aYohana 8

Abining akak a tú ku yiir rikuna

1Amma aYeso be natoon Kawhanang Nafar.

2Nadiding bop aYeso bun a tu bun nubang agbang kutu kuya Adakunom iben. Ánerawe cice̱r be̱s á tú ku gorok yong yong aYeso sonong nong a tú ku bo̱so̱p ba'me. 3Ayong áner kubo̱so̱p Itsi ne áner aFarisi be̱e̱n be abining akak á tú ku yiir be aner akak. Á tu sak a tá nyeseng nasho̱o̱n ánerawe cice̱r. 4Ne á fe̱ be aYeso ye, “Aner Kubo̱so̱p, abining na á tú yiir mak be aner akak. 5To̱, Itsi aMusa fe̱ ye a ra barak áner kuri ayong be ata. Kyo̱o̱rna, akye̱ ne wan fe̱ e̱?” 6Ba nye kurip na nong á ta bo̱mo̱ng aYeso, nong ase̱ ba tà se̱ iren nong a tú ku yiir.

Amma aYeso tiguum kaben nong a tá nye izibir be kabanbo̱k. 7Nizen ba tá yiir kurisim, aYeso sok kanyisi naza a tá fe̱ be ba ye, “Ke akak kaye̱e̱r yin se dar rine̱n, to̱, a ra san ku barak abining na.” 8Ayong aYeso bun a tiguum nong a tá bun a nye izibir kaben gbak.

9Ba tá fa fok anong ne á kpaan ku dorok azong, azizirik, ásho̱n ne a kpaan'e ma á won aYeso wu ze̱r be abining ame nunyeseng nasho̱o̱n wu. 10aYeso dorok a tú ku rip ye, “Aner abining, ánerawe ame se ake̱ e̱? Akak tá to̱ amok aꞌa?”

11Ayong abining ame fe̱ be aYeso ye, “Atekasa, akak kuse baꞌ.” Ne aYeso fe̱ be wu ye, “To̱, mi gip mi ta ka to̱ amok baꞌ. Tseng, amma won kunye rine̱n.”

aYeso ne a nye akanang kazatse

12Ayong aYeso bun a fe̱ be ánerawe'me ye, “Mi ne i nye akanang kazatse. Koangan afe a ta sen nikuus, a tà tseng nawhi baꞌ, amma a tà se̱ akanang afe kutser.”

13Ayong áner aFarisi ame fe̱ be wu ye, “Di, wan bun i fe̱ natoon rice wan, wan tonong ye wan be katsak baꞌ.”

14aYeso fe̱ be ba ye, “Ko ke mi fa fe̱ natoon rice mi, rife̱ mi nye katsak, kamok mi ren karo̱ kaya afe mi tú ku ne, be karo̱ kaya afe mi tù ku be. Amma yin ren yin karo̱ kaya afe mi tú ku ne ka karo̱ kaya afe mi tù ku be baꞌ. 15Yin to̱ yin amok be kudi rinerawe. Mi to̱ akak amok baꞌ. 16Amma ke mi to̱ amok'e, amok'i nye katsak, kamok mi se mi ze̱r baꞌ. Mi se mak be Ada mi aya a tin tom. 17Kaye̱e̱r Itsi yin, a zibir ye, ke áner afa fe̱ rife̱ rizining, to̱, ne a shan rife̱'ong. 18Mi fe̱ natoon rice mi, Ada mi aya a tin tom nye afe afa mi.”

19Ayong á tú ku rip ye, “Ada wan'e se ake̱ e̱?” aYeso fe̱ be ba ye, “Yin ti ren yin baꞌ, yin bun i ren yin Ada mi baꞌ. Yin fa ni ren yin ke yin ren yin Ada mi gip.”

20aYeso fe̱ rife̱ na nizen iya a tá se be kubo̱so̱p kaye̱e̱r agbang kutu kuya Adakunom iben, bubarak be karo̱ a tú ku saas abeko. Amma gip be anong, ko akak tú yiir baꞌ, kamok izen wu tsang i nye baꞌ.

Karo̱ kaya mi tù ku be yin ta kyem i tseng yin baꞌ

21Ayong aYeso bun a fe̱ be ba ye, “Mi ta tseng, yin tin tse̱r yin, ta kus yin be rine̱n yin. Yin tà kyem i tseng yin naro̱ mi tu ku be baꞌ.”

