Лука 3

Ягьʼяйи инсанар штуан апӀуб

1Тиберий кӀуру Римдин паччагьди паччагьвал апӀури йицӀихьудпи йис вуйиган, Ягьудия уьлкейиъ Понтий Пилатди аьхювал апӀурайи девриъ, Гьирод – Галилей уьлкейин, дугъан чве Филип – Итурей уьлкейинна Трагьонит юрднан, хъа Лисаний – Абилей уьлкейин гьюкумдрар вуйиган, 2Гьаннай ва Каяфа аьхюну маллйир вуди гъахьну. Гьадму йисан ичӀи чюлиъ айи Закарʼяйин бай Ягьʼяйиз завариан Аллагьдин дих гъабхьнийи. 3Гьаму дихнахъди Ягьʼяйи, вари Ярдан нирин гъирагъар вуйиси лицури, гьар касди чан тахсрар гардандиъ дисбан, инсанар штуан апӀбан ва гьамци чпин гунгьарилан хил алдабгъбан бадали, аьгъювалар рагъури гъахьну. 4Му Ишая пайгъамбрин китабдиъ дибикӀну айиси гъабхьну:

– ИчӀи чюлиъ дих атӀабгура: «Агъайин рякъ ккабалгай, Дугъаз рякъяр-жилгъйир диш апӀинай. 5Гьарсаб гъяр ругди гъябцӀиди, гьарсаб дагъна тепе – ис, кьяни йишвар – дюз, дюз дару рякъяр цӀалцӀам хьиди. 6Гьарсар жан алириз Аллагьди Чав гунгьариккан азад апӀувал рябкъиди».

7Чахьна штуан апӀуз гъафи халкьдиз Ягьʼяйи кӀуйи:

– БитӀракан гъахьидар! Гъюз ккайи Аллагьдин хъюлхьан гьергуз шли улупунчвуз? 8Учву, ичв гунгьар гардандиъ дидисну, уьмур дигиш апӀуз шлуси, ичв ляхнариинди улупай ва, «Ич аба Ибрагьим ву» кӀури, фикиркьана мапӀанай, гьаз гъапиш учвуз кӀуразаки, Аллагьдихьан гьаму гъванариканра Ибрагьимдиз веледар ктауз шулу. 9Гьарин кьаблихъ магьа екӀв гьязурди хъа: гъяни йимиш туври адру гьарсаб гьар алдабтӀиди ва цӀигъна гатӀабхьиди.

10Хъа халкьди дугъхьан гьерхру:

– Хъа учу гьапӀну ккунду?

11Ягьʼяйи кӀуру:

– Кьюб гъат палат айири, сабнуб адруриз туври; шлиз ипӀруб-убхъруб аш, гьадгъура гьаци пай апӀри.

12Налук уч апӀрударира, чпи штуан апӀбан бадали дуфну, дугъаз: «Я мялим! Учу гьапӀча?» – кӀури, гьерхру.

13Ягьʼяйи дураризра жаваб туву:

– Учвуз улупнайибтӀан артухъ налук мибисанай.

14Эскрарира дугъхьан гьерхру:

– Учу гьапӀну ккунду?

Хъа дугъу дураризра кӀуру:

– Сар касдизкьан гиран макадапӀанай, футна мапӀанай ва ичв дуллугъниин рази йихьай.

15Халкь Месигьдиз ккилигуради, вардари: «Гьаяман, му Ягьʼя Месигь даришри гьа?» – кӀури, фикир апӀурайиган, 16Ягьʼяйи дурариз вардариз жаваб туври гъахьну:

– Узу учву штуан апӀуразачву, амма йиз кьяляхъди узутӀан Кьудратлур гъюра, узу Дугъан шаламарин гъахмйир гъядарчузкьан лайикь дарза. Дугъу Гирами Рюгьнахьдина цӀихьди цӀийи алаидичву. 17Дугъан хилиъ йирф хьибди, Дугъу дяхинна нахъв жара апӀиди: дяхин Чан танхариъ абхьди, хъа нахъвар хътрубгру цӀигъ гъяхьну ургиди.

