aYohana 7

Áronyining aYeso ti no̱o̱k katsak ni wu baꞌ

1Nama anong, aYeso tsang a gorok aGalili. Amma shim a tá tseng kaye̱e̱r aYahudiya baꞌ, kamok áner aYahuda á tá se azong shim a tú ku fe̱r. 2Izen kunye Riye̱ Rikan áner aYahuda nong á yiring be kusor ba kaye̱e̱r nabur #7.2: Riye̱ rikan kuyiring be kusor áner aYahuda na abur: fa: Akanang Ike̱re̱ Ikak, kaye̱e̱r nafarap'e nakak. ta be̱ barak, 3áronyining aYeso fe̱ be wu ye, “Fa gye̱ ke wan dorok aze nong ta be niben aYahudiya nong álimazhiri wan ta di itomong azhing iya wan ta nye. 4Akak kuse a ta shim a tu ku ren ne a bun a nye ike̱re̱ wu nune̱re̱ng baꞌ. Kum wan ta sen nye ike̱re̱ na, tonong rice wan nong kazatse tà ka ren.” 5Kamok áronyining aYeso'me gip á ti no̱o̱k katsak ni wu baꞌ.

6Kamok anong aYeso fe̱ be ba ye, “Izen'i n nye nizham baꞌ, amma nufe yin, koakye izen se gye̱r tsek. 7Yin kazatse ta kyem ka ta ka ranyin baꞌ, amma ka ti ramin kamok mi fe̱ ye itomong wu nye imaan'e. 8Yin tseng yin naro̱ riye̱ rikan'e tsek. Mi tà tseng naro̱ kunye riye̱ rikan'e kyo̱o̱rna baꞌ, kamok izen'i n nye nizham baꞌ.” 9A tá fe̱ anong, a sor na aGalili.

10Nama áronyining wu ta be naro̱ riye̱ rikan ame, aYeso tseng gip, amma a tseng de̱s baꞌ. 11Áner aYahuda ame yiir tse̱r aYeso naro̱ riye̱ rikan'e. Ne á risim ye, “Aner ame se akye̱ e̱?”

12Kaye̱e̱r rigwo̱m ánerawe'me ákak fe̱ cucuk natoon aYeso. Ákak fe̱ ye, “A nye aner atek.” Ne ákak fe̱ ye, “Wayo, a wo̱ro̱k ánerawe.” 13Amma akak kyem a wuruk nong a tá fe̱ natoon aYeso'me kanang baꞌ, kamok ba tá fok inyim áko̱k kasho̱o̱n áner aYahuda'me.

aYeso bo̱so̱p ánerawe'me naro̱ Riye̱ Rikan

14A tá bo̱ karo̱ dide̱ng ni inye riye̱ rikan'e ne aYeso ma tseng kaye̱e̱r kubang agbang kutu kuya Adakunom iben'e nong a tá san ibo̱so̱p ánerawe'me. 15Ayong áko̱k kasho̱o̱n aner aYahuda te zhing ma á fe̱ ye, “Aner na kun tseng naro̱ kubo̱so̱p baꞌ ko̱, a san ane̱ a ta a ren ike̱ng dide̱ng ana e̱?”

16aYeso fe̱ be ba ye, “Ike̱re̱ iya mi ta ka bo̱so̱p yin'e nye ife rice mi baꞌ, amma ife aya a tin tom. 17Aner aya a ta shim a ta nye ike̱ng iya Adakunom ta shim, a ta ren ye kubo̱so̱p'i ne nufe Adakunom, sang kufe rice mi. 18Aner aya a ta fe̱ natoon rice wu fe̱ nong a tà tiyiik rice wu. Amma aya a ta shim a ta tiyiik aya a tú ku tom, ayong ne a nye afe katsak, a be abo̱o̱s baꞌ. 19Aser, aMusa ne a tá ka no̱o̱k yin Itsi aꞌa? Amma gip be anong, akak kuse kaye̱e̱r yin a ta kuus Itsi'me baꞌ. Akye̱ sak yin shim tin fe̱r yin e̱?”

20Ánerawe fe̱ be wu ye, “Wan be amaan kabik. Angan ne á shim á ta ka fe̱r e̱?”

21Ayong aYeso fe̱ be ba ye, “Mi nye ike̱ng azhing izining tsek, amma yin te yin zhing cice̱r yin. 22aMusa tá sak yin tá nye yin izhak (wu ne a san'e baꞌ, amma átukop átukop yin) Gip be anong yin nye yin inoon izhak katuk Asabar. 23To̱, ke i nye ye a ta kyem a nye igon izhak katuk Asabar nong a ta kuus Itsi aMusa, akye̱ sak yin be yin riye̱ riwe be mi, kamok mi ta sak ánerawe ta te atser cei katuk Asabar e̱? 24Won kuto̱ yin ánerawe amok natoon ike̱re̱ yin ta ye̱re̱k yin tsek, amma to̱ yin kaye̱e̱r katsak.”

aYeso ne a nye aKiristi'me a?

25Ayong áner aUshalima ákak fe̱ ye, “Aser, aner na ne a tse̱r a tà fe̱r a'a? 26Ayuna, a fe̱ ne̱k, sang ba fe̱ ike̱ng ikak be wu baꞌ. Ka áko̱k kasho̱o̱n'e n shim ye wu ne a nye aKiristi de̱? 27Amma yir ren yir karo̱ aner na tú ku ne, izen iya ne aKiristi afe katsak tana be̱, akak tà ren karo̱ kaya a tù ku wuruk baꞌ.”

