aMarkus 3

Aner akak kubo̱k'e tá we̱

(aMat 12.9-14; aLuk 6.6-11)

1aYeso tá bun a no̱ kaye̱e̱r kutu aduwa ame, aner akak tuse azong afe kubo̱k wu tá we̱. 2Áner akak tuse azong á tá shim ke a di aYeso'me ta taam, iyong á tú ye̱re̱k nong á ta di ka a tá sak aner'e tá te atser katuk Asabar. 3Ayong aYeso fe̱ be aner kubo̱k'e tá we̱ ame ye, “Dorok tá nyeseng nasho̱o̱n ánerawe.”

4Ne aYeso rip ánerawe'me ye, “Akye̱ ne ise gye̱r a ta nye kunom Asabar e̱? I se gye̱r a ta nye ike̱ng itek ka a ta nye ike̱ng imaan'e e̱? I se gye̱r a ta shesh kutser ka a ta fe̱r e̱?” Iyong á te ba gbik.

5aYeso tú ye̱re̱k ba be riye̱ kubeseng ne a nye riye̱ riwe dide̱ng kamok atep aye̱ ba. Ayong aYeso fe̱ be aner ame ye, “Nabak kubo̱k wan.” Aner ame nabak kubo̱k wu, yong kubo̱k'e te kutser gye̱r. 6Áner aFarisi tá fa di anong ayong á wuruk nufang nong á ta se nye ibo̱ro̱ng mak be áner aHiridus nong a tá fe̱r aYeso.

Rigwo̱m ánerawe whe̱re̱ kuus aYeso

7Ayong aYeso naka ko̱ro̱k be álimazhiri wu, á kuwo̱p'me nong á tá be nukim kudung aGalili. Ánerawe aGalili whe̱re̱ tú ku kuus. 8Nizen iya ba tá fa fok ike̱re̱ iya aYeso'me tá nye cei, yong ánerawe whe̱re̱ nes ni iben aYahuda be aUshalima ne Idumiya be afe kunyi aUrdun ne áfe abas aSur be aSidon be̱s nufu. 9Kamok ánerawe tá nar agap yong aYeso fe̱ be álimazhiri wu ye, á ra su ku tse̱r kukpara ashi kurisher nong a tin no̱, fan á bu mak á ku firik. 10Kamok a tá sak ánerawe whe̱r tá te atser yong áfe iro̱k whe̱re̱ be̱s bubarak nong á tu ku ras. 11Koakye izen ne ámaan nabik tu di ne á kpas kaben nasho̱o̱n wu ne á tang ikun ye, “Wan ne i nye Igon Adakunom.” 12Ne aYeso fe̱ be ba be agbang kuto̱ ye, sang akak tú tak ka wu nye angan'e baꞌ.

aYeso kasa álimazhiri wu kuso̱k be afa

(aMat 10.1-4; aLuk 6.12-16)

13Ayong aYeso ngarak natoon kawhanang nong a tá yis áya wu tá shim, ne á be̱ nufu. 14Ne a kasa áner kuso̱k be áfa nong a tá sor mak be wu, ne a ka sak á ta te ámanzo wu ne a ku toos ninye awazi rife̱ Adakunom, 15á se̱ kukyem kuturung amaan nabik.

16Ayu ne á nye áner kuso̱k be afa wu tá kasa; aSiman (aya a tú ku te riyerek ye aBitrus) 17aYakub igon aZabedi, ne aYohana aronyining wu, a tú ku no̱o̱k ba ayerek ye aBuwanazhis, ri ta sor; inoon akparam. 18Adarawus be aFilibus ne aBatalomi be aMatiyu, ne aToma, be aYakub igon Alfiyus, ne aTadiyus, be aSiman aner rifur kuwo̱p wu, 19ne aYahuza Iskariyot, aya a tá re̱p aYeso.

aYeso ne aBazabul

(aMat 12.22-32; aLuk 11.14-23)

20Ne aYeso no̱ nasa kakak be álimazhiri wu, ánerawe whe̱re̱ se na ka tusung azong gbak, ma wu be álimazhiri wu'me kyem á se̱ izen kuya naya baꞌ. 21Izen iya áfekari wu tá fok itak'e, á tse̱r iren nong á tú ku yiir ye, “An ririm.”

22Áfe kubo̱so̱p Itsi áya a tá ne na aUshalima fe̱ ye, “aBazabul, agwo̱m ítseng ne a se kaye̱e̱r wu. Be kukyem aBazabul ne a ti turung ítseng'e.”

23Ayong aYeso yis ánerawe'me nong a tá fe̱ be ba kaye̱e̱r kumaas ye, “Ishetan ta nye ane̱ i ta tun Ishetan e̱? 24Ke rigwo̱m naka kabak, ne rigwo̱m'e kyem ri nyeseng baꞌ. 25Ke kasa na kabak, ne kasa'me kyem ka nyeseng baꞌ. 26Ke Ishetan rawu rice wu, a ta naka kabak, a ta kpa, i nye ye igang wu be̱'ong.

27“Akak ta kyem a no̱ nasa aner agap, nong a tu ku kok ike̱re̱ wu baꞌ, ma ke a rosom aner'e nizham, a ta ra nye itsang nasa'me.

28“Katsak ne mi ta ka tak yin, koakye kuri rine̱n ne ánerawe tá nye ka azhe̱e̱sh Adakunom ayi, a tù ku re̱ng ba'me. 29Amma koangan ne a zhe̱e̱sh Kabik Kazhe̱l'e, a tù ku re̱ng rine̱n riyong nigaan'e baꞌ. A nye agbang rine̱n ri tana sor ma izen izen.” 30aYeso fe̱ anong kamok ba fe̱ ye wu be amaan kabik.

Anyining aYeso ne áronyining

(aMat 12.46-50; aLuk 8.19-21)

31Nizen iyong ango̱ aYeso be áronyining wu be̱ nufu. Á nyeseng nufang nong á ta tom akak nufu ye, á ra su ku yis. 32Ánerawe aya a tá sosok á tu ku gorok, fe̱ be wu ye, “Ango̱ wan be áronyining wan m be̱ nufang. Á shim a ta ka di.” 33aYeso tú rip ba ye, “Angan nye ango̱ mi be áronyining'i e̱?” 34Ayong a ye̱re̱k áfe a tá sosok á mu ku gorok ne a fe̱ be ba, “Di yin, ango̱ mi be áronyining'i na. 35Koangan afe a ta nye ike̱ng iya Adakunom ta shim, nye ango̱ mi ne áronyining'i ne ángasnyining'i.”

Currently Selected:

aMarkus 3: izrNT

Highlight

Copy