aLuka 20

Áner aYahuda rip karo̱ aYeso tú ku se̱ kukyem wu

(aMat 21.23-27; aMar 11.27-33)

1Katuk kakak nizen aYeso tá sen bo̱so̱p ánerawe'me nubang agbang kutu kuya Adakunom iben, ne a ku taas ba Rife̱ Ritek Adakunom, ágbang átsi be áfe kubo̱so̱p Itsi mak be áko̱k kasho̱o̱n be̱s nufu. 2Á fe̱ be wu ye, “Ni tak yir, be akye̱ kuri kukyem ne wan ti nye ike̱re̱ na e̱? Angan ta no̱o̱k iren nong ta nye ike̱re̱ na e̱?”

3Ayong aYeso fe̱ be ba ye, “Won tà ka rip yin ike̱ng ikak. Ni tak yin, 4aBatisma aYohana tá nye, a nye afe Adakunom ka afe anerawe e̱?”

5Iyong á nye ibo̱ro̱ng awan ba á tá fe̱ ye, “Ke yir fe̱ yir ye, ‘A nye afe Adakunom,’ a tin rip yir ye ‘Akye̱ sak yir ti no̱o̱k yir katsak ni wu baꞌ e̱?’ 6Ke yir fe̱ yir ye, ‘A nye afe anerawe,’ ánerawe cice̱r tin barak yir be ata, kamok ba shim ye aYohana nye aner kuzarap Adakunom.”

7Iyong á fe̱ be aYeso ye, “Yir ren yir baꞌ.”

8Ayong aYeso fe̱ be ba ye, “To̱, mi tà ma ka tak yin ka be akye̱ kuri kukyem ne mi ti nye ike̱re̱ na baꞌ.”

Kumaas natoon áfe ikap ákak á tá bo̱ aro riko̱

(aMat 21.33-46; aMar 12.1-12)

9Ayong aYeso ya kasho̱o̱n be kutaas ánerawe kumaas na ye, “Aner akak tuse a tá be riko̱ anap. A no̱o̱k áner ákak aro'me nong a tá be naro̱ kakak, a sor azong dide̱ng. 10Izen anap'e tá fa te, a tom asam wu akak ye a ra tseng nufe áner wu tú ku no̱o̱k ba aro riko̱'me nong a tà su ku shan kanu kafu. Aner á tú ku no̱o̱k ba aro riko̱'me tsor asam'me, ne á ku ro nong a tú ku bun kari dar ike̱ng ikak. 11Ayong atek riko̱'me bun a tom asam wu akak nufuba. Áner á tú ku no̱o̱k ba aro riko̱'me bun á tsor asam'me dide̱ng. Ne a nye kye̱re̱ be wu ne á ku ro, a tú bun kari dar ike̱ng ikak. 12Gip be anong a bun a tom asam afe ataar gbak, ne á bun á tu tsor ma á tu man ne á ku barak nama riko̱'me.

13“Atek riko̱'me bun a fe̱ ye, ‘Mi tà nye ane̱ e̱? Mi tà tom igon riye̱ mi, kashim á tu ku fok.’

14“Amma áfe a ta sok aro riko̱ ame tá fa ku di, ne á fe̱ ye, ‘Ayu ne a nye aya kutse wu, i ku fe̱r yir nong kutse'me ta te kufe yir.’ 15Iyong á tú barak nama riko̱'me nong á tú ku fe̱r.

“To̱, akye̱ ne atek riko̱'me tà nye be ba e̱?” 16“A tà tseng nong a tà se fe̱s áner wu tú ku no̱o̱k ba aro riko̱'me, ne a won riko̱'me nubo̱k áner ákak ze̱e̱r.” Ánerawe'me tá fa fok anong ne á fe̱ ye, “Adakunom ra roon'e!”

17aYeso ti sak anyisi niba, ne a ku rip ba ye, “To̱, akye̱ ne yin to̱ yin natoon izibir yin tá fa yin ye,

“ ‘Kuta kuya áfe rino̱k tá raba,

ne kute itsik ribor kutu a?’

18“Koangan ne a tikpa natoon kuta'ong, a tà te ikpis'e ze̱r ze̱r, amma aner aya kuta'me tikpa natoon wu, ku tú ku me̱re̱sh.”

Kurip natoon kukarang itso̱m iben

(aMat 22.15-22; aMar 12.13-17)

19Áfe kubo̱so̱p Itsi be ágbang átsi tse̱r iren, á tana wor á yiir aYeso, kamok ba ren ye a ti nye kumaas'ong natoon ba, á ra fok inyim ánerawe'me.

20Á ta se be kutseng niren, yong á tom ákak be ritse̱ng nong á tà se di ike̱ng aYeso'me tá sen nye'me. Á shim ke aYeso taam nong á tà se̱ á tu ku yiir nong á tu ku sok á tà no̱o̱k rigwo̱m. 21Áner á tú ku tom ba ame fe̱ be aYeso ye, “Aner Kubo̱so̱p, yir ren yir ye wan fe̱ ne i bo̱so̱p ánerawe katsak, wan tonong kushim rice baꞌ, ne i bo̱so̱p ánerawe iren Adakunom kaye̱e̱r katsak. 22Iyong i se gye̱r yir ta karang yir aKaisar itso̱m iben aꞌa?”

