Luka 11

Isaye kǝla moduwayen alamdu

(Mat 6.9-15; 7.7-12)

1Yim laa Isa na laan moduwa cǝde kerǝnniya, fuwurawanjuye falnja tiro: «Kǝma, andiro moduwa dio sakkarai, jiɍi Yahaya fuwurawanjuro cǝkkǝranadǝ gai,» yeno. 2Isaye tayiro: «Sa moduwa diwiya, ngai wullowo:

“Bawa, cunǝmbo daraja tio!

Nodonǝm bargaa iso!

3Yimbi yaye kǝmbonde sade.

4Biwunde gawursagane,

andi ye am biwu saddǝnadǝa gawurniye nangaro.

Bare kolsame jaraptiyende.”»

5Koro Isa walde tayiro: «Kamndo laa sawanjua duwon dǝrdu fannjuro leje tiro: “Sawa, burodi yakku tagarisǝgǝne. 6Kǝrmama sawani laa curo bǝlawuroyen duwon, nanin jǝpkeno, koro wu ye awima tiro yikke juwui bawo,” yenniya, 7sawanjudǝ curo fadodǝyen tiro: “Kolsǝne, bare suwolsǝmmi! Cinna ye jakkada, koro wu-a yallani-a ye boniyena. Rangǝkke cikke njikkiwawo,” cǝni wa? 8Nayiro wulnjagakki, nansawanja nangaro gǝni, dolero cije awo cǝraana sammaa ci. Dalilnjudǝ kamdǝ nangujǝnni tia cuworiya, cuwori nangaro.

9«Koro nayiro wulnjagakki, korowo njadi, manowo fanduwi, cinna bangowo kanjagai. 10Wundu duwon cuworimadǝro cadi, kam majimadǝ ye cuwandi, koro kam cinna bakcimadǝ yero kajagai. 11Bawa fi curondon tadanju tia buniro cuworiya, cujunjuro kadi cidǝ? 12Bi ngǝwullo cuworiya, kǝlanji cidǝ? 13Nayi diwidǝ awowa ngǝla tadawandoro njo nonuwwa, balle Bawa Mai Samema Ruhunjudǝmaa am tia caworiro juwajiyidǝ!» yeno.

Kǝnduwo Isaye ndaran isi?

(Mat 12.22-32; Mar 3.20-30)

14Yim laa Isa sedan kam laaa muwaro cǝdǝnaa duje kiluwunniya, kamdǝ mana badiyeno. Jamadǝ ajapkera, 15amma laaye: «Kǝnduwo Beljabul#11.15 Beljabul - Mai sedannaye tiro Yiwulis cani. mai sedannayen sedannaa duji,» yera. 16Laanja ye tia rijapturo alama laa sameye tayiro fǝlejuworo mayera.

17Amma Isa awo karwunjaye asuje tayiro: «Kǝrmai fi yaye kǝlanjuro yaktǝgǝnadǝ dǝgaiwawo, koro fado duwon kǝlanjuro yaktǝgǝnadǝ dǝgaiwawo. 18Wu sedannaa kǝnduwo Beljabullen dukki nuwwa. To, Yiwulis ye kǝlanjuro yaktiyia, ndayilan gǝle kǝrmainjudǝ dǝgai? 19Koro wudǝ kǝnduwo Beljabullen sedannaa dukkia, fuwurawando kǝnduwo wunduyen gǝle sedannaa dujai? Adǝmaro tayi sharawundoro waljai. 20Amma kǝnduwo Alayeman sedannaa dukkia, daji nodo bargaa Alaye nandoro isǝna, diye!

21«Kam dunoa mukkon baɍimia fannju gurejiya, kǝndanju samma kǝlewa. 22Amma kam laa tia dunon kojǝna ise tia lawalaje nasardiya, baɍiminju ardijǝnadǝa cǝmoye kǝndanju sammaa ngoje dagarji. 23Nonowo, kam wuro kǝldǝgǝnnidǝ lawalamani, koro kam wua banasiye rokko cammiyewawodǝ tarduma.

Waldu sedanne

(Mat 12.43-45)

24«Sedan kamlan culuwiya, leje curo karaa dǝɍiyen na naptuye maji, cuwandiwawodǝ, daji kǝlanjuro: “Nda fanni kollǝkkǝnadǝro waldǝkke,” cǝni. 25Waldiya, fadodǝa tas fǝraada ye, tassana ye najiyi. 26Daji leje sedan tulur gade tia niadiwin kojana capce cuwude ngasaane napcai. Adǝ nangaro naptu kam adǝyedǝ cayemaa kojǝnaro kuttaji,» yeno.

27Isa manaji ngai duwon, kamu laa curo jamadǝyen kowo sapce: «Bargaa kamu nia njambe kiam njinadǝ!» yeno. 28Isaye: «Attǝroa, barganja am mana Alaye fanjane jaanadǝ!» yeno.

