Markus 7

Tayir-a tayir gǝni-a

(Mat 15.1-20)

1Farisawa-a malǝmba Attauraye laa-a Jerujalemlan isane na Isayen capkadaranniya, 2fuwurawanju laa mukkonja tayir gǝni bǝri jawui kero, maananjudǝ mukkonja tuljanni. 3Wotte Farisawadǝ-a yaudiya samma-a ada amwurawanjayea jaane mukkonja kalkallo tuljannia, kǝmbo jawuiwawo. 4Kasuwulan isaiya, kasaldannia, kǝmbo jawuiwawo. Koro ada gade kada cadana cadi mbeji, gǝmdowolom so, tasa so, kulo so tulda gai. 5Daji Farisawa-a malǝmba Attauraye-aye Isaro: «Awiro fuwurawanǝmdǝ ada amwurawayedǝa koljane mukkonja tayir gǝnin kǝmbo jawuidǝ?» cane tia keworo. 6Isaye tayiro: «Nayi mǝnafǝkkaso, awo Kǝmande kuren ci Nawi Ishayayen kǝlandon wuljǝnadǝ jire, kitawulan ruwuwadadǝ gai. Tiye:

“Jama adǝ cilan wuro daraja sadi,

amma karwunjan nanin kuruwujana.

7De sullo wua ambǝnsagai,

alamdunjadǝ wada kambe,”#Ish 29.13 cǝnna.

8Wada Alaye kolluwe ada kambe gawwa.»

9Koro tayiro: «Fagat, wada Alaye wanuwe adando garo jauro nonuwwa! 10Kuren Nawi Musaye: “Bawanǝm-a yanǝm-aro daraja ye!”#NL 20.12; SK 5.16 koro “Kam duwon bawanju bi yanjua bassǝnamadǝ, tia roro ceyeso!”#NL 21.17; Lew 20.9 cǝnna. 11Amma nayiye: “Kam bawanju-a yanju-aro: ‘Awo nanin nuwandoro tǝmanuwwadǝa Alaro gǝnaakkǝna,’ cǝnia, 12bare gadero bawanju-a yanju-aro banajǝgǝnni,” nuwi. 13Adǝgaima adando tatarnuwe mana Alayedǝa bowuro kalakkew. Koro awo kada jiɍi adǝ gai diwi,» yeno.

14Daji Isa walde jamadǝa nanjuro bowoje tayiro: «Nayi samma fanowo, asunowo! 15Awima awo deyalan curo kambero ngaye kamdǝa tayir gǝniro cǝdima bawo, amma awowa curo kamben caluwidǝ, tayima kamdǝa tayir gǝniro cadi wo. 16[Kam sǝmonjuamadǝ fanjo!]» 17Isa jamadǝa kolje fadoro kǝrgaanniya, fuwurawanjudǝ kǝla misal adǝyen tia keworo. 18Isaye tayiro: «A! Nayi ye kǝla jakkadaa wa? Awi yaye deyalan curo kambero ngaanadǝ kamdǝa tayir gǝniro cǝdiwaworo nonuwwi wa? 19Dalilnjudǝ karwunjuro gǝni, curonjuro ngaye tiyinjuyen culuwi,» yeno. Adǝgainin kǝmbo samma halallo asuyeyeno. 20Isaye walde tayiro: «Awo curo kamben culuwidǝ, tima kamdǝa tayir gǝniro cǝdi wo. 21Dalilnjudǝ niadiwi so, jarawa so, nambarwu so, kam njejo so, 22kǝnjǝna so, mangar so, nankǝlado so, curoyindi so, nanjane so, nandǝɍi so, ngadar so, rokura so, hangalnambu so karwu kambedǝman caluwi. 23Awo diwi ani samma curo karwudǝyen caluwe kamdǝa tayir gǝniro cadi,» yeno.

Kamu lardu kǝrdiyaye ser Alaye fando

(Mat 15.21-28)

24Daji Isa cije nadǝa kolje lardu bǝrni Tirre-a Sidonne-ayero#7.24 lardu bǝrni Tirre-a Sidonne-aye - Lardu kǝrdiyaye. leyeno. Bare wunduma ti mbejiro asujǝnniro fado laaro kǝrgawo, amma gǝradunjudǝ yojǝnni. 25Kamu laa feronju kǝlayakku karuwaa lawar Isaye fangenniya, ise fuwunjun tungurumgeno. 26Kamudǝ lardu Gǝresse tia cidi Siri-Fenisiyelan kesambo. Daji Isa sedandǝa feronjulan dujoro tia ngǝwuro lowoyeno. 27Isaye tiro: «Kolle burwon yalla jawo kulja, kǝmbo yallayedǝa ngonǝme kǝrisoro njodǝ jussǝnni!» yenniya, 28kamudǝ tiro kalakciye: «Aaa, Kǝma. Adǝ yaye kǝrisodǝma kǝmbo yalla koljane cidiro cukkurunadǝa jawui,» yeno. 29Daji Isaye tiro: «Kǝla mananǝm adǝyen lene, sedandǝ feronǝmlan culuwuna,» yeno. 30Adǝgaima kamudǝ fadoro walladanniya, feronju kǝla dǝgǝllen bowada nayeyeno, koro sedandǝ tilan culuwuna.

Isaye kam muwa ye, kǝgǝnji ye isangaduwu

31Daji Isa lardu bǝrni Tirredǝa kolje cidi bǝrni Sidonneyen koje bǝrǝm Galileye cidi Bǝlamewudǝyero kadio. 32Nadǝn tiro kam laa muwa ye, kǝgǝnji ye cakkude Isaa lowojane mukkonju tiro gǝnajuwo yera. 33Isa kamdǝa dawu am captanayen sǝgǝriro kittuluwunniya, ngulondonju curo sǝmo yindi kamdǝyero cakke lallaɍi tǝwaje tǝlam kamdǝyea leyeno. 34Daji Isa kǝla samero sapce captiye sinje: «Efata!» yeno, maana efatayedǝ fǝrǝmdǝne. 35Sadǝman sǝmo kamdǝye fǝrǝmde, awo tǝlamnjuro mana dapcǝgǝna ye wuide, farakko manadu badiyeno. 36Isa amdǝro wada ce bare wundumaro wuljaganni yeno. Amma wada ce sapciyi yaye, cayemaa kojǝnaro manajaidǝma. 37Amdǝ jauro naa kojǝnaro ajapcane: «Awisoa kalkallo cǝdǝna, har muwasoa fanjairo cǝdi ye, kǝgǝnjisoa manajairo cǝdi ye!» cani.

Currently Selected:

Markus 7: kby

Highlight

Copy