18Ягьʼяйи гьамци ва хъанара жара гафариинди халкьдиз ужуб хабар дебккри гъахьну.

19Хъа Ягьʼяйи гьякимдар Гьироддик, чан чвуччвун хпир Иродиада чаз дитбаз ва жара пис ляхнар апӀбаз лигну, тахсир кипган, 20Гьиродди чан чӀуру ляхнар, думу дустагъдиъ итбиинди, гужал гъапӀну.

21Вари халкь штуан шулайиган, Исара Ягьʼяйихьна гъафну. Штуан гъахьи Иса ккарагурайиган, зав атӀабццуру, 22ва Аллагьдин Рюгь луф жюрейиинди Исайиина ис шулу, хъа завʼан дих шулу:

– Уву Йиз масан Бай вува! Узу Увʼин гизаф рази вуза!

Исайин ата-бабйир

23Исайин, Аллагьдиз гъуллугъ апӀуз хъюгъруган, сумчӀур йис дубхьнайи. Халкьди фикир апӀурайиганси, Думу Юсуфдин бай ву кӀура. Юсуф Гьелийин бай, 24Гьели Маттатдин бай, Маттат Левийин бай, Левий Мелкийин бай, Мелки Яннайин бай, Янна Юсуфдин бай, 25Юсуф Маттайин бай, Матта Амосдин бай, Амос Нагьумдин бай, Нагьум Эслимдин бай, Эслим Наггайин бай, 26Наггай Маатдин бай, Маат Маттайин бай, Матта Симеиндин бай, Симеин Ясегьдин бай, Ясегь Ядайин бай, 27Яда Яанандин бай, Яанан Рисайин бай, Риса Зеруббабелин бай, Зеруббабел Шеалтиэлин бай, Шеалтиэл Нерийин бай, 28Нери Мелкийин бай, Мелки Аддийин бай, Адди Косамдин бай, Косам Элмадамдин бай, Элмадам Эрин бай, 29Эр Ешийин бай, Еши Элизарин бай, Элизар Яфимдин бай, Яфим Маттатдин бай, Маттат Левийин бай, 30Левий Симеондин бай, Симеон Ягьудайин бай, Ягьуда Юсуфдин бай, Юсуф Янамдин бай, Янам Элиякимдин бай, 31Элияким Мемайин бай, Мема Меннандин бай, Меннан Маттатдин бай, Маттат Натандин бай, Натан Давудрин бай, 32Давуд Ессейин бай, Ессе Обеддин бай, Обед Воаздин бай, Воаз Салмандин бай, Салман Нецрондин бай, 33Нецрон Амминадабдин бай, Амминадаб Арамдин бай, Арам Гьецрондин бай, Гьецрон Перецдин бай, Перец Ягьудайин бай, 34Ягьуда Якьубдин бай, Якьуб Исакьдин бай, Исакь Ибрагьимдин бай, Ибрагьим Терагьдин бай, Терагь Нагьорин бай, 35Нагьор Серукдин бай, Серук Реуйин бай, Реу Пелегдин бай, Пелег Эберин бай, Эбер Шелайин бай, 36Шела Каинандин бай, Каинан Арфакшаддин бай, Арфакшад Симдин бай, Сим Нюгьдин бай, Нюгь Лемекдин бай, 37Лемек Метушелагьдин бай, Метушелагь Янокдин бай, Янок Яреддин бай, Яред Магьалеелин бай, Магьалеел Кайнандин бай, 38Кайнан Еношдин бай, Енош Шитдин бай, Шит Адамдин бай, Адам Аллагьдин бай вуди гъахьну.

Currently Selected:

Лука 3: ТабГК

Highlight

Copy