Ляхнар 2
2
Аьршариан Гирами Рюгь гъюб
1ХьуцӀдарин машквраз вари Исайин вакилар сабишвʼина уч гъахьнийи. 2Сабпну завариан тӀурфансиб микӀлан сес шулу ва вакилар айи хал абцӀру. 3Дурарин улихьна цӀин мелзарстар гъядахьну, жара шули, гьаруриина саб алабхъуру. 4Хъа вари Гирами Рюгьнахъди ацӀру, ва жара чӀалариинди улхуз хъюгъру, фицики гьаци хьувал дурариз Гирами Рюгьну бахш гъапӀнийи.
5Гьадму вахтна Ерусалимдиъ дюнʼяйин жюрбежюр юрдариан вуйи динагьли жугьдар яшамиш шулайи. 6Гьадму сес гъабшиган, дурар уч шулу ва гизаф мюгьтал шулу, гьаз гъапиш вакиларикан гьарсар дурариз чан чӀалниинди улхурайиси гьибгърайи.
7Вари гьяйран ва аьламат духьнайи:
– Мегер гьаму улхурайи касар вари Галилейин агьалйир вуйин? – кӀури, чиб-чпин арайиъ гьерхрайи. – 8Дици вуш, ухьуз дурар ихь бабан чӀалариинди улхурайиси гьаз гьибгърайкӀан? 9Ихь арайиъ Парфияйин, Мидияйин, Эламдин ва Месопотамияйин, Ягьудияйин, Каппадокияйин, Понтайин ва Асияйин агьалйирра айихь, 10Фригияйинна Памфилияйин, Египетдин ва Киринеяйиз багахь юрдариан ва Римдин агьалйирра, 11гьацира Критдин, Аравияйин агьалйирра, жугьдарра, дин кьабул гъапӀу аллагьсузарра айихь – вушра ухьуз варидариз Аллагьдин зурба ляхнарикан дурари ихь багъри чӀалариинди ктитурайиганси ебхьурахьуз.
12Гьамци вари гьяйран духьнайи ва, дубхьнайибдин гъавриъ адрахъди, «Му фу ляхин вуйкӀан?» кӀури, чиб-чпигъ гьерхрайи. 13Хъа бязидари кялхъбахъди: «Дурари гизаф чяхир дубхънайи гьял ву», – кӀурайи.
14Гьадмуган Петри, йицӀисаридра хъади гъудужвну, халкьдихьинди илдицну, кӀуру:
– Эй жугьдар ва Ерусалимдиъ яшамиш шулайи вари агьалйир! Узу учву му ляхнин гъаври тӀаъдиза. Йиз гафарихъ дикъатлуди хъебехъай! 15Учву фикир апӀурайиси, учу пиянди адарча, фицики гьеле гвачӀниндин сяаьт урчӀвубтӀан дар. 16Хъа учву гъурхуб Яил пайгъамбрилантина дибикӀнайиб ву:
17«Гьаци хьибди аьхиримжи йигъари, –
кӀура Аллагьди, –
Узу Йиз Рюгь вари инсанариина улурзидиза.
Ичв баярина шубари
аьяндар гафар пиди
ва ичв живанариз аьламатнан рякъбар рякъиди,
хъа ичв кьабидариз
фагьумлу нивкӀар рякъиди.
18Ав, гьадму йигъари Узу Йиз Рюгь
Йиз лукӀариина:
гьам жилариина, гьамсана хпариина улурзидиза,
ва дурарира хьуз ккайиб улихьмиди кӀури хьиди.
19Узу завариин ва жилариин
гьамцдар аьламатнан лишнар:
ифи, цӀа ва кумран дифар – улупидиза.
20Ригъ – мучӀу,
хъа ваз ифиси уьру хьибди,
Агъайин зурба ва адлу йигъ улубкьайиз.
21Агъайин ччвур дибисну ккарагу
гьарсар кас уьрхиди».
22Эй Израилин агьалйир! Гьаму йиз гафарихъ хъебехъай: Назаретдиан вуйи Исайихь Аллагьдин гьюкум хьайи. Аллагьди Чан гьюкум Гьадгъуантина гъапӀу аьламатнан, аьжайиб ва зурба ляхнариинди улупну. Му учвузра аьгъячвуз, фицики гьадму ляхнар ичв улихь гъашидар ву. 23Аллагьди улупнайиганси Тувнайир учву, кьумариинди хачрак карсну, къанунсузарин хилариинди гъакӀунчва. 24Хъа Аллагьди, аьжалин кьюкьяр дармадагъин дапӀну, Думу чӀиви гъапӀну, фицики Думу аьжалихьан дерккуз гъабхьундайи.
