Piancilna 44
44
Van Sungah Ngunhai
1Tu-in Joseph in a innsung ukpa hih bangin a hihsak hi: "Hih mite amau puak zawh zahzah guan inla, a van gonguah a nguntang uh koih ciat in. 2 Tua ciangin ka hai, ngunhai pen, a an lei nading nguntang tawh a nau tum pen van gongah koihsak in," ci hi. Amah in Joseph gen bangin a hih hi.
3 Zingsang khuavak ciangin tua mite a laate uh tawh paikhia uh hi.#Pc 42:25 4 Khuapi pan gamla a tun ma un Joseph in a innsung ukpa kiangah, "Tua mite nungdelh pak inla, na phak ciangin amaute kiangah, ‘Bang hangin a hoih, a hoih lo-a thuk na hi uh hiam? 5 Hih hai, ka pu in tuidawnna le aisanna-a zong a zat hai hi lo hiam? A hoih loin na gamta zo uh hi,’ va ci in," a ci hi.
6 Amah in amaute a phak ciangin amaute kiangah hih teng mah a gen hi. 7 Ahi hangin amaute in ama kiangah, "Bang hangin ka topa un tua bangin hong ci na hiam? Na nasemte tua bangin gamta buang lawmlawm ding ka hi uh hiam? 8 Canaan gam panin ka vangong ua ka muh uh nguntang nangawn hong puak kik buang hi lo ka hi uh hiam? Tua ahi ciangin na pu’ inn sunga kham le ngunte bang dinga gu zawzen ding ka hi uh hiam? 9 Ko na nasemte lakah tua a kimuhna penin sihna thuak henla ko adang teng na sila in kong om ding uh hi," ci uh hi.#Pc 31:32; 42:25
10 Amah in, "Hoih mahmah hi, na cih bangun hita hen, tua a kimuhna pen ka sila suak dinga, no adang teng mawh na baang kei ding uh hi," ci hi.
11 A van ciat uh lei-ah nga uh a manlang in a hong uh hi. 12 Tua ciangin nasempa in a upa pen van panin pana, a nautum pen van a nunun pen hi. Tua ciangin Benjamin van sungah hai kimukhia hi. 13 Tua ciangin a puan uh balkek uh hi. Tua ciangin a vekun a laate uh van suan uh a, khuapi lamah kileh kik uh hi.#Pc 37:29; Ms 14:6
14 Judah le a sanggamte a lut uh ciangin Joseph a innah na om lai a, amai-ah leilak a kidenna uh hi. 15 Joseph in amaute kiangah, "Bang hanga hici gamtat na hi uh hiam? Kei bang mi in tua bangte aisanin ka theih ding lam thei lo na hi uh hiam?" ci hi.#tg 5; Pc 37:7,10
16 Judah in, "Ka topa aw, bang gen thei ding ka hi uh hiam? Mawhpeng ka hina uh bangci lah ding ka hi uh hiam? Pasian in na nasemte khialhna a lakkhia zo hi. Kote - kote mahmah le hai kimuhna pa tu-in ka topa’ sila ka hi uh hi," ci-in dawng hi.#tg 9
17 Ahi hangin Joseph in, "Tua bang hi mawkmawk lo e! Hai kimuhna pa bek kei sila a suak ding hi. No adang teng na pa uh kiangah lungnuamtakin ciah kik un," ci hi.
18 Tua ciangin Judah ama kiangah paito in, "Ka topa aw, nong hehpihna-in na nasempa in ka topa tungah kam khat kong gen ding hi. Pharaoh mahmah tawh na kikim hi. Ahi zongin na nasempa tungah hong heh peuhmah kei in. 19 Ka topa in na nasemte nong donga, ‘Pa ahi zongin sanggam ahi zongin na nei uh hiam?’ nong ci hi. 20 Kote in, ‘Pa tek khat ka nei uh a, a tek nunga a neih tapa khat a om hi. A sanggampa si zo-in, a nu tapa lakah amah bek hi-a, a pa in amah a it hi,’ kong ci uh hi.
21 "Tua ciangin na nasemte kiangah, "Kei mahmah muh dingin hong tonpih suk dih un,’ nong ci hi. 22 Tua ciangin kote in, ‘Naupang in a pa nusia thei lo hi; nusia leh a pa si ding hi," kong ci uh hi. 23 Ahi hangin nang na nasemte kiangah, "Na nautum pen uh nong tonpih kei uh leh ka mai na mu kei ding uh hi,’ nong ci hi. 24 Ka pa kiangah na nasemte ka ciah kik uh ciangin ka topa in nong gen bangin ama kiangah ka gen uh hi.
25 "Tua ciangin ka pa un, ‘Pai-in an tawm va lei beh lai un,’ hong ci hi. 26 Ahi hangin, ‘Paisuk thei kei nung. Ka nautum pen uh ka tonpih uh leh ka pai bek ding uh hi. Ka nautum pen un ko hong zuih kei leh tua mipa’ mai ka mu kei ding uh hi,’ ka ci uh hi.
27 "Na nasempa’ pa in kote kiangah, ka zi in kei tawh tapa nih a nei hi. 28 A khat penin kei hong nusia zo-a, "Amah kibalzan khin zo hi," ka ci hi. Tua-a kipan amah ka mu nawn kei hi. 29 Hih pen zong kei kiang pan paikhiatpih in, ama tungah siatna khatpeuh piang kha leh ka lukang han a#44.29 Hebrew ah Sheol tg. 31 ah zong sungah dahna tawh na tun kha ding uh hi,’ hong ci hi.#Pc 37:33; 42:38; 46:19
30 "Tua ahi ciangin tu-in naupang ka tonpih kei uh leh na nasempa ka pa uh kiang ka tun ciangin ka pa uh hinna, naupang hinna tungah kinga phadiak ahi manin 31 naupang mu kei leh amah si ding hi. Na nasemte in ka pa uh lukang dahna tawh hanah ka paipih uh kul ding hi. 32 Na nasempa in naupang bittaka ka pa kianga tut ding ka kham a’ ‘Amah nang kiang kong tunpih kik kei leh ka nuntak sung tawntung na mai-ah mawhsakna ka thuak ding hi!’ ka ci hi.#Pc 43:9; 1Sa 18:1
33 "Tua ahi ciangin tu-in nong hehpihna-in ka topa sila in naupang tangin kei hong omsak inla naupang a sanggamte tawh ciahsak in. 34 Naupang tonpih loin ka pa kiangah bangci pai theih ding ka hiam? Hi thei lo hi! Ka pa tunga piang dahna hong musak kei in," ci hi.
Currently Selected:
Piancilna 44: ZIV
Highlight
Share
Copy
Want to have your highlights saved across all your devices? Sign up or sign in
Copyright 1994 Myanmar Center for World Mission
