Эвел 28
28
1Исакьди Якьубдиз дих дапӀну, дугъаз ужʼвал ккун дапӀну, гьамциб насигьят тувру:
– Ханаандин шубарикан фужкӀара швушвди магъадагъан. 2Паддан-Арамдиз, яв абайин – Бетуэлин – хулаз гъарах, ва яв халуйин – Лавандин – шубарикан увуз хпир кадагъ. 3Гъит Кьудратлу Заанури ужувлакк ккаъриву! Гъит Дугъу яв тухум бегьерлу ва артухъ апӀри, увлантина гизаф халкьар артмиш ишри! 4Гъит Дугъу увуз ва яв наслариз, Ибрагьимдиз туву ужʼвал тувривуз. Уву гъурабади яшамиш шулайи му жил, Заанури Ибрагьимдиз багъиш дапӀнайи жил яв хилиъ абхъди!
5Исакьди бай рякъʼин апӀуру. Якьуб арамейжви Бетуэлин бай, Лавандихьна Паддан-Арамдиз гъюру. Лаван, Якьубдина Исавдин дада Ребекайин гъардаш вуйи.
6Исавдиз, Исакьди Якьубдиз ужʼвал ккун дапӀну, думу чаз хпир ктагъуз Паддан-Арамдиз гьаъбакан, Якьубдиз хананей шубарикан швушв макадагъан пубкан 7ва Якьуб чан адашдихъна дадайихъ хъебехъну Паддан-Арамдиз гъягъбакан аьгъю шулу. 8Исавдиз, чан адаш Исакьдиз хананей шубарин маш ккадруваликан аьгъю гъабхьнийи. 9Хъа гьадмуган Исав Исмаилихьна душну, чаз сарсана хпир – Неваютдин чи, Ибрагьимдин бай Исмаилин риш, Махалат гъахнийи.
Бет-Элиъ Якьубдин нивкӀ
10Якьуб, Беэр-Шева гъибтну, Харрандиз рякъюъ учӀвнийи. 11Думу саб йишвахьнакьан гъафир, сарун йишв хьпаз дилигну, дийигъуру ва кӀуликк гъван ккивну ахуз дахъру. 12Дугъаз нивкӀукди, жилилан заварихьнакьан вуйи умбрар ва душвʼан асина-зиина Заанурин малайикар гъяри рякъюру. 13РАББИ зиин дийигъну Якьубдиз кӀуру:
– Узу, яв аба Ибрагьимдин Заанур ва адаш Исакьдин Заанур, РАББИ вуза. Уву дахънайи гьаму жилар Узу увуз ва яв наслариз багъиш апӀидиза. 14Гъумкьан гизаф хьиди яв наслар. Дурар ригъ гьудубчӀву, ригъ алабхъру, кьибла ва кафари терефаризди рагъиди. Увлантина ва яв насларилантина дюнʼяйин вари халкьариз ужʼвал хьибди. 15Аьгъю йибхь, Узу увухъди хьидиза. Уву наанди гъушишра, Узу уву уьрхюри хьидиза. Узу уву думу Ханаан уьлкейиз кьяляхъ апӀидизаву, уву ялгъузди гъитидарза. Йиз туву гафар вари тамам апӀидиза.
16НивкӀʼан хъергу Якьубди:
– Дугъриданра РАББИ гьаму йишвʼин ал; хъа узуз мидкан аьгъюдикьан дайзуз! – гъапи.
17– Му йишв фукьан гучӀ шлу йишв ву! – гъапи гукӀни гъахьири. – Му йишв Заанурин хал, аьршарин урнар ву!
18ГвачӀнин ухди Якьуб гъудужвну, чан кӀуликк ккиву гъван гъадабгъну, думу гирамиб ва лишанлуб вуди дубсру ва дидин зиин ччим улубзуру. 19Дугъу думу йишваз, гьеле думу шагьриз Луз кӀури ашра, Бет-Эл («Заанурин хал») кӀуру ччвур тувру. 20Хъа Якьубди гьамци дупну ху апӀуру:
– Эгер Заанур узухъди гъашиш ва узу гьаму рякъяриъ гъюрхиш, ипӀуз уьл ва жандиина палат тувиш, 21узу мясляаьтниинди йиз адашдин хулаз кьяляхъ хътакуз кюмек гъапӀиш, РАББИ йиз Заанур хьиди. 22Хъа му узу гирамибди гъван дубсу йишв Заанурин хал хьибди. Уву узуз багъиш апӀру варибдикан Увуз йицӀубпи пай туври хьидиза.
Currently Selected:
Эвел 28: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
