Ляхнар 8
8
Саул хъугънайидарихъ хъерхуб
1Стефан йикӀбиин Саул рази гъахьнийи. Гьадму йигъан Ерусалимдиъ айи хъугънайидарихъ зурбади хъергбар ккергънийи ва дурар, вакилар ктарди, вари Ягьудия ва Самария уьлкйир вуйиси гъарагънийи.
2Стефандиз вафалу вуйидари, дугъʼин ишлар дапӀну, думу накьвдик кивнийи.
3Хъа Саули, хъугънайидар терг апӀуз ккунди, гьардин хулариъ учӀври, жилар, хпар дисури, дустагъдиъ итуйи.
Филип Самарияйиъ
4Чпин йишвариан утӀурккну, гьар йишвариъ гъадаргъу хъугънайидари Ужувлан хабар рабгъуйи. 5Гьаци, Филип Самария кӀуру шагьриз гъюру ва Месигьдикан аьгъювалар улупуру. 6Дугъан гафар деерхьну, дугъу гъапӀу аьламатар дяркъну, халкьди сабхилди Филипди гъапиб аннамиш апӀуз хъюгъру. 7Гьаз гъапиш, дугъу гизафдариан чӀигъар апӀурайи жинар адаъну ва аьхючӀвеъ паралич кайидар, ликудар сагъ гъапӀну. 8Ва гьадму шагьриъ зурба шадвал абхънийи.
9Самарияйиъ улихьдира сюгьюрчивалар апӀру ва мидʼинди вари мюгьтал апӀру сар Симон кӀуру кас айи. Дугъу учв зурба касси улупуйи. 10Дугъахъ хъпехъу варидари кӀури шуйи:
– Му касдиъ «Зурба Кьувват» кӀуру аллагьдин кьудрат а. 11Дугъу хайлин вахтна инсанар чан сюгьриинди гьяйран апӀруган, дугъахъ хъугъри шуйи. 12Хъа халкьар Аллагьдин Паччагьлугъдикан ва Месигь Исайикан аьгъювалар улупурайи Филипдихъ хъпехъуз хъюгъиган, жилар ва хпар штуан шулу. 13Гьадму Симонра хъугънийи ва, штуан духьну, гьарган Филипдихъди шули гъахьну. Дугъу улупурайи аьламатар ва аьжайиб лишнар рякъюри, думу учвра гьяйран шуйи.
Петрна Югьан Самарияйиъ
14Самарияйин агьалйири Аллагьдин Гаф кьабул гъапӀну, кӀури гъеебхьу Ерусалимдиъ айи вакилари, дурарихьна Петрна Югьан гьаъру. 15Дурар, дина дуфну, тазади хъугънайидари Гирами Рюгь кьабул апӀри пну, ккарагуру. 16Фицики дурар Агъа Исайин ччвурнахъди штуан духьнашра, Гирами Рюгь дурарикан сарира кьабул дапӀнадайи.
17Гьадмуган Петрина Югьанди дурариин хилар иливуру ва Гирами Рюгь кьабул апӀуру. 18Вакилари хилар иливиган, дурари Гирами Рюгь кьабул гъапӀуб дябкъну, Симонди вакилариз пул теклиф апӀури, 19кӀуру:
– Узу шлиин хил иливишра, дугъу Гирами Рюгь кьабул апӀруси, узузра гьациб гьюкум чавайчва.
20Петри дугъаз кӀуру:
– Яв пул кӀулик кубкӀрияв, гьаз гъапиш уву Аллагьдин багъиш пулихъ гъадабгъуз ният гъапӀунва. 21Ич ляхнарин иштиракчи хьуз лайикь дарва, фицики яв юкӀв Аллагьдин улихь дугъри дар. 22Гьаддиз яв чӀуру ният гардандиъ бис, дидлан хил алдабгъбан бадали Аллагьдиз ккараг, белки, Дугъу увлан хил алдабгъур. 23Гьаз гъапиш рякъюразузки, яв жан кьутӀкьли бахилвалихьди абцӀна ва уву гьякьсузвали йисир дапӀнаву.
24Гьадмуган Симонди жаваб туву:
– Учву гъапибдикан фукӀара узʼин улулубкьбан бадали, Агъайиз ккарагай.
25Петрна Югьан, Исайикан шагьидвал дапӀну ва Агъайин гаф аьгъювалиинди улупну, Ерусалимдиз хътакуру. Гъюру рякъюъди дурари Самария уьлкейин гъуларикан гизафдариъ Исайикан Ужувлан хабар рабгъуру.
Филипди хасижви хъугъувалихъна хуб
26Агъайин малайикди Филипдиз кӀуру:
– Гьязур духьну, кьиблайихъинди, Ерусалимдиан Газа кӀурушваз ичӀи чюлиантина гъябгъюрайи рякъюхъна гъарах.
27-28Филип, гьязур духьну, гъягъюру. Дугъаз рякъюъ Эфиопияйин, Кандакия ччвур али паччагь дишагьлийин девлет уьбхру, бегларикан вуйи эфиоп хасижви алахъуру. Думу Ерусалимдиз икрам апӀуз душну хътакурайир вуйи. Дугъу, фургъниъ деъну, Ишая пайгъамбрин китаб урхурайи. 29Гьадмуган Гирами Рюгьну Филипдиз кӀуру:
– Фургънихьна душну, гьаддихъди гъуз.
30Дидихьна гъушиган, Филипди, дугъу Ишая пайгъамбрин китаб урхури деебхьну, гьерхру:
– Урхурайибдин гъаври ахърана?
31– Узу фици гъаври ахъзахъа? Узу шликӀа гъаври тӀаърайинхъа? – жаваб тувру дугъу ва Филипдиз фургъниз чан гъвалахъна теклиф апӀуру.
32Дугъу Гирами китабариан гьамцдар гафар урхурайи:
– Думу убккуз гъабхурайи марччси вуйи
ва ултӀубкъурайи марччлихънин улихь
сессуз агълижиси
Дугъу Чан ушв абццундайи.
33Думу инсан вуди гьисаб апӀурдайи.
Думу гьякь вуйи диван апӀбахьан
мягьрум апӀури гъахьну.
Фуж Дугъан заманайиндарин ниятарин гъаври ахъди?
Фицики дюнʼяйиин Дугъан уьмур кьатӀ гъапӀну.
34Хасижвуву Филипдихьан гьерхру:
– Узу увкан пуб ккун апӀураза: мушваъ пайгъамбри шликан кӀура – чакан, даршиш жарарикан?
35Гьадмуган Филипди, мушваъ Исайикан кӀура, дупну, Гирами китабдин гьадму йишвлан ккебгъну, Ужувлан хабар ктибтуз хъюгъру.
36Рякъ давам апӀури, дурар штухъна гъюру ва хасижвуву Филипдихьан гьерхру:
– Магьа шидра: узуз штуан хьуз фти машат апӀидихъа? [37]#8:37 Грекарин саспи БикӀбариъ кӀура: «Хъа Филипди гъапи: „Эгер уву яв вари юкӀв хъипну хъугъраш, штуан хьуз шулвухьан“. Хъа дугъу гъапи: „Узу хъугъурза – Иса Месигь Аллагьдин Бай ву“».
38Дугъу фургъун дебккуз буйругъ тувру, кьюридра штуъ учӀвру ва Филипди думу штуан апӀуру.
39Хъа штуан удучӀвган, Агъайин Рюгьну Филип гьадагъуру, хасижвуваз думу сарун гъяркъюндайи ва дугъу шадди рякъ давам апӀуру. 40Филип, кӀуруш, Аштод шагьриъ ади шулу. Дугъу, шагьриан шагьриз гъягъюри, Къайсарияйиз гъяйизкьан, Ужувлан хабар рабгъури гъахьну.
Currently Selected:
Ляхнар 8: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
