Лука 1
1
Лукайи Феафилас ликӀиная
1Гьал ппараттар алучӀуная ахъакьас че мисаъ хьуна, ккеттушу курарихъас. 2Час ге курарикес хабарди аяфе Аллагьдин гаф файде инсанарикес, ге курар чиппин уларилди ке цӀае кӀилиас мич агуна. 3Зунна кьастт акьуная, кӀилди ке удигьас ягӀар акьуна, садпеттилас мич вас ликӀенас, хӀуьлматлу Феафил, 4вас агурай пуна, те вас ягӀар акьунаттар дуз идеф.
Малайикди Захарияйис акьуна идже хабар, пайгъамбар ЯхӀъя хасе пуна
5Ягьудея агъа дерейин хӀавелдиъ Ирод агъа паччагь ая вахттуни, ахьуная тисаъ ешемиш вей Захария агъа са малла, Абияйин инсанарикес. Захарияйин хьир хьуная Арунан тухумдиас, агъай хьуная гис Элизаветта. 6Ӏудара Аллагьдин юлайиъ ая инсанар хьуная гебур, дузди аркьай кӀилди Аллагьди пунаттара, ликӀинаттара. 7Элизаветта шиниккв кидаф идехӀела, шиникквар хъахьуна адава гебурихъ. Ӏудара хӀа яшариъ ахьуная гебур.
8Захарияйихъай ая маллабурин нубатиъ ай вахтт хъучадиная чиппил але фарз акьас Аллагьдис. 9Маллабурин арайиъ ая гӀедатилди, ихьуная кӀур. Захарияйис агъдиная ге кӀур: батӀар ниъ хъая шамар кикӀас Аллагьдин хулаъ. 10Ги Аллагьдин хулаъ батӀар ниъ хъая шамар кикӀа вахттуни, кӀилди халкь гъузуна ахьуная хӀеятиъ дуьгӀебур аркьай.
11Гисаъ, шамар кикӀа усан хӀурджал багулихъ, малайик гъузуна агуная Захарияйис. 12Малайик агуф, фиркьайчира дагӀай, гучӀ хьуна гъузуная Захария. 13Малайикди пуная гис:
– ГучӀ мева, Захария, ве дуьгӀе унихьуная. Хьира ве Элизаветтайи хасе вас кӀиркӀ, вун алихьуна кканхьасе гил ттур ЯхӀъя. 14Вас ппара хӀа шадвел гъасе ги, ацӀунттар шад хьасе ге хегуна. 15Аллагьдин улиъ ахьасе ге зурба инсан суман, ухай ахьасттава ги я чехир, я джуьре ухаттар, Аллагьдин РуьхӀ ахьасе гихъай уч хуру ягъанилас мич. 16Ппараттар Ӏизраилдин халкьдигӀас алдаркас акьасе ги Аллагьдилди. 17Ге вей ахьасе Аллагьдин удигь, пайгъамбар Илйайин суман руьхӀна кьуват хъай, ги дадарин юркӀвар дахъасе шиниккварис, ги дава рекъуьъ аяттар дуз рекъуьъ ихьасе, ги хӀезур акьасе халкь Аллагьдил юркӀв алиянас.
18Захарияйи хабар гъушуная малайикдифас:
– Фиштти ягӀархьасе зас ле дуз идеф? Зун гьал Ӏуьссеф э, хьира зе джигьилф дава.
19Малайикди пуная гис:
– Зун Джабрагьил э, зун Аллагьдин удигь гъузунаф э. Ли зун гьикунафе вас гьеме пас, вас идже хабар акьас. 20Зун вас пеф аларкьвасе учин вахттуни, амма агьал вун Ӏебаб хьасе, зе чӀаларихъ хъудугъухӀела. Вун Ӏебаб хьуна гъургъас девей ахьасе джалла зун петтар аларкьвасттегьен.
21Халкь гъузуна ахьуная Захарияйихъ, муьхӀтал хьуна, фас гин кьана хьефегьан агъай аттес Аллагьдин хулаас. 22Захария аттиная, амма гъургъас вей хьуна адава гифас. Гебур гъавурдиъ архьуная Аллагьдин хулаъ гис фиичира агвар акьуф. Ӏебаб хьуна, инсанарихъай ишаратарилди гъургъай хьуная ге. 23Аллагьдин хулаъ кар ккиркӀуна, ушуная ге учин хулади.
24Са чӀукь вахттунилас гин хьир Элизаветта хьуная фуниъ. ГӀифу ваз хьасттегьен уч фуниъ аяф джин аркьай, ги агъай хьуная: 25Аллагьди йинаф э зас ме, Учи амур акьугуна, заалас инсанарин чӀаларин къакъ алттивуна.
Малайикди акьуная идже хабар, Ӏиса хасе пуна
26Ерхьидпе ваз хьегуна Элизаветта фуни ай, Аллагьди гьикуная малайик Джабрагьил Галилея дерейин Назарет агъа хӀуриди, 27Юсуф агъа инсандис хъаттийина са рушалди. Юсуф хьуная Давудан тухумдиас. Ге рушас агъай хьуная Майрам. 28Малайикди адина пуная Майрамас:
– Салам! Шад ухь, Аллагьдин иджвеликк кичархьуна дишагьли! Аллагь ая вахъай.
29Майрам муьхӀтал хьуная ге чӀаларил, ги фикир аркьай хьуная, фас гишттин салам ефегьан агъай малайикди.
30Малайикди пуная гис:
– ГучӀ мева, Майрам! Вун Аллагьдин иджвеликк кичархьуная. 31Вун фуни хьуна, хасе вас кӀиркӀ, алихьасе вун гил ттур Ӏиса. 32Зурба хьасе Ге, Гис Аллагьдин КӀиркӀ агъай ахьасе. Аллагьди Гис есе Гин дадарин, Давудан тахтт. 33Ги гьемишанди паччагьвел аркьай ахьасе Якьубан халкьдил, Гин Паччагьвелдин ахир хьасттава.
34Майрама пуная малайикдис:
– Зун шувас душунагуна, Фиштти э ле вереф?!
35Малайикди джуваб йиная:
– Аллагьдин РуьхӀ аладесе ваалди, Аллагьдин кьуватра архьасе ваъ, дехӀела, вас хуру гирами#1:35 Гирами – святой. шиникквдис, Аллагьдин КӀиркӀ агъай ахьасе. 36Тагьа Элизаветтара, ве багунф, шиниккв кидаваф э агъаф, фуниъ ая учин хӀа яшариъ ай магьа ерхьидпе ваз э, кӀиркӀ э тинфра. 37Аллагьдифас агъдарукьаф фера афттава.
38Майрама пуная:
– Зун Аллагьдин гъиликк ккеяфе. КӀилди гьеле вун пегъилди хьурай. Хуппай малайик ушуная гигьас.
Майрам ушуная Элизаветайилди
39Са чӀукь гагьдилас Майрам тегӀди кей ушуная Ягьудеяйин сувари ая хӀуриди. 40Адина Захарияйин хулади, салам йиная ги Элизаветтайис. 41Майраман салам унихьугуна, Элизаветтайин фуниъ тӀушуная шиниккв. Аллагьдин РуьхӀ архьуная Элизаветтайиъ. 42Элизаветтайи гьавайикес гъургъуна пуная:
– Вун хумбаригӀас, Аллагьдин иджвел але дишагьли! Аллагьдин иджвел алдея ве шиникквдилла! 43Зун фуше, заалди зе ХӀаттин баб адесттегьен? 44Ве джил зе ибурихъди ахъадегуна, шиниккв ишине зе гӀанаъ шад хьуна. 45Бахттлу э Аллагьдихъ хъугъу дишагьли, Аллагьди гис педегьенттар аларкьвасе.
46Майрама пуная:
– Шукур аркьая зе руьхӀди Аллагьдис,
47Бахилдея зе руьхӀ Аллагьдил, зун УхӀуттил,
48заал, учин лукӀул, ул алчихьухӀела, Ли зун хӀисабикк акьуна.
Магьа гьалдихъас хаб бахттлу агъай ахьасе зас кӀилди джилилас алавередегьен инсанари,
49зас хӀа зурба иджвел акьухӀела Гуджлуйи. Лин Ттур – гирами э!
50Лин иджвел алдея дуьнйайилас алавередегьен инсанарил, Лигьас гучӀаттарил.
51Ли дагъуна Учин гуджлу гъил, далгъванас акьуне дамакъар кеяттар, кӀилди гебурин фикирара хъай.
