Лука 20

Гьина э Ӏисайис хӀавел йинаф?

1Са ягъа, Ӏиса Аллагьдин хулаъ аягуна, халкьдис иджвелин хабар аркьай, Ӏисайигьди гьучадина хӀа маллабур, Ӏелимар, хӀа къуджабур, 2пуная Ӏисайис:

– Уп час, гьинан хӀавел фай аркьаеттар э Вун ле курар, гьина э Вас ле хӀавел йинаф?

3Ӏисайи гебурис пуная:

– Зун чвасра са суал алихьасе, чун Зас джуваб тин. 4ЯхӀъяйис хьеттигӀ гӀучӀуна гӀайчӀва гӀедат акьас гьина э хӀавел йинаф? Аллагьди эв хъара инсанари?

5Гебури фикир акьуна, чаб чиппигӀди пуная:

– Нагагь хьин «Аллагьди э» пичин, хьефас Ӏисайи хабар гъушанасе: «Фас чун пайгъамбардихъ хъугъундава?» 6Нагагь хьин пичин «инсанари», кӀилди халкьди хьес гъвандинф акьасе, чиппис хӀекьди ягӀахӀела ЯхӀъя пайгъамбар хьунаф. 7Гебури джуваб йиная, чиппис ягӀайдава пуна, гьина ичин ге гӀедат акьас хӀавел йинаф.

8Ӏисайи гебурис пуная:

– Давайчин Зун чвасра пасттава гьинан хӀавел фай ичин Зун мебур аркьаяф.

Мисала багъдихъанарихъас

9Хаб Ӏисайи ахъакьуная ме мисала:

– Узуная са инсанди тӀибитӀин багъ. Йина ге тӀибитӀарин багъра багъдихъанарилди, уч ушуная ме са хубджи вахттунисттегьен варха мукьварихъди. 10Вахтт хъучадегуна, багъдин эесси гьикуная учин лукӀ багъдихъанарилди багъдилас алттархьу учин пай гъас. Багъдихъанари йирхӀуна, фера дайина гьикуная лукӀ. 11Багъдин эесси гьикуная учин Ӏудпе лукӀ. Багъдихъанари йирхӀуна, келхъуьна, фера дайина, ге лукӀра гьикуная. 12Хьибудпе лукӀ гьикуная ги. Ге лукӀусра йирхӀуна, адикуна гьикуная гебури. 13Гегуна багъдин эесси пуная: «Фиркьагьан зун? Нан гва Зун зе юркӀв але кӀиркӀ гьикас, белекин, гис хӀуьлмат акьасе тебури». 14Эессин кӀиркӀ агугуна багъдихъанари чаб чиппигӀди пуная: «Ме эессин кӀиркӀ э, див хьин ме кӀес, мин дадан девлет хьес хьас». 15БагъдигӀас гӀаттфайшуна, кӀиная гебури ге. Фикьасе гебурис багъдин эесси? 16Эесси адина кӀесе ге багъдихъанар, багъ есе сасрабурилди.

– Аллагьди адатурай лишттин курар хьас! – пуная Ӏисайил юркӀв алийина инсанари.

17Ӏисайи гебурихъ хъуттурфуна, пуная:

– Фи э ме ликӀина гафарин мегӀна?: «Усттабури хӀисабикк ккидавай фадихьу гъвандикес, мурттуъ ихьа гъван хьуне». 18Ге гъвандил алирхӀуф чурхъвасе, ге гъвандикк кичархьуф, ругӀасе.

19ХӀа маллабурисна Ӏелимарис гьеге сеӀетти фацуна кӀес кканди ахьуная Ӏиса, гебур гъавурдиъ архьуная ге мисала чиппис файдинаф идеф. Амма халкьдигьас гучӀай, гебурифас кирхӀас хьуна адава Ӏисайик.

Паччагьдис ирцӀан налукихъас

20Гебури гьикуная Ӏисайил алгъузанас чиппин фитначибур. Ге фитначибур чаб иджи агвар аркьай, алгъузуна ахьуная Ӏисайин сивиас фи гаф аттархьайчугас, хаб хӀекимарис шикат акьуна, Ӏиса суттис ес. 21Гебури пуная Ӏисайис:

– МегӀелим, час ягӀа Ве гафара Вун ягӀар аркьаттара хӀекь идеф. Час ягӀа Вун сайинна хъуьсу дафарцанф, Вун инсанарис Аллагьдин рекъуьъ вес ягӀар акьа. 22Уп час, чин Римдин паччагьдис йина ккандев налук, хъара кканду?

