Ляхнар 3
3
Петри ликур сагъ апӀуб
1Сабан Петрна Югьан лисхъан, сяаьт шубуб шулайиган, ккарагуз Аллагьдин хулаз гъягъюрайи. 2Дурариз учв бабкан гъашихъанмина ликар ккурсуз даршлу сар ликур рякъюру. Думу, чан дустари хури, гьар йигъан Аллагьдин хулан «Уччву урнарихъ» кӀурушвахь дитри шуйи. Дугъу дина гъюрудариз садакьа ча кӀури шуйи.
3Дугъу, Аллагьдин хулан урнарихьна гъафи Петрна Югьан дяркъну, дурариз садакьа ча кӀуру. 4Дурар дугъаз дикъатниинди лигуру ва Петри кӀуру:
– Учухьинди лиг.
5Думура, чаз фукӀа тувур кӀури, дурарихьинди лигуру. 6Амма Петри дугъаз гъапи:
– Узухь арс, ясана гъизил хьтарзухь, хъа узуз айиб тувдизавуз: Назаретдиан вуйи Месигь Исайин гьюкмиинди кӀураза: гъудужвну гъарах!
7Гьамци дупну, Петри, дугъан арччулну хил дибисну, дугъаз за хьуз кюмек апӀуру. 8Гьадмуган ликурин ликар мюгькам шулу ва думу гъедергну лицуз хъюгъру. Хъасин думу, ергури ва Аллагьдин тярифар апӀури, дурарихъди Аллагьдин хулаъ учӀвру. 9Варидариз думу, фици Аллагьдин тярифар апӀури гъягъюраш, рякъюру ва 10думу, садакьа ча кӀури, «Уччву урнарихъ» деъну шлу ликур вуйиб аьгъю шулу. Дугъан ликар сагъ хьувалиин адмийир русвагь духьнайи.
Сулеймандин айвандихъ Петрин улхуб
11Гьадму ликар сагъ гъаши кас Петрихьанна Югьандихьан гьудудучӀври гъахьнийи, хъа гьаму арайиъ мюгьтал духьнайи вари халкь Сулеймандин айван кӀурушвахь дурарихьна уч хьуз хъюгъру. 12Му гьял дябкъну, Петри кӀуру:
– Израилин агьалйир, мидʼин гьаз аьламат духьначва? Гьаз учву учуз, му касдин ликар ич кьувватниинди ва ужувлиинди сагъ дапӀнайиси, лигурачва? 13Му Аллагьди гъапӀуб ву: Ибрагьимдин, Исакьдин ва Якьубдин Аллагьди, ихь абйирин Аллагьди Чан Гъараваш Иса адлу гъапӀну. Хъа учву Думу йикӀуз гъитунчва ва, Пилатдиз Думу азад апӀуз ккун гъабшиган, Думу нигь гъапӀунчва. 14Марцци ва Гьякьлу вуйи Кас нигь дапӀну, адми гъачӀи гъачагъ азад апӀувал тӀалаб гъапӀунчва. 15Учву уьмур Туврайир гъакӀунчва. Ари Гьадму Аллагьди, гъачӀихъан, чӀиви гъапӀну, ва учу мидин шагьидар вуча. 16Му кас Исайин кьувватниинди сагъ духьнайир ву, фицики учу Исайин кьувватнахъ хъугънача. Учвуз гьаму кас аьгъячвуз ва Исайихьан вуйи хъугъували думу сагъ апӀувал магьа гъябкъюнчвуз!
17Амма узуз аьгъязузки, йиз чвйир, му ляхнар ичв аьхюдаризси учвузра аьгъдарди хьувалиан гъапӀдар вуйичв. 18Аллагьди чан пайгъамбрарин мелзналан Месигьдин аьзабарикан улихьмиди гъапну ва гьаци гъапӀнура ву. 19Гьаци вуйиган, ичв тахсрар гардандиъ дисай ва, ичв гунгьарилан хил алдабгъбан бадали, Агъайихьинди илтӀикай. 20Гьадмуган Агъайи учвуз шадвалар тувиди ва учвухьна гьязур духьнайи Иса Месигь гьаъди.
21Думу аьршариин Аллагьди Чан марцци пайгъамбрарин мелзналан дупнайи вари ляхнар тамам апӀайизкьан гъузди. 22Фицики Муса пайгъамбри дупна: «Ичв Аллагь вуйи Агъайи ичв чвйирин арайиан, узуси, Пайгъамбар адаиди. Дугъу учвуз фу гъапишра, тамам апӀинай. 23Ва гьадму Пайгъамбрихъ хъпебехъу гьарсар кас Аллагьдин халкьдин арайиан адаиди ва терг апӀиди». 24Ав, Шамуил пайгъамбрилан ккебгъну, дугъхъанмина гъахьи вари пайгъамбрари гьамцдар йигъар улуркьбакан улихьмиди кӀури гъахьну. 25Пайгъамбрари улихьмиди дупнайи йикьрар, Аллагьди ичв абйирихъди гъийитӀдар, учвуз дурукьна. Аллагьди Ибрагьимдиз гъапнуки: «Яв тумралантина дюнʼяйин вари инсанариз ужувлар хьиди». 26Аллагьди сифте учвухьна, ичв чӀуру рякъяриан адаъну, учвуз ужувлар хьпан бадали, Чав чӀиви гъапӀу Чан Гъараваш Иса гьаъна.
Currently Selected:
Ляхнар 3: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
