

7Amma áner aYahuda yiir'e ding ding ye, “Yir be yir itsi, itsi yir fe̱ ye, a tù ku fe̱r dim, kamok wu sok rice wu ye wu nye Igon Adakunom.”

8aBilatus tá fa fok anong a ti barang ku fok inyim dide̱ng. 9Ayong a tú ku bun kaye̱e̱r azuri wu nong a tá se rip aYeso ye, “Wan ne ake̱ e̱?” Ko aYeso tú ku sak ko'me ba baꞌ. 10aBilatus fe̱ ye, “Wan tà fe̱ kanu be mi aꞌa? Wan ren ye mi kyem tá ka won ka tá ka tigak aꞌa?”

11Amma aYeso fe̱ be wu ye, “Wan ti be kukyem kukak natoon'i ze̱e̱r be kuya a ta ka no̱o̱k natoon kaza baꞌ. Kamok anong, aner aya a tin sok a tá ka no̱o̱k ne a be rine̱n ne a ka nar.” 12Be rife̱ na aBilatus shim ke a won aYeso, amma áner aYahuda yiir itasak ye, “Ke wan won aner na a ta tseng, i nye ye wan nye aferime̱ aKaisar baꞌ. Koangan a ta sok rice wu ye wu nye agwo̱m tonong ye wu rawu aKaisar.”

13aBilatus tá fa fok anong, yong a tun aYeso'me nufang ne a sonong natoon itsik amok, a tá nye be ata. (A yis ni irem áner Aramiya ye aGabbata.) 14Katuk'ong nye kunom kunye kanye̱k aPasova, natite kunom. aBilatus fe̱ be áner aYahuda ame ye, “Inga yin agwo̱m yin!”

15Amma áner aYahuda ame korok ikun ye, “A ku fe̱r! A ku fe̱r! A ku tigak!”

Ayong aBilatus tú ku rip ba ye, “Yin shim yin mi ta tigak agwo̱m yin a?”

Ne ágbang atsi ame fe̱ ye, “Ei, yir be yir agwo̱m akak ze̱e̱r be aKaisar baꞌ.”

16Ni igang'e aBilatus sok aYeso nong a tá no̱o̱k áner aYahuda tá tigak.

A tigak aYeso

(aMat 27.32-44; aMar 15.21-32; aLuk 23.26-43)

17Ayong ásozha dorok á tá tseng be aYeso. aYeso wuruk kaye̱e̱r kuwo̱p'e an cer kukon a tana ku tigak mo be rice wu, ma naro̱ a tá yis ye Karo̱ Áho̱karo̱k Ace. (Ni irem áner Aramiya a yis ye aGolgota.) 18Azong ne a tigak aYeso'me mak be áner akak ba afa, azining nabas kubo̱k riya akak nabas kubo̱k rimen.

19aBilatus nye izibir ikak nong a tin basak nukon a tin tigak aYeso'me ye, “ayeso afu nazaret, agwo̱m áner ayahuda.” 20Áner aYahuda whe̱re̱ fa izibir'e kamok karo̱ a tú ku tigak aYeso'me se bubarak be agbang kuwo̱p, a nye izibir'e ni irem áner aYahuda ne ni irem áner aRom ne ife aner aHeleni. 21Ayong ágbang átsi'me fe̱ be aBilatus ye, “Sang tu zibir ye, ‘Agwo̱m áfe aYahuda’ baꞌ, amma zibir ye aner na sok rice wu ye wu nye Agwo̱m áner aYahuda.”

22aBilatus fe̱ ye, “Ike̱ng iya mi tan zibir mi zibir'ong.”

23Nama asozha'me tá tigak aYeso, á sok ares wu a tá kasap, nasa nanaas. Koangan ba be kukap kuzining. Kukpiin kufe kaye̱e̱r'e tú ku tuk kuya ku ta se itan'e izining, kunye kugung'e natoon'e ma natak, a tos baꞌ. 24Ayong a fe̱ be rice ba ye, “I tu sarak yir baꞌ, i nye yir kukasa ta di yir aner aya a tana se̱.” A nye iyu nong a tá shining izibir Kufumung Adakunom tá fe̱ ye,

“Á kasap ares'i nace ba,

á tin nye kukasa na ares'i.”

