Yohana 12

A Shin na Yesu Kindob

(Matiyu 26:6-13; Markus 14:3-9)

1Ayi tsitsi usir itsongnjo titawe ti aba u ci Ukwab Itiyafe. Yesu ru ka uten Betani, uwog ti Lazaru unde ti awu kunn nwunn wu uwae kuskab ku nae atang. 2Usir jwo ureb, Lazaru ti ambakaya-wu nde iken ti ci na wu atang. Marta ti ku kan wuci yi na ba. Lazaru ti Yesu ti ande ti putsa wu ta tetso uwog tebur atang. 3Tiri Mberimu ru ba ti iturbasa kindob iki ti a kyae yi ijwe ipab nardi. Kindob yine site aser ko timambe. Ama awu sa yi yaen si afxen Yesu u pu ikyinn risu-wu fen yi atang. Kuyang kindob yi shag kyi fe uwae kusog atang meme.

4Ama Yawuda Iskariyoti ti si kinjo uwae ande rijwe asu ifaen ba ti Yesu tsab, awu unde wu ti u ru ba ye Yesu jabci, ri baa, 5“A! A! Imi ti nde a sa kindob yine jabci-ba, ama ndeya ande ti rikaen te aser-yi be. Aser-yi u si ayaen aser azurfa ukob ita.#12:5 Aser-yi u si ayaen aser azurfa ukob ita. Unde u nde wande kusang kinjo titawe u tu aser ti fob ana kindob yine!” 6Awu Yawuda ri ira yine ikyaen ti, awu si unde ti riyib, ayi si-yi ikyaen ti awu ku nung risi ande ti rikaen be. Awu ti si unde ti ku ye su aser na ande ti putsa Yesu. Awu ku ci kob aser iki atang ikyaen iken ti awu ku sha. 7Ama Yesu ri baa, “Ya wu ta! Awu sa kindob yine tsika ikyaen usir ti a u ba nji m atang. 8Ko kiye titini ande ti rikaen te ni ta tetso, amaa ame u te ni ta-m tetso ko kiye titini be.”

Ira ti A Myae Risu Lazaru

9Ande yang-ba akwen fxen baa, Yesu na ta uten Betani. Aba nwunn ru yi atang. I si-yi ikyaen Yesu amam ti a ter ru ba be. Aba ku sha ti a na u ru ka nung Lazaru unde ti Yesu kunn nwunn uwae itikicwu. 10Ikyaen yine akwen Rimam tiyang ku myae ira risu Lazaru ti a na u wen wu wen ama. 11Ikyaen ti, ayi si ikyaen-wu nee ande yang akwen ter saen ba ku ta u ku ru uwae kinjo uwog Yesu.

Itisang na Yesu Uwae Urushelima

(Matiyu 21:1-11; Markus 11:1-11; Luka 19:28-40)

12Ucwefam-yi, ande meme ti ru ba uwog Ukwab Itiyafe fxen baa, Yesu na ta fengo ru ku ba yi Urushelima. 13Ikyaen yine aba pye asaen itu u pu ti a na u ru ka kyang te wu fengo. Aba nyae ira baa, “Ti teb Rimam roo! Itinyang ā ta risu awu ti ba yi rinyi Rimam!” 14Yesu sha tu umbae ikyinnsu u tso ka som tsa atang, pangma ti a bae uwae Kutsingken Rimam baa,

15“Kyen-fu ikyenricwu be, afu Mbawandab Siyon!

Ukwe-fu ru ku ba yi uwog-fu tine.

Awu tso umbae ikyinnsu ru ku ba.”

16Kiye ti iken yine ku nde, ande ti putsa Yesu nungye-ba imbyi ira yine be, amaa isim ti Yesu nwunn pu wu uwae iticwu ti kuko ukwe-wu titawe aba tangsom baa, a na bae ira risu iken yine uwae Kutsingken Rimam, aba ama na nde pu ba iken yine ikyaen-wu.

17Ande ba ti te Yesu ta te atso kiye ti awu kunn nwunn Lazaru, sa ira yi kyang u ri te tag pu ba ande. 18Iken ti nde titawe ande yang akwen ru ba byir uwog wu, si ikyaen ti, aba fxen pu ba baa, awu na nde wande ti ku fur ayib wune. 19Ti ande ti kumbub Farisi nung iken yine, aba ku ri te atso baa, “Ni nung, ati nde tu-ti iken iki be. Ni nung, utense meme ter putsa wu ku ru.”

Ande ti Helene iki ku Sha Rifab Yesu

20Ande ti Helene iki ta uwae ande ti tso ba Urushelima ikyaen ti a u fen Rimam kiye na ukwab. 21Aba ru ba uwog Filip, awu unde wu ti ru uten Betisaida yi uten Galili ba. Aba ri te wu baa, “Itse, ati ku sha ti ti u nung uwe Yesu.” 22Filip nwunn u ru ka ri te Andarawu, ama meme ifaen-ba ru ka ri te Yesu. 23Yesu ri te ba baa, “Kiye ru ba pu yi ti ande u nung kuko na Umbae Unde. 24Ame ku ri te ni kubenti, riyáen awum u waen-wu awaen amen be, se iken ti aba a sa wu tso riben awu a nde ma awu na rwa mbub itawe. Asiti awu a rwa mbub u ru pu inja tawe awu u waen awaen tiyang. 25Unde titini ti awu a sa uwae tsi skeb risu unyang-wu utense ike, awu u shanum unyang-wu ti kubenti. Amaa unde titini ti awu a ku pyir unyang-wu utense ike, awu u site unyang ti tsi kukunn. 26Unde titini ti awu a baa, awu na u nde na m wande, awu ā putsa m, ikyaen ti, ko aka ti ame a kyang atang, awu umbae kufxen-m te me u ta te atso. Unde titini ti ru ba ku nde na m wande, Itse-m u nda wu kuko.”