23aYeso tá ren ritse̱ng ba yong a fe̱ be ba ye, 24“Ni tonong yin ica itso̱m'e ta di. Nawu be riyerek angan ne na se natoon'e e̱?”

25Iyong á fe̱ ye, “Nafe aKaisar.”

Ne aYeso fe̱ be ba ye, “To̱, no̱o̱k yin aKaisar ike̱ng i ta nye ife aKaisar, ne i no̱o̱k yin Adakunom ike̱ng i ta nye ife Adakunom.”

26Á kyem á se̱ ike̱ng á tana ku yiir mo be rife̱ wu a tá fe̱ azong nasho̱o̱n ánerawe baꞌ, yong á te zhing be rife̱ wu ne á tigbik.

Kurip natoon kudorok ikom

(aMat 22.23-33; aMar 12.18-27)

27Áner aYahuda ákak áya a tá se kaye̱e̱r kugung rice aSadusi #20.27: aSadusi: fa: Akanang Ike̱re̱ Ikak, kaye̱e̱r nafarap'e nakak. be̱ nufe aYeso nong á tá fe̱ be wu ye sang kudorok ikom kuse baꞌ. Iyong á be̱ nufu be kurip ye, 28“Aner Kubo̱so̱p, aMusa ti zibir yir'e ye, ke anerawe ku a tá won abining dar inoon, aronyining ra sok akumung'e, nong ase̱ a tu ku tes mo inoon. 29To̱, áner ákak tuse a tá nye aner be áronyining ba kanataar. Afe ime̱se̱ng'e nye kuwe̱ne̱ng, a ku dar kuse̱ igon. 30Aronyining afe afa sok akumung'e, a bun a ku dar ku nise̱ igon gip. 31Ne afe ataar bun a sok akumung'e, anong ne a bun a ku gip dar igon. Anong ne áner kanataar'e kus cei dar kuse̱ inoon. 32Ni igang'e abining'e ku gip. 33To̱, ayong nizen kudorok ikom, abining'e tà nye afe angan kaye̱e̱r áner kanataar'ong á tá tsang á nye kuwe̱ne̱ng be wu e̱?”

34Ayong aYeso fe̱ be ba ye, “Áner izam na ne á nye iwe̱ne̱ng ne á nyesek inoon ba niwe̱ne̱ng. 35Amma áfe Adakunom ta di ye á kyem kuno̱ naza nizen kudorok ikom, a ta ba nye iwe̱ne̱ng ka a ta no̱o̱k akak nuwe̱ne̱ng baꞌ. 36Á tà ba kus baba baꞌ, kamok ba ma te kyo̱ndi ámaleka. Ba nye inoon Adakunom makong, kamok ba tá dorok nure̱k be kutser. 37Amma kaye̱e̱r rife̱ Adakunom natoon kuro̱ng tá ya kuci, aMusa tonong ye áfe a tá kus tà dorok be kutser, kamok wu yis Adakunom ye, Adakunom afe Ibrahim ne Adakunom Ishaku, ne Adakunom aYakub. 38Iyu tonong ye A nye Adakunom ikom baꞌ, amma Adakunom áfe a ta nye atser.”

39Áner kubo̱so̱p Itsi ákak ti sak ye, “Wan i ren i shim gye̱r, Aner Kubo̱so̱p.” 40Nama anong akak ba ra ba kyem á tu rip ike̱ng ikak baꞌ.

Kurip natoon aKiristi

(aMat 22.41-46; aMar 12.35-37)

41Ne aYeso ku rip ba ye, “Akye̱ sak á ta fe̱ ye aKiristi nye Igon aDauda e̱? 42aDauda be rice wu gip a fe̱ kaye̱e̱r Kufumung aZabura ye,

“ ‘Agwo̱m Ágwo̱m fe̱ be Agwo̱m Ágwo̱m mi ye,

“Sonong nubo̱k riya mi,

43Ma mi sak ámudo̱n wan

tà ka kpa kaben.” ’

44“aDauda tú yis ye, ‘Agwo̱m Ágwo̱m.’ To̱, ne a bun a nye ane̱ a tà nye igon wu e̱?”

aYeso te̱s áner kubo̱so̱p Itsi

(aMat 23.1-36; aMar 12.38-40)

45Áfe á tá sen foos aYeso'me fok, a tá fe̱ be álimazhiri wu ye, 46“Sak yin riye̱ be áner kubo̱so̱p Itsi, á ta shim kutsang tseng be agbang akpiin, ne á shim á tu ku nye ba ashou ninaro̱ rizhik. Ne á kasa naro̱ kusosok natek natu aduwa áner aYahuda ne ninaro̱ nayiik'e naro̱ kunye riye̱ rikan kyo̱ndi ágbang áner. 47Á mo̱o̱r ákumung, ne a nye aduwa aso̱p nong ánerawe tà di. Áner kuri ayong, amok ba tà be agap ne a nar.”

Currently Selected:

aLuka 20: izrNT

Highlight

Copy