Эвел 27
27
Якьубдиз кучӀлиинди берекетна ирс рубкьуб
1Исакьди, учв кьаби гъахьиган, ва уларин акв зяиф дубхьну, кур гъахьиган, чан аьхюну бай Исавдиз чахьна дих дапӀну кӀуру:
– Я йиз бай!
– Гьай! – пну жаваб тувру адашдиз бали.
2– Магьа узу сарун кьаби гъахьунзу ва фила йикӀурушра аьгъдарзуз. 3Гъадабгъну яв чӀимир, чӀурариз душну узуз чӀурдин фукӀа-мукӀа дибисну хьади гъач. 4Дидкан узуз ккуни ицциб гьязур апӀин ва узуз ипӀуз аьбкъин. Узу йикӀайиз, увуз, РАББИЙИКАН берекет хьуб ккун дапӀну, йиз ирснан эйси апӀидизаву.
5Исакьди чан бай Исавдиз кӀурайи гафар, дурарихъ хъебехънайи, Ребекайиз гъеерхьнийи. Исав чӀурариз хюрчаз гъушиган, 6Ребекайи бицӀину бай Якьубдиз гьамци кӀуру:
– Яв чвуччвуз, Исавдиз, ичв адашди гъапиб гъеебхьунзуз. 7Дугъу дугъаз: «ЧӀурдин фукӀа-мукӀа дубхну, йиз ккуни хураг гьязур апӀин. Узу ипӀидиза ва узу йикӀайиз, увуз, РАББИЙИКАН берекет хьуб ккун дапӀну, йиз ирснан эйси апӀидизаву», – гъапну. 8Гьамус, йиз бай, увуз кӀурайи йиз гафарихъ хъебехъ. 9Лижягъна душну кьюб ужударстар мудрар гъядягъну гъач. Узу яв адашдиз дурарикан чаз ккуни ицциб гьязур апӀидиза, 10хъа уву думу яв адашдихьна хьади гъягъидива, дугъу ипӀиди ва чав йикӀайиз увуз, РАББИЙИКАН берекет хьуб ккун дапӀну, чан ирснан эйси апӀидиву.
11Якьубди чан дада Ребекайиз кӀуру:
– Йиз чве Исав чӀар алир ву, хъа узу – алдрур. 12Нагагь дупну дугъу узук кучиш гьапӀза? Хъа дахъ, берекетнан ерина узу йиз кӀулʼина бала гъазанмиш дапӀну!
13Хъа дадайи дугъаз гъапи:
– Гъит думу бала узуз гъядябхъри, йиз бай, уву анжагъ узу кӀурайибдихъ хъебехъ: гъарах, хьади гъач.
14Думу мудрар хуз гъягъюру; чан дадайихьна хуру, хъа дадайи дурарикан, адашдиз ккуни ицциб гьязур апӀуру. 15Хъасин Ребекайи чан хулаъ айи аьхюну бай Исавдин ужударстар палтар бицӀину бай Якьубдиин алахьуру. 16Якьубдин хилариланра гардандилан мудрарин гъидкьар илдижуру, 17ва чав гьязур гъапӀу иццибна уьл дадайи чан балин хилиъ ивру. 18Хъа Якьуб чан адаш айишвазди учӀвру ва дугъу кӀуру:
– Я адаш!
– Гьай, йиз бай, – кӀуру дугъу, – уву фунур вува?
19Якьубди чан адашдиз кӀуру:
– Узу Исав вуза, яв сарпир. Узу уву гъапибси гъапӀунза. Гъудужвну, ахниин деъ ва гьаму ипӀин, хъасин узуз РАББИЙИКАН берекет хьуб ккун апӀин. 20Хъа Исакьди чан бализ кӀуру:
– Гьамкьан ухди хюрч бисуз фици хъуркьунва, йиз бай?
– Яв Заанур РАББИЙИ узуз кюмек гъапӀиган, – кӀуру Якьубди.
21– Багахьнаси гъач, йиз бай, – кӀуру Исакьди Якьубдиз, – гьеле кучзавук, йиз бай Исав уву вуш аьгъю апӀурза.
22Якьуб чан адашдихьнаси гъюру ва дугъу дугъак хилар кучру ва кӀуру:
– Дих – Якьубдинуб, хъа хилар – Исавдиндар…
23Якьубдин хилар Исавдиндарси чӀарарихьди элеркнайиган, Исакьдиз думу аьгъю гъахьундайи ва гьаддиз дугъу Якьубдиз РАББИЙИКАН берекет хьуб ккун апӀуру.
24– Уву йиз бай Исав дарнахъа? – гьерхру дугъу Якьубдихьан.
– Вуза, адаш, – пну тасдикь гъапӀу дугъу.
25Хъа Исакьди гъапи:
– Ча яв хюрч, йиз бай, ипӀурза, хъа увуз, РАББИЙИКАН берекет хьуб ккун дапӀну, йиз ирснан эйси апӀидизаву.
Якьубди чпин адашдиз ипӀрубна чяхир туву. ИпӀуб-убхъуб гъапӀхъан, 26Исакьди гъапи:
– Минаси гъач, узуз мак апӀин, йиз бай.
27Якьуб багахь духьну адашдиз мак апӀуру ва, дугъан ккурттарин ниъ гъафири, Исакьди дугъаз гьамцдар гафариинди РАББИЙИКАН берекет хьуб ккун апӀуру:
Йиз балин ниъ –
РАББИЙИ ужувлакк ккаънайи хутӀларин ниъ ву.
28Гъит увуз Заанури
завариан чиг багъиш апӀри,
жилин мейва ва булди уьлна чяхир.
29Гъит халкьар увухъ лихри,
миллетар яв улихь ис ишри.
Гъардшарин зиин агъа хьидива,
яв дадайин баяри увуз икрам апӀиди.
Увуз чӀуруб ккун апӀрудар балайикк ккахъди;
увуз ужʼвал ккун апӀрудар ужувлакк хьиди!
30Исакьди Якьубдиз РАББИЙИКАН берекет хьуб ккун апӀбан кьяляхъ, Якьуб чан адашдихьан гьудучӀвубси, дугъан чве Исав хюрчʼан хъуркьру. 31Дугъу ицциб гьязур дапӀну чан адашдиз хуру ва кӀуру:
– Гъудужв, йиз адаш, уву узу адашʼвалин ужувлакк ккаъбан бадали, яв балин хюрч ипӀин.
32Исакьди, Исавдин адашди дугъхьан гьерхру:
– Фуж вува?
– Узу яв бай, яв сарпир, Исав вуза, – кӀуру дугъу.
33Исакьдин жан бегьем гукӀни гъабхьи ва гъапи:
– Хъа фуж вуйи думу, хюрч дубхну, уву гъяйиз узуз гьивур? Узу гьадму йиз ужувлакк ккаъунза, аьхир, гьаддиз сарун думунур ужувлакк шулу. Думу кьяляхъ апӀуз шлу ляхин дар!
34Му гафар гъеерхьу Исавди зарбди ва дердлуди гьарай апӀуру, хъа чпин адашдикан:
– Я адаш, узура яв ужувлакк ккаъ! – кӀури тӀалаб апӀуру.
35– Гьадму гъафир яв чве вуйи, – кӀуру Исакьди, – ва аьмалдарвалиинди яв берекет гьадгъу гъадабгъну.
36– Гьаддиз дугъаз Якьуб#27:36 Ччвурнан жара мяна: «аьмалдар». дупнадаринхъа! Кьюб кӀуру ражари узу тӀублан гъапӀну дугъу! – кӀуру Исавди. – Сифте йиз аьхювал тадабгъну, хъа гьамус – узуз вуйи берекетна ирс! Белки увуз хъана сабсан берекетна ирс ашул?
37– Узу дугъкан яв агъа ктаунза, – гъапи Исакьди, – вари багахьлуйир дугъан лукӀар гъапӀунза, уьлра чяхирра гьадгъваз тувунза. Узхьан увуз фу апӀуз шул кӀурва, йиз бай?
38– Я адаш, – гьерхру Исавди чан адашдихьан, – саб берекетна ирстӀан адари? Узузра берекетна ирс ккун апӀин, адаш!
Исав зарбди ишуру.
39Хъа Исакьди дугъаз гьамци кӀуру:
– Яв хал ярхла хьибди
мянфяаьтлу жилихьан,
заълан вуйи заварин чиграхьан.
40Уву туриинди яшамиш хьидива ва,
яв чвуччвуз гъуллугъ апӀури хьидива.
Хъа уву къаршу гъудужвган,
яв гардандиан дугъан гьалкъа идипидива.
Харрандиз Якьуб гьергуб
41Исавди, чпин адашдин берекетна ирс гъардши чахьан гъадабгъган, Якьубдикан яман хъял апӀуру. «Йиз адашдихъ ишру йигъар гъюра, – чакна кӀуру Исавди, – хъа гьадмуган узу йиз чве Якьуб йивну йикӀидиза». 42Ребекайикна чан аьхю балин, Исавдин гафар кдитнийи. Хъа дадайи чан бицӀину бализ, Якьубдиз дих дапӀну: «Яв чве Исав уву дарчиди сикин шулдар, – гъапнийи. 43– Гьамус, йиз бай, йиз гафарихъ хъебехъ: тяди Харрандиз, йиз чвуччвухьна, Лавандихьна гьергну гъарах. 44Яв чвуччвун хъял дубгайиз, гьадушваъ яшамиш йихь. 45Яв чвуччвун увʼина вуйи хъял ктубчӀвган ва уву чакан гъапӀуб кӀваълан гьархиган, узу фужкӀа гьаъну дилин уву хъади гъюз гъитдиза. Гьаз вухъа йиз сад йигъан учву кьюридра узхъан хъадагъну?» 46Гьаддиз Ребекайи Исакьдиз гъапи:
– Узу, гьаму хетт шубар алахъхъанмина, уьмрикан рази дарза. Эгер Якьубди чазра хпирди гьаму йишван дишагьли, магьа гьаму хетт шубарикансир сар гъадагъиш, сарун йиз яшамиш духьну гьаз вухъа!
Currently Selected:
Эвел 27: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