Ike̱ng iya ásozha'me tá nye'ong.

25Áner aya a tá se nunyeseng bubarak be kutigak aYeso'me nye anyining wu, be angasnyining wu be aMarya abining aKilopas ne aMarya abafe aMagadaliya. 26aYeso tá fa di anyining wu, ne alimazhiri wu aya wu tá shim dide̱ng ame nuyeseng azong, yong a fe̱ be anyining wu'me ye, “Ango̱, ayong ne a te igon wan.” 27Ne a fe̱ be alimazhiri'me ye, “Ango̱ wan'ong.” Kum nizen iyong álimazhiri'me tseng be anyining aYeso'me kari wu.

Riku aYeso

(aMat 27.45-56; aMar 15.33-41; aLuk 23.44-49)

28Nama anong, aYeso tá ren ye kyo̱o̱rna a n gang koakye, nong ase̱ a tá shining ike̱ng iya Kufumung Adakunom tá fe̱ yong aYeso fe̱ ye, “Kuto̱ mi n koor.”

29Kafeneng akpukpak ashi anap tú ku se azong, ayong a ti shumung asoso kaye̱e̱r'e, a tá rosom nukon nong a tá nabak aYeso'me nanu. 30aYeso tá shushu akpukpak ashi'me ne a fe̱ ye, “An gang!”

Ne a ma roor kuto̱ a tá no̱o̱k kutser wu.

A tubuk aYeso be kuko̱o̱n

31Ayong áner aYahuda nye aBilatus izong ye a ra busung atak áner aya a tá tigak nong a tá tisik be ikom'me kaben. A fe̱ anong kamok kaya katson'e nye kunom Asabar, ba shim nong ikom'e tu sor natoon'e baꞌ. 32Ayong ásozha'me be̱ nong á tá busung atak aner afe ime̱se̱ng'e, a tú ku tigak mak be aYeso ne afe afa'me. 33Amma á tá fa be̱ nufe aYeso ne á di a n ku, á busung atak wu baꞌ. 34Azining kaye̱e̱r asozha'me bun a tubuk aYeso nukafam be kuko̱o̱n ne naso̱k be ashi wuruk naro̱'me. 35Aner aya a tá di ike̱ng'e, a fe̱ ye i se anong. Ike̱ng iya a tá fe̱'me nye katsak. Wu be rice wu gip ren ye wu fe̱ katsak, a fe̱ anong, nong yin gip tin no̱o̱k yin katsak. 36A nye ike̱re̱ na nong ase̱ a tá shining ike̱ng iya Kufumung Adakunom tá fe̱ ye, a tá fe̱ ye, “A tá bur kukup wu kuzining baꞌ.” 37Kufumung rife̱ Adakunom bun ku fe̱ ye, “Ba tà ye̱re̱k aya ba tá tubuk.”

Kune̱r aYeso

(aMat 27.57-61; aMar 15.42-47; aLuk 23.50-56)

38Nama anong, aYusufu aner Arimatiya nye alimazhiri aYeso amma a se de̱s baꞌ, kamok a fok inyim áner aYahuda. A tseng nufe aBilatus nong a tá su ku rip ye a ru ku no̱o̱k kukom aYeso. aBilatus'e shim, yong a se sok kukom aYeso'me. 39A se mak be aNikodimus aya a tá kun tseng nufe aYeso natuk. aNikodimus be̱ be name iko̱o̱n itek a tá yis ye amuur a tá min kare̱ be alos, kugaar'e tá se akilogam iso̱k itaar be anaas (34). 40Á sok kukom aYeso'me ba afa, á tá kis be kures a tin te name iko̱o̱n ame, kyo̱ndi i tá se ni igo̱o̱n kune̱r áner aYahuda. 41Naro̱ a tú ku tigak aYeso riko̱ rikak tu se azong. Kaye̱e̱r riko̱'me, kure̱k kufas tu se kuya sang a tá kun ni ne̱r akak baꞌ. 42A ne̱r aYeso azong kamok i nye kunom kunye Kanye̱k áner aYahuda, ne kure̱k'e bun kuse bubarak azong.

Currently Selected:

aYohana 19: izrNT

Highlight

Copy