22Iyong sak áner aYahuda fe̱ ye, “A tà fe̱r rice wu a? A tá fe̱ ye, ‘Karo̱ kaya mi tù ku be yin ta kyem i tseng yin baꞌ a?’ ”

23Amma aYeso ya kasho̱o̱n be rife̱ ye, “Yin ne yin kaben; Mi ne naza. Yin nye yin áfe kazatse na, mi nye afe kazatse na baꞌ. 24Kamok anong, mi fe̱ be yin ye yin tà kus yin be rine̱n yin. Kamok ke yin tin no̱o̱k yin katsak ye ‘Mi Ne I aya wu aya mi tá ka tak yin baꞌ, yin tà kus yin be rine̱n yin.’ ”

25Ayong á rip aYeso ye, “Wu wan nye angan nigaan'e e̱?”

Ne aYeso fe̱ be ba ye, “Mi ne i nye aya mi tá ka tak yin kum ni ime̱se̱ng'e. 26Ike̱re̱ kuse dide̱ng mi tana kyem i fe̱ ife amok natoon yin, amma wu aya afe a tin tom nye afe katsak. Ike̱re̱ mi tá fok nufu ne mi taas kazatse.”

27Ánerawe'me ren ye wu sen ku taas ba itak natoon Ada wu baꞌ. 28Iyong sak aYeso fe̱ be ba ye, “Nizen yin tana sok yin Igon Anerawe naza, nizen iyong ne yin tà ren yin ye ‘Mi ne i nye,’ yin tà ren yin ye sang mi nye ike̱ng ikak mi ka ma mi baꞌ, amma ike̱ng iya Ada'me tin bo̱so̱p'e ne mi fe̱ tsek. 29Aya a tin tom se be mi; a ti won mi ka ma mi baꞌ, kamok mi nye koakye riye̱ wu tá shim.”

30Nizen aYeso ta se be kufe̱ ike̱re̱ na, ánerawe whe̱re̱ ti no̱o̱k katsak ni wu.

Katsak yin tà ka tun yin

31Ayong aYeso fe̱ be áner aYahuda áya a tin no̱o̱k katsak ni wu ye, “Ke yin kuus yin kubo̱so̱p'i, to̱, yin nye yin álimazhiri mi áfe katsak. 32Ne yin ren yin katsak, ne katsak'e ka sak yin tà sor yin ne̱k.”

33Ne ba fe̱ be wu ye, “Yir nye yir kuri Ibrahim, yir i kun te yir ásam akak baꞌ. Akye̱ sak wan tá fe̱ ye yir tà sor yir ne̱k e̱?”

34aYeso fe̱ be ba ye, “Katsak'e, mi ta ka tak yin, koangan ne a nye rine̱n a nye asam rine̱n. 35Asam be karo̱ kusor kafe rice wu numa atekasa wu baꞌ, amma igon'e be ma izen izen 36Kamok anong, ke Igon'e ta ka no̱o̱k yin iren kusor ne̱k, to̱, yin tà se̱ yin kusor ne̱k kufe katsak. 37Mi ren yin nye yin kuri Ibrahim, gip be anong, yin shim tin fe̱r yin, kamok rife̱ mi n no̱ kaye̱e̱r aye̱ yin baꞌ. 38Mi ta taas yin ike̱re̱ ife mi ta di nufe Ada mi, amma yin nye yin ike̱re̱ iya yin tá fok yin nufe ada yin.”

39Ayong á fe̱ be aYeso ye, “Ibrahim ne a nye ada yir.” Ne aYeso fe̱ be ba ye, “Ke a fa fe̱ ye yin nye yin inoon Ibrahim, ke yin nye yin ike̱re̱ wu tá nye. 40Mi nye aner aya mi ta fe̱ katsak kaya mi tá fok nufe Adakunom. amma yin shim tin fe̱r yin. To̱, Ibrahim'me nye ike̱re̱ kuri iyong baꞌ. 41Kamok anong, yin nye yin ike̱re̱ iya ada yin ta nye.”