Yesu Ri Ira Risu Iticwu-wu

27Yesu ri ama baa, “Ame ku yer anying utob tine. Ame u ri ana-m baa imi? Ame u nde tu ti m u jwam Itse-m baa, ‘Itse-m, sa rikaen na kiye wune ru uwog-m,’ amaa ayi si ikyaen rikaen yine né ame ru ba utense ike. 28Afu Itse-m, nde iken ti afu u tu rurob ukwe-fu atang.” Ti ritsen Rimam ri ira apupwen baa, “Ame tatso pu m rurob ukwe-m, ama ame u nde yi cwucwo.”

29Ande ti funn tsi atang fxen afxenjwin-wu, a ku ri baa, “Imam ti taen!” Ariki ri baa, “Iyee. Atom Rimam ti apupwen ti ri ira te wu!” 30Ama Yesu ri te ba baa, “Afxenjwin yi ti ri ira ne si-yi ikyaen na-m be, ayi si ikyaen-ni. 31Ayine ti si kiye ti a u pwen utense rikwen. Tine a u mbe ra ukwe na utense wune kujwo Shetann, u rwae wu ru ye. 32Ama kiye ti a ye ra m nwunn ritsen ame u shir ande meme ru ba yi uwog-m.” 33Awu ku ri ira yine ikyaen ti ande na nung itso iticwu ti awu u cwu.

34Ande ti funn atang ri te wu baa, “A bae uwae icwe-ti baa, Unde wu ti Rimam Tsab Tsi na u som kukunn ti unyang. Imi ti nde titawe afu ku ri baa, aba na u ye wu na nwunn ritsen u wen wu? Umbae Unde ti afu ri ne awu si aye?”

35Yesu ri te ba baa, “Uwog ti saen kyag u te ni ta tetso uwae kiye kpang ahan cwucwo. Kiye wune ti uwog ti saen kyag awune te ni ta tetso, ni kyang-ni ikyin-ni ti uwog ti saen paenine ti atang, ikyaen ti, unde ti ku kyang ikyin uwae kufub u ku nung-wu uwog ti awu ku ru yi atang be. 36Ame ku ri te ni, ru uwae kinjo uwog unde wu ti si Uwog ti Sisaen ti ti awu te ni ta tetso, ikyaen ti ani ama ā si uwog ti sisaen uwog ande iki.”

Ande ti Uwe Uten Pyir Ira Yesu

Isim ti Yesu ri mam ira yine awu nwunn u ru ka tam uwog ti ande na u tu-ba wu be. 37Ko ti awu nde wande tiyang ti tsotso uwe ande, aba ru-ba uwae kinjo uwog-wu be. 38Iken yine nde ikyaen ti ira ti Ishaya bae na ā ba kumunn. Awu ri baa,

“Itsekuru, aye ti ru kubenti

uwae ira ti ati ri?

Afu tso kuko ukwe-fu,

aye ti cwe?”

39Ande bane ru-ba uwae kinjo be, pangma ti awu Ishaya ri kyi cwucwo baa:

40“Rimam mbúb pu wu aba ayib,

u yirkyi pu wu aba utob

ikyaen ti aba ā sae tu-ba

uwog cwucwo be,

u kab ye-ba ira ti utob-ba be,

be aba u kafe ba uwog-m

ama ame ú nwangru ba

uwae kicaeb-ba.”

41Ishaya ri ira yine ikyaen ti, awu sae pu wu riyinn Yesu ama ri ira risu-wu.

42Ko ti ayi si ahan, ande ti uwe uten yang-ba akwen ru uwae kinjo uwog Yesu. Amaa ikyaen ti aba ku kyen ikyenricwu ande ti kumbub Farisi, a ri-ba ira iki risu-yi be. Aba ku kyen ricwu baa, a na u rwae ba rwae kusog Rimam. 43Aba ku sha ti ande na nda ba kuko skeb kuko ti ku ru uwog Rimam ba.

Yesu Ri Ira Risu Rikwen ti Pwen

44Uwog ne Yesu ya iskin baa, “Unde ti a ru uwae kinjo uwog-m, awu ru-wu nyang uwae Kinjo uwog-m be, awu ru uwae kinjo uwog awu ti tom m ba ama. 45Unde titini ti a nung m ti ayib, awu nung AWU ti tom me tom ba. 46Ame sang ba uwae utense ike ikyaen ti m u si uwog ti saen, ikyaen ti unde titini ti a ru uwae kinjo uwog-m awu na ā som-wu uwae kufub cwucwo be. 47Unde titini ti a fxen ira ti ame ku ri u putsa-wu ayi be, awu u sang uwae rikwen. I si-yi ame ti u pwen wu rikwen be. Ame sang ba-m utense ikyaen ti m na u pwen ande rikwen be, i si ikyaen ti m u nda ba unyang. 48Unde titini ti a pyir ira-m u pae mbe-wu ira ti ame ku ri te wu be, rikwen u ye wu. Ayi si ira ti ame ku ri te wu ti u ye wu usir ti ricwunnkyi. 49Ira yi ti ame ku ri, ame ku ri-m ayi ti risu-m be, i si awu Itse-m ti tom m ba, awu ti nda m ira ti ame ku ri. 50Ame nung pu m ama baa, ira ti Itse-m ri si iken ti ku nda ande unyang ti tsi kukunn. Ira ti ame ku ri si iken ti awu Itse ri te m baa, ame na ri.”

Currently Selected:

Yohana 12: kubNT

Highlight

Copy