23Ӏисайи, гебурин гӀифритвеларин гъавурдиъ архьуна, пуная гебурис:

24– Агваракь Зас ле манат. Гьинан ишкилна ттур э ле манатик кеяф?

– Римдин паччагьдин, – пуная гебури.

25Ӏисайи пуная гебурис:

– Айчин, паччагьдинф фачи паччагьдис, Аллагьдинф – Аллагьдис.

26Халкьдин удигь дава гафунил фацанас хьуна адава гебурифас Ӏиса. Ӏисайин джувабил муьхӀтал хьуна, буӀуная гебур.

КӀеттарик джан керхьубахъас

27Ӏисайигьди гьучадиная садуккеярикес са Ӏу инсанар. Садуккеяр хъугъай хьуна адава кӀе инсанарик джан керхьа пуна. Ге садуккеяри хабар гъушуная Ӏисайифас:

28– МегӀелим, Мусайи хьес ликӀиная, нагагь гьинан хьунара чу кӀехаб шиникквар хъудавай, гин хьир акьуна кканде сасра ччуччу, кӀе ччуччунттар хӀисаб акьуна хуна хӀа акьас шиникквар. 29Ахьуная ери чу. Садпе чу, хьирра акьуна, шиникквар хъудавай кӀиная. 30Ӏудпе ччуччу акьуная ге кӀе ччуччун хьир. Шиникквара хъудавай Ӏудпе чура кӀиная. 31Хаб хьибудпе ччуччу акьуная ге хьир, шиникквара хъудавай, ге чура кӀиная. Гьегиштти еридар чуппар кӀиная, са шиникквра дахьуна. 32Джаллабурин кьабахъай ге хьирра кӀиная. 33КӀина инсанарик джан керхьу ягъа, нае ччуччун хьир хӀисаб акьасе ге, ге хьир еридар ччуппарис ушуна адавуйив?

34Ӏисайи пуная гебурис:

– Ме дуьнйайин инсанари э хумбар аркьаф, шуварис вереф. 35Хаб вере дуьнйайи кӀинаттаригӀас ккидиркӀва Ӏуьмур есе лайикьлу инсанарис. Ге инсанари я хумбар аркьай ахьасттава, я шуварис вей ахьасттава. 36Гебур Ӏеджал хъудаваттар хьасе, малайикар суман. КӀинаттаригӀас Аллагьди гебурик джан кихьухӀела, гебур Аллагьдин шиникквар э. 37КӀе инсанарик хекьданди джан керхьа пуна Мусайира пуная, учис агуна зазарин тӀурухъас ахъаркьагуна. Сес унихьуная Мусайис: «Зун Ибригьиман Аллагь э, ИсхӀекьан Аллагь э, Якьубан Аллагь э», – агъай. 38КӀина инсанар, Аллагьдис садра кӀина адава. Джаллабурин руьхӀер аме.

39ӀелимаригӀас са Ӏудари пуная:

– МегӀелим, идже джуваб йине Вун гебурис.

40Гебурифас сара фиттихъасра хабар гъушанас вей хьуна адава Ӏисайифас.

Гьинан кӀиркӀ э Месигь?

41Ӏисайи гебурис пуная:

– Фиштти агъагьан инсанари Месигь Давудан кӀиркӀ э пуна?

42Учи Давуда Забуриъ агъая: «Аллагьди зе ХӀаттис пуная: Вун экьве Зе хӀуьрджал багулихъди, 43Зун Ве душманар Ве лекарикк ккерхьас акьасттегьен». 44Давуда Гис ХӀаф агъагуна, фиштти э Месигь Давудан кӀиркӀ вереф?

ЭхӀттият акье Ӏелимаригьас

45КӀилди халкьди Ӏисайил юркӀв алийинагуна, Ӏисайи Учин ученикарис пуная:

46– ЭхӀттият акье ирхе кунара аликӀуна ккируцас ккане Ӏелимаригьас. Гебурис кканве чаб гимил хӀуьлматилди кьабул аркьагуна; гебурис кканве дуьгӀебур хура хулариъ удигь ке идже мукьвариъ экьвас, шадвел ая хулариъра, ке хӀуьлматин мукьвариъ экьвас. 47Ӏелимари ашкӀин хумбарис Ӏемалар аркьай гебурин хулар Ӏелде, хаб инсанарис чаб иджи агвас, ацӀуна дуьгӀебур хура. Гишттин Ӏелимарин ппара хӀа диван акьасе.

Currently Selected:

Лука 20: AGU

Highlight

Copy