Марк 16
16
Ученикариз Иса чӀиви хьуб аьгъю шулу
1Султ йигъ улдукьиган, Магдалайиан вуйи Якьубдин дада Марʼямди ва Саломеяйи Исайин бедендикан ктатуз ицци ниъ хъайи ччимар гъадагъуру. 2Гьяфтайин садпи йигъан, яна элгьетган, гвачӀнин ухди, ригъдин сабпи нурарихьди, дурар накьвдихьна гъюру.
3– Ухьуз накьвдихьан гъван шли гьадабгъиди, – кӀуйи чиб-чпиз дурари, гьаз гъапиш душвахь гьипнайи гъван гизаф аьхюб вуйи.
4Лигуруш, гъван гьидипна.
5Накьвдиъ учӀвдариз, арччул терефнаъ лизи палтар алди деънайи жигьил рякъюру ва сабпну гучӀ шулу.
6– ГучӀ мапӀанай! – кӀуру дугъу дарариз. – Дариз гъизигу Назаретдиан вуйи Иса учву агурачва. Думу чӀиви гъахьну, мушваъ имдар. Магьа Думу дитну гъахьи йишвра. 7Сарун учву гъарахай, Дугъан ученикариз, иллагьки Петриз, Думу Галилейиъ дурариз ккилигура, йипай.
8Дурар, накьвдиан удучӀвдар, гучӀбаан гьергну гъягъюру. Дурари гьич саризра фукӀара гъапундайи – дурариз гучӀуйи.
Сакьюдар ученикариз Иса рякъюру
9Гьяфтайин садпи йигъан гвачӀинган чӀиви гъахьи Иса сифте чаан ургуб жин утӀукку Магдалайиан вуйи Марʼямдиз ачмиш шулу. 10Дугъу мидкан гъам зигурайи ва ишурайи ученикариз хабар дебккру. 11Хъа дурар Думу чӀиви духьнайивалихъ, му дишагьлийи чаз гъяркъюнзуз гъапнушра, хъугъундайи. 12Мидхъан Думу жара суратнаъди дурарикан кьюриз, чпи шагьриан удубчӀвурайи рякъюъ айиган, ачмиш гъахьнийи. 13Дурар кьяляхъ хътакнийи ва мидкан имбударизра хабар дебккнийи. Амма дурар мурарихъра хъугъундайи.
Исайи вакиларихъди гафар апӀуб
14Аьхирки, йицӀисар ученик суфрайихъ деъну уьл ипӀурайиган, Иса Учв ачмиш шулу ва, кӀван курвализ ва хътругъувализ дилигну, Дугъу дурариз тягьна йивуру, гьаз гъапиш дурар Думу чӀиви духьну гъяркъдарихъ хъугъундайи. 15Дугъу дурариз кӀуру:
– Вари дюнʼя вуйиси гъарахай ва Ужувлан хабар вари инсаниятдиз дебккай. 16Шли, хъугъну, штуан апӀувал кьабул гъапӀиш, думу женнетдиъ ахъди, хъа фуж хътругъиш, думу жегьеннемдиъ итди. 17Хъугъдарихьан аьламатар улупуз хьибди: дурарихьан Йиз ччвурниинди жинар утӀурккуз хьиди, цӀийи чӀалариинди кӀури хьиди. 18Эгер битӀ гъибисиш, ясана агъу гъубхъиш, дурариз саб зарарра хьибдар; иццрудариин хилар иливиди – ва дурар сагъ хьиди.
19Гьамци дупну, Агъа Иса завариз за шулу ва Аллагьдин арччулну хилихъ деъру. 20Хъа дурар гъягъюру ва варишвариъ Ужувлан хабар рабгъуру. Дурарин му ляхниз Агъайи кюмек апӀуру, ва дурари улупру аьгъювалар аьжайиб лишнариинди мюгькам шуйи.
Currently Selected:
Марк 16: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
