Лука 16
16
Дугъривал ктру идарачийикан тахалус
1Хъа Исайи Чан ученикариз кӀуруки:
– Сар девлетлуйиз чан мяишат идара апӀру сар кас ади гъахьну. Гьадгъу эйсийин мяишат зяя апӀура кӀури, аьрза гъюру. 2Эйсийи дугъаз дих дапӀну гъапи: «Увкан узуз ерхьурайи аьрзйир гьапӀрудар ву? Яв идара апӀбан ляхнарин гьякь-гьисаб ча, фицики сарун увхьан мяишат идара апӀуз шулдарвухьан».
3Гьадмуган мяишатдин идарачийи чав-чакна кӀуру: «Узу гьапӀну ккун? Йиз агъайи хулан мяишат идара апӀувал узхьан тадабгъиди: жил йибккуз узхьан удубкьидар, шликанкӀа пул тӀалаб апӀуз начди вузуз. 4Йиз ляхнихьан гьадаиган, узу жарадарин хулариъ кьабул апӀру ужуб аьмал аьгъязуз». 5Хъа чан агъайин буржар кайидариз жа-жаради чахьна дих апӀури, дугъу сарпирихьан гьерхну: «Уву йиз агъайиз фукьан буржлу вува?» 6Дугъу: «Варж бети ччимдин» кӀуру. Хъа дугъаз идарачийи: «Ма яв расписка» ва тядиди «хьуцӀур бети бикӀ» кӀуру. 7Хъасин тмунурихьан гьерхру: «Хъа уву фукьан буржлу вува?» Дугъу: «Варж шишал дяхнин» кӀуру. Дугъазра кӀуру: «Ма яв распискара ва „миржцӀур шишал“ бикӀ». 8Хъасин эйсийи, чан нягьякь идарачийи аькьюллу ляхин гъапӀну кӀури, дугъан тяриф апӀуру. Фицики гьамусдин деврин адмийир аквнахьна чалишмиш шулайидартӀан чпин хайирнан гъаврикк ккайидар ву.
9Хъа гьаддиз Узу кӀуразачвуз: учвуз жилʼин тувнайи девлетниинди жарадариз хайир тувай. Фицики му дюнʼяйин девлетар тӀанкь гъапиган, учву Агъайин гьаргандин хулариъ кьабул апӀидичву. 10ЦӀиб вуйибдиъ дугъри кас – аьхюбдиъра дугъри ву, хъа цӀиб вуйибдиъ угъри – аьхюбдиъра угъри ву. 11Гьаци вуйиган, эгер учвʼина жилариин али девлет аманат апӀуз шулдарш, хъа аьршариин али хазна шли учвʼинна аманат апӀиди? 12Ва эгер учву жарарин девлетнаъ угъри гъахьнуш, учвуз ичвуб шли тувди? 13Гьич сар гъуллугъчийихьанра кьюр агъайиз гъуллугъ сабси апӀуз шулдар, фицики дугъаз санур даккун, хъа тмунур ккун хьиди, вая сариз ужуди гъуллугъ апӀиди, хъа тмунуриз – чӀуруди. Аллагьдизра девлетназра сатӀиди гъуллугъ апӀуз хьибдарчвухьан.
Къанун ва Аллагьдин Паччагьлугъ
14Пул ккуни фарисйир, гьаму гафарихъ хъпехъури, Исайиин аьлхъюри гъаши.
15Дугъу дурариз гъапи:
– Учву инсанарин улихь гьякьлудар вуди улупурачва, хъа Аллагьдиз ичв юкӀвар аьгъя, фицики инсанариз фу заан вуш, Аллагьдиз думу алчагъвал ву. 16Ягьʼя гъяйизкьан къанун ва пайгъамбрар ади гъахьну. Хъа Ягьʼя гъафихъанмина Аллагьдин Паччагьлугъдикан Ужувлан хабар рабгъура ва гьарсар дидиъ гужниинди учӀвуз чалишмиш шула. 17Амма къанундин саб цӀаркьанра дубгайиз, заварна жилар ухди дармадагъин шул.
18Чан хпир гьадаурайири ва жарар хурайири кьяппавал апӀура. Хъа гьарсар жилирихьан гьудучӀву хпир хурайирира кьяппавал апӀура.
Девлетлуйинна Лазарин гештваликан ва аьзабнакк хьуваликан
19Сар кас девлетлу вуди, багьа вуйи палтар алахьури, гьар йигъан гешт хъапӀри гъахьну. 20Хъа гьацира Лазар кӀуру, чан хамриин хац алабхьнайи, дугъан урнарихъ дахъри шлу касибра гъахьну. 21Думу девлетлуйин суфрайихъан хътахьру кьацӀар вушра итӀуз рази вуйи, ва хуйири, дуфну, дугъан хацариз мелз йивури гъахьну. 22Касиб гъачӀиган, малайикари думу Ибрагьимдин багахьна гъахуру. Девлетлура йикӀуру, ва думура кивру.
23Жегьеннемдиъ аьзабар зигури ади, дугъу улар за гъапӀиган, дугъаз ярхлаъ Ибрагьимна дугъан гъвалахъ деънайи Лазар рякъюру. 24Ва дугъʼан гьарай утӀубччвуру: «Я Ибрагьим аба! Йиз язухъ апӀин; Лазар узухьна гьаъ. Дугъу чан тӀубан кӀакӀ штук кубсну, йиз мелз кьяши апӀри, узу му жегьеннемдин цӀин аьзабнакк кказа». 25Хъа Ибрагьимди дугъаз кӀуру: «Йиз бай! КӀваин апӀинки, сарун увуз яв уьмриъ рубкьру ужʼвал гъурубкьунвуз, хъа Лазариз писвалтӀан фукӀа гъябкъюндар. Гьамус дугъаз мушваъ гешт ккабхъна, хъа уву аьзабнакк ккава. 26Хъа дитӀланра гъайри, явна ич арайиъ гьациб зурба деринар айихьки, милин увухьна гъюз ккунидарихьан ва дилин гьамина гъюз ккунидарихьан дилан улдучӀвуз хьибдар». 27Гьадмуган девлетлуйи гъапи: «Я аба! Увкан Лазар йиз адашдин хулаз гьауб ккун апӀурза. 28Узухъ хьур чве хъазухъ: гъит Лазари, гьадму йиз чвера гьаму аьзабнан йишваз дяргъруси, гьадрарихь чаз гъябкъюбдикан шагьидвал апӀри». 29Ибрагьимди дугъаз гъапи: «Дурариз Мусайин ва жара пайгъамбрарин китабар а; гъит гьадрарихъ хъебехъри». 30Хъа девлетлуйи кӀуру: «Ваъ, Ибрагьим аба! Белки, магьа гъачӀидарикан сар, дурарихьна дуфну, ктибтиш, дурари гунгьар гардандиъ дисиди ва тахсрар апӀидар». 31Гьадмуган Ибрагьимди дугъаз кӀуру: «Эгер дурар Мусайихъ ва пайгъамбрарихъ хъпехъурадаш, дурар, фуж гъачӀидаригъян чӀиви гъахьишра, хътругъур».
Currently Selected:
Лука 16: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