Amma áner aYahuda fe̱ ye, “Yir nye yir inoon rikuna baꞌ. Adakunom ne a nye Ada yir, wu wu ze̱r ne yir be yir.”

Inoon Ishetan

42aYeso fe̱ be ba ye, “Ke a fa fe̱ ye Adakunom ne a nye Ada yin, ke yin ti shim yin, kamok mi ne nufe Adakunom, kyo̱o̱rna mi se aze. Mi be̱ kube̱ rice mi baꞌ, amma wu ne a ti tom. 43Akye̱ sak yin ren yin ike̱ng iya mi tin fe̱ baꞌ e̱? Kamok yin kyem i fok yin rife̱ mi baꞌ. 44Yin nye yin áfe ada yin, Ishetan. Kamok anong, yin shim tà nye yin ike̱ng iya wu tá shim. Wu nye aner kufe̱s ánerawe kum ni ime̱se̱ng'e. A shim katsak baꞌ, kamok a be katsak'e baꞌ. Izen iya ne a bo̱ naborok, a fe̱ ike̱ng ife i ta nye igo̱o̱n wu, kamok wu nye aner abo̱o̱s, ne a nye ada áfe abo̱o̱s. 45Amma kamok mi tá taas katsak, yin ti no̱o̱k yin katsak rife̱ mi baꞌ. 46Angan kaye̱e̱r yin ta kyem a fe̱ ye mi kun nye rine̱n e̱? Ke i nye ye mi ta taas yin katsak, to̱, akye̱ sak yin ti no̱o̱k yin katsak rife̱ mi baꞌ e̱? 47Aya a ta nye afe Adakunom foos ike̱ng iya Adakunom ta fe̱. Yin wesek yin kuto baꞌ, kamok yin nye yin áfe Adakunom baꞌ.”

aYeso nar Ibrahim

48Ayong áner aYahuda ame fe̱ be aYeso ye, “Aser, yir fe̱ yir katsak yir tá fe̱ yir ye wan nye aner aSamariya aya a ta be amaan nabik a?”

49aYeso fe̱ be ba ye, “Mi be amaan kabik baꞌ. Mi tiyiik Ada mi. Amma yin ti zhe̱e̱sh yin. 50Mi tse̱r kuyiik kamok rice mi baꞌ. Aner akak kuse a tin tse̱r'e, wu ne a nye aner amok'e. 51Katsak'e ne mi ta ka tak yin, aner aya ne a kuus rife̱ mi, a tà ku baꞌ sam.”

52Ayong áner aYahuda'me fe̱ be wu ye, “Kyo̱o̱rna yir ren yir ye wan be amaan kabik! Ibrahim be áner kuzarap Adakunom gip á kus, ne wan ra fe̱ ye, ‘Aner aya a ta ka kuus a tà ku baꞌ.’ 53Wan di ye wan nar ada yir Ibrahim a? Wu gip a ku, ne áner kuzarap Adakunom gip á kus. Wan di ye wan nye angan e̱?”

54aYeso tú shim ba'me ye, “Ke mi tiyiik rice mi, kuyiik'e sor ike̱ng ikak baꞌ. Ada mi aya yin ta di yin ye a nye Adakunom yin, ne a nye aner a tin tiyiik. 55Yin tu ren yin baꞌ, amma mi tu ku ren. Ke mi fe̱ ye mi tu ku ren baꞌ, i nye ye mi nye aner abo̱o̱s kyo̱ndi yin, amma mi tu ku ren ne i kuus rife̱ wu. 56Ada yin Ibrahim nye riye̱ rikan kamok a tá izam mi, ayong a di, a nye riye̱ rikan.”

57Iyong áner aYahuda ame fe̱ be wu ye, “Wan n te aye̱ iso̱k itoon baꞌ, ne wan fe̱ ye wan di Ibrahim a?”

58aYeso fe̱ be ba ye, “Katsak'e ne mi ta ka tak yin, nizham a tá ra tes Ibrahim ‘Mi Nye I Nye.’ ”

59aYeso ta fa fe̱ anong, yong á bo̱ ata nong á tú ku barak mo. Amma aYeso ne̱re̱ng nong a tá wuruk kaye̱e̱r agbang kutu kuya Adakunom iben'e.

Currently Selected:

aYohana 8: izrNT

Highlight

Copy