aLuka 21

Kuno̱o̱k akumung akak tá nye

(aMar 12.41-44)

1Nizen aYeso tá se na agbang kutu kuya Adakunom iben, a sok rice naza ne a di árum ákak tá saas itso̱m nures a tin tusung abeko. 2Ne a di akumung akak gip a tá be rizor tá sak íca itso̱m izhizhe̱k'e ifa. 3Ayong aYeso fe̱ be ánerawe'me ye, “Katsak ne mi tà ka tak yin, ike̱ng ife akumung na tá no̱o̱k nar ife ribir ánerawe na cei. 4Ánerawe na cice̱r no̱o̱k kaye̱e̱r kurum ba tá be, amma akumung na no̱o̱k kaye̱e̱r rizor wu, a sok ike̱ng iya wu tin sor nong a tá no̱o̱k cei.”

aYeso fe̱ natoon kuyirik agbang kutu kuya Adakunom iben

(aMat 24.1-2; aMar 13.1-2)

5Ákak sen fe̱ natoon kuri ata a ta saas a tin no̱k agbang kutu kuya Adakunom iben, ne kuri ike̱re̱ a ta nyesek kamok a tin zem karo̱ kuya Adakunom iben'e. Ayong aYeso fe̱ be ba ye, 6“Izen saase a tana yirik ata be ike̱re̱ yin ta ye̱re̱k yin na, a tà won kuzining natoon kufudang baꞌ. A tà yirik cei.”

Risam be kutabak áfikuus

(aMat 24.3-14; aMar 13.3-13)

7Iyong á tú rip ye, “Aner Kubo̱so̱p, nizing ne ike̱re̱ na tà nye e̱? Akye̱ ne yir tá di yir nong tá ren yir ye izen'e m be̱ bubarak e̱?”

8Ayong aYeso fe̱ be ba ye, “Sak yin riye̱, fan akak ba ka wo̱ro̱k yin. Kamok ánerawe whe̱re̱ tà be̱s kaye̱e̱r riyerek'i ne á fe̱ ye, ei, ba ne á nye mi, ne á bun á fe̱ ye, ‘Izen m be̱ bubarak.’ Sang tu kuus yin baꞌ. 9Izen iya yin fok yin itak itsom be kuren natoon rigwo̱m, tu te yin febek baꞌ. Ma a nye ike̱re̱'ong nizham, igang'e tà ra be̱.”

10Ayong aYeso ya kasho̱o̱n be rife̱ ye, “Iben ikak tà ko̱n be ikak, ne rigwo̱m rikak ko̱n be rikak. 11Kaben tà zu dide̱ng, ne a nye amaan izong. Iriri iro̱k ta yising ánerawe koake̱, ike̱re̱ i tana no̱o̱k ánerawe inyim tá wuruk ne ike̱re̱ azhing wuruk naza dide̱ng.

12“Nizham a ta ra nye ike̱re̱ na, a tà ka yising yin, ne a ka tabak yin dide̱ng. A tà tseng be yin natu aduwa áner aYahuda ne a ka te yin nitso̱m ne á tseng be yin nufe ágwo̱m ne áko̱k kasho̱o̱n kamok mi. 13Iyong tà ka no̱o̱k yin iren nong tu ku taas yin ba Rife̱ Ritek natoon'i. 14Sang tu daam yin be ike̱ng iya yin tana fe̱ yin baꞌ. 15Kamok mi tà ka no̱o̱k yin ike̱ng iya yin tana fe̱ yin be kukyem kuya sang ámudo̱n yin tana kyem á ya kanu be yin baꞌ. 16Áda be ángo̱ yin ne áronyining yin be afe iri yin ne áferime̱ yin tà ka sok yin á tà no̱o̱k nong á tà fe̱s ákak yin. 17Ánerawe cice̱r tà ka ranyin kamok mi. 18Amma ko itsam nakuyo̱ng rice yin kazining tà wei baꞌ. 19Nyeseng yin be agap, yin tà se̱ yin kashesh.”

