aMatiyu 17

Kanyisi aYeso shishing

(aMar 9.2-13; aLuk 9.28-36)

1Nama inom igataar aYeso sok aBitrus, be aYakub, ne aYohana a tà nye aronyining aYakub, nong a tá tseng be ba natoon kawhanang kakak ka ta se garang dide̱ng. 2Iyong kanyisi wu shishing nasho̱o̱n ba. Kanyisi wu'me te kanang kyo̱ndi kunom ne ares wu kare̱p pes. 3Gbashak, ne aMusa be Iliya a tá nye áner kuzarap wor á ti wuruk ni ba ne á fe̱ kanu be aYeso ame.

4Ayong aBitrus fe̱ be aYeso ye, “Atekasa, i se gye̱r yir ta se yir aze. Ke wan shim, mi tà nye abur ataar aze, kuzining tà nye kufuan ne kuzining nye kufe aMusa ne kuzining nye kufe Iliya.”

5Kum ne a ru fe̱ kanu, kune̱n kukak ku ta se kanang be̱ ku tú kis ba ne kuto̱ kukak wuruk naza ye, “Ayu ne a nye Igon'i kaya mi ta shim. Mi fok kasas wu dide̱ng. Ku fok yin kuto.”

6Nizen iya álimazhiri'me tá fa fok anong, iyong inyim tú ro̱ ba ma á kpas ba kaben. 7Ayong aYeso be̱ nong a tú ku dorok ba, a tá fe̱ ye, “Dorok yin, sang tú fok yin inyim baꞌ.” 8Nizen á tá sok ace ba naza ne a di aYeso tsek, ko á di akak baba baꞌ.

9Nizen iya á tá sen tisik natoon kawhanang ame, aYeso tu ku kpam ba ye, “Sang yin tú tak yin akak ike̱ng iya yin tá di yin na baꞌ, ma ke a dorok Igon Anerawe nure̱k nizham.”

10Álimazhiri'me tú ku rip ye, “Akye̱ sak áner kubo̱so̱p Itsi fe̱ ye, ma Iliya san kube̱ ni ime̱se̱ng e̱?”

11aYeso fe̱ be ba ye, “Katsak'e, Iliya tà be̱ ni ime̱se̱ng'e nong a tà be̱ nye koakye gye̱r. 12Amma mi fe̱ be yin ye, Iliya m be̱, ba tú ku ren baꞌ, ma á tú ku nye ike̱ng iya ba tá shim. Anong ne Igon Anerawe tà so̱ risam nubo̱k ba gip.” 13Ayong álimazhiri ame ma ren ye, a sen ni fe̱ natoon aYohana aner abatisma.

Acam akak a tá be kabik rigbanu te atser

(aMar 9.14-29; aLuk 9.37-43a)

14Nizen iya ba tú ku bun nufe rigwo̱m ánerawe ame, aner akak be̱ nufe aYeso a tá tigbok akuur kaben nasho̱o̱n wu. 15A tá fe̱ ye, “Atekasa, ro̱ riye̱ igon'i, kuro̱k ricirim kudaam, a se risam dide̱ng. Nizen ikak a man ne a kpa nuro̱ng ka na ashi ayi. 16Mi tseng be wu nufe álimazhiri wan, amma ko ba kyem á tú ku sak a tá te atser baꞌ.”

17Ayong aYeso fe̱ be wu ye, “Kaꞌ yin ánerawe izam na i tá shonong yin, yin be yin kuno̱o̱k katsak baꞌ. Ma ane̱ ne mi ta sor mak be yin e̱? Ma ane̱ ne mi ta naka mak tsesek be yin e̱? Be̱e̱n yin be acam'me aze.” 18Ayong aYeso zhe̱e̱r amaan kabik ame ne ka wuruk kaye̱e̱r igon ame. Ne igon ame wor ka te katser.

19Ayong álimazhiri'me be̱ nufe aYeso kyo̱o̱n nong á tú ku rip ye, “Akye̱ sak yir kyem i tun yir amaan kabik'e baꞌ e̱?”

20aYeso fe̱ be ba ye, “Kamok kuno̱o̱k katsak yin gop baꞌ. Won ta ka tak yin katsak'e, ke a fa fe̱ ye kuno̱o̱k katsak yin se hiir kyo̱ndi ica amusta ke yin kyem i fe̱ yin be kawhanang na ye, ‘Dorok aze ta be aza,’ ka tà dorok. Ike̱ng ikak tà ka gaar yin kunye baꞌ.” 21[Amma ike̱ng kuri iyu ta kyem i wuruk baꞌ ma be aduwa ne azumi.]

aYeso bun a nye kuzarap riku wu

(aMar 9.30-32; aLuk 9.43b-45)

22Nizen iya á tá se karo̱ kazining na aGalili, aYeso fe̱ be álimazhiri wu ye, “A tà no̱o̱k Igon Anerawe nubo̱k ánerawe. 23A tù ku fe̱r, katuk afe ataar a tù ku dorok be kutser.” Iyong álimazhiri wu nye riye̱ riwe dide̱ng.

Agandu kamok karo̱ kuya Adakunom iben

24Nizen iya aYeso be álimazhiri wu tá no̱ kaye̱e̱r aKapanum, áfe ku shashang itso̱m kamok karo̱ kuya Adakunom iben be̱ nufe aBitrus nong á tú ku rip ye, “Aner kubo̱so̱p yin karang yin itso̱m karo̱ kuya Adakunom iben a?”

25aBitrus fe̱ be wu ye, “Ei, a karang.”

Nizen iya aBitrus tá no̱ kaye̱e̱r kasa'me, aYeso fe̱ be wu ni ime̱se̱ng'e ye, “aBitrus, wan di ane̱ e̱? Ágwo̱m kazatse shashang itso̱m iben angan e̱? Á shashang nufe inoon ba ka nufe ákak ze̱e̱r e̱?”

26aBitrus fe̱ be wu ye, “Nufe ákak.”

Ayong aYeso fe̱ be wu ye, “Á wosong inoon ba. 27Gip be anong, nong fan ánerawe bu beseng aye̱ be yir, tseng nudung ta se te agunung wan. Sok izos ife ime̱se̱ng'e wan ta yiir nong ta ngamang kanu'me, wan tà se̱ ica itso̱m kaye̱e̱r'e. Sok tá su ku karang mo ba itso̱m inaan be ifuan.”

Currently Selected:

aMatiyu 17: izrNT

Highlight

Copy