Ляхнар 1
1
Иса чӀиви хьуваликан
1Йиз сабпи китабдиъ, Феофил, узу Исайи гъапӀу вари ляхнар ва улупу аьгъювалар ктитунза, 2Дугъан уьмур, Дугъу Чан ученикарикан ктагъу вакилариз Гирами Рюгьналантина насигьятар тувну, Учв аьршариз удучӀвайиз, лап эвелиан хъюгъну улупунза. 3Учв дукӀну чӀиви гъахьихъантинара, Иса швнубсабан дурарин улихьна гъюри гъахьну ва Дугъу, Учв чӀиви хьувал усбат апӀури, хайлин шагьидвалар улупну. Учв чӀиви гъахьихъантина ягъчӀвур йигъандин арайиъ Чан вакилариз ачмиш шули, Дугъу дурариз Аллагьдин Паччагьлугъдикан ктибтури гъахьну.
Иса аьршариз удучӀвуб
4Саб ражари, вакиларихъди уьлихъ хъайи вахтна, Исайи дурариз амур апӀуру:
– Ерусалим мидипанай, хъа Адашди тувурза гъапибдиз ккилигури гъузай, фицики Дугъу, учвуз Узкан гъеебхьубси, гьамци дупна: 5«Ягьʼяйи инсанар штуан апӀури гъахьну, хъа учву багарихьди Гирами Рюгьниинди цӀийи алаидичву».
6Хъасин дурар вари сабишвʼина уч гъашиган, вакилари Исайихьан гьерхнийи:
– Я Агъа! Уву гьамус Израилиз паччагьлугъвал дебккрадарнахъа?
7Исайи дурариз жаваб тувру:
– Адашди Чан гьюкмиъ тӀаънайи вахтарна муддатар аьгъю хьувал ичв ляхин дар. 8Гирами Рюгь учвʼина гъафиган, кьувватну ацӀдичву ва Йиз шагьидар, сифте Ерусалимдиъ хъа вари Ягьудияна Самария уьлкйириъ, ва гьацира тап дюнʼяйин тмуну кӀулизкьан, хьидичва.
Иса аьршариз за хьуб
9Гьамци дупну, Иса, дурариз рякъюри, аьршариз за гъахьну ва дифру Думу дурарихьан ккеркру. 10Дурар дикъатниинди завариз лигури имиди, дурарин улихьна лизи ккурттар али кьюр жви ачмиш шулу. 11Дурари гъапну: «Галилей уьлкейин агьалйир! Завариз лигури, мушвʼин гьаз дийигъначва? Учвуз, Думу фици аьршариз за гъахьнуш, гъяркъюнчвуз. Ва гьадму Иса, учвуз аьршариз за шули гъяркъиганси, кьяляхъра гъиди».
12Хъасин вакилар шагьрихьан саб километр манзилиъ айи Елион дагъдилан Ерусалимдиз хътаркуру. 13Чпи дергнайишваз дуфну, дурар заан хулаз удучӀвуру. Душваъ Петр, Югьан, Якьубна Андрей, Филипна Фома, Варфолемейна Матта, Алфейин бай Якьуб, Женгчи кӀуру лакӀам хъайи Симон ва Якьубдин бай Ягьуда айи. 14Дурар вари сатӀиди ккарагурайи. Дурарихъди Исайин дада Марʼям, Дугъан чвйир ва гьацира сакьюр дишагьлйир хъайи.
Вакил ктагъуб
15Сакьюд йигълан Исайихъ хъугънайидар сабишвʼина уч шулу (душваъ вари варжна къар касдихьнакьан айи). Петри, ученикарин арайиъ дийигъну, кӀуру:
16-17– Эй йиз гъардшар! Гирами китабариъ Гирами Рюгьну Давудрин мелзналан дупнайиб улубкьну ккунду: ухьухъди зегьмет дизигнайи, ухькан сар вуйи Ягьудайи, Иса дисуз ккеънайидар хъади гъиди, дибикӀна. (18Ягьудайи Иса масу тувну гъибису пулихъ хутӀил гъадабгъну. Думу душвʼин кӀулихъди алдакну гъакӀну ва дугъан айитӀишвар чӀатна адахьну. 19Му ляхин Ерусалимдиъ яшамиш шулайидариз варидариз аьгъю шулу ва му хутӀлиз жугьуд чӀалниинди Акелдама кӀуру, яна «Ифдин хутӀил»). 20Мяълийирин китабдиъ мидин гьякьнаан гьамци дибикӀна:
«Дугъан жил ичӀи ибшри,
душвʼин фужкӀа яшамиш даришри». Ва хъанара:
«Дугъан йишв
жара касди бисри».
21-22Гьаддиз ухьу Иса чӀиви хьувалин шагьид гъаши сар жара кас кадагъну ккунду. Думура, Ягьʼяйи адмийир штуан апӀуз хъюгъю вахтналан ккебгъну, Иса, ухьухъди хъади гъаши вахтра кади, тап аьршариз удучӀвайизкьан, гьарган ухьухъди гъашир духьну ккунду.
23Хъа дурари кьюр кас улупуру: Варсава вая Юст кӀури шлу Юсуф ва Матта. 24Хъасин вакилари ккарагури гъапнийи:
– Я Агъа, Увуз гьар касдин кӀваъ айиб аьгъявуз. Гьаму кьюрикан Уву фуж ктагъуруш, 25яна учв гъягъюз лайикь гъахьи йишваз гъушу Ягьуда гьадахъу вакилвал шли гъабхуруш, учуз улуп.
26Хъа дурари тупут ипу, ва Аллагьдин амриинди думу Маттайиз удубчӀву. Гьамци Маттайикан, миди вуйи йицӀисариканси, Исайин вакил шулу.
Currently Selected:
Ляхнар 1: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