52Кьуват хъаяттар алайкуна тахттарилас, Ли кегъдивуне уджуз акьунаттар,
53гашила аяттарис Ли иджвелар йине, девлетлубур фера фадавай гьикуне.
54Адине кумакис Ӏизраилдис, учин лукӀус, кӀвал хьуна
55иджвел акьасе пуна гаф йинаеф хье дадарис, Ибригьимасра гин халкьдисра гьемишанди.
56Са хьибу вазала дегьен Элизаветтайихъай экьуна, хаб адиная Майрам учин хулади.
Хуная пайгъамбар ЯхӀъя
57Вахтт хъучадегуна, хуная Элизаветтайис кӀиркӀ. 58Элизаветтайис Аллагьди йина иджвелихъас унихьугуна, Элизаветтайин къуншибура, багунттара шад хьуная.
59Муядпе ягъа адиная гебур шиникквдин суннат акьас, ттура алихьас кканхьуная шиникквдил, учин дадас агъаф суман, Захария. 60Баб рази хьуна адава:
– Ваъ, гил алихьасе ЯхӀъя, – пуная баба.
61– Ве тухумди фушра лишттин ттур алеф адава! – пуная гебури Элизаветтайис.
62Ишаратарилди хабар гъушуная шиникквдин дадафас, ттур фуш алихьас кканде вас пуна.
63Захарияйи, нан пуна тахтта, ликӀиная: «Гин ттур ЯхӀъя э». Джалла муьхӀтал хьуная. 64Гьеге сеӀетти чӀал агьадиная Захарияйин, учифас гъургъас хьегъилди, шукур акьуная ги Аллагьдис. 65Джаллабурис гучӀ хьуная. КӀилди Ягьудеяйин сувариъ Ӏаре гьеге Ӏеламатихъас хьуная ахттилат аяф. 66КӀилдибури, гихъас унихьуттари, хияликк кичушуна, агъай хьуная чаб чиппикди: «Фуш хьасегьан ге шиникквдикес?» ХӀекьданди, Аллагьдин гъил алхьуная ге шиникквдил.
Захарияйи учин кӀиркӀахъас пуна гаф
67Шиникквдин дад, Захария, Аллагьдин РуьхӀ архьуна, гъургъуная пайгъамбар суман:
68– Шукур хьурай Аллагьдис, Аллагь адина Учин Ӏизраилдин халкьдилди азадвел йине Учин халкьдис.
69-70Дагь заманайилас мич Учин пайгъамбарарилас хабар акьуна, хьес пунаф суман, Ли гьикуне Учин лукӀ Давудан тухумдиас, Кьудратлу хьин УхӀаф.
71Ли хьин ухӀасе хье душманариккесра, кӀилди хьяъ хъел аттариккесра.
72Ли гаф йинафи, иджвелар акьасе пуна хье дадарис, юркӀуралла атасе пуна Учин гирами китабиъ ликӀина,
73Хье дад Ибригьимас йина гаф, хьин душманарин гъиликкес Учи ккеттивасе пуна.
74Сайигьасра дагучӀай, хьин Лин лукӀвел аркьай ахьасе,
75ХӀекьди Гирами хьас Лин удигь кӀилди хье Ӏуьмурди.
76Вас, зе шиниккв, агъай ахьасе Аллагьдин пайгъамбар, вун Аллагьдин удигь ушуна кканеф идехӀела, Гис рекъ хӀезур акьас.
77ЯгӀар акьас Гин халкьдис, чве гунагьарилас гъил гъушуна, чун Аллагьди ухӀасе пуна.
78Аллагьди, Учин кканевелдина иджевелди, гьикасе хьес заварин нур,
79мучӀаъ ешемиш вей, Ӏеджаликк ккеяттарис, хьес маслихӀетин рекъ агвар акьас.
80БицӀи ЯхӀъя хӀа вей, фагьумра ппара хьуная. Ге ешемиш вей ахьуная къумариъ, учин вахтт хъучадесттегьен Ӏизраилдин халкьдигьди айчӀвас.
Currently Selected:
Лука 1: AGU
Highlight
Share
Copy
Want to have your highlights saved across all your devices? Sign up or sign in
© Библия тарджума аркьа институт, Москва, 2005