aYeso fe̱ natoon kuwo̱p aUshalima

(aMat 24.15-28; aMar 13.14-23)

20“Nizen iya ne yin di yin ásozha whe̱r n gorok kuwo̱p aUshalima, ne i ren yin ye izen a tana yirik'e n nye. 21Won áfe a ta se na aYahuda tu teng nong á ta ne̱re̱ng na nawhanang. Áfe a ta se kaye̱e̱r kuwo̱p aUshalima ra wuruk, áfe a ta se ni iwo̱p i ta se bubarak tu no̱ kaye̱e̱r agbang kuwo̱p'e baꞌ. 22Kamok iyu ne i nye izen a tana to̱ ánerawe amok nong a ta shining ike̱ng iya a tá zibir. 23I ta sor ike̱ng kuro̱ riye̱ be ányining áya a tana se be nafa be áya a tana sen ngasa inoon nizen iyong. Amaan risam tu kuse dide̱ng nazatse nizen iyong, ne riye̱ kubeseng Adakunom ni tiik natoon ba. 24Á tà fe̱s ákak ba, ne á yising ákak nong á tà se te ásam niben ikak, áner aya a ta nye áner aYahuda baꞌ, tà shan kuwo̱p aUshalima'me ne á ni fan ma izen ba shining.

Izen kube̱ igon anerawe kufe afa

(aMat 24.29-31; aMar 13.24-27)

25“A tà di ike̱re̱ azhing kaye̱e̱r kunom be kufe̱n ne ádar. Ánerawe iben ze̱r ze̱r tà te titak nazatse, ne á daam kamok ashi ta ko̱n ne a tang agung. 26Ánerawe tà kus ne á shiship kamok inyim ne naso̱k ku kpas ba naye̱ kamok ike̱re̱ i tana se̱ kazatse, kamok ike̱re̱ i ta se kaye̱e̱r kaza tá zuur. 27Nizen iyong ne á tà di Igon Anerawe ta saase kaye̱e̱r ane̱n be kukyem ne kuyiik dide̱ng. 28Ke yin di yin ike̱re̱ na, nyeseng yin ta sok yin rice yin naza kamok kashesh yin m be̱ bubarak.”

Bo̱so̱p yin ike̱ng ikak be ritin atafo

(aMat 24.32-35; aMar 13.28-31)

29Ayong aYeso tú tak ba kumaas na ye, “Ye̱re̱k yin ritin atafo be ribir nakon cice̱r. 30Izen iya ne ato'me san kufunung, ne yin ren yin ye kushik n nye. 31Anong gip ke yin di yin ike̱re̱ na, ne i ren yin ye rigwo̱m Adakunom m be̱ bubarak.

32“Katsak ne mi ta ka tak yin, ánerawe izam na tà kus baꞌ, ma a nye ike̱re̱ na cei nizham. 33Kaza be kaben tà gor, amma rife̱ mi tà gor ze̱r baꞌ.

Sor yin be kanye̱k

34“Sak yin riye̱, so̱. Sang tu won yin kuso̱ ike̱re̱ ne kuya kanu be kushim ike̱re̱ kazatse na ta sok kuto̱ro̱ng yin baꞌ, sang ke anong baꞌ, kunom'e tin be̱ ni yin niburum. 35Kunom'e tin be̱ natoon koangan a ta sor kaye̱e̱r kazatse. 36Sor yin be kanye̱k koakye izen, ne i nye yin aduwa nong tà wher yin ike̱re̱ i tana nye, nong ta kyem i nyeseng yin nasho̱o̱n Igon Anerawe.”

37Koakye kunom, aYeso tseng na agbang kutu kuya Adakunom iben nong a tà se bo̱so̱p ánerawe'me, ke kawheshirim nye ne a ngarak natoon kawhanang a ta yis ye, kawhanang Nafar, a ta se ko̱so̱ azong. 38Ke kadiding karak ne ánerawe cei be̱s nufu na agbang kutu kuya Adakunom iben nong á tú ku foos.

Currently Selected:

aLuka 21: izrNT

Highlight

Copy