Ляхнар 7
7
Стефандин улхуб
1Гьадмуган жугьдарин аьхюну маллайи гьерхру:
– Му гафар гьякь вуйин?
2Стефанди жаваб тувру:
– Хъебехъай, чвйир ва абйир! Ихь аба Ибрагьимдиз, гьеле чав Харрандиъ бин апӀайиз улихьна, яна учв Месопотамияйиъ яшамиш шулайи девриъ, кьудратлу Аллагь ачмиш гъахьну 3ва гьамци гъапну: «Яв багъри юрд ва яв багахьлуйир гъитну, Узу улупу уьлкейиз гъарах». 4Ибрагьимдира, халдеялуйирин уьлке дипну, Харрандиъ бин гъапӀну. Дугъан адаш кечмиш гъашихъан, Аллагьди Ибрагьим гьамусяаьтди учву яшамиш шулайи уьлкейиз гъюз гъитну. 5Аллагьди дугъаз ирс вуди жилин саб чӀукӀкьан тувундар, амма думуган Ибрагьимдиз веледар адайишра, гележегдиъ дугъазна дугъан веледариз жил тувуз гаф тувру. 6Аллагьди дугъаз гъапну: «Яв веледар яд ругариина гъафи гъурабйир хьиди ва дурар юкьудварж йисан лукӀарди аьзабнакк ва зулмикк ккади гъузди. 7Дурар лукӀариз илтӀикӀу халкьдин узу диван апӀидиза, ва дурари, гьадму юрд дипну, гьамина дуфну, гьаму ругдиин Узуз икрам апӀиди». 8Аллагьди, Ибрагьимдихъди йикьрар йибтӀбан лишан вуди, суннат апӀбан аьдат дугъаз багъиш гъапӀну. Гьаддиз лигну, Ибрагьимдикан Исакьдин адаш гъашиган, дугъу миржидпи йигъан Исакьдин суннат гъапӀну. Исакьдикан Якьубдин адаш гъашиган, дугъура гьаци Якьубдин суннат гъапӀну, дидхъантина Якьубди чан баяринна суннат гъапӀну, хъа дурарикан гележегдиъ йицӀикьюб сихлин ата-бабйир гъахьну.
9Дурари, чпин чве Юсуфдиин бахил духьну, думу Египет уьлкейиз йисирвализ масу тувру. Хъа думу Аллагьдин кӀваин илмиди гъахьну. 10Аллагьди думу вари завалариккан уьрхюру, дугъаз зурба фагьумлувал ва Египетдин паччагь дугъахьна ужуди янашмиш хьувал тувру. Паччагьди дугъкан вари Египетдин ва чан хусуси хулан гьякимдар гъапӀнийи. 11Египетдиъна Ханаан юрднаъ гашʼвал абхъру, ва вари агьалйир зурба аьзабарикк ккуркьру. Ихь абйириз ипӀруб дибрихъри гъабхьну. 12Египетдиъ уьл а, кӀури деебхьну, Якьубди дина ихь абйир гьаънийи. Му дурари Египетдиз гъапӀу сабпи сиягьят вуйи. 13Дурар гьадина кьюбпи ражари гъушиган, Юсуф чан чвйириз ачмиш шулу, ва Египетдин паччагьдиз Юсуфдин тухум аьгъю шулу. 14Хъа Юсуфди чан адаш ва вари багахьлуйир хъади гъюз адми гьаъру. Дурар вари ургцӀурна хьур кас вуйи. 15Якьуб Египетдиз гъюру ва ихь абйир душваъ чпин аьжал хъубкьайиз яшамиш шулу. 16ГъачӀихъан, дурарин майтар багъри юрднаъ айи Сихем кӀуру шагьриз духну, Ибрагьимди Хаморин баярихьан арсрахъ гъадабгъу накьвдиъ ивру.
17Аллагьди Ибрагьимдиз тувнайи гаф тамам апӀру вахт багахь хьубахъ, Египетдиъ айи жугьдарин кьадар гъюблан-гъюбаз артухъ шули гъабхьну. 18Аьхириъ Египетдин тахтниина, Юсуф аьгъдру жара паччагь гъафнийи.
19Дугъу ихь халкь аьмал кади ишлетмиш гъапӀну ва ихь абйириз гужар тувну. Дурарин бицӀидар, пуч хьубан бадали, чӀурариз гатӀахьуз мажбур апӀури гъахьну. 20Гьадму вахтна Муса бабкан шулу. Думу Аллагьдиз кьабул шлу бай гъахьну. Думу шубуб вазли чан адашдин хулаъ дадайин мухрихъ шулу, 21хъа думу гатӀахьиган, паччагьдин шуру гъадагъуру ва чахь, чан байси, тербияламиш апӀуру. 22Мусайиз Египетлуйирин гьадмугандин илмар аьгъю гъахьну. Думу улхбариъ дилавар, ляхнариъ бажаранлу кас вуди гъахьну.
23Мусайин ягъчӀвур йис гъабхьиган, гъардашлугъ жугьдариин улукьуз дугъан кӀваз гъюру. 24Чан гъардшарикан сарик Египетдин агьали кялхъради ва дугъаз йивуради дяркъну, дугъхъанди духьну, Мусайи египетлу йивну йикӀуру.
25Мусайи, чан халкьдиз чалантина Аллагьди азадвал гьапӀрайивалин дурар гъаври ахъуршул пну, фикир гъапӀнийи, амма дурар гъаври ахъундайи. 26Хъайигъан дугъаз хабарсузди чиб-чпик кархьнайи кьюр жугьуд рякъюру ва дугъаз дурар, гьамци кӀури, мясляаьтнахъна хуз ккун шулу: «Эй инсанар, учву гъардшар вучва, гьаз учву сари-сариз гиран ктапӀурачва?» 27Амма чан багахьлуйиз гиран ктапӀурайири, Мусайиз хъизигну, кӀуру: «Уву ич аьхюрди ва диванбегиди шли дерккунву? 28Накь Египетлуси, узура йивну йикӀуз ккунди ануз?» 29Му гафар гъеерхьиган, Муса Египетдиан гьергну, Мадиам юрднаъ гъурабайиси чаз бин ккебгъру. Душваъ дугъаз кьюр байра шулу.
30ЯгъчӀвур йис улдучӀвхъан, ичӀи чюлиъ Синай дагъдиин дугъаз чан улихь убгурайи зазун рукчин ялавнягъ малайик рякъюру. 31Му гъяркъю Муса мюгьтал шулу. Хъа ужуди тамаши апӀбан бадали рукчиз багахь хьуз хъюгъиган, дугъаз Агъа Аллагьдин сес ебхьуру: 32«Узу яв абйирин Аллагь, Ибрагьимдин Аллагь, Исакьдин Аллагь ва Якьубдин Аллагь вуза!» ГучӀбаан гукӀни духьнайи Муса рукчиз лигуз даршули гъахьну. 33Гьадмуган Агъайи дугъаз кӀуру: «Яв ликарилан илдит, фицики уву дийигънайишв Аллагьдиз гирами жил ву. 34Узуз Египетдиъ Йиз халкьдиз зулмар апӀуради рябкъюразуз, дурарин сузйирин агьузар ерхьуразуз ва дурар азад апӀуз жилиина кудучӀвназа. Гьаци вуйиган, Узу уву хъана Египетдиз гьаъразаву».
35«Уву ич аьхюрди ва диванбегиди шли дерккну» пну, жугьдари нигь гъапӀур гьадму Муса ву. Убгурайи зазун рукчигъ Аллагьдин малайик гъяркъю, Аллагьди малайикдилантина жугьдарин гьякимдарди ва азад апӀрурди гьаурра гьадму Муса ву. 36ЯгъчӀвур йисан Египет жилариин Уьру гьюлихъ ва ичӀи чюлиъ аьламатар ва аьжайиб лишнар улупури, дурар Египетдиан адаурра гьадму Муса ву. 37Израилин баяриз: «Ичв Агъа Аллагьди учвухьна ичв чвйирин арайиан, узуси, Пайгъамбар гьаъди» гъапирра гьадму Муса ву. 38ИчӀи чюлиъ уч гъашиган, Израилин халкьдихъ хъайир, чахъди Синай дагъдиин малайик гъулхур, чӀиви гафар кьабул гъапӀур, дурар ухьухьна рукьуз гъитур, ихь абйирихъди хъади гъаширра гьадму Муса ву. 39Ихь абйириз дугъахъ хъебехъну хьуз ккун гъабхьундар, думу нигь дапӀну, Египетдиз хътакуз ккун гъабхьну. 40Дурари Гьарундиз гъапну: «Ухьу дина хъади гъягъюз ухьуз идолар кадаъ, фицики ухьу Египетдиан адау Мусайихъди фу гъабхьнуш, аьгъдархьуз». 41Гьадмуган дурари идол вуди кӀарисиб кадапӀну, дидиз гъурбнар хури ва чпи гъапӀубдикан шадлугъар апӀури гъахьну. 42Аллагьди дурарихьан маш гьадабгъуру, ва дурари завун идолариз гъурбнар хури икрамар апӀуру. Пайгъамбрарин Китабдиъ гьамци дибикӀнайиси гъабхьну:
«Израилин халкь!
ЯгъчӀвур йисан ичӀи чюлиъ
урккру ва ургру гъурбнар
учву Узуз хури гъахьунчвахъа?
43Ваъ, учву икрам апӀбан бадали,
учвухьди Молохдин чадур,
ичв Ремфан-идолин хяд,
ичв ктау идолар гъахури гъахьунчва.
Гьаддиз лигну, Узу учву
Вавилон сяргьятарилан тина гьаъдиза».
44Ихь абйири, ичӀи чюлиъ лицурайи вахтна, йикьрарнан гирами Чадур гъабхури гъахьну. Думу Чадур Мусайи, Аллагьди чаз улупу чешнейиинди гъапӀну. 45Ихь абйири Гъисайин хиликкди чпин абйирилан гъурубкьу гьадму чадур гъабхури гъахьну. Дурари, Аллагьди улихьди жара халкьар ултӀуркку жил гъибисну. Гьамци Давудрин йигъар улукьайиз гъабхьнийи. 46Давуд Аллагьдиз ккунир гъахьну. Думу, Якьубдин Аллагьдиз хал дивбан бадали, ккарагну.
47Хъа Агъайиз хал Сулейманди дивру. 48Анжагъ ВаритӀанзаанур хилариинди диву дараматариъ яшамиш шлур дар, фицики, пайгъамбри дупнайиганси:
49«Аьршар Йиз тахт вуйиз,
хъа жил – Йиз ликарин кӀан.
Фициб хал Узуз дивуз шулчвухьан? –
кӀура Агъайи, –
Ясана Йиз эргвал йивру йишв наан а?
50Му вари Узу яратмиш гъапӀуб даринхъа?»
51Эй, Аллагьдиз юкӀвар бахш апӀуз ва Дугъахъ хъпехъуз даккни фурсачйир! Учву гьарган Гирами Рюгьназ къаршу удучӀвурачва, учву ичв абйирсдар вучва. 52Ичв абйири пайгъамбрарикан фуж утӀурккундар? Дурари Гьякьлур гъюваликан улихьмиди хабар гъапӀу пайгъамбрарра гъийихну, гьамус гьадму Гьякьлур учву масу тувну гъакӀунчва! 53Аллагьдин малайикари учвуз туву Къанундиз мютӀюгъ гъахьундарчва.
Стефан йикӀуб
54Му гафарихъ хъпехъурайи жугьдарин гьякимдрари хъюлу ургури, силбари жакьракьар апӀурайи. 55Гирами Рюгьнахъди ацӀнайи Стефан завузди лигуру, ва дугъаз Аллагьдин гьяйбатна Дугъан арччулну хилихъ дийигънайи Иса рякъюру. 56Дугъу кӀуру:
– Магьа, узуз атӀарццнайи аьршарна Аллагьдин арччул терефнаъ Инсаниятдин Бай рякъюразуз.
57Гьякимдрари чӀигъар апӀури, чпин ибариъ тӀубар урччву. Хъасин дугъʼин алархьу. 58Дурари, Стефан шагьрин гъирагъдихъна духну, дугъʼин гъван уьлюбхюз хъюгъру. КучӀлин шагьидари Саул кӀуру сар жигьилихь чпин палтар уьрхюз гъитнийи. 59Дурари Стефандиин гъван уьлюбхнайиган, Стефанди ккарагури гъапи:
– Я Агъа Иса! Йиз рюгь кьабул апӀин!
60Хъасин кьамкьариина ис духьну, зарбди чӀигъ апӀуру:
– Я Агъа! Дурарин гьаму гунгьилан хил алдабгъ!
Гьамци дупну, дугъан нефес улдубтӀуру.
Currently Selected:
Ляхнар 7: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