25Фицики Давудри Исайикан гьамци кӀура:
«Узуз Агъа гьарган йиз улихь хьади рякъюразуз.
Дугъу, йиз арччул хилихъ дийигъну,
узу уьрхюрайи.
26Мидʼин йиз юкӀв шад гъабхьну,
йиз мелзну гьарган Яв тяриф апӀура.
Йиз беденра кмиди архаинвалиъ а,
ва узу умуд ктабтӀурадарза,
27фицики Уву йиз рюгь жегьеннемдиъ гъидрибтарва
ва Яв Марцци Кас накьвдиъ утӀуз гъитидарва.
28Уву узуз уьмрин рякъ ачухъ гъапӀунва,
Уву йиз улихь хьайивали узу шадвали ацӀди».
29Эй йиз чвйир! Узхьан учвуз ихь абйирин аба Давудрин гьякьнаан саб шак адарди пуз шулзухьан: думу гъакӀну ва думу киву накьв гъийин йигъазкьан имихьухь. 30Учв пайгъамбар вуди хьпаз дилигну, дугъаз, учв али тахтниина чан насларикан сар дитуз Аллагьди аьгьт дапӀнайиваликан аьгъяйи.
31Дугъаз Месигь гъачӀихъан чӀиви шлубдиканра аьгъяди гъабхьну, фицики дугъу гьамци кӀура:
«Месигь гъийихдарин паччагьлугъдиъра гъитдар,
ва Дугъан беденра накьвдиъ убтӀидар».
32Аллагьди гьадму Иса чӀиви гъапӀну, ва учу вари мидин шагьидар вуча.
33Гьамус Думу аьршариин Аллагьдин арччул хилихъ деъна. Дугъу Адашдихьан тувурза дупнайи Гирами Рюгь кьабул гъапӀну ва Гьадму, учвуз рябкъюрайиси ва ебхьурайиси, учʼин улурзну.
34Давуд аьршариз за гъапӀундаршра, дугъу гьамци дупна: «Агъайи йиз Агъайиз гъапну: 35„Сабан Узу Яв душмнар Яв ликарикк дахьайизкьан, Йиз арччул хилихъ деъ“».
36Гьаци вуйиган, аьгъю йибхьайки, эй Израилин халкь, Исайикан Аллагьди Агъа ва Месигь гъапӀну, хъа учву Думу кьумариинди хачрак карсунчва!
37Му гафар гъеерхьиган, дурарин лап кӀваз тясир гъапӀнийи ва Петризна миди вуйи вакилариз дурари гьамци гъапнийи:
– Хъа учу гьамус гьапӀча, гъардшар?
38Петри дурариз кӀуруки:
– Ичв гунгьар гардандиъ дидисну, уьмур дигиш апӀинай. Ва ичв гунгьарилан хил алдабгъбан бадали, гьарсар кас Месигь Исайин ччвурнахъан штуан йихьай: гьадмуган учвуз Гирами Рюгь пешкеш хьиди. 39Му, учвузси, ичв веледаризра, сабан Аллагьдихьан ярхла вуйидаризра, Агъа Аллагьди, Чахьна дих дапӀнайидаризра кади, тувнайи гаф ву.
40Петри «аьрбатанди яшамиш шулайидарихьан ихтият йихьай» кӀури ва хъана жара гизаф гафариинди дурариз ихтият хьуз дих апӀури гъахьну.
Хъугънайидарин яшайиш
41Дугъан гафар кьабул гъапӀдар штуан гъахьнийи; хъа гьадму йигъан хъугънайидарин кьадар шубуд агъзур кас шулу. 42Дурари, гьаммишан вакиларин аьгъюваларихъ хъпехъури, чпин арайиъ сюгьбатар гъахури, сатӀиди ипӀури ва ккарагури, чпин вахт адапӀури шуйи.
43Аллагьдихьан варидариз гучӀуйи, ва Аллагьди вакиларилантина дурариз аьхючӀвеъ аьламатар ва аьжайиб лишнар улупнийи.
44Хъугънайидар вари сатӀиди гъузнайи, ва вариб дурарин уртахъди вуйи. 45Дурари чпин мал-мулк масу туври ва дарвал кайидариз пай апӀури гъахьну. 46Дурар гьар йигъан Аллагьдин хулаз уч шуйи ва уьлра кмиди чпин хулариъ сатӀиди ипӀуйи, сари-сариз разивалиинди хураг гьиври, шадди яшамиш шуйи. 47Гьацира дурари, Аллагьдин тяриф апӀури, вари халкь чпихъди ужуди хьубʼин шадвал хъапӀри гъахьну. Ва гьар йигъан, Аллагьдихъ хъугънайидарихьна, гунгьариккан азад гъаши касар артухъ шуйи.
Currently Selected:
Ляхнар 2: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
