MAK 10
10
I Jisas mo huhui huri na toga vilewahe
1Siu i Jisas mo siregi na vanue hi, ko mo vano lolo loloi venue ta Judia, ko lo tavalui wai Jodan. A sinobu ram vanai ram sone dalie taligu, ko nge mo huhuire mwere hi mo vai gesegi. 2Ira Varise lavasigi ram vonai lobena, ram vai lehe ram huie, ram veve vena, “U wa a Leo Hora mo siregi huri ve a tangaloi vin vilewahe den gahorana?” 3I Jisas mo duvi gorora mo veve vena, “?Hava Leo Hora hi i Mosis u bete lawe gimiu?” 4Ingere ram duvi goroe ram veve vena, “I Mosis u hora ve a tangaloi vin reve na revereve huri na togaana vilewahe, ko vin hora vohogi gahorana.” 5Nge i Jisas mo veve lawera vena, “I Mosis u reve na Leo Hora hi lawe gimiu a vevenagi a qatumiu rau siaga. 6Nge lo tauvuigi, lune God u teu na ure, u reve vena, ‘I God u teu na mwera ko a vavine. 7Giniehi, a tangaloi vin siregi tamana ko i retahine, ko mo bulu mei gahorana, 8ko ingere gairue roin voragi betugi gatagale.’ A vevenagi rohe gairue tea taligu, nge a betugi gatagale. 9Giniehi, irahine God u vilebubuginire, a tangaloi vin he vilewahe laire tea.”
10Lune ram vano taligu lolo vale, ira nona rorongtagi ram hui Jisas huri na gineu ngaha. 11Nge mo veve lawera vena, “Tare ve a mwera mo hora vohogi gahorana ko mo lagi mena vavine wagineu, nge mo galegaleasi goro horana; 12mwerehi vage, tare ve a vavine mo vilewahe den tamai netune ko mo lagi mena mwera wagineu, nge mo galegaleasi goro tamai netune.”
I Jisas mo vaigareaginire maresu wuwerigi
13A tangaloi lavasigi ram lai na maresu lawe Jisas vena tangolure, nge ira rorongtagi ram tara gorora. 14I Jisas mo leo, mo lolobute huri, ko mo veve lawera vena, “Nen siregi nire maresu ve ran vonai lobeku, ko nen mese vai gorora, huri a ute hi i God mo ratahigi lolona a nora sinobu hi rau mwere na maresu ingere ngaha. 15A hogo nam veve lawe gimiu vena, tare vi ihine he mwere na maresu biti tea vin he ahu lai tea vohogi lolo mwasoana garaqa hi i God mo ratahigi lolona.” 16Tau nge mo ragovi na maresu, mo tangovire, mo vaigareaginire.
A tangaloi mwerai homu
17Lune i Jisas mo dige taligu lo turegi, a tangaloi mo toa hurie, mo sisiqeu goroe, mo huie, mo veve vena, “?Huhui garea, nain vei mwerehilogo huri ve nain lei na mwasoana radu?” 18I Jisas mo veve lawea vena, “?Huri hava gineu gom wareau ve nau garea? Ihine tea he garea tea, nge i God hogosie. 19Gu ilo na Leo hora: ‘Goin mese ue tangaloi; goin mese vagasile lo vavine; goin mese balubelu; goin mese tawei vurogi; goin mese kalikeli; gon lado mavagi tamamu ko iratahimu.’ ” 20Nge mo duvi lawea mo vena, “Huhui, nau tabe na Leo hora ingere ngaha doluegi lo mahogi nau mwalakelo mo dadari hi bagataha. 21Ko i Jisas mo lehe gina domi tabetabe, mo veve lawea vena, “A gineu gatagale mo eno gohe vaie tea mosigei. Goin vano gon sogagi vohogi na nomu lalaie teri, gon bete na manegi lawera mahogi, ko goin haqe na nomu lalaie lo eulu; siu gon vanai, goin hurieu.” 22Lune nge mo rongo na leo ngaha, a nagona mo hivo, ko mo mule gina hahagavi, huri a nona lalaie u sao.
A lalaie mo voragi na vatu taturegi lawe na tangaloi
23I Jisas mo leo dalibulu gi na nona rorongtagi, mo veve lawera vena, “Ei, u gona garagara hurire tagi hako gineu ve rain ehu lolo mwasoana garaqa i God mo ratahigi lolona.” 24Ko ira rorongtagi ram awogi huri na nona leo, nge i Jisas mo veve taligu vena, “Ira netuku, u gona garagara huri ve ihine tea vin ehu lolo mwasoana garaqa God mo ratahigi lolona. 25U mwatamwasara huri ve a bulugi vin ehu turu na matai nitil dena tagi hako gineu ve vin ehu lolo mwasoana garaqa hi i God mo ratahigi lolona.” 26Nge ira rorongtagi ram garigi garagara, ram vui hui, huiginire gagatalegi vena, “?Nge siu ihine vin mwaso lai? 27I Jisas mo leo vano lure, mo veve vena, “A sinobu ran he vailei na gineu hi tea, nge i God u veilei. I God u veilei na gineu doluegi.”
28Siu i Bita mo laqa lawe Jisas vena, “Leo, gamai gau siregi na nomai lalaie doluegi ko gam hurigo.” 29I Jisas mo veve vena, “A hogo, nam veve lawe gimiu ve, ihine tea vin siregi na valena sige ire tuana, sige ire haqena, sige i retahine, sige tamana, ko ire netune, sige a talune a vevenagi ineu ko a Roro Garea, 30Ingeie vin lei vin liu lolo taro ngaha, vin lei na togagi venue vin liu den vudolue, ko ire tuana ko ire haqena ko ire retahine ko ire netune a talune, ko mena vai gagarasigo vage, ko lolo ure vin vonai nge vin lei na mwasoana radu. 31Nge ingere rau sao hi ram tomue rain tu tagu, ko ingere ram tu tagu rain tomue.”
I Jisas mo veve vagatoligi huri na nona mateana
32Lune i Jisas meire nona rorongtagi ram huri na turegi mo hage Jerusalem. I Jisas mo vano tomue denire ko a nona rorongtagi ram garigi garagara; ko a sinobu ram vutugegi esi, irahine ram huri lo tagune ram matagu. Taligu i Jisas mo lai beraginire hangavulu domwagi gairue, mo tauvuigi mo laqagi lawera huri na gineu ve rain vei lawea. 33I Jisas mo veve vena, “Leo, dam hage Jerusalem, ko rain lei i Netui Tangaloi lawera muei rugurugu ko ira huhui talo Leo Hora noi Mosis. Rain vevegi vagamatea ko rain sireginie lawera haroharo. 34Ko ingere rain sovue, rain lodosie, rain telie ko rain vei vagamatea. Ko lo bongi gaitoligi nge vin maraga taligu.”
A leo navunevu noi Jemis ko i Jon
35Siu i Jemis ko i Jon, ira netui Sebedi, rom vanai lobei Jisas, rom veve vena, “Huhui, gamaru goro mo tarani huri ve gon vai lawe gamaru a hava gineu gori nevu denigo.” 36I Jisas mo huire vena, “Nerum tarani ve nain vei na hava gineu lawe gimiru?” 37Rom duvi lawea vena, “Lune goin toga lo nomu tanoi togatoga ratahigi lolo ute roroa hi gom ratahigi lolona, gon siregi ve gori toga gatagale lo matuemu ko tuegi lo mawirimu.” 38I Jisas mo veve lawera vena, “Nero he ilo tea huri na hava gineu nerum navu denieu. ?Wa neri inu lei lolo laha ineu nain inu lolona? ?Sige neri leilei na garuhigogona vin garuhigogonagieu ginie?” 39Ngere rom duvi lawea vena, “Gori vei lei.” I Jisas mo veve lawera vena, “A hogo, gimiru neri inu laha hi ineu nain inue, ko neri lei na garuhigogona hi vin garuhigogonagieu ginie. 40Nge hatie noku ve nain leowahe ve ihine vin toga lo matueku sige lo mawiriku, nge God hogosie ve vin bete lawe rahine hi u vei vagatai hurire.”
Mo eno ve ira tomtomuegi rain voragi tangaloi tabanagi
41Lune ira rorongtagi hangavulu ram rong huri na gineu ngaha, ram tauvuigi ram lologagasigi Jemis ko i Jon. 42Siu i Jisas mo warera vonai lobena, mo veve lawera vena, “Igimiu neu ilo huri ve a sinobu ingere hi hatie duvi Israel a nora tomtomuegi lure. Igimiu neu ilo ve a tomtomuegi ngerehi ram rongarea huri ram haharagi na nora huireana lo ului nora sinobu, ko ira tomtomuegi lalawua ram vosangi ve ingere ram hakovi na huireana doluegi. 43Nge ngaha vin he mwerehi tea mei gimiu. Nge ihine tea mei gimiu mo tarani ve vin lawua, nge vin voragi na nomiu tangaloi lalakogi; 44ko ihine tea mei gimiu mo tarani ve vin tomue, nge vin voragi na tangaloi tabanagi lawe gimiu doluegi. 45Huri i Netui Tangaloi sibona he vonai tea ve rain tabana lawea, nge ve vin tabana ko vin siregi na mwasoana gi gaivolire tangaloi saosao.”
I Jisas u vagamwasoi na matadodo i Batimeas
46Ingere ram vonai Jeriko. Lune i Jisas mo siregi na vanue hi meire nona rorongtagi ko a sinobu lawua, a tangaloi matadodo, Batimeas, netui Timeas, mo toga lo mwararai turegi mo navunevu. 47Lune nge mo rongo ve i Jisas ta Nasaret, nge mo tauvuigi mo ulo vena, “Jisas, Netui Devet, gon hagavieu!” 48A sinobu u sao ram gato goroe vena toga rorongo. Nge mo ulo siaga den tomue vena, “Netui Devet, gon hagavieu!” 49I Jisas mo labe, mo veve vena, “Nen warea.” Siu ram ware na matadodo hi ram veve lawea vena, “Gon mese romasi! Maraga, nge mo warego.” 50Ko inge mo tuli vohogi na luqana, mo maraga siseri, mo vonai lobei Jisas. 51I Jisas mo huie vena, “Gom taranieu ve nain vei na hava gineu lawego?” A matadodo hi mo duvi vena, “Huhui, nam tarani ve nain leo taligu.” 52I Jisas mo veve lawea vena, “Gon vano, nomu ladohogo mo vagamwasoigo.” Ko siserigi nge mo leo taligu, ko mo huri Jisas lo turegi.
Currently Selected:
MAK 10: HNT
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific, 2013
