Лука 1
1
Лукайин Феофилихьна вуйи гаф
1Ич арайиъ гъаши мялум вуйи гьядисйирин гьякьнаан гьамус гизафдари бикӀуз хъюгъна. 2Учузра дурар сифте кӀулиан чпин улариинди гъяркъдари ва Аллагьдин Гафнан гъуллугъниин алидари гизафдар ктитну. 3Узура, гьарсаб жигьат дикъатниинди сифтейиан аьхиризкьан ахтармиш апӀбалан кьяляхъ, гьамрарикан увуз, гьюрматлу Феофил, хъайи-хъайиси дибикӀну, ктибтуб лазим вуди фикир гъапӀунза. 4Миди увуз туву аьгъюваларин бин мюгькам апӀиди.
Малайикди Закарʼяйиз Ягьʼя бабкан хьубкан туву хабар
5Ягьудия уьлкейин паччагь Гьироддин девриъ душваъ Абияйирин «ражнаъ» гъуллугъ гъабхурайи Закарʼя кӀуру сар малла ва Гьарундин тухмиан вуйи Елисавета кӀуру дугъан хпир ади гъахьну. 6Дурар кьюридра, Аллагьдин вари табшуругъар ва къайдйир уьрхюри, Дугъан улихь дугъри агьлар вуди гъахьну. 7Дурариз веледар адайи, гьаз гъапиш Елисавета бегьерсузур вуйи. Дурар кьюридра агьли яшнахъна хъуркьнайи.
8Сабан, Закарʼяйи Аллагьдиз чан гъуллугъ апӀурайи вахтна (дугъахъди хъайи маллйирин раж, яна гъуллугънан нубат хъубкьнайи), 9маллйирин арайиъ, аьдат вуйиганси, тупут ипиган, думу Аллагьдин хулаъ ицци ниъ хъайидар ургуз гъягъбакк ккуркьнийи. 10Хъа Аллагьдин хулан гьяятдиъ халкь му вахтна ккарагурайи. 11Гьадмуган Закарʼяйиз ицци ниъ хъайидар ургурайишван арччул терефнаъ Аллагьдин малайик дийигъну рякъюру. 12Думу гъяркъган, Закарʼя чашмиш шулу ва дугъак яманди гучӀ кабхъру. 13Малайикди дугъаз гьамци кӀуру:
– ГучӀ мапӀан, Закарʼя, яв ккарагувал деебхьна, ва яв хпир Елисаветайи увуз бай апӀиди, дугъʼин Ягьʼя кӀуру ччвур илив. 14Увуз хушʼвална шадвал хьибди, ва гизафдар думу бабкан хьувалиин шад хьиди, 15фицики думу Аллагьдин улихь, зурба касси, заан хьиди. Дугъу чяхир вая жара ички убхъидар. Думу чав бабкан гъахьи йигъхъанмина Аллагьдин Рюгьнахьди ацӀнайир хьиди. 16Дугъу Израилин баярикан гизафдар Аллагьдихьинди илтӀикӀиди. 17Абйирин юкӀвар веледарихьна илдицбан бадали, мютӀюгъ дарудар марцци касарин фикрарихьна илтӀикӀбан бадали ва Агъа гъяйиз халкь гьязур апӀбан бадали, думу Дугъан улихьди Илʼясдин рюгьнаъди ва кьудратнаъди гъягъюри хьиди.
18Закарʼяйи Малайикдиз кӀуру:
– Му гьякь вуйиб узуз фици аьгъю хьибди, узу кьабир вуза, хъа йиз хпирра агьли яшариъ а?
19Малайикди дугъаз гъапи:
– Узу Аллагьдин улихь дийигънайи ва увухьна ужуб хабар тувуз гьаънайи Жабраил вуза. 20Амма гьадму ляхин кӀулиз удубчӀвру йигъ гъяйиз, яв чӀал бисиди ва увуз улхуз мумкинвал хьибдар. Гьаз гъапиш чарасуз кӀулиз удучӀвру му йиз гафарихъ хъугъундарва.
21Му арайиъ чӀат Закарʼяйиз ккилигурайи халкь думу Аллагьдин хулаъ энгел духьнайивалиин мюгьталди айи. 22Думу халкьдихьна удучӀвиган, улхуз даршули гъузру ва дурариз, Закарʼяйиз Аллагьдин хулаъ Малайик гъяркъюб, аьгъю шулу. Закарʼяра, лал гъаширси, халкьдихъди хилин ишаратариинди улхуз хъюгъру. 23Хъа Аллагьдин хулаъ гъуллугъ апӀбан йигъар ккудукӀиган, Закарʼя чан хулаз хътакуру.
24Гьадму йигъарилан кьяляхъ дугъан шив Елисавета, гъагъдиъ духьну, хьуб вазлин арайиъ чӀатна удудучӀвди, учв улупури гъахьундар. Дугъу гьамци кӀуйи:
25– Гьаму йигъари узухьинди илдицу Аллагьди инсанарин арайиъ узʼин али бегьерсузвалин нянат алдабгъруганси гъапӀну.
Малайикди Марʼямдиз Иса бабкан хьуваликан туву хабар
26Хъа йирхьубпи ваз улубкьиган, Аллагьди Галилей уьлкейиъ айи Назарет кӀуру шагьриз 27Давудрин тухмиан вуйи Юсуф кӀуру касдиз хъирснайи шурахьна Жабраил малайик гьаъру. Шуран ччвур Марʼям вуйи. 28Малайикди, риш айи хулаъ учӀвну, гъапну:
– Хайир ибшри, Аллагьди кадагънайи Дишагьли! Аллагь гьарган увухъди хъади хьиди!
29Думу гъяркъиган, Марʼям дугъан гафариин мюгьтал шулу ва, учв мици саламламиш апӀувал фу вуйкӀан кӀури, фикрарик кахъру.
30Хъа малайикди дугъаз гъапну:
– ГучӀ мапӀан, Марʼям, Аллагьди увуз ужʼвал улупна: 31магьа БицӀир киршдивук ва Бай апӀидива. Дугъʼин Иса кӀуру ччвур иливидива. 32Думу зурба Кас хьиди, ва Дугъаз ВаритӀанзаанурин Бай пиди. Агъа Аллагьди Дугъаз Чан аба Давудрин паччагьвалин тахт тувди. 33Дугъу Якьубдин халкьдиин уьмурлугъди паччагьвал апӀиди, ва Дугъан паччагьвалин аьхир хьибдар.
34Марʼямди малайикдиз кӀуру:
– Му ляхин хьуб фици мумкин вухъа, узу мегьел швуваз душнадарди?
35Малайикди Дугъаз гъапи:
– Аллагьдин Рюгь учӀвди увуъ ва ВаритӀанзаанури уву Чан кьувватнакк ккаъди, гьаддиз бабкан шулайи Гирамийиз Аллагьдин Бай пиди. 36Магьа чаз бегьерсузур кӀурайи яв багахьлу Елисаветара чан кьабишнаккди, бицӀир кади гъагъдиъ ади, йирхьубпи ваз ву, 37гьаз гъапиш Аллагьдин гьич саб гафра кьувватсузди гъубзурдар.
38Марʼямди:
– Узу Аллагьдин лукӀ вуза, узʼин уву кӀурайидар улуркьри, – кӀуру.
Хъа малайик Дугъхьан гьудучӀвуру.
Марʼямдинна Елисаветайин сюгьбат
39Гьадму йигъарикан сад йигъан Марʼям, гьялаквал кади, Ягьудия уьлкейин дагълариъ айи саб шагьриз гъягъюру 40ва, Закарʼяйин хулаъ учӀвну, Елисаветайиз салам тувру. 41Марʼямдин салам гъеебхьиган, Елисаветайин фуниъ бицӀир гъиришву ва Елисавета Аллагьдин Рюгьнахьди ацӀру. 42Елисаветайи, зарбди чӀигъ дапӀну, гъапну:
– Уву дишагьлийирин арайиъ бахтавар вува, ва яв фуниъ айи бегьерра бахтавар ву! 43Узухьна йиз Агъайин дада гъювалин бахт узуз наънан гъафиб вуйкӀан? 44Яв салам туврайи сес йиз ибарихъна гъурубкьубси, йиз фуниъ айи бицӀир шадди гьялак гъахьну. 45Аллагьдихьан дупнайиб тамам шлувалихъ хъугънайир, хуш бахтавар вува.
46Марʼямди гьамци жаваб тувру:
– Узу йиз кӀваан Агъа заан апӀураза.
47Йиз рюгь узу гьарсабдихьан уьрхюрайи Аллагьдикан шад духьна.
48Дугъу чан лукӀран аьжуз гьялназ лигну рягьим гъапӀну, гьамусдихъантина вари наслари узуз ужʼвал алабхъу кас пиди,
49Гьаз гъапиш Кьувватлури узуз зурба ляхин гъапӀну, ва Дугъан ччвур гирами ву.
50Чахьан гучӀрудариз наслариан наслариз Дугъан ужʼвал а.
51Дугъу, Чан хиларин кьувват улупури, кӀваъ дамагълу фикрар айидар гьубкьушвахъинди гъарагъну.
52Кьудратлудар тахтарилан илдитну ва аьжузар заан гъапӀну.
53Дарвал айидар ужувлариинди рази гъапӀну, хъа девлетлутӀан девлетлу шулайидар фукӀа адарди деетну.
54-55Чан гъуллугъниин али Израилин халкьдиз кюмек гъапӀну, Чав ихь абйириз гъапиганси, Ибрагьимдиз ва дугъан тухмиз гьаргандиз ужʼвал апӀуз тувнайи гаф кӀваин уьбхюра.
56Марʼям Елисаветайихь шубуб вазлиъкьан гъузну, хъа чан хулаз хътакуру.
Ягьʼя бабкан хьуб
57Елисаветайи, вахт улубкьиган, бицӀир апӀуру. 58Агъайи рягьим дапӀну думу за апӀбакан гъуншйиризна майил-мадатдиз гъеебхьнийи ва дурар дугъахъди сабси шад гъахьнийи.
59Миржидпи йигъан багахьлуйир бицӀирин суннат апӀуз гъюру ва дугъʼин чан адашдин ччвур Закарʼя иливуз ккун шулу. 60Мидʼин балин дада рази даршиди, дугъаз Ягьʼя кӀурхьа, гъапну.
61Хъа дугъаз: «Яв багахьлуйиригъ дициб ччвур алир фужкӀа гъядар», кӀуру. 62Хъасин, балʼин фициб ччвур иливуруш, хилин ишаратариинди Закарʼяйихьан гьерхру.
63Дугъу, чахьна чан кьул хуз гъитну, дидик гьамци бикӀуру: «Дугъан ччвур Ягьʼя хьибди». Хъа вари мюгьтал шулу. 64Гьадму сяаьт дугъан ушвна мелз деебтнийи ва думу, Аллагьдин ад апӀури, улхуз хъюгъру. 65Дурарин гъуншйир-мирасарик гучӀ кабхъру ва вари гьамрарикан бютюн дагълу Ягьудия уьлке вуйибси ктибтури гъахьну. 66Мидкан гъеебхьдари, мурар чпин кӀваъ уьрхюри, гьамци кӀури гъахьну:
– Аллагьдин хил али му балкан фуж шуйкӀан?
Закарʼяйин чан балихьна вуйи гаф
67Хъа балин адаш Закарʼяйира, Аллагьдин Рюгьнахьди ацӀнади, гьамци кӀури, чан аьяндарвал улупуру:
68– Израилин Аллагь вуйи Агъайиз чухсагъул! Дугъу, кюмекназ дуфну, Чан халкь азад гъапӀну.
69-70Дегьзаманайи гъахьи марцци пайгъамбрарин мелзналан мялум гъапӀубси, Дугъу Чан лукӀ вуйи Давудрин тухмиан Кьудратлур – ухьу гунгьарикан азад АпӀрур – адаъну.
71Дугъу ухьу вари ихь душмнарихьан ва ухьу даккнидарихьан уьрхюз гаф тувну.
72Дугъу ихь абйириз ужʼвал апӀуз ва дурарихъди гъийитӀу гирами вуйи йикьрар тамам апӀуз гаф тувну.
73Му йикьрар Аллагьди ихь аьхю аба Ибрагьимдиз ухьу душмнарихьан уьрхюз туву аьгьт ву:
74-75Дурари ухьуз, гучӀ дарди, ихь уьмрин кӀулиан аьхиризкьан Дугъан улихь марцциди ва гьякьди гъуллугъ апӀуз гъитди.
76Хъа увуз, йиз бай, ВаритӀанзаанурин пайгъамбар пиди, гьаз гъапиш уву Агъайин улихьди Дугъаз рякъяр ккабалгуз, 77Дугъу халкь уьрхрувалин ва инсанарин гунгьарилан хил алдабгърувалин гьякьнаан халкь гъаврикк ккауз,
78Аллагьдин зурба ужʼвал ахсрарин Нурси ухьʼина дуфну,
79МучӀушнаъ ва аьжалин гъабгъу дяхъникк деънайидариз акв тувуз, ихь рякъяр мясляаьтниина хуз, гъидива.
80БицӀи Ягьʼя, аьхю шули, рюгьниинди мюгькам хьуз хъюгъру. Думу, Израилин халкьдиз гъуллугъ апӀуз гъяйизкьан, ичӀи чюллериъ яшамиш шулу.
Currently Selected:
Лука 1: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