28aYeso ta sen bo̱so̱p ánerawe'me kaye̱e̱r kubang agbang kutu kuya Adakunom iben'e, a tá kuto̱ naza ye, “Ei, yin ti ren yin, ne i ren yin karo̱ afe mi tú ku ne, mi be̱ kube̱ rice mi baꞌ. Amma aya a tin tom nye afe katsak, yin tu ku ren yin baꞌ. 29Mi tú ku ren kamok mi ne nufu, wu ne a ti tom.”

30aYeso tá fa fe̱ anong yong ánerawe ame shim a tú ku yiir. Amma akak kyem a ti sak kubo̱k ni wu baꞌ, kamok izen wu tsang i nye baꞌ. 31Gip be anong, ánerawe dide̱ng ti no̱o̱k katsak na aYeso ne á fe̱ ye, “Nizen iya aKiristi'me, a tà nye itomong azhing iya i ta nar iyuna a?”

Áko̱k kasho̱o̱n áner aYahuda shim ke a yiir aYeso

32Áner aFarisi fok ánerawe tá tsang á fe̱ cucuk natoon aYeso, yong ágbang atsi ne áner aFarisi'me tom áfe a ta tor agbang kutu kuya Adakunom iben'e ye á ra se yiir aYeso'me.

33Ayong aYeso fe̱ be ba ye, “Izen mi tana sor be yin se cie̱k tsek, ne mi kubun nufe aya a tin tom. 34Yin tin tse̱r yin, tin se̱ yin baꞌ. Karo̱ kaya mi tana ku se, yin tà kyem i be̱ yin baꞌ.”

35Áner aYahuda'me fe̱ awan ba ye, “Ake̱ ne wu be, yir tana kyem i tseng yir baꞌ e̱? Ka a be nufe ánerawe yir áya a ta te shaam á ta sor be áner aHeleni, nong a bo̱so̱p áner aHeleni'me a? 36Akye̱ ne wu shim a ta fe̱ wu tá fe̱ ye, ‘Yin tin tse̱r yin, amma yin tin se̱ yin baꞌ e̱?’ Ne, ‘Karo̱ mi tù ku be, yin ta kyem i tseng yin ba e̱?’ ”

37Katuk igang'e, i tá nye agbang kunom kunye riye̱ rikan ame, aYeso dorok a tá ta kuto̱ ye, “Aner aya a fok kuto̱ kukoor, a ra be̱ nunaan a tà so̱ ashi. 38Koangan afe a tin no̱o̱k katsak ni mi, kyo̱ndi rife̱ Adakunom ta fe̱ ye, kaye̱e̱r wu ne itop ashi kutser tà wo̱k.” 39aYeso ti fe̱ natoon Kabik Kazhe̱l'e, aya áfe a tin no̱o̱k katsak ni wu tana se̱ nasho̱o̱n. Nizen iyong, a tsang a no̱o̱k Kabik Kazhe̱l'e baꞌ, kamok a tsang a tiyiik aYeso kaye̱e̱r kaza baꞌ.

40Be kufok rife̱ aYeso, ákak ba fe̱ ye, “Katsak'e, aner na ne a nye aner kuzarap Adakunom'me.”

41Ákak ba bun á fe̱ ye, “Ayu ne a nye aKiristi'me.” Amma ákak bun á rip ye, “Aser, aKiristi'me ta wuruk na aGalili e̱? 42Kufumung izibir rife̱ Adakunom fe̱ ye, aKiristi tà ne kaye̱e̱r kasa aDauda na aBetalami nuwo̱p aDauda tú ku sor aꞌa?” 43Iyong kuto̱ro̱ng ánerawe'me te ze̱r ze̱r. 44Ákak shim á tú ku yiir, amma akak ri sak kubo̱k ni wu baꞌ.

Áko̱k kasho̱o̱n áner aYahuda ti no̱o̱k katsak baꞌ

45Áner aya a tá tor agbang kutu kuya Adakunom iben ame tú bun nufe ágbang átsi ne áner aFarisi ame, yong á tu ku rip ba ye, “Akye̱ sak yin be̱e̱n yin be wu baꞌ e̱?”

46Ayong áner aya a tú ku tom ba ame fe̱ ye, “Aner akak kun fe̱ kanu kyo̱ndi aner na baꞌ.”

47Ne áner aFarisi ame ku rip ba ye, “Ka yin gip a tá ka wo̱ro̱k yin e̱? 48Ka yin kun di yin ako̱k kasho̱o̱n ka aner aFarisi akak tá kun ni no̱o̱k katsak ni wu a? 49Wayo. Amma ánerawe na á ta ren ike̱ng ikak natoon Itsi aMusa baꞌ, a tú fiming baꞌ.”

50aNikodimus, aya a tá ku tseng nufe aYeso natuk, aya a tá tsang a nye akak kaye̱e̱r áner aFarisi, tú ku rip ba ye, 51“Itsi yir tonong ye sang yir ta te̱n yir anerawe amok ba' ma ke a tú ku fok nizham nong a ta ra ren ike̱ng iya a tana nye be wu a'a?”

52Ayong á fe̱ be wu ye, “Wan nye aner aGalili'me gip a? Fa rife̱ Adakunom ta di, aner kuzarap kun wuruk na aGalili baꞌ.”

53Koangan dorok nong á tá be kari.

Currently Selected:

aYohana 7: izrNT

Highlight

Copy