aMarkus 4
4
Kumaas be aner ikap
(aMat 13.1-9; aLuk 8.4-8)
1aYeso bun a san ku bo̱so̱p ánerawe nukim agbang kudung aGalili. Ánerawe aya a tú ku gorok mak whe̱re̱ ma ayeso'me no̱ kaye̱e̱r kukpara ashi nong a ta sonong kaye̱e̱r'e. Kukpara ashi'me se nukim kudung'e, ne ánerawe'me cice̱r na tusung bubarak azong. 2Ayong a tú ku bo̱so̱p ba ike̱re̱ whe̱re̱ be ku ninye kumaas, kaye̱e̱r kubo̱so̱p'e, a fe̱ be ánerawe'me ye, 3“Wesek yin kuto! Aner ikap akak be ni nas izha naya. 4Nizen iya a tá se be kunas'e, íca'me ikak kpas ni iren ne nanon tang. 5Ica'me ikak kpas nifang agudong naro̱ ka tá be iben dide̱ng baꞌ. I tang zizirik kamok iben'e tuse dide̱ng baꞌ. 6Kunom ta fa tar ne ato'me wor a koor kamok atsip'e se̱ iben baꞌ. 7Íkak kpas kaye̱e̱r ikiritsan, ne ikiritsan'e rasak mak be ba, ne i ku te̱ne̱ng ba, ne i te íca itek baꞌ. 8Ne íca'me íkak kpas niben itek, ne i rasak ne i te itek dide̱ng, ikak kuso̱k inyak ne ikak te ace iso̱k igataar ne ikak te iso̱k itaar ne i nar ike̱ng iya a ta nas.” 9Ayong aYeso fe̱ ye, “Aner afe a ta be ato kufok a ra fok.”
10Nizen aYeso tá se be álimazhiri wu kuso̱k be afa'me awan ba, ne ákak áfe a tá se azong, tú rip ike̱ng ife kumaas'e tá sor. 11Ayong aYeso fe̱ be ba ye, “A ma ka no̱o̱k yin kukyem kuren ike̱re̱ rigwo̱m Adakunom i ta se nune̱re̱ng, amma ba áfe a ta se nufang, koakye ma be kumaas, 12nong a ta shining rife̱ Ishaya, a tá fe̱ ye,
“ ‘Á tà yiir iye̱re̱k'e amma á ta ren baꞌ, ne á yiir ifoos'e amma á ta ren ike̱ng'e baꞌ, Ke anong baꞌ, á ta shishing kuse ba nong a tù ku re̱ng ba rine̱n ba.’ ”
aYeso tú tak ba ike̱ng ife kumaas'e tá sor
(aMat 13.18-23; aLuk 8.11-15)
13Ayong aYeso fe̱ be ba ye, “Aser, yin ren yin ike̱ng iya kumaas'ong tin fe̱ a? To̱, ane̱ ne yin ta ren yin ribir kumaas kuya mi tana nye e̱? 14Aner ikap'e se kyo̱ndi aner a ta nas rife̱ Adakunom. 15Íca'me íya i tá kpas niren se kyo̱ndi áner aya a ta fok rife̱ Adakunom. Amma kum ke á fok, ne Ishetan be̱ ne i kok rife̱'me kaye̱e̱r aye̱ ba. 16Anong ne íca'me íya i ta kpas nifang agudong, se kyo̱ndi ánerawe aya a tá fok rife̱'me ne á shan be aye̱ akan, 17amma rife̱'me kpa agap naye̱ ba baꞌ, a sor dide̱ng baꞌ. Ke izen iya ne kudaam ka kutabak be̱ kamok rife̱'me ne a wor a kpa. 18Íca'me iya i ta kpas kaye̱e̱r ikiritsan se kyo̱ndi áner aya á ta fok rife̱ Adakunom, 19amma ke kudaam kazatse be kushim kurum, ne kushim ike̱re̱ ikak be̱ ne i te̱ne̱ng rife̱'me kurasak kaye̱e̱r wu ma a beseng. 20Amma íca'me iya i tá kpas niben itek se kyo̱ndi áner aya a tá fok rife̱'me, ne á shan, ne á te ike̱ng itek dide̱ng, ikak tes iso̱k itaar, ikak iso̱k igataar, ikak kuso̱k inyak ma i nar ike̱ng iya a tá tuus.”
Kumaas be apitila
(aLuk 8.16-18)
21aYeso tú rip ba ye, “Yin be̱e̱s yin be apitila ne i sak yin na agarang, ka ne i sak yin ribong agadu e̱? Sang yin sak yin natoon ike̱ng ikak garang aꞌa? 22Koakye i ta se nune̱re̱ng a ta te̱s, koakye ne a tá ne̱r nye ife a tana tu kanang. 23Koangan afe a ta be ato kufok a ra fok.”
24aYeso bun a fe̱ be ba ye, “Sak yin riye̱ be ike̱ng ife yin tá fok yin. Kuri kures kufe wan tin maas akak'e, kuri kuyong ne a ta ka maas ko'me, ma i ta nar anong. 25Aner aya a ta be ike̱ng iya a tu ku barang mo. Aner aya a be baꞌ, ike̱ng iya wu ta be cie̱k'ong a tin shan ni wu.”
Kumaas be ike̱ng iya i ta tang kaye̱e̱r riko̱
26aYeso bun a fe̱ ye, “Rigwo̱m Adakunom ta se kyo̱ndi anerawe tá nas naya riko̱ wu. 27Nama inom cie̱k, ne naya'me tang ne na rasak, wu ren ka akye̱ ne i sak i ta te anong baꞌ. 28Iben be rice wu ne i sak naya ta te, ni ime̱se̱ng'e ne i tang, ne i tun ace ne i kpa ica makong. 29Kum ke naya'me te, ne aner'e san kute̱m'e, kamok izen ishamang n nye.”
Kumaas be ica amusta
(aMat 13.31-32; aLuk 13.18-19)
30aYeso bun a fe̱ gbak ye, “Be akye̱ ne yir tin maas yir be rigwo̱m Adakunom e̱? Ka yir ta maas yir ane̱ e̱? 31Ri se kyo̱ndi ica kakon a ta yis ye, amusta i ta nye i hiir'e kaye̱e̱r ica nakon kazatse na a ta tuus 32Gip be anong ke a tuus ne i rasak ne i te igbang'e ne i nar ribir nakon a tá tuus be ágbang íwhang, ma nanon ni sosok kaye̱e̱r nawu'me.”
33Be iriri kumaas kyo̱ndi iyong, ne aYeso tú taas mo ba rife̱ Adakunom te̱re̱ be kuren ike̱ng ba tá be. 34A fe̱ ike̱ng ikak be ba dar ku ninye kumaas baꞌ. Amma ke a se be álimazhiri wu, ne a ku taas ba koakye kanang.
aYeso tigba kuwun
(aMat 8.23-27; aLuk 8.22-25)
35Katuk'e yong, kawheshirim tá fa nye, aYeso fe̱ be álimazhiri wu ye, “I tar yir kunyi kukya.” 36Ayong á won rigwo̱m ánerawe'me, ne á ku sok nong á tá tseng kaye̱e̱r kukpara ashi ba tin se kaye̱e̱r'e. Akpara ashi ákak tuse azong gip. 37Kuwun kukak be agap dorok, ma ashi tang agung ne a no̱o̱s kaye̱e̱r kukpara'me. Ashi tá no̱o̱s kaye̱e̱r kukpara'me ma ku be̱ barak ku tá kushining be ashi. 38aYeso se be ida ako̱o̱n wu kaye̱e̱r kukpara ashi'me nama. Iyong álimazhiri wu su ku shiming nong á tá fe̱ be wu ye, “Aner Kubo̱so̱p, wan daam ka yir sen wei yir aꞌa?”
39Ayong aYeso dorok nong a tá tigba kuwun'e ne a fe̱ be agung ashi ame ye, “Nyeseng kyo̱o̱n” ne kuwun'e nyeseng ne karo̱ te win.
40Ne a fe̱ be álimazhiri wu ye, “Akye̱ sak yin fok yin inyim anong e̱? Yin n no̱o̱k yin katsak gum aꞌa?”
41Amma inyim tú ro̱ ba dide̱ng ma á san ku naka risim ye, “Angan na e̱? Kuwun be ashi gip tu ku fok e̱!”
Currently Selected:
aMarkus 4: izrNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc
