Эвел 30
30
1Хъа Рахил, чахьан Якьубдиз бицӀидар хуз даршулайиб рябкъюри, чан чуччʼин бахил шулу.
– Узуз бицӀидар ча, – кӀуру дугъу Якьубдиз, – дарш узу йикӀуру!
2Хъа хъял кубчӀву Якьубди Рахилиз кӀуру:
– Узу увуз бицӀидар тутруврайи Заанур вуйинхъа?
3– Магьа йиз лукӀ Билха, – кӀуру Рахили, – гьадгъвахъди дахъ, гъит дугъу узуз бицӀир хри. Гъадгъвалантинакьана узухъ бицӀидар ишри! 4Рахили чан лукӀ дишагьли Билха чан жилириз лукӀ-хпирди тувру. Якьуб гьадгъвахъди шулу. 5Билха гъагъдиъ шулу ва дугъу Якьубдиз бай хуру.
6– Заанури гьякьлуди диван гъапӀну ва, йиз ккарагуб деебхьну, бай тувунзуз, – кӀуру Рахили.
Гьаддиз Рахили бализ Дан («диван») кӀуру ччвур тувру.
7Билха хъана гъагъдиъ шулу ва дугъу Якьубдиз сарсан бай хуру.
8– Кьувватлуди узу йиз чуччухъди женг гъубхунза, – кӀуру Рахили, – ва думу ккагъунза!
Рахили дугъаз Нефталим («женг») кӀуру ччвур тувру.
9Чан нубатнаъ Лияйи, чаз сарун бицӀидар шулдариз пну фикир дапӀну, чан лукӀ Зилфи Якьубдиз лукӀ-хпирди тувру. 10Зилфийира, Лияйин гъаравашди, Якьубдиз бай хуру.
11– Бахт гъилибхнийиз! – гъапи Лияйи ва гьаддиз бализ Гад («бахт») кӀуру ччвур туву. 12Зилфийи Якьубдиз кьюрпи бай хуру. 13– Узу бахтлу вуза! – гъапи Лияйи. – Шадвал гъурубкьур пиди узуз хпари!
Гьаддиз Лияйи бализ Ашер («шадвал») кӀуру ччвур тувру.
14Дяхнарин игнарин вахтна хутӀлариинна гъушу Рувимдиз мандрагор#30:14 Мандрагорин кьабар жилириз хпирихьна тямягь зигрудар ва дишагьлийиз гизаф бицӀидар хуз кюмек апӀрудар вуди гьисаб апӀуйи. кӀуру кьабар дихъуру ва дурар чан дада Лияйиз хуру. Хъа Рахили чан чи Лияйиз:
– Яв бализ гъидихъу гьадму мандрагорар узуз чава, – кӀуру.
15– ЦӀиб вуйвуз, йиз жилир тадагъунва, гьамус йиз бализ гъидихъу мандрагорариинара хаин шулайва? – гъапи Лияйи.
– Гьадму мандрагорар узуз тувиш, гъит гьаму йишван жилир увухъди дахъри, – пну Рахили гаф туву.
16Хябяхъган Якьуб хутӀлилан гъюрайиган, дугъан улихьинди Лия гъюру ва:
– Ахъли уву узухьна гъюзди, узу уву йиз балин мандрагорарихъ гъадагъунзаву, – гъапи Лияйи.
Думу йишван Якьуб Лияйихъди шулу. 17Лияйин ккарагуб Заануриз ебхьуру ва дугъу Якьубдиз хьурпи бай хуру.
18– Заанури узуз, йиз лукӀ дишагьли йиз жилириз, мажбур духьну, узу тувиган, гьамциб пешкеш гъапӀунзуз, – гъапи Лияйи.
Гьаддиз дугъу балʼин Иссахар («пешкеш») кӀуру ччвур иливнийи.
19Лия хъана гъагъдиъ шулу ва Якьубдиз йирхьурпи байра хуру.
20– Бегьем багъишар гъапӀунзуз Заанури! – гъапи дугъу. – Гьамускьана жилири узуз гьюрмат апӀуршул, фицики узу дугъаз йирхьур бай гъахунза! – гъапи Лияйи.
Бализ дугъу Забулун («гьюрмат») кӀуру ччвур тувнийи.
21Хъасин Лияйи риш хуру, Лияйи дугъʼин Дина кӀуру ччвур иливуру.
22Заануриз Рахил кӀваълан душнадайи, дугъан ккарагбар дерехьди имдайи ва гьаддиз дугъазра бицӀидар шлуси апӀуру. 23Рахил гъагъдиъ шулу, бай шулу, хъа дугъу:
– Заанури узу аьйибнаккан ккадаунзу, – кӀуру.
24Дугъу балʼин Юсуф («артухъди туври») кӀуру ччвур иливуру ва: «Гъит РАББИЙИ узуз сарсана бай туври!» – кӀуру.
Якьубди чан девлет артухъ апӀуб
25Юсуф бабкан хьплан кьяляхъ Якьубди Лавандиз гъапи:
– Узуз, йиз ватандиз хулаз кьяляхъ гъягъюз ихтияр тува. 26Узухъди гъягъюз йиз веледаризра, йиз хпаризра ихтияр тув, фицики гьадрар бадали узу увухъ гъилихунза. Узу увухъ фукьан зегьмет гъизигнуш увуз ужуйи аьгъявуз!
27– Узухьна рягьимлу йихь, узухъ хъебехъ! – кӀуру дугъаз Лаванди. – Уву бадали РАББИЙИ Чан ужʼвал узузра улупруб фал ккипган аьгъю гъабхьунзуз. 28Йип узуз, узхьан фициб кьимат ккундувуз?
29– Узу увухъ фици гъилихнуш ва увухъ фукьан лижар хъиршнуш, увуз ужуйи аьгъявуз. 30Узу гъяйиз сакьюдартӀан даяв, хъа гьамус лиг фукьандар духьнаш! Рябкъюрайвуз, узу гъюбʼинди Заанури увуз фукьандар тувнаш! Узу йиз хизандихъ фила лихуз ккайир ву? – гъапи Якьубди.
31– Гьан, йип, фициб гьякъи тувзавуз? – гьерхру Лаванди.
– Узуз увкан фукӀара ккундарзуз, – жаваб туву Якьубди. – Яв мал-къара уьбхюз гьамусдихъантинара узу рази вуза, – аммаки увкан йиз саб тӀалаб айиз. 32Узухьди, яв вари мал-къарайилан илтӀикӀуз гъитну, дураригъян узузди, цӀаруна тӀюрхъяр кайи вари марччар, кӀару ччилар, цӀаруна тӀюхъяр кайи вари цӀигьар гъядягъюз гъит. Ари гьадрар гъит лихбан йиз кьимат ишри. 33Уву узуз тувру гьякъи узу дюзди гъадабгъури аш-адарш увхьан ккуни вахтна аьгъю апӀуз хьибдивухьан. Эгер йиз лижягъ цӀару дару ва тӀюхъяр ктру марччар-цӀигьар, ясана кӀару дару ччилар гъяди гъашиш, узу дурар увхьан гьитӀикӀу гьисаб ибшри.
34– Ибшри, – гъапи Лаванди, – уву кӀурубси ибшри!
35Гьадму йигъан Лаванди тӀюхъяр кайи вари кьунарна цӀигьар ва кӀару вари ччилар гъядягъну чан баярихьна тувру, 36хъасин дурар Якьубдихьан шубуд йигъан ккадапӀру рякъюн манзилназ ярхла вуди гьаъру.
Хъа Якьуб учв Лавандин имбу мал-марчч уьбхюри гъузру. 37Якьубди гъавахдин, миндал гьарин ва чинарин тӀулар кадатӀну, дурарилан цӀаруди рябкъруси гал алдабхъуру. 38Дугъу тӀулар марччари шид убхъру латариъ штук, шид убхъуз гъафи цӀигьариз рякъбан бадали кахьру. Думу вахт цӀигьар кьунакк ва марччар якъракк ккайи вахт вуйи. 39Кьунариккна цӀигьар гьадму цӀару тӀуларин улихь гъяри шуйи, гьаддиз бабкан шлу мудрарра цӀарудар, тӀюхъяр кайидар ва леке кайидар шуйи. 40Якьубди чан марччар Лавандиндариз рякъруси, гьадгъван цӀаруна кӀару марччариз лигруси дерккуйи. Гьамци дугъахъ чазди вуйи марччарин лижар хъиршуйи ва дурар Лавандиндарихьан жаради уьрхюйи. 41Аьхю ва сагъи марччар-цӀигьар якъар-кьунарикк гъяруган, шидʼина гъафи дурарин улихь Якьубди цӀару тӀулар латʼин элерчуйи. 42Хъа зяифдар якъракк ккайиган, дугъу цӀару тӀулар илирчдайи. Гьамци зяифдар Лавандиз шуйи, хъа сагъидар – Якьубдиз.
43Якьубдикан кентхуда гъахьнийи. Дугъахъ марччар-цӀигьарин сюрйир, лукӀар вуйи гизаф жиларна хпар, девйирна дажйир гъахьнийи.
Currently Selected:
Эвел 30: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