Alama Nawi Yunusse

(Mat 12.38-42)

29Jamadǝ na Isayen cacaptai adǝgai duwon, Isaye: «Am jaman adǝye jauro diwi. Alama laa sameye majai, amma alama Nawi Yunusse gǝnia, alama fima tayiro fǝlediyiwawo. 30Jiɍi Nawi Yunus kuren am bǝrni Niniweyero alamaro waljǝnadǝ gai,#11.30 Nawi Yunus gai - Jiɍi Nawi Yunus kawu yakkuro curo buni mafǝndiyen dǝganadǝ gai, Isa ye nune kawu yakkuro kaminnju curo kauriyen dǝgai. Tada Kambedǝ ye am jaman adǝyero alamaro walji. 31Kiyama wakkajiya, Mai kamuye lardu Anǝmbedǝ cije am jaman adǝyedǝa jirenambuwuro shedaji, dalilnjudǝ ti ci duniayen cije na Mai Sulemanayero nanrashidunju fanduro isǝna nangaro. Akko awo laa Mai Sulemanaa kojǝna nadǝn mbeji. 32Kiyama wakkajiya, am bǝrni Niniweye ye cijane am jaman adǝyedǝa jirenambuwuro shedajai, dalilnjudǝ tayi mana Nawi Yunusse ngojane tuwa cadǝna nangaro. Akko awo laa Nawi Yunussa kojǝna nadǝn mbeji.

Misal fatǝla-a nurnju-aye

(Mat 5.15; 6.22-23)

33«Wunduma fatǝla wasse na turuiwawolan bi kǝmon tǝmjiwawo. Kam fatǝla wassiya, am ngasayidǝ nurdǝa caroro tia kǝla gǝnaduramnjuyen gǝnaji. 34Simmǝmdǝ, tima fatǝla tiyinǝmbe wo. Simmǝm ngaa, tiyinǝm samma ye nurraro walji. Amma simmǝm kuttua, tiyinǝm samma ye duwuaro walji. 35To, hangal gǝnane, bare nur nilan dǝganadǝ duwuro waljǝnniro! 36Tiyinǝmlan ndarama duwu bawo samma nurraa, alama fatǝla nurnjulan nia wasnjidǝ gai kǝrgam.»

Kuttunja Farisawa-a malǝmba Attauraye-a!

(Mat 23.1-36)

37Isa mana cǝdi ngai duwon, Farisa laa fannjuro tia masǝna dioro doyeno. Leje fadodǝro ngaye masǝnaro napkera. 38Farisadǝ kǝla Isa mukkonju tulje tayirro cǝdǝnnin masǝnaro napcǝnayen ajapkeno. 39Daji Kǝmaye tiro: «Nayi Farisawadǝ ngawo tasaye-a gǝmdowolombe-adǝa tulluwe tayirro kalanguwi, amma curondodǝ kare kambe luwaptu so, niadiwi solan cǝmbǝɍǝna. 40Nayi hangal kuttua! Ti ngawodǝa alakcǝnadǝ curodǝ yea alakcǝnni wa? 41Karwu tiloaro sadaa yowo, daji awiso nayiro tayirro walnjagai.

42«Kuttundo nayi Farisawa! Bulu kaskasi so, nana so, kǝɍijuwo samma solan#11.42 Bulu kaskasi so, nana so, kǝɍijuwo so - Jire dio so, Alaa rawo sodǝ, tayi jakka kaluyedǝa faidan kojana. jakka tuluwuwi, amma jire dio so, Alaa rawo soa kolluwwa. Tayidǝa kolluwwin awo ani yea dio wajimnjaana. 43Kuttundo nayi Farisawa! Dandallan napturam fuwuye-a kasuwulan lewa darajaa-a raawwa. 44Kuttundo, nayi alama kauri noduram bawoa#11.44 kauri noduram bawoa - Jiɍi kauri guwattudǝ amba tayir gǝniro kalakcidǝ gai, Farisawa-a adanja-adǝ ye amba na Alayen kuruwunno kalakcai. am nojannilan tia guwaccane kojaidǝ gai,» yeno.

45Malǝmba Attauraye falnjaye tiro: «Sayinna, adǝgai wullǝmiya, andi yea rasamma, diye!» yeno. 46Daji Isaye tiro: «Nayi ye kuttundo, malǝmba Attauraye! Katkun kurwowu dama bawo ambo gǝnagǝwi, amma nayi ngulondoma sanguwe tayia banagǝwwawo. 47Kuttundo! Kauriya nawiya kureye tanduwi, koro amwurawandodǝma tayia ceyeso! 48Ngainin awo amwurawando cadǝna sammaa kasadduwwaro shedanuwi, dalilnjudǝ tayi nawiyaa ceyesǝna, nayi ye kauriyanja tanduwwa! 49Adǝ nangaro nanrashidunjulan Alaye: “Nawiya-a kǝngayamba-a tayiro juwaakki. Laanjaa ceyesi, laanja yea basarjai,” cǝnna. 50Adǝma nangaro bu nawiya sammaye kawu dunia alaktǝnaman am jaman adǝyero cukkuri, 51bu duwon jaman Nawi Haabilayen tamiya har jaman Nawi Jakariya katte laya duwadurambe-a Fado Alaye-ayen bawojǝnadǝyero kudero samma fidǝnadǝ. Ai, nayiro wulnjagakki, kǝla am jaman adǝyemaro cukkuri. 52Kuttundo, malǝmba Attauraye! Cuwuram ilmuye ngonuwi. Nayi kǝlando ye ngawuwwi, koro am tia ngaworo majaidǝ yero dapkǝwwa.»

53Isa nadǝa kolyenniya, malǝmba Attauraye-a Farisawa-a tiro jauro gǝrgajagane koro kǝla awo ngǝwuyelan tia jǝkcane 54jawal mananjulan tia taye madu badiyera.

Currently Selected:

Luka 11: kby

Highlight

